Daniéu 4:34 - ꞌRe Ihâimana Uꞌâsi Mono Zadawa Wasuꞌu

³⁴ Tawamhã te apito hã tinha ãne: — 7 na oto ĩ'ãma wahu pari, hâiwa u wa hã te rob'madâ'â wamhã, ma tô apâ ĩnhimiza'rese wẽ hã ĩma wi. Tahawa, wa tô uburé danhipai u isiptede 'Re ihâimana u'âsi mono ãma hã ĩwata, dâ'â ãna õne u'â 're ihâimana mono ãma. Tawamhã wa hã wa tinha ãne: “Danhipai u 'Re ihâimana u'âsi mono nhiptetezé hã si'utõrĩ õ di. Duré Danhib'apito na te te 're ida'a'madâ'â mono zé hã si'utõrĩ waihu'u õ di.

Daniéu 4:34 ပူးပေါင်းရင်းမြစ်များ

Salmu 10:16

Uburé Danhib'apito, õne u'â te danhipai u apito na hã 're hâimana. Tahawa, te za a'uwẽ iwasété norĩ hã isipti'ai hawimhã sô tirobaba za'ra.

Salmu 102:24

Ĩte 'Re ihâimana u'âsi mono, õne u'â 're i'aihâimana mono, ma'ãpé awa'awi na hã a'â ĩ'âri tõ, ĩsi'ihi wana ré!

Daniéu 12:7

Tawamhã hâiwa ãma romhuri'wa tinhib'rada hâimo te te wẽ sina, te 'Re ĩhâimana u'âsi mono idâ'â'õ nhisi na tinha ãne: — Wa za aima ropisutu. Ãne hã te za tô tiromhâiba, si'ubdatõ wahu aiwa ãma isipo'o u, 'Re ĩhâimana u'âsi mono tinhib'a'uwẽ da, te te ipisutu norĩ ma, da te tãma 're irob'manharĩ wasété za'ra mono zé hã si'utõrĩ wapsi.

Daniéu 2:44

Tawamhã apito norĩ ãne na 're hâimana za'ra mono ré, 'Re ihâimana u'âsi mono hâiwa ãma 're isãmra mono hã te za danhib'ihâ'a nhimi'madâ'âzé niwa za da te ipru waihu'u'õ hã pisutu, aimawi danhib'ihâ'a norĩ te te ãma i'ai'uté za'ra õ hã. Tawamhã ã hã te za aimawi ihâiba amo norĩ danhib'ihâ'a nhimi'madâ'âzé hã uburé pese uprosi pese. Tahawa, te za õhõ si oto 're hâimana u'âsi, pire na apito nhimi'madâ'âzém na hã.

Daniéu 4:2

Wa tô ĩsima wẽ, 'Re ihâimana u'âsi mono danhipai u isiptete uptabi, marĩ dama i'manharĩ waihu'u'õ iwẽ uptabi te te ĩma ihâi'rézé hã uburé waihu'u za'ra wa'aba da.

Daniéu 4:26

Tawamhã duré hâiwa ãma romhuri'wa, wede nhana'rada sari ré te te siwi rẽme da, te te iwaihu hã, a hã 'Re ihâimana u'âsi mono uburé danhipai u siptete na te te 're ida'a'madâ'â mono na sazei wapsi, apâ i'asi'apito da hã te wasu'u.

Daniéu 4:3

Isimiromhõsizé hã wẽ uptabi di. Duré uburé marĩ iwaihu'u'õ te te dama 're i'a'manharĩ mono zé hã siptete uptabi di! Ta hã Uburé Danhib'apito, si'utõrĩ ãna 're ihâimana mono. Tahawa, te za dama i'rãnho'õmo na 're hâimana u'âsi.

Daniéu 4:32

A'uwẽ na 're idahâimana za'ra mono zém hawimhã te za aiwazere ni oto, abaze norĩ siré 're aihâimana mono da, du hã 're 'masi mono da, powawẽ te te 're ihuri mono ne. Ãne na 're aihâimana mono ré, te za 7 na ai'ãma tiwahu. Taha parip si, te za a hã asimirosa'rata na asina isi, uburé danhipai u isiptede 'Re ihâimana u'âsi mono, daro mono bâ uburé da'rãnho'õmo norĩ nhimi'madâ'âzém nhipai u siptete na te te 're ida'a'madâ'â mono na hã, duré da'rãnho'õmo norĩ nhimi'madâ'âzéb da, te te sima iwẽzéb zarina te te dama 're i'apisutu mono na hã.

Daniéu 4:36

— Tawamhã tô awa'awi ĩnhimiza'rese wẽ zé hã apâ ĩma wisi wamhã, wa tô apâ ti'â, i'rãnho'õmo na ĩpire na duré dama ĩwazém na 're ĩhâimana mono zé hã. Duré ĩte dama roti'wa norĩ hã duré ĩte dama ipire norĩ hã ma tô apâ hã siwi ĩ'âri wẽ. Tahawa, wa tô duré ĩsi'apito apâ, ĩnhiptede hã imorĩ'rata na ĩsi'apitozém nhipai u.

Daniéu 5:18

Apito, danhipai u isiptede 'Re ihâimana u'âsi mono, ma tô aimama ma, Nabucodonozoho ma hã pisutu, siptete na duré pire uptabi na dama i'rãnho'õmo na 're hâimana mono da hã.

Daniéu 5:21

Tahawa, a'uwẽ 're ihâimana za'ra mono zém hawimhã ma tô wazere ni. Ma tô duré ti'rãiwaihu hã simini, abaze ne oto 'rã nhimiza'rese ãna 're hâimana mono da. Tawamhã te duré oto awaru po're pore norĩ siré 're hâimana. Te duré du hã te te 're 'masi, powawẽ rom na du sima iwẽ na te te 're ihuri mono ne. Romnhiwasi te duré 're sõtõ. Ma tô duré atébré hã te te 're hâiba waihi. Tawamhã uburé danhipai u isiptede 'Re ihâimana u'âsi mono, daro mono bâ uburé da'rãnho'õmo nhimi'madâ'âzém nhipai u siptete na te te 're ida'a'madâ'â mono na, duré da'rãnho'õmo nhimi'madâ'âzéb da, te te sima iwẽzéb zarina te te dama 're i'apisutu mono na te te tinhimirosa'rata na sina siri õ ré, ma tô ãne ré hã 're hâimana siwa'ru.

Daniéu 6:26

Uburé a'uwẽ norĩ, ĩnhimi'madâ'âzéb 're daza'rui mono bâ 're i'aihâimana za'ra wa'aba mono ma, wa aima waihu'u za'ra wa'wa, ãne. Ma'ãpé Daniéu, 'Re ihâimana u'âsi mono ãma 're iwata mono hã asiwi 're wazé aba mono. E marĩ wa, õ hã 'Re ihâimana u'âsi mono idâ'â'õ, õne u'â 're ihâimana mono. Niwamhã duré dama i'rãnho'õmo na isimi'madâ'âzé hã isipru waihu'u õ. Duré niwamhã isiptetezé hã tiwi isi'utõrĩ waihu'u õ.

Daniéu 7:14

Ma tô isimiroti pire na 're ihâimana mono zé, duré apito wa, da te ãma 're iwazé mono zé duré te te 're ida'a'madâ'â mono zé hã tãma pisutu ni. Tawamhã dapoto mono bâ, duré daro mono bâ 're idahâimana za'ra mono hã, duré damreme mono bâ 're idamreme zusi mono hã ma tô uburé ãma 're dawata za'ra. Ĩsiptetezé hã isi'utõrĩ waihu'u'õ. Duré te te 're ida'a'madâ'â mono zé isi'utõrĩ waihu'u'õ na.

Daniéu 7:27

Tawamhã ti'ai ãma da'madâ'âzé hã duré danhimiroti nhiptetezé hã te za uburé danhipai u Isiptede 'Re ihâimana u'âsi mono nhib'a'uwẽ ma hã tãma sõmri za'ra ni. Ta norĩ hã te za ti'ai mono bâ uburé pese õne u'â te te 're da'madâ'â za'ra. Tahawa, uburé pese dapoto mono bâ te za tãma 're dahâimana za'ra. Te za duré isimiroti hã uburé da te 're wapari pese za'ra.

Daniéu 9:14

Tahawa, Uburé Danhib'apito, za ãma iwahâ za'ra zéb da, wa'ãma i'madâ'â za'ra zarina, ma tô wanhisiwi waptã'ã za'ra da hã i'manha. A hã Uburé Danhib'apito, wate 'Re ihâimana u'âsi mono, i'uwaibaba na si te uburé marĩ na dama 're i'arowairébé mo. Tane nherẽ, asimiroti na wama 're i'arowaihu'u mono zé hã wa te wasiwi 're 'madâ'â pese mono õ di.

Zona 1:14

Tahawa, te oto mreme zu, mreme 'rãihâ na ãne: — Uburé Danhib'apito, wahâ za'ra tõ, wasi'utõrĩ da hã, ãhã aibâ hâimanazé, wa te wasiwi i'uprosizém na hã. A hã Uburé Danhib'apito te ãne hã i'manha. Duré marĩ iwatobro hã asima iwẽzéb zarina hã.

Luca 1:33

Danhib'apito 're morĩ wa, te za Zacoho nhihudu sidâpâsi, Isib'apito na hã tãma 're hâimana u'âsi za'ra, õne u'â. Te za ãma 're sib'a'uwẽ u'âsi za'ra.

Luca 18:13

— Tanei õ di, rob'uiprazé arĩ ubumroi'wa hã. Hâiwi te za, romhâ na. Te ti'rã po. 'Râwi siwẽ'õ wa, 'rãi wahutu õ di. Ãne te tãma siwasu'u: “'Re ihâimana u'âsi mono, wa hã ĩwasétére di. Ĩwasété wa, ĩ'ãma aipẽ'ẽzé na, ĩwasédé hã ĩma pari da.”

Zuwã 5:26

Imama hã dapẽ'ẽ 're, dadâ'â ãna rowẽ na 're idahâimana u'âsi za'ra mono zé nhomri'wa dama. I'ra wa, ma tô duré pisutu, taha zama 're idahâimana u'âsi za'ra mono zé nhomri'wa na dama 're ihâimana mono da hã.

1 Timotiu 1:17

Tahawa, Danhib'apito uptabi ãma si wa za 're wawata u'âsi za'ra. Ta hã Apito u'â te dama 're sãmra, idâ'â'õ hã, ni'wa hã niwa te te i'madâ'â waihu'u õ hã. Õhõ si Danhib'apito uptabi, 'Re ihâimana u'âsi mono hã. Wẽ uptabi wa, wa za ãma 're wawata u'âsi za'ra.

1 Timotiu 6:16

Õhõ si siwaprosi 're imorĩ u'â hã. Ta hã, rowa'a za'ẽtẽ na te 're hâimana u'âsi. Tahawa, ni'wa itẽme isébré da hã, mare di. Da te dasiwi ihâiba pibu da hã, mare di duré. Ta hã wẽ uptabi di. Waihu'u pese uptabi di duré. Tahawa, wa za ãma 're wawata u'âsi za'ra.

Apocalipsi 10:6

Tawamhã simiwẽ sina, ma tô waihu'u: — 'Re ihâimana u'âsi mono hã za te te irob'manharĩzéb da hã sô rowaptâ'â õ di za oto. Tawamhã 7 ãma hâiwa ãma romhuri'wa hã tinhimnhihârâzém na simnhihârâ wamhã, te za 'Re ihâimana u'âsi mono hã ãma uwaimra, duréihã te te da'ãma sima iropisutuzé hã dama iwaihu'u'õ hã. Duréihã tizadawa 'mahârâ'wa norĩ ma, te te iropisutuzém na te za oto dama rob'manha. Ãne, wa tô sena na awaihu'u, 'Re ihâimana u'âsi mono nho'a, isimiropisutuzém na zama. — Ãne ma tô 'Re ihâimana u'âsi mono zadawa para waihu'u, hâiwa ãma romhuri'wa hã, hâiwa nho'õmo tinhib'rada te te iwẽ hã. 'Re ihâimana u'âsi mono hã ta hã hâiwa 'manharĩ'wa, duré ti'ai 'manharĩ'wa, duré â poré 'manharĩ'wa, duré uburé iwa 're idahâimana za'ra mono poto 'wa.

Apocalipsi 11:15

Tawamhã 7 ãma hâiwa ãma romhuri'wa hã ma tô tinhimnhihârâzém na amnhihârâ. Simnhihârâ wi, hâiwa ãma damreme 'rãihâ hã wa tô wapa. Ãne te nharĩ za'ra: — Satanasihi nhimi'madâ, 're danomro mono da, ma tô da te dasima 're wẽ za'ra aré, daro mono bâ. Tane nherẽ, ropâ te za oto 'Re ihâimana u'âsi mono nhimi'madâ'â si 're danomro, Wanhib'apito nhimi'madâ hã. Danho'reptui'wa da, te te ipisutu nhimi'madâ'â zama te za 're dahâimana za'ra oto. Wanhib'apito hã te za tô te te 're da'ab'madâ'â u'âsi oto, õne u'âsi.

Apocalipsi 4:10

Nasi ãma wata za'ra siré, te nasi 24 na dama ipire za'ra norĩ hã danhib'apito simasisizém na isãmra nho're hi'rãtitõ ana, siré ãma wata za'ra da. Te duré nasi hi'rãtitõ si'ubumro sina, ti'rãzaza sani za'ra isõ're, tãma pire za'ra wa, ãma wata za'ra da.

Apocalipsi 4:9

Ãne te ã norĩ hã maparane si'uiwa na ropoto na ihâiba norĩ hã nasi ãma tiwata za'ra, danhib'apito simasisizém na isãmra ãma, 'Re ihâimana u'âsi mono ãma. Waihu'u pese uptabi wa, te nasi ãma tiwata za'ra, duré sõpru uptabi wa.