Daniéu 4:23 - ꞌRe Ihâimana Uꞌâsi Mono Zadawa Wasuꞌu

²³ Tawamhã ma tô duré hâiwa ãma romhuri'wa we te te si'rai ré hã i'madâ. Ta hã ãne te te inharĩ hã: “Ma'ãpé wede hã asiwi mei wa'aba. Duré asiwi panhipti nhihâri aba mono. Tane nherẽ, isãna'rata si isari ré te za asiwi irẽme 'wa. Tawamhã te za isi'uwazi tete na, duré ẽtẽ topsada brõzi na ãma asiwi iwasisi zahuré wa'wa, rom na siwazari du 're ihâimana za'ra mono wa'wa 're sa mono da. Tawamhã te za ã hã aibâ nhisi wi atébré hã 're rere'e. Tahawa, te za aibâ hã abaze sazém na si oto 're sa. Tawamhã ãne na 're hâimana mono ré hã te za 7 na ãma tiwahu.”

Daniéu 4:23 ပူးပေါင်းရင်းမြစ်များ

Daniéu 4:26

Tawamhã duré hâiwa ãma romhuri'wa, wede nhana'rada sari ré te te siwi rẽme da, te te iwaihu hã, a hã 'Re ihâimana u'âsi mono uburé danhipai u siptete na te te 're ida'a'madâ'â mono na sazei wapsi, apâ i'asi'apito da hã te wasu'u.

Daniéu 5:21

Tahawa, a'uwẽ 're ihâimana za'ra mono zém hawimhã ma tô wazere ni. Ma tô duré ti'rãiwaihu hã simini, abaze ne oto 'rã nhimiza'rese ãna 're hâimana mono da. Tawamhã te duré oto awaru po're pore norĩ siré 're hâimana. Te duré du hã te te 're 'masi, powawẽ rom na du sima iwẽ na te te 're ihuri mono ne. Romnhiwasi te duré 're sõtõ. Ma tô duré atébré hã te te 're hâiba waihi. Tawamhã uburé danhipai u isiptede 'Re ihâimana u'âsi mono, daro mono bâ uburé da'rãnho'õmo nhimi'madâ'âzém nhipai u siptete na te te 're ida'a'madâ'â mono na, duré da'rãnho'õmo nhimi'madâ'âzéb da, te te sima iwẽzéb zarina te te dama 're i'apisutu mono na te te tinhimirosa'rata na sina siri õ ré, ma tô ãne ré hã 're hâimana siwa'ru.

Daniéu 8:13

Taha pari wa tô duré wapa, hâiwa ãma romhuri'wa norĩ te te sima irobzanhamri zahuré zé hã. Nima hã ma tô tihâiba amo sadanha ãne: — E niha danhotõ 'rowim ne marĩ 'madâ'âzém na we iromhâimana mono na hã te za we ãma ropsi'utõrĩ. Duré marĩ zata na bâtâ sidâpâsi 're idanhoprub za'ra mono zéb upana, iwasété na si oto 're idanhoprub za'ra mono na hã, e niha te za duré we ãma ropsi'utõrĩ. Duré isõrõwa 'ri 'rãihâ siprum haré 're isa mono na hã e niha te za duré we ãma ropsi'utõrĩ. E niha te za hâiwa ãma dasi'wapéi 'manharĩ'wa norĩ ãma, da te ãma 're i'ai'uté za'ra mono na hã we duré ãma ropsi'utõrĩ u'âsi.