Daniéu 2:48 - ꞌRe Ihâimana Uꞌâsi Mono Zadawa Wasuꞌu

⁴⁸ Tawamhã apito ma tô Daniéu danhipai u pire na danhib'ihâ'a na 're hâimana mono da hã pisutu oto. Ma tô duré ãma tãma tinhopru, marĩ iwa'âbâ za'ẽtẽ norĩ na hã. Ma tô duré Babilonia ãma daza'rui wa'õno ihâimana ãma dama i'rãnho'õmo na 're hâimana mono da hã, duré uburé rowaihu'u pese 'wa norĩ nhib'ihâ'a na 're hâimana mono da hã pisutu, ti'ai wa'õtõ nho'õmo 'remhã.

Daniéu 2:48 ပူးပေါင်းရင်းမြစ်များ

Daniéu 2:6

Tane nherẽ, te irosawẽrẽzé ĩma wasu'u za'ra wa'aba wamhã, duré ãma ĩma saprĩ wẽ za'ra wa'aba wamhã, wa za taré marĩ iwa'âbâ za'ẽtẽ na ãma aima ĩnhoprub za'ra wa'wa. Wa za duré aipisutu za'ra wa'wa, dama aipire na 're aihâimana za'ra wa'aba mono da. Tahawa, ma'ãpé te irosawẽrẽzém na hã ãma ĩma rowasu'u za'ra wa'aba. Taha pari te za duré marĩ te te iwasu'uzém na ãma ĩma isaprĩ za'ra wa'wa.

Daniéu 3:1

Tawamhã apito Nabucodonozo, ropodo 27 metru na i'rãihâ pibuzém na duré 2,70 metru na i'a're si'uiwa u ipibuzém na da te dasiwi 'manharĩ da hã, ma tô dama ti'ru. Ta hã, Babilonia na daza'rui wa'õtõ nhisi ãma Dura na ti'ai haré nhisi wa, da te dasiwi sãrĩ da hã, ma tô duré dama waihu'u.

Daniéu 3:12

Ãne nherẽ, ni'wam norĩ zudeu Babilonia daza'rui wa'õtõ 're, rob'madâ'â'wa na dama 're hâimana za'ra mono da, a hã ipisutu za'ra hã, Sadraqui norĩ, Mezaqui, Abide-Negu, ta norĩ hã asimiroti na hã te te siwi aiwazéb õ di. Ate ihâiba'õ ãma, duré ropodo ẽtẽ waipo pré oru na da te dasiwi 'manharĩ da, i'rui ãma dame ãma wata za'ra õ di.

Daniéu 3:30

Tawamhã apito Nabucodonozo, si'ubdatõ aibâ ipréduptém norĩ hã ma tô pisutu za'ra, Babilonia daza'rui wa'õtõ ãma romhuri ipire na te te tô duré 're romhuri za'ra mono da hã, te te aré ãma 're iromhuri za'ra mono zém nhipai u.

Daniéu 4:6

Tahawa, Babilonia ãma rowaihu'u pese 'wa norĩ zô, wa tô sô ĩhârâ za'ra, te irosawẽrẽzé te te ĩma ãma saprĩ za'ra da.

Daniéu 4:9

Wa tô tãma tinha ãne: “Béutésaza, marĩ 'manharĩ nhipese 'wa norĩ nhib'ihâ'a, ĩma waihu'u pese di, ihâiba'õ norĩ pẽ'ẽzani aiwa ihâimana na hã. Duré ĩma waihu'u pese di, nima hã ipire dama iwaihu'u'õ hã ãma dama saprĩ da, aima ipire õ na hã. Tahawa, wa za aima wasu'u, te irosawẽrẽzé hã ãma ĩma saprĩ da, marĩ te te iwasu'uzé hã.

Daniéu 5:11

E tihai wa. Ãme asimi'madâ'âzéb ãma te ihâiba'õ norĩ pẽ'ẽzani ré aibâ hã tihâiba. Aimama Nabucodonozo, apito na 're hâimana mono ré hã, ma tô aibâ hã da te 're waihu'u za'ra, i'rã nhimiza'rese wẽ na hã, duré rowaihu'u pese 'wa na hã, ihâiba'õ norĩ ne. Tawamhã ta hã ma tô apito Nabucodonozo pisutu, rowaihu'u pese 'wa norĩ nhib'ihâ'a na, tiha 'manharĩ nhipese 'wa norĩ nhib'ihâ'a na, simi'â na romhuri'wa norĩ nhib'ihâ'a na, duré wasi na romnhoré'wa norĩ nhib'ihâ'a na tãma 're hâimana za'ra mono da hã.

Daniéu 5:16

Tane nherẽ, ma tô ni'wa hã ĩma aiwasu'u, a hã dama iwaihu'u'õ ipire hã za ãma isaprĩ waihu'u pese na hã. Tahawa, a hã 'ri na'rata na rob'ui'éré sõré waihu'u pese wamhã, duré ãma ĩma saprĩ waihu'u pese wamhã, te za da'uza ihâ prépe iwa'âbâ za'ẽtẽ na ai'uza ni za. Te za duré ẽtẽ waipo pré oru 'manharĩ na hã ãma asõ'rebzum ni za. Tawamhã wa za duré ĩte i'rãnho'õmo na si'ubdatõ ãma dama aipire na 're aihâimana mono da hã aima pisutu.

Daniéu 5:29

Tawamhã apito Béusaza, te Daniéu hã dama ti'ru, da'uzazé ihâ prépe iwa'âbâ za'ẽtẽ na da te dasiwi uza da, duré ẽtẽ waipo pré oru na da te dasiwi sõ'rebzu da hã. Tawamhã ma tô duré Daniéu hã pisutu, Babilonia ãma dama i'rãnho'õmo na si'ubdatõ ãma dama ipire na 're hâimana mono da.

Daniéu 5:7

Tawamhã sa'ẽtẽ mreme 'rãihâ na ma tô marĩ 'manharĩ nhipese 'wa norĩ zô, rowaihu'u pese 'wa norĩ zô, duré wasi na romnhoré'wa norĩ zô dahãsi da hã dama ti'ru. Tawamhã ta norĩ sihutu wi, ma tô Béusaza hã tãma nharĩ za'ra ãne: — Ã hã 'ri na'rata na rob'ui'éré, ni'wa hã te te sõré waihu'u wamhã, duré marĩ te te iwasu'uzém na te te ãma ĩma saprĩ waihu'u wamhã, da'uza ihâ prépe iwa'âbâ za'ẽtẽ na te za ãma uza ni. Oru 'manharĩ na danho'rebzum na zama te za duré ãma sõ'rebzu ni za. Tahawa, wa za duré tãma pisutu, si'ubdatõ ãma dama ipire na ĩzahâpâmhã 're hâimana mono da, ĩnhimi'madâ'âzéb 'remhã.

Daniéu 8:27

Wa hã Daniéu, bâtâ siwaptom na wa tô ĩhâiba zei õ na duré ĩhâzé na we ĩhâimana. Taha pari oto apâ we ĩwẽ na ĩhâimana mono wamhã, wa tô apâ dama ĩ'rã nho'õmo nhimiromhuri na hã te romhuri. Tane nherẽ, marĩ te i'ab'madâ'â mono zém na si ĩhâtâ'â u'âsi di, te isadaihu'u da hã ĩma pire wa.

1 Samuéu 17:25

Tahawa, te ãne sima nharĩ za'ra: — Ni'ã õ hã aibâ hã asiwi 'madâ'â aba. Ma'ãpé wazô ihârâ zahi za'ra zé hã wapari aba. Ni'wa hã filisteu te te wĩrĩ wamhã, te za tipawa'â isa'ẽne hã ti'â. Apito te za marĩ iwa'âbâ za'ẽtẽ uptabi hã ahâ na tãma sõmri za'ra. Te za duré ti'ra sipi'õ hã ãma imro da hã tãma tisõ. Tahawa, imama sisãnawã norĩ niwamhã tite rob'uiprazé apito ma, te te dame tãma 're i'arĩ za'ra mono da hã mare di za.

1 Samuéu 2:8

'Re ihâimana u'âsi mono hã te robzaprum hawi te te 're awahutu, isiptihai õ norĩ hã. Te duré tihai õ zarina robzépata hawi, te te 're azani, tiha zô tiwi 're iro'wanhi'riti u'âsi za'ra mono norĩ hã. Ta hã te duré isiptihai õ norĩ ma hã te te 're apisutu, dama ipire norĩ siré 're idahâimana za'ra mono zéb da hã. Te duré te te 're da'a'maza, dawazém na 're idahâimana za'ra mono zéb u hã. Ti'a na'rada hã Uburé Danhib'apito te hã. Ta hã ma tô ti'a hã isisiwimhã 'manha.

1 Samuéu 25:2

Tawamhã aibâ hã te 're hâimana, Calebihi nhihudu hã, Nabau na isisi hã, 'ri'ahâ Ma'õ hawimhã, duré Carmeru na 'ri'ahâ nhisi ãma te te 're iromhuri mono. Isib'ro pe hã, 3 miu na isimizama hâiba hã pone'ẽrebâ zéré mapure hã, duré miu na isimizama hâiba hã pone'ẽrebâ zéré uzé hã. Duré imro nhisi hã Abigaiu na. Ta hã iwẽ uptabi, duré te te irowaihu'u pe. Tane nherẽ, imro hã aibâ iwasédé. Isahi. Tahawa, te Nabau hã tihâiba, Carmeru na 'ri nho'õmo nhisi ãma te te tinhimizama pone'ẽrebâ zéré mapure azéré nhihâri da hã.