Daniéu 12:4 - ꞌRe Ihâimana Uꞌâsi Mono Zadawa Wasuꞌu

⁴ Daniéu, ma'ãpé a hã romreme na rob'ui'éré ré hã marĩ uptobzém na tob'rata to na, sitom haré a'â nomro da, rob'rãsutu u. Da'ahâ uptabi na te za 're dasiwa'rãmi rowaihu'u wẽ zô, da te dasima sa'ẽtẽ za'ra da.

Daniéu 12:4 ပူးပေါင်းရင်းမြစ်များ

Daniéu 10:1

Si'ubdatõ Ciruhu ãma iwahubzém na, Persia te apito na 're ihâimana mono zém na, wa hã Daniéu, Béutésaza na zama ĩnhisi ma, ma tô 'Re ihâimana u'âsi mono, timreme hã ĩma hâi'ré. Imreme sena na 're hâimana mono nherẽ, pire uptabi di, te isadaihu'u da hã. Tawamhã imreme na ãma isaprĩzé hã tô ĩnhotõ 'rowim ne marĩ te i'a'madâ'âzém na si wa tô awaihu'u.

Daniéu 10:14

Wa hã awa'awi na wa we atẽme mo, asib'a'uwẽ norĩ ma, za iromhâimanazém na te ãma aima saprĩ da. E marĩ wa. Ã hã i'ab'madâ'â mono hã apto'oré za marĩ iwatobrozém na te rowasu'u.

Daniéu 11:33

Rowaihu'u pese 'wa norĩ, te za tinhimiroti wẽ na te te 're dapawaptob za'ra. Tane nherẽ, suru na a'â we hâimana ré, te za ta norĩ sib'ézé wapa na hã dasiwi simro ni, niha wamhã unhama ro'o na. Duré niha wamhã, ti'ai wa'õtõ nho'õmo nhiti, da te dasiwi simroi mono da hã te za tãma rob'ru za'ra ni, pawasisi ré. Te za duré uburé isimarĩ hã tiwi sani za'ra ni.

Daniéu 11:40

— Oto we romhâimanazéb 'rãsudu wisi wamhã, te za Ezitu te apito hã hâiwa nhimi'e niwĩ te apito hã susi. Tahawa, te za tô sô watobro, wedewara zapore na dasi'wapézém na duré awaru na isi'wapéi'wa norĩ ré, duré uba're i'ahâ uptabi na hã. Â rom na 're i'âpusi mono ne, te za Ezitu u hã sisisi.

Daniéu 12:13

— A hã Daniéu, ma'ãpé rob'rãsutu u asiptete na ãma 're aihâimana mono. Te za tô atâ. Tane nherẽ, te za apâ hã aihâiwa'u, aipawa'âbâzé âri da hã.

Daniéu 12:5

Tawamhã wa tô maparane hâiwa ãma romhuri'wa â zaihâ na isima'wara hã 'madâ'â zahuré. Ihâiba amo te pa zara niwĩ za, ĩ niwĩ. Duré ihâiba amo, te pa zaihâ amo niwĩ we za.

Daniéu 12:9

Ma tõ ãma ĩzada'â ãne: — Daniéu, aihâtâ'â ãna aimorĩ oto. E marĩ wa. Ã hã ĩmreme hã tom haré pi'uriwi a'â hâimana wa za, rob'rãsutu u.

Daniéu 8:17

Tawamhã Gabriéu 'râwi te te ĩtẽme sina rotété wamhã oto, wa tô ĩpahi pese. Tahawa, wa tô ĩhi'rãtitõ tãma aime. Wa tô duré ti'ai u ĩ'ubu na ropto. Tahawa, te ãne ĩma tinha: — A hã, aibâ i'atâ'â pesere, marĩ i'madâ'âzé iwaihu'u da hã tô i'ru zahi. E marĩ wa. Rob'rãsutuzé, ta hã te te sina wasu'u wa.

Daniéu 8:19

Ãne ma tô ĩma tinha: — 'Re ihâimana u'âsi mono siti'rui wa, marĩ za iwatobrozém na, wa za aima rowasu'u. E marĩ wa. Ã hã marĩ i'ab'madâ'â mono zé hã za rob'rãsutuzéb ãma we iromhâimana mono zé, te wasu'u.

Daniéu 8:26

Tawamhã Gabriéu hã timreme, ma oto 'rãsutu: — Ma tô iwapari pa, rosawẽrẽ na hâiwahâ sidâpâsi duré mararé sidâpâsi marĩ zata na 're idanhoprub za'ra mono zém na, sena na ãma isaprĩzé hã. Tane nherẽ, marĩ i'a'madâ'â mono zém na ãma isaprĩzé hã ni'wai ma, wasu'u õ di za. E marĩ wa. Ã norĩ na za a'â we iromhâimana mono zé hã watobro su'u õ na dâ'âsina.

Mateu 24:14

'Re ihâimana u'âsi mono, da'ãma 're isib'a'uwẽ mono zé wasu'u hã iwẽ uptabi hã, ĩzazei'wa norĩ hã te za daro mono bâ te te dama 're wasu'u za'ra, daro mono bâ da te oto 're wapari za'ra mono da, da te ãma 're isaze za'ra mono zéb da hã. Tame te za oto tirob'rãsutu.

Roma 10:18

E zudeu norĩ hã zahadu iwasu'uwẽ hã te te 're wapari za'ra mono ã bâ bété. Iwasu'uwẽ hã ma tô te te 're wapari za'ra aré ta norĩ hã, tô sena na. Duréihã Dawi hã ma tô ãne na ãma rob'ui'éré: “Isadawa wasu'u'wa norĩ mreme hã ma tô daro mono bâ te te 're ropé. Ta hã ma tô ropâ dapo're na hã da te 're wapari za'ra.”

Apocalipsi 10:4

Wapsa'a za'ra wamhã, damreme ne hã wa tô wapa. Tahawa, wa tô imreme za'ra hã te iwapari na aré rob'ui'éré. Tane nherẽ, te ni'wa hã hâiwa hawimhã ĩma tinha, te rob'ui'éré tõ da. Ãne te ĩma tinha: — Tô'ã. Rob'ui'éré tõ. Taré asi'repsi asima si hã waihu'u, tãiwapsa'a norĩ mreme hã.

Apocalipsi 22:10

Tawamhã te duré ĩma tinha, ãne: — Ãhã wasu'u hã za iromhâimana mono zém na i'arob'ui'éré mono hã asima sawi õ di za. Sõ'awi te za dama ãma 're i'arowasu'u mo, iromhâimanazéb da hã za ãma ronomro õ wa.

Apocalipsi 5:1

Tawamhã wa tô duré 'madâ, ibaihâ isinhai ré hã. Danhib'apito simasisizém na isãmra hã te tinhib'rata nhimire niwĩ tété. Ibaihâ nhinha hã, i'ui'éré si'uiwa ré hã. Duré 7 na ihâiba hã i'uptob ré hã siwasihu tõ da, ni'wa te te duré sõré tõ da hã.