Daniéu 12:1 - ꞌRe Ihâimana Uꞌâsi Mono Zadawa Wasuꞌu

¹ Hâiwa hawi romhuri'wa hã te zahadu duré ĩma rowasu'u ãne: — Ãne na we 're romhâimana mono ré hã, te za hâiwa ãma romhuri'wa Migueu hã we oto sihâi'ré, 'Re ĩhâimana u'âsi mono nhib'a'uwẽ 'wawi 're isimapa mono 'wa hã. Taha ré, ropire uptabi na te za tiromhâiba za, niwa daza'rui mono bâ a'uwẽ 're ihâimana za'ra mono ma, ãne hã we iromhâimana mono õ, ã wamhã. Tane nherẽ, tô we iromhâimana mono zém na hã te za 'Re ĩhâimana u'âsi mono te, ibaihâ 're, isisi ui'éré ré norĩ hã uburé sõ'reptu za'ra, tinhib'a'uwẽ hã.

Daniéu 12:1 ပူးပေါင်းရင်းမြစ်များ

Salmu 69:28

Tahawa, 'Re ihâimana u'âsi mono 'rata za 're idahâimana u'âsi za'ra mono norĩ nhisi ré ibaihâi hawi isisi za'ra hã tiwi i'apari da si ĩma iwẽ hã. Duré i'uwaibaba 're ihâimana za'ra mono norĩ nhisi zu isisi za'ra na 're irob'ui'éré mono õ da si, ĩma iwẽ hã.

Daniéu 10:13

Tawamhã hâiwa ãma romhuri'wa, Persia ãma apito norĩ nhimi'madâ'âzéb 'wawi 're isimapa mono hã ma tô 21 na bâdâ imorĩ 'rem na ĩzada tihâiba. Tane nherẽ, Migueu hâiwa ãma romhuri'wa norĩ nhib'ihâ'a siré, ma tô te te ĩpawaptob da, we ĩtẽme mo, ĩsiwaprosi Persia te apito norĩ zada, ĩhâimana wa.

Daniéu 11:45

Tawamhã Mediterãniu na âporé nhisi wa'wa ẽne iwẽ uptabi iwazéb zahi wa'wa me, te za sima 'ri nha, romhâ 'manharĩ na 'ri hã. Tane nherẽ, tame te za oto dârâ. Dâ'â wamhã, ni'wa hã te te pawapto waihu'u õ di za.

Daniéu 7:10

Taha nho'remhã ma tô duré unhama na â hã tipraba. Tamemhã te duré da'ahâ uptabi na tahâimana za'ra ni, marĩ, da te tãma i'manharĩ za'ra da hã. Nemo te da'ahâ uptabi na duré daza'rata waihu'u ãna isõ're aimasam ni. Tawamhã da'ãma rowairébézé oto sãna'rata wamhã, ma tô ibaihâ hã sõzi za'ra ni.

Daniéu 9:12

A hã wama 're i'amhâzépa mono zém na hã ma tô wama ãma i'uwaimrami za'ra, wama i'rã nho'õmo norĩ ma zama. Tahawa, tô itete na ma tô iwahâ za'ra. Niwamhã ãne hã ropipa ihâimana'õ, Zeruzalẽ nhisiwi iwaptã'ã sine hã.

Zuéu 2:2

Taha bâtâ na hã te za oto tirobra. Duré te za hâiwa'a norĩ hã ti'rãdâ'â za'ra. Taha ré, te za 'ridi hã sina rotété za'ra, dasi'wapéi 'manharĩ'wa norĩ i'ahâ isiptete ne hã, duré hâiwa'a i'rãdâ hã ẽtẽ 'rãirã te te siwi i'upsibi ne hã. Niwamhã ãne hã iwatobro õ. Duré niwamhã romhutu'õmhã ãne hã za iwatobro õ.

Mateu 24:21

Rowasédé hã oto dazô 're wairébé mono wamhã, te za oto da te 're robzépata za'ẽtẽ za'ra. 'Re ihâimana u'âsi mono te te i'aropoto na'rata mono zém hawimhã, ãne na hã da te 're robzépata za'ẽtẽ uptabi za'ra mono õ di. Duré tane nherẽ niwamhã ãne na hã da te 're robzépata zahu za'ra mono õ di za.

Marcu 13:19

E marĩ wa. Rowasédé hã oto dazô 're wairébé mono wamhã, te za oto robzépata za'ẽtẽ za'ra ni. 'Re ihâimana u'âsi mono te te i'aropoto na'rata mono zém hawimhã, ãne na da te irobzépata za'ẽtẽ uptabi za'ra õ. Niwamhã ãne na hã da te 're robzépata zahu za'ra mono õ di za.

Luca 10:20

Asimirob'ru zarina wa'aba, wa'uburé hã dama 're wairébé mono wa, ma tô 're ato za'ra wa'aba mo. Tane nherẽ, taha nhipai u te za 're ato uptabi za'ra wa'aba mo, asisi hã hâiwa ãma 're hâimana za'ra wa'aba mono wa, asisi ui'éré za'ra wa'wa hã.

Roma 11:15

Ta norĩ hã te te 're saze za'ra mono õ wa, ma tô 'Re ihâimana u'âsi mono hã asa te te siwi 're awẽ'õ, a'â. Ãne wa, ma tô a'â ai'ãma si 're siwadi za'ra wa'wa, zudeu'õ norĩ ãma. Tane nherẽ, ta norĩ hã niwapsi 'Re ihâimana u'âsi mono u, apâ 're isipizari za'ra mono zéb zarina, te te 're wẽsãmri za'ra mono wa, te za oto rowẽ uptabi na 're hâimana za'ra, iwasédé hã te te oto ãma 're i'ab'madâ'â mono õ zarina. 'Re dadâ'â za'ra mono wa, apâ 're dahâiwa'utu za'ra mono wa, dama 're irowẽ za'ra mono ne, te za oto ta norĩ hã rowẽ uptabi na 're hâimana za'ra.

Roma 11:26

Ãne 'Re ihâimana u'âsi mono te te 're isõ'reptu za'ra mono zéb da hã, Izaraéu nhihudu norĩ hã. Ãne na ma tô duréihã Izaia hã ãma rob'ui'éré siro, ta norĩ ãma hã: “Danho'reptui'wa da hã, Zeruzalẽ ãma Siã na sa'a nhisi ãma, dasiré za 're ihâimana mono hã, tame. Ta hã Zacoho nhihudu norĩ 're iwasété za'ra mono zé hã te za te te tãma 're apari.

Éfézu 1:21

Tame te pire uptabi na dama 're hâimana, pire na hâiwa ãma 're ihâimana za'ra mono norĩ ma, duré tame siptete na 're ihâimana za'ra mono norĩ ma zama. Taha na dâ'âsina wa, ti'ai ãma duré hâiwa ãma zama tipire na te te ãma siwi wabzu za'ra õ di, dama ipire za'ra norĩ hã. Õne u'â te za tipire na te te 're da'a'rãnhipai u'âsi.

Filipu 4:3

Duré a hã ĩpawapto wẽ 'wa na 're i'aihâimana mono hã, ma'ãpé ã pi'õ norĩ hã pawaptob zahuré na. Ta norĩ hã ma tô ĩsiré te te 're romhuri pese zahuré, Cristuhu wasu'uwẽ na wa te dama ãma 're iropéi mono na hã. Clemetihi siré zama ma tô te te 're romhuri zahuré, duré uburé ĩsiré romhuri'wa norĩ siré zama. Uburé te ã norĩ nhisi hã dame 're hâimana za'ra ibaihâ na hã, 'Re ihâimana u'âsi mono 'rata za 're idahâimana u'âsi za'ra mono norĩ nhisi ré, ibaihâ 're ihâimana mono na hã.

Apocalipsi 1:5

Zezu Cristuhu zama te te 're aipawaptob u'âsi za'ra wa'aba mono da, wa duré ai'ãma te 're rosa'rata u'âsi za'ra wa'wa. Ta hã dama i'umnha, te simi'ẽ na 're hâimana, 'Re ihâimana u'âsi mono zadawa wasu'uwẽ 'wa da hã. Ta hã ma tô dawana tihâiwa'utu 'rata, ihâiba si'utõrĩ waihu'u õ na. Uburé ti'ai ãma danhib'apito norĩ nhipai u, Zezusi hã te 're hâimana. Misi Danhib'apito uptabi na, te tô 're hâimana. Ta hã te te 're wa'azawi pese. Tahawa, ma tô wazada dârâ. Wazada dâ'â wamhã, iwapru ma tiwi puru. Tawamhã wawasété na 're wanomro mono ré, ma tô tiwapru na tidâ'âzém na te te 're wa'a'upsõ, wawasété ãna ãma 're wanomro mono da oto.

Apocalipsi 12:7

Tawamhã dasi'wapé, hâiwa nho're ãma ma tô watobro. Hâiwa ãma romhuri'wa hã Migueu na isisi hã, duré hâiwa ãma isiré tãma iromhuri'wa norĩ hã, te ho'orã hâiba ne ropoto siwamnarĩ hâiba za'ẽne hã siwi 'wapé. Tawamhã ho'orã hâiba ne ropoto siwamnarĩ hã ma tô sina ana, hâiwa ãma tãma iromhuri'wa norĩ me.

Apocalipsi 13:8

Tawamhã ti'ai ãma daro mono bâ 're idahâimana za'ra mono norĩ hã te za ãma 're dawata za'ra, da'ahâ uptabi na. Tane nherẽ, ni'wam norĩ hã ãma 're wata za'ra mono õ di za, ibaihâ na 're idahâimana u'âsi za'ra mono norĩ nhisi, 're isimi'wara mono zém na isisi 're isimi'wara mono norĩ hã. Duréihã 'Re ihâimana u'âsi mono hã te te ropoto mono õ ré, danhisi na te te ãma irob'ui'éré za'ra hã ã ibaihâ hã, Pone'ẽrebâ, da te dasiwi iwĩrĩ te hã.

Apocalipsi 17:14

Te za duré ropoto siwamnarĩ siré siwi 'wapé, Pone'ẽrebâ hã. Tane nherẽ, te za Pone'ẽrebâ hã ãma ai'uté za'ra. Ta hã Pone'ẽrebâ danhipai u Uburé Danhib'apito uptabi na 're hâimana mono wa, duré danhipai u dama pire na 're hâimana mono wa, te za ãma ai'uté za'ra. Ni'wam norĩ hã isirã zarina si 're nomro mono da, Pone'ẽrebâ te te 're i'apisutu mono norĩ hã, duré simi'ẽ na õhõ ãma si 're inomro mono norĩ hã, te za Pone'ẽrebâ siré ãma ai'uté za'ra, ropoto siwamnarĩ norĩ ãma hã.

Apocalipsi 20:12

Tawamhã wa tô duré 'madâ'â za'ra, 're idadâ'â za'ra mono hã, dama ipire norĩ hã, duré dama iwapu norĩ hã. Da'upsãtã mono bâ, te aihĩni pese danhib'apito simasisizém nho're aimasam ni. Â poré mono bâ, â na 're idasi'utõrĩ mono norĩ zama te aimasam ni, adâ 're ihâimana za'ra mono zém hawib zama. Tawamhã ibaihâ ahâ na ma tô sõzi za'ra ni, ti'ab ré uburé marĩ, da te 're i'manharĩ za'ra mono zém na rob'ui'éré ré hã, marĩ iwẽ na, duré marĩ iwasété na zama. Ma tô duré sõzi ibaihâ hã, 'Re ihâimana u'âsi mono 'rata za rowẽ na 're idahâimana u'âsi za'ra mono norĩ nhisi ré hã. Tawamhã ibaihâ na da te 're i'manharĩ wẽ za'ra mono zéb ui'éré zarina, ma tô da'ãma rowairébé za'ra ni. Da te 're i'manharĩ wasété za'ra mono zéb ui'éré zarina zama, ma tô aihĩni pese da'ãma rowairébé za'ra ni.

Apocalipsi 3:5

“Duré ni'wam norĩ hã tidâ'âzéb u ĩwi sipizari ãna Satanasihi ãma te te i'ai'uté za'ra norĩ hã te za duré uza hâirã na ĩ'rata 're hâimana za'ra. Ibaihâ na 're idahâimana u'âsi za'ra mono norĩ nhisi, 're isimi'wara mono zém na isisi isimi'wara hã te tiwi pari za'ra õ di za. Ĩmama nho'a, wa za sõ'awi ĩnhib'a'uwẽ na hã te tãma 're wasu'u za'ra, hâiwa ãma duré tãma iromhuri'wa norĩ nho'a zama.

Apocalipsi 7:14

Tawamhã asa wa tãma tinha, ãne: — Me. Wa hã te waihu'u õ di. Aima waihu'u pese di, a hã. Tawamhã ma tô oto ĩma waihu'u, ãne: — Ã norĩ hã ropsi'utõrĩzéb ãma, ti'ai ãma da te 're irobzépata za'ẽtẽ za'ra mono zéb 'rãsutu u, hâiba ré 're ihâimana za'ra mono. Da te dasima 're irob'manharĩ wasété za'ra mono zém na 're idasi'utõrĩ mono zém hawib õ di. Te te 're robzépata za'ẽtẽ za'ra mono nherẽ, hâiba ré we iwairébé, ã norĩ hã. 'Re ihâimana u'âsi mono ma, ma tô sihâiba 'ru za'ra, Pone'ẽrebâ wapru na dazada idâ'âzém na iwasété wi te te 're a'upsõi pese mono da, da'uza hã hâirã da, da te 're i'upsõi pese za'ra mono ne.