Daniéu 11:5 - ꞌRe Ihâimana Uꞌâsi Mono Zadawa Wasuꞌu

⁵ — Ezitu ãma apito 're ihâimana mono hã siptete di za. Tane nherẽ, nima hã ite dasi'wapéi 'manharĩ'wa norĩ 'madâ'â'wa hã, isipai u siptete uptabi na te za 're hâimana. Tahawa, te za dama i'rã nho'õmo na siptete uptabi na te te 're da'ab'madâ'â.

Daniéu 11:5 ပူးပေါင်းရင်းမြစ်များ

Daniéu 11:11

Tawamhã Ezitu te, apito sib'rui pese wamhã, te za tite dasi'wapéi 'manharĩ'wa norĩ ré watobro, hâiwa nhimi'e niwĩ daza'ru te apito te te 'wapé da. Tahawa, hâiwa nhimi'e niwĩ dasi'wapéi 'manharĩ'wa norĩ hã te za ezipsiu norĩ ma sihâiba nhomri za'ra.

Daniéu 11:14

— Tahawa, Ezitu te apito da, te za da'ahâ uptabi na sada tahâimana za'ra ni. Ta norĩ 'remhã Izaraéu nhihudu norĩ nhipti'ai 'remhã te za nima norĩ aibâ isipãrĩ ze hã dame tihâimana za'ra. Ta norĩ hã te za tô sada dame tihâimana za'ra, sõtõ 'rowim ne marĩ te te i'madâ'â za'ra zéb zarina. Ãhã nherẽ, te za ta norĩ ãma ai'uté za'ra ni.

Daniéu 11:25

— Tinhiptete na isi'umnhasi zarina, duré tinhib'ru na isi'madâ'âzéb zarina, te za tite dasi'wapéi 'manharĩ'wa norĩ te te simro, te te ropãrĩ za'ra mono sina sisõré pese na, Ezitu te apito te te 'wapé da hã. Tawamhã ta hã tisi'wapéi u te za watobro, tite dasi'wapéi 'manharĩ'wa isiptete uptabi ré. Tane nherẽ, te te da'ãma i'ai'uté za'ra da hã mare di za. E marĩ wa. Roti na i'upari'wa norĩ hâimana nhipese za'ra na te te siwi sa'réi wa. Tawamhã ite dasi'wapéi 'manharĩ'wa norĩ ãma hã te za ai'uté za'ra ni. Te za dasi'wapéi 'manharĩ'wa norĩ ahâ uptabi na ai'utõ.

Daniéu 11:40

— Oto we romhâimanazéb 'rãsudu wisi wamhã, te za Ezitu te apito hã hâiwa nhimi'e niwĩ te apito hã susi. Tahawa, te za tô sô watobro, wedewara zapore na dasi'wapézém na duré awaru na isi'wapéi'wa norĩ ré, duré uba're i'ahâ uptabi na hã. Â rom na 're i'âpusi mono ne, te za Ezitu u hã sisisi.