Colosu 3:8 - ꞌRe Ihâimana Uꞌâsi Mono Zadawa Wasuꞌu

⁸ Tahawa, te za uburé marĩ hã 're i'manharĩ wasété za'ra wa'aba mono zé hã irẽme pese za'ra wa'wa oto, 're ida'ruiwapari za'ra wa'aba mono zé hã, duré asisada 're asiti'ru za'ra wa'aba mono zé hã, duré niha dama 're rob'manharĩ za'ra wa'aba mono da, asima da'ãma 're irosa'rata wasété za'ra wa'aba mono zé hã, duré da'ãma 're iwasété za'ra wa'aba mono zé hã, duré uburé aimreme wasété 'wa hã. Ã norĩ hã te za uburé irẽme pese za'ra wa'wa.

Colosu 3:8 ပူးပေါင်းရင်းမြစ်များ

Provébiu 17:14

Damreme na dasi'ahâri, 're isãna'rata mono zé hã, aiwa â nhowadazé 're isipo'o na'rata mono ne hã te 're hâimana. Tahawa iwẽ hã ropsiwamnarĩ prãi ré, da te ãma 're irosahâri za'ra mono da si.

Provébiu 19:19

Ni'wa hã ihâimana wa'ro su nimahã na te te robzépata tõ da, pawaptom nherẽ, sisãmri dai õ di. Duré pawaptob zahu nherẽ, isisãmri da hã mare di. Tahawa, ihâimana wa'ro su'u norĩ te te tô 're robzépata za'ra mono.

Provébiu 29:22

I'rãi wa'ro su'u norĩ hã te za damreme na dasi'wapé hã te te 're poto za'ra, duré ro'wa'rutu zama.

Mateu 5:22

Ãne na roti hã tô sena nherẽ, wa za oto wa hã aimawi na aima waihu'u za'ra wa'wa, ãne na roti na hã. Ni'wam norĩ hã tisiré 're ihâimana za'ra mono norĩ da, 're siti'ru za'ra mono wamhã, ta norĩ hã te za 'Re ihâimana u'âsi mono hã te te siwi 're awẽ'õ, iwasété na te te 're i'awaihu'u mono zéb zarina. Duré ãté ni'wa hã te za tisiré ma tinha, ãne: “A hã, marĩ da, 're aihâimana mono õ.” Ãne ni'wam norĩ hã te te dama 're nharĩ za'ra mono wamhã, te za da te 're simro, zudeu norĩ ma roti'wa norĩ u, dawasété na dawaihu'u'wa norĩ tẽme, ta norĩ hã te te siwi 're wẽ'õ za'ra mono da, iwasété na te te siwi 're waihu'u za'ra mono wa. Duré ni'wa hã ãté ãne te za tisiré ma tinha: “E niha asimiza'rese'õ a hã, 'Re ihâimana u'âsi mono wasu'u na hã.” Ãne ni'wam norĩ hã tisiré ma, te te 're nharĩ za'ra mono wamhã, ãté ta norĩ hã te za ropipa u 're sisisi, unhama ro'o u'âsi u.

Roma 13:13

Wawasété ãna, wa za oto 're wanomro wẽ, rowa'a na 're idanomro mono ne. Âzé wa te dame 're âhuri mono õ di za, dato iwasété u 're dasi'rã'õtõ mono wa, siwa'ru da te 're i'âhuri mono ne, 're wa'rã siwamnarĩ tõ za'ra mono da. Duré siwa'ru wahâimanazé iwasédé hã wa te 're 'manharĩ u'âsi za'ra mono õ di za, pi'õ na aibâ na zama. Duré marĩ na 're iwasiwẽ'õ za'ra mono hawi, wa te wasima 're nharĩ za'ra mono õ di za. Duré marĩ na 're wasi'ruiwapari za'ra mono õ di za.

1 Corĩtu 3:3

E marĩ wa. Isazei'õ'wa norĩ 're ihâimana za'ra mono zéb zarina, zahadu 're anomro aba mono wa. Tahawa, te zahadu 're asi'ruiwapari za'ra wa'aba mo, marĩ na. Te duré 're asisada'âbâ u'âsi za'ra wa'aba mo. Ãne na 're aihâimana za'ra wa'aba mono zé hã, e marĩ te aima wasu'u za'ra wa'wa. Cristu hã 're saze za'ra wa'aba mono õ ré, aiwasété na 're aihâimana za'ra wa'aba mono zé, zahadu 're irẽme waihu'u za'ra wa'aba mono õ zé, te aima wasu'u za'ra wa'wa, isazei'õ'wa norĩ 're ihâimana za'ra mono zém ne hã.

2 Corĩtu 12:20

Ai'ãma 're ĩhâtâ'â za'ra wa'aba mono sina, wa tô ai'ãma te 're rosa'rata u'âsi za'ra wa'wa, za ãma atẽme ĩmorĩ aba na dâ'âsina, duré 're aihâimana za'ra wa'aba mono zém na, za te aiwẽsãmri za'ra wa'aba õ na dâ'âsina. Ãté a norĩ wa'wa hã te za duré asiwi ĩwẽ'õ za'ra wa'wa, za ãma atẽme ĩmorĩ za'ra wa'aba wamhã. Ãté ãhã na hã te 're asisada'âbâ u'âsi za'ra wa'aba mo 'râwi. Ãté te duré marĩ na 're asi'ruiwapari za'ra wa'aba mo. Ãté te duré asisada 're asiti'ru za'ra wa'aba mo. Ãté asi'ãma si te duré 're irosa'rata za'ra wa'aba mo. Ãté te duré asi'ãma 're iwasété za'ra wa'aba mo. Ãté te duré asima 're idabâsi wasété za'ra wa'aba mo. Ãté dama aipire newa, te duré 'râwi 're asi'madâ'â ze za'ra wa'aba mo. Ãté siwa'ru te duré 're aihâimana za'ra wa'aba mo. Ãne na 're aihâimana za'ra wa'aba mono õ'umnhasite, wa ai'ãma te 're romnhimimnhasi u'âsi za'ra wa'wa, wa hã.

Galata 5:15

Tane nherẽ, abaze zahi 're isisimroi mono ne, asisada 're asiti'rui u'âsi za'ra wa'aba mono wamhã, asina asapa'a za'ra wa'aba õ di za.

Galata 5:20

Duré 'Re ihâimana u'âsi mono upana, te romhâiba 'manharĩ ãma 're dawata za'ra. Te duré tãma 're damreme zusi. Duré abzé 'manharĩ'wa, te 're danomro. Duré te 're dasi'ruiwapari za'ra. Te duré 're dasisada'âbâ za'ra. Duré marĩ na te 're dasi'ruiwapari za'ra. Dasi'aba'ré na te duré 're dazahi za'ra. Duré marĩ iwẽ zô, te dasima si 're danhopré. Te duré 're dasirẽme za'ra, 'râwi dasi'rata 're dahâimana za'ra mono tõ da.

Galata 5:26

Danhipai u, wapire na 're wahâimana za'ra mono newa, 'râwi wapẽ'ẽ na wasina 're wawata za'ra mono õ di za, da te wama 're nharĩ za'ra mono tõ da. Duré wanhipai u, dapire na 're idahâimana za'ra mono na, wa te 're da'ruiwapari za'ra mono õ di za.

Éfézu 4:22

'Re anomro wasété aba mono da si, te aré asima 're irosa'rata za'ra wa'aba mo. Tahawa, te aré aiwi 're si'utõrĩ za'ra wa'wa, 're anomro wẽ wa'aba mono zé hã. Tane nherẽ, te za oto irẽme pese za'ra wa'wa, 're aihâimana wasété za'ra wa'aba mono zé hã.

Éfézu 4:25

Tahawa, dama 're asadawa nhipese za'ra wa'aba mono õ di za oto. Aihâiba mono bâ te za tô sena na si asima 're irowasu'u za'ra wa'aba mo.

Éfézu 4:26

Nimahã na 're asiti'ru za'ra wa'aba mono wamhã, 're aiwasété za'ra wa'aba mono õ di za, aiwasédé hã 're 'manharĩ za'ra wa'aba mono tõ da. Duré asiti'rui ré bâdâ hã wahuré ai'ãma 're si'utõrĩ za'ra wa'aba mono tõ da, te za asiwi 're iwẽ'õ za'ra wa'aba mo, Wa'uburé nhimiwada'uri zarina aiwasédé hã 're 'manharĩ za'ra wa'aba mono tõ da dama.

Éfézu 4:29

Aimreme wasété na dama 're aimreme zusi aba mono õ di za oto. Aimreme wẽ na si te za oto dama 're aimreme zusi aba mo, asimiroti wẽ na si 're dapawaptob za'ra wa'aba mono da ãma.

Éfézu 5:4

Duré aimreme nhiséb'õ na asima 're rowasu'u wasété za'ra wa'aba mono õ di za. Aimreme to na duré asima 're rowasu'u wasété za'ra wa'aba mono õ di za, ãne hã i'uwaibaba õ wa, Wamama nhib'a'uwẽ 're iwanomro mono norĩ ma hã. Wama 're isõpru mono zém na si, te za oto asima 're irowasu'u za'ra wa'aba mo, Wamama ãma si 're aiwata za'ra wa'aba mono da.

Colosu 3:5

Ti'ai ãma isazei'õ'wa norĩ hâimanazéb zarina, marĩ wasété zô 're irob'ruiwapari za'ra wa'aba mono zé hã te za 'râwi asiwi 're i'uprosi pese za'ra wa'aba mo, 're dadâ'â za'ra mono wa, marĩ zô da te oto 're irob'ruiwapari za'ra mono õ ne. Pi'õ na aibâ na zama siwa'ru aiwasédé, 're i'manharĩ za'ra wa'aba mono zé hã te za 'râwi 're i'uprosi pese za'ra wa'aba mo asiwi, duré asisô 're irowasutu za'ra wa'aba mono zé hã, duré marĩ wasété zô si asima 're irob'ruiwapari za'ra wa'aba mono zé hã, duré danhipai u asibro pese na 're aihâimana za'ra wa'aba mono da, marĩ zô si asima 're i'asõpré wa'aba mono zé hã. Ãne hã 'Re ihâimana u'âsi mono ma, wẽ õ di, marĩ zô i'upana asima 're irob'ruiwapari za'ra wa'aba mono zé hã. Tahawa, te za tô uburé aiwasédé hã asiwi 're i'uprosi pese za'ra wa'aba mo, aiwi 're si'utõrĩ pese za'ra wa'aba mono wa, 're anomro wẽ wa'aba mono da oto.

Colosu 3:9

Taré asima 're asadawa nhipese za'ra wa'aba mono õ di za oto, 're anomro 'rata aba mono zé hã 're rẽme pese za'ra wa'aba mono nherẽ, uburé aiwasédé 're i'manharĩ za'ra wa'aba mono zé hã.

1 Timotiu 1:20

Ãne Imeneusi norĩ hã te oto 're tineb zahuré, Alesãdrihi me. Tahawa, wa tô a'â tãma hâiba za'ré zahuré, Satanasihi ma, robzei'õ hã a'â te te sina waihu'u zahuré da. E marĩ da. Roti tô sena upana te te dama 're rowasu'u zahuré mono tõ da, taha u'âbâ te te 're wẽ'õ zahuré mono tõ da, 'Re ihâimana u'âsi mono hã.

Hebreu 12:1

Duréihã ni'wam norĩ hã 'Re ihâimana u'âsi mono te te sina 're i'umnhasi za'ra mono zéb zarina, danho'a 're inomro wẽ mono norĩ hã ahâ uptabi na 'râwi wamana wawi 're isimasab u'âsi mono ne, wa za ta norĩ ãma 're wasipo're pu'u u'âsi za'ra. Tahawa, wa za uburé marĩ iwasédé hã wa te wasiwi 're wẽ'õ pese za'ra, 're iwanomro wẽ mono zé wi, te te 're wanhowada za'ra mono tõ da, te te 're iwawasutu u'âsi za'ra mono hã, wawasédé hã. Dawara na 're dasipibu za'ra mono wa, dahâiba wapu na 're dasisa'rei mono da, marĩ ipire hã dahâiba na dama 're ihâimana za'ra mono hã da te dasisa 're isani za'ra mono ne, wa za wawasédé hã wa te wasiwi 're wẽ'õ pese za'ra. Tawamhã wanhiptete na wa za tô ãma 're wahâimana za'ra Cristuhu ãma si, tiwi 're wasipizari za'ra mono ãna. Dawara na 're dasipibu za'ra mono wamhã, dawara tete haré dasiwi 're idasisa'rei mono ne, wa za tô wanhiptete na ãma 're wahâimana u'âsi za'ra, Cristuhu ãma si.

Tiagu 2:7

E ta norĩ hã Asib'apito za'ra wa'aba nhisi hã te te 're waptẽrẽ wasété za'ra mono ã bâ bété, wẽ uptabi nherẽ, ta hã.

1 Pedru 2:1

Tahawa, te za aiwasédé hã 're irẽme pese za'ra wa'aba mo, dasi'ruiwapari hã, duré dazadawa nhipe hã, duré dahâimanazé tô senai'õ hã, duré danhimarĩ na danhimi'ruiwapari hã, duré dasima dawasu'u wasédé hã.

2 Pedru 2:18

Ta norĩ hã simiroti pire newa, 'râwi sina 're wata za'ra mono sina, te za te te dama 're rowasu'u za'ra, da te dasima 're iwẽ za'ra mono zéb uwaibaba, 're dahâimana wasété za'ra mono da, dama ãma 're rowẽ za'ra mono da newa. Ãne wamhã, nimosi isazei'õ'wa norĩ hâimana wasétézém hawi 're idasipizari za'ra mono norĩ hã, te za oto te te ãma 're sasõmri za'ra, senai'õ na rowasu'u'wa norĩ ãma hã.

2 Pedru 2:7

Loho si 're morĩ wẽ wa, ma tô sõ'reptu, 'Re ihâimana u'âsi mono hã. Dahâimana nhiséb'õ na, 're dahâimana za'ra mono wa, ma tô tipẽ'ẽ na aré te te 're robzépata, Lo hã.

Zuda 1:13

 sisasi hã 're isibzaihâ za'ra mono ne, te ta norĩ hã tãma 're rowẽ za'ra mono da newa, hâiwi si 're nomro, 're wa'utu za'ra mono ãna. Duré â nhibzaihâ zaipro iwasédé, supara 'ré u te te 're isãmra mono ne, te marĩ iwasété si te te 're 'manharĩ za'ra, ta norĩ hã. Wasi hã siwa'ru 're inomro mono ne, te duré ta norĩ hã siwa'ru 're hâimana za'ra, te te 're rob uptabi za'ra mono ãna. Ta norĩ ãma ma tô 'Re ihâimana u'âsi mono hã sima ãma roti siromo za'ra, za te te ihâ za'ra zém na hã. Robra si 're isa'wari mono zéb u te za satõrĩ za'ra, robra u'âsi u, iwa 're hâimana u'âsi za'ra mono da, tame.

Zuda 1:8

Duréihã 're idawasété za'ra mono ne, te ãhã na hã aibâ norĩ hã 're hâimana wasété za'ra, roti tô senai'õ na te te aima 're iroti za'ra wa'aba mono norĩ hã. Ta norĩ hã sõtõ 'rowim ne, marĩ iwasétére hã te te 're i'madâ'â za'ra mono zéb zarina, te tihâiba na 're siwasété za'ra. 'Re ihâimana u'âsi mono nhimiroti hã ma tô duré te te siwi 're wẽ'õ za'ra. Hâiwa ãma 'Re ihâimana u'âsi mono ma, romhuri'wa norĩ ãma, te duré te te 're wasété za'ra, ta norĩ hã. Tanei õ di, Migueu hã hâiwa ãma romhuri'wa norĩ ma ipire hã. Ta hã duréihã ma tô Mozésihi hâiba hã sawi Wa'uburé wi, te te âri tõ da. Tawamhã Migueu aré sada sahi nherẽ, iwasédé hã te te ãma hiri õ di, te te ãma iwasété na hã. Ãne si ma tô tãma waihu'u, Wa'uburé ma: “Wanhib'apito si te za sa'ẽtẽ aima tinha.” Õ hã Wa'uburé aré dama pire na hâiwa ãma romhuri'wa na 're ihâimana mono. Tahawa, te te tô ãma wasété õ di, Migueu hã. Tane nherẽ, te ta norĩ hã hâiwa ãma 'Re ihâimana u'âsi mono ma romhuri'wa norĩ ãma, te te 're wasété za'ra, aibâ iwasété norĩ hã.

Apocalipsi 16:9

Ma tô duré te te dahâpré pese. Tawamhã ma tô 'Re ihâimana u'âsi mono hã 'ruiwapti za'ra ni, rob'manharĩ pipazém na te te dazada ãma 're rowairébé mono wa. Tane nherẽ, dawasété wi dasipizari za'ra õ di. Duré siptete uptabi nherẽ, 'Re ihâimana u'âsi mono ãma 're dawata za'ra mono õ di.