Tahawa, te za 're asipibui pese za'ra wa'aba mo, dawi. Ãté ni'wam norĩ hã te za te te sima 're aiwẽ za'ra wa'wa, te te 're aiwaibui wa'aba mono da, zudeu norĩ ma roti'wa norĩ u, te te 're asimroi wa'aba mono da. Tawamhã ta norĩ hã te te siwi 're aiwẽ'õ za'ra wa'aba mono zéb zarina, te za duré isimirowahutuzéb ãma da te 're ai'maipré'é 'wa, romhâ nhorõ na.
Colosu 2:8 - ꞌRe Ihâimana Uꞌâsi Mono Zadawa Wasuꞌu8 Tahawa, te za 're asi'madâ'â pese za'ra wa'aba mo, dasi'uihâ na senai'õ na danhimirosa'rata nhipese na da te aima 're roti za'ra wa'aba mono wamhã, ãma 're dazaze za'ra wa'aba mono tõ da, tô sena newa taha ãma si 're aihâimana za'ra wa'aba mono tõ da. Ni'wam norĩ hã danhimiwada'uri zarina pawa'âbâ ãna te te dama 're iromhuri za'ra mono ne, robzei'õ na apâ 're aihâimana za'ra wa'aba mono õ'umnhasite, te za dawi 're asi'madâ'â pese za'ra wa'aba mo. Danhimirosa'rata nhipe hã Cristuhu hawib õ di. Dahi'rata sidâpâsi tô senai'õ na taré da te dasima 're iroti za'ra mono zém hawimhã ta hã, duré ihâiba'õ norĩ hã wasété uptabi na 're ihâimana za'ra mono norĩ hã ropâ siptete sina marĩ te te 're i'madâ'â za'ra mono hawimhã, danhimirosa'rata nhipe hã. အခန်းကိုကြည့်ပါ။ |
Colosu 2:8
38 ပူးပေါင်းရင်းမြစ်များ
Zezusihi wasu'uwẽ na ma tô dama rowasu'u. Dâ'â nherẽ, apâ ihâiwa'utuzém na ma tô duré dama rowasu'u. Tahawa, Epiturezuhu nhimirowahutu zarina, duré etozitu norĩ nhimirowahutu zarina dama rowahutu'wa norĩ hã ma tô duré ãma sada'âbâ za'ra, Paulu hã. Tawamhã nima norĩ hã ma tô ãne sisadanharĩ za'ra ãma: — E marĩ na te wama rowasu'u za'ra. Simiza'rese bâ. Nima norĩ hã te duré ãne sima nharĩ za'ra: — Ãté ihâiba'õ norĩ wasu'u na te wama rowasu'u, iwaihu'upese hâiba amoi wasu'u na, wa te ãma 're saze za'ra mono da.
Ĩsisãnawã norĩ, wa za oto ĩnhimiroti na aima 'rãsutu za'ra wa'wa. Ni'wam norĩ hã te aimawi tinhimirosa'rata prã na te te 're 'wa'rutu za'ra, isazei'wa norĩ wi. Te te tiwi ãma 're 'wa'rutu za'ra mono wa, te isazei'wa norĩ hã imreme hã te te 're wapari za'ra. Taha zarina, te duré sima ãma 're siwanhizari. Ta norĩ nhimirob'manharĩ wasété zéb zarina, te isazei'wa norĩ hã 're si'marõpãrĩ za'ra, tiwasété na. Zezusihi nhimiroti na, da te aima 're iroti za'ra wa'aba mono zéb upana, te ta norĩ hã te te dama 're roti za'ra, aimawi na si. Tahawa, te za tiwi 're asisawi pese za'ra wa'aba mo, ta norĩ siré 're aihâimana za'ra wa'aba mono tõ da.
Ãté te za tô asima 're iwẽ za'ra wa'aba mo, dasa hã romhâiba 'manharĩ ma, da te 're isõmri za'ra mono na dame 're asaihuri aba mono da, 'Re ihâimana u'âsi mono hã za te te siwi 're aiwẽ'õ za'ra wa'aba mono õ na dâ'âsina. Tane nherẽ, te za 're asi'madâ'â u'âsi za'ra wa'aba mo, ta hã dasa hã 're huri aba mono wa, asiré isazei'wa nherẽ, sib'uware na 're inomro mono norĩ hã apâ tiwasété u 're rere'e mono tõ da.
Taha na si, wa duré danhimiroti tô senai'õ hã wa te dawi 're a'uprosi. Ni'wam norĩ hã tiwẽ na sina 're wata za'ra mono wa, te 'Re ihâimana u'âsi mono hã tãma waihu'u ãna, 're hâimana za'ra. Ãne na danhimirosa'rata wasédé hã, wa duré wa te dawi 're a'uprosi u'âsi, 'Re ihâimana u'âsi mono nhimnhi'ãsi na, iwaihu'u pese zarina. Uburé Cristuhu nhitob'ru norĩ nhimirosa'rata wasédé hã wa duré wa te tiwi 're awaibui u'âsi, Cristuhu nhimiroti zarina si, te te oto 're rosa'rata za'ra mono da, ta norĩ hã iwẽ na si.
'Re ihâimana u'âsi mono hã ma tô oto Aimama na asiwi iwaihu'u za'ra wa'wa. Tahawa, aima 're rowẽ za'ra wa'aba mono di oto. Taha nhipai u, ti'ra na te te oto sina ai'awaihu'u aba wa, aima 're rowẽ uptabi za'ra wa'aba mono di. Ãne wamhã, e niha te za bété apâ aipizari za'ra wa'wa, asimizazezéb 'rata u hã, taha zarina asina uwaimrami za'ra wa'aba õ nherẽ, asõ'reptu za'ra wa'aba zé hã, duré taha zarina rowẽ si aima 're hâimana za'ra wa'aba mono õ nherẽ. E niha te za bété asima iwẽ za'ra wa'wa, danhimiwada'uri zarina si pawa'âbâ ãna 're ihâimana za'ra mono norĩ ne, apâ 're aihâimana za'ra wa'aba mono da, robzei'õ na hã.
Isazei'õ'wai hâimanazém na ma tô aré 're aihâimana za'ra wa'aba mo, wa'uburé norĩ nhib'apito nhimiroti na zama. Hâiwa nho're ãma te ta norĩ hã 're hâimana za'ra. Isimiroti hã tãma pire za'ra di, ipo're'õ norĩ ma hã. Tahawa, te ta norĩ hã isimiroti na si 're nomro, 'Re ihâimana u'âsi mono wapari'õ'wa norĩ hã.
Ta norĩ hã po're'õ u'âsi 're nomro mono wa, te za nimahã na tãma rob'manharĩ za'ra ipipa na, 'Re ihâimana u'âsi mono hã. Tane nherẽ, ãté ni'wam norĩ hã te za sadawa nhipese na te te aima 're rowasu'u za'ra wa'wa, za te te idahâ za'ra õ na hã. Ãne na te te aima 're rowasu'u za'ra wa'aba mono nherẽ, 're wapari za'ra wa'aba mono õ di za, isimirowasu'u tô senai'õ wa, ta norĩ hã.
Tahawa, te za a norĩ wa'wa hã 're asi'madâ'â pese za'ra wa'aba mo, wapsã dazada 're isiwamnarĩ za'ra mono ne, rosa'rata wasété na dazada 're ihâimana za'ra mono norĩ wi. Marĩ iwasété si te ta norĩ hã te te 're 'manharĩ za'ra. Ãne te ta norĩ hã te te dama 're rowasu'u za'ra: “Aibâ norĩ hã Cristu te te 're saze za'ra mono da, te te sima 're wẽ za'ra mono wamhã, te za da te 're sihâiwata nhihâri za'ra, taha zarina 'Re ihâimana u'âsi mono hã ãma 're sib'a'uwẽ za'ra mono da.” Ãne te ta norĩ hã te te dama 're roti za'ra, senai'õ na. Tane nherẽ, te ta norĩ hã dahâiba hã taré te te dawi 're wamnarĩ za'ra, taha zarina 'Re ihâimana u'âsi mono hã ãma 're sib'a'uwẽ za'ra mono da newa.
Ãté ni'wam norĩ hã te za sadawa nhipese na dama 're siwasu'u za'ra, dama wapu na 're idahâimana za'ra mono norĩ na, 'râwi 're si'madâ'â ze za'ra mono nherẽ. Ãté te za duré ta norĩ hã hâiwa ãma romhuri'wa norĩ ãma si 're wata za'ra, 'Re ihâimana u'âsi mono upana. Tawamhã ãté ta norĩ hã te za aima roti za'ra wa'wa, ãne: “A norĩ wa'wa hã wasine 're aihâimana za'ra wa'aba mono õ wamhã, 'Re ihâimana u'âsi mono hã iwẽ uptabi hã te te aima 're sõmri za'ra wa'aba mono õ di za. Te za isimini za'ra wa'wa.” Ãne na ta norĩ hã te te aima 're nharĩ za'ra wa'aba mono wamhã, ãma 're saze za'ra wa'aba mono õ di za. Tô'ã. Ta norĩ hã marĩ aimawi hã dama iwaihu'u'õ hã sõtõ 'rowim ne, te te 're isabu za'ra mono na dama 're isiwasu'u za'ra mono na, te 're si'madâ'â ze za'ra, dama pire na 're hâimana za'ra mono newa, 'Re ihâimana u'âsi mono waihu'u'õ'wa norĩ nhimirosa'rata wasété zarina.
Cristu hã dâ'â wamhã, 're anomro 'rata aba mono zé hã ma tô isiré aiwi ai'utõrĩ za'ra wa'wa. Tahawa, ti'ai ãma danhimiroti zarina 're aihâimana za'ra wa'aba mono õ di za oto, taha zarina 'Re ihâimana u'âsi mono te te 're aiwẽsãmri za'ra wa'aba mono dai õ wa. Ta hã tâibâ oto. Ta hawi ma tô ihawimhã aiwairébé 'wa. E marĩ da, te bété zahadu ãne hã isazei'õ'wa norĩ nhimiroti hã asina 're isazei pese za'ra wa'aba mo, taha na zahadu 're aihâimana za'ra wa'aba mono õ nherẽ.
Dasa na te te dama 're iroti wasété za'ra mono norĩ hã waihu'u pese newa, te ta norĩ ãma da te 're sasõmri za'ra. Tane nherẽ, ta norĩ hã waihu'u pese na 're hâimana za'ra mono õ di. Ta norĩ hã te ãne te te 're dawada'uri za'ra, hâiwa ãma 'Re ihâimana u'âsi mono ma romhuri'wa norĩ ãma si 're dawata za'ra mono da, 'Re ihâimana u'âsi mono upana. Ta norĩ hã 'râwi sina 're wata u'âsi za'ra mono nherẽ, te dama wapu na 're ihâimana za'ra mono na dama 're siwasu'u za'ra, sadawa nhipese na. Dasa hã te te siwi 're iwẽ'õ za'ra mono na te ta norĩ hã te te 're robzépata za'ra tihâiba na, 'Re ihâimana u'âsi mono hã taha zarina te te 're wẽsãmri za'ra mono da newa. Tane nherẽ, taré uptabi ta hã. Marĩ dai õ di, dasi'uihâ na dasai mono bâ da te dasima 're iroti za'ra mono zé hã. E dasi'uihâ na da te dasima 're iroti za'ra mono na 're wahâimana za'ra mono wa, wa za wa te wasina tãma ãma 're uwaimrami za'ra, wanhimirosa'rata wasété zarina marĩ iwasédé hã wa te 're 'manharĩ za'ra mono tõ da. Mare di. Sib'uware di, marĩ da, wama 're hâimana za'ra mono õ wa, ta hã.
Timotiu, ma'ãpé roti hã tô sena si asina 're 'madâ'â u'âsi mono za, 'Re ihâimana u'âsi mono te te aima iwaihu'uzé hã, ãma 're ida'apawapto mono zéb da hã. Ni'wam norĩ hã taré te dama 're siwasu'u za'ra, roti tô sena hã tãma iwaihu'u za'ra na hã. Tane nherẽ, Zezu Cristuhu nhimiroti hã wa te 're isaze za'ra mono zém hawi, ma tô ta norĩ hã 're sipa za'ra. Ta norĩ hã te te dama 're irowasu'u za'ra mono zé hã, Wanhib'apito nhimiroti zarinai õ di. Tahawa, roti tô senai'õre wi, te za asina 're asiptete u'âsi mo, 're wapari tõ mono da. Wa ĩsima aiwẽ za'ra wa'wa, rowẽ u'âsi 're anomro aba mono da, Wamama hã te te 're i'aipawaptob za'ra wa'aba mono zéb zarina si.
Cristuhu wasu'uwẽ upana, danhimiroti aimawi na da'ãma 're sasõmri za'ra wa'aba mono õ di za, senai'õ na da te dasima 're irowasu'u za'ra mono na hã. 'Re ihâimana u'âsi mono hã tinhoprubzéb zarina, iwẽ uptabi hã te te wama 're i'apisutu mono na si, wa za wapẽ'ẽ 're ãma 're wanhiptete u'âsi za'ra. Taha si wa norĩ hã wama iwẽ uptabi za'ra hã. Dasa hã da te dasiwi 're isawi za'ra mono na roti hã da te 're i'madâ'â za'ra mono na, ãma 're danhiptete waihu'u za'ra mono õ di, dapẽ'ẽ 'remhã. E marĩ wa. Taré na dasa hã 're hâimana mono wa. Taha na ãma 're dasipawapto waihu'u za'ra mono õ di tô, dasa da te dasiwi 're isawi za'ra mono na roti na hã.
A norĩ wa'wa hã ma tô iwaihu'u za'ra wa'wa, aiwa'âbâ za'ra wa'aba zé hã. Cristu hã ma tô aiwa'âbâ za'ra wa'wa, tarére na 're i'aihâimana za'ra wa'aba mono zém hawi, te te 're asõ'reptu za'ra wa'aba mono da, aihi'rata norĩ ne, 're aihâimana za'ra wa'aba mono tõ da oto. E ẽtẽ waipo pré oru na, duré e ẽtẽ waipo prã prata na ma tô ai'awa'âbâ 'wa. Taha na te te ai'awa'âbâ aba õ di. E marĩ wa. Ta norĩ hã wẽ u'âsi 're hâimana za'ra mono õ wa. Tahawa taha na te te aiwa'âbâ za'ra wa'aba õ di.
Ĩsiwadi norĩ, ĩma asawi pese za'ra wa'aba norĩ hã, ãne hã aima waihu'u pese za'ra wa'aba wa, ma'ãpé 'râwi 're asi'madâ'â pese za'ra wa'aba mono, 'Re ihâimana u'âsi mono nhimiroti wẽ'õ'wa norĩ nhimirowasu'u hã 're wapari za'ra wa'aba mono tõ da, Wanhib'apito ãma asiptete sina 're aihâimana u'âsi za'ra wa'aba mono da.
Tahawa, roti tô senai'õ na te te dama 're iroti za'ra mono norĩ wi, te za 're asi'madâ'â pese za'ra wa'aba mo 'râwi, 're iromhuri za'ra wa'aba mono zé wa'â hã 're simini tõ za'ra wa'aba mono da. Uburé marĩ iwẽ na 'Re ihâimana u'âsi mono, za te te aima iwa'âbâ za'ra wa'aba zé hã ubuni na asima 're waibui wa'aba mono da, te za 'râwi 're asi'madâ'â pese za'ra wa'aba mo tiwi.
ကြော်ငြာတွေ