Tawamhã Zezusi hã te duré ãne Timama ma hã mre: — Ĩmama, a hã Danhib'apito uptabi, hâiwa ãma hã, duré ti'ai ãma zama. A hã ma tô rowaihu'u pese 'wa norĩ wi roti iwẽ hã 're i'anhito mo, te te 're waihu'u za'ra mono tõ da hã. Rowaihu'u prãi 'wa na 're ihâimana za'ra mono norĩ ma si, ma tô marĩ iwẽ hã 're i'awaihu'u mo. Tahawa, wa ai'ãma ĩwata, asõpru wa.
Colosu 2:2 - ꞌRe Ihâimana Uꞌâsi Mono Zadawa Wasuꞌu2 Ta norĩ hã tipẽ'ẽzani wẽ ré, siptete sina 're hâimana za'ra mono da, wa tô te ãma 're romhuri pese za'ra. A norĩ wa'aba ãma zama wa tô duré te 're romhuri pese, aipẽ'ẽzani wẽ ré tô asiptete sina 're aihâimana za'ra wa'aba mono da. Tahawa, te za 'râwi simisutu siré 're hâimana za'ra ta norĩ hã, 're isisawi pese za'ra mono zéb zarina. A norĩ wa'aba zama te za duré ãne zarina simisutu asiré 're aihâimana za'ra wa'aba mo. Tawamhã 'Re ihâimana u'âsi mono wasu'uwẽ hã aré dama iwaihu'u'õ hã te te oto waihu'u pese za'ra wa, te za tô ta norĩ hã oto sena na te te 're waihu'u za'ra. Duré a norĩ wa'aba zama hã te za tô oto sena na 're iwaihu'u za'ra wa'aba mo. 'Re ihâimana u'âsi mono wasu'u hã aré dama iwaihu'u'õ hã, ã hã Cristuhu wasu'uwẽ, te dama wasu'u. အခန်းကိုကြည့်ပါ။ |
Colosu 2:2
58 ပူးပေါင်းရင်းမြစ်များ
— Ĩmama ma tô ĩma waihu'u, uburé za 're ihâimana mono zé hã. Ni'wam norĩ hã si'uihâ na te te 're ĩwaihu'u za'ra mono õ di, 're ĩhâimana mono zém na hã. Ĩmama si ma tô ti'ra na ĩwaihu'u pese, 're ĩhâimana mono zém na hã. Duré dasi'uihâ na Ĩmama, da te 're waihu'u za'ra mono õ di za. Ĩwétési wa tô Ĩmama hã waihu'u pese, 're ihâimana mono zém na hã. Te ĩsima 're i'awẽ mono zéb uwaibaba si, wa za ni'wam norĩ ma si te 're awaihu'u, ta norĩ zama Ĩmama hã te te 're waihu'u za'ra mono da, 're ihâimana mono zém na hã.
Teofilu, asawi di. Ãhã na wa za aima rob'ui'éré, Wanhib'apito Zezu Cristuhu wasu'u na, sena na waihu'u da. Ni'wam norĩ hã ma tô Zezusihi wasu'u na te te 're dapo're pu'u na'rata za'ra, titõmo na te te ãma 're i'madâ'â za'ra mono norĩ hã. Ta norĩ hã ma tô iwasu'u na'rata hawi wama rowasu'u za'ra. Tawamhã isimirowasu'u zarina, ma tô iwasu'u na ãma rob'ui'éré za'ra ni, da'ahâ na. Tahawa, wa hã wa duré ĩsima wẽ, te ãma aima rob'ui'éré da. Iwasu'u na'rata hawi, wa tô rosa'rata pese, te waihu'u pese da. Ni'wam norĩ hã ma tô iwasu'u hã aima wasu'u za'ra. Tahawa, wa tô ĩsima wẽ, upsãtã pese na te aima rowasu'u da, rob'ui'éré na, Zezusihi wasu'u hã sena na waihu'u da.
'Re ihâimana u'âsi mono hã waihu'u pese wa, te za te te 're wa'apawaptob u'âsi, marĩ iwẽ hã te te wama 're ipisutu za'ra mono zéb zarina, za te te wama ãma 're i'a'uwaimrami mono zéb zô, wa te wasiwi 're umnhasi za'ra mono sina, sô 're wanhimipari u'âsi za'ra mono da. Tahawa, wa ai'ãma tãma 're ĩmreme u'âsi za'ra wa'wa, atoi uptabi na 're aihâimana u'âsi za'ra wa'aba mono da, duré rowẽ si te te aima 're pisutu za'ra wa'aba mono da, asina 're i'umnhasi za'ra wa'aba mono paramhã. Ipẽ'ẽzani nhimipawaptobzéb zarina, marĩ iwẽ uptabi hã 'Re ihâimana u'âsi mono, za te te aima 're isõmri za'ra wa'aba mono zéb zô, asiwi 're umnhasi za'ra wa'aba mono sina, sô 're asimipari za'ra wa'aba mono zém na, 'râwi asima ãma 're sa'ẽtẽ za'ra wa'aba mono da, wa tô te ĩsima 're aiwẽ za'ra wa'wa.
'Re ihâimana u'âsi mono ãma si, wa za 're wawata u'âsi za'ra. Taha ma si, tãma waihu'u pese di, te te 're iwa'apawapto mono zéb da hã, Zezu Cristuhu wasu'uwẽ hã wa te 're isaze za'ra mono zé hã wa te 're rẽme za'ra mono ãna, wanhiptete u'âsi ãma 're iwanomro mono zéb da hã. Taha wasu'uwẽ hã wa tô te dama 're wasu'u u'âsi. Duréihã iwasu'uwẽ hã, 'Re ihâimana u'âsi mono te te dama 're awaihu'u mono õ di. Iwasu'uwẽ hã dama sa'rese ãna, ma tô aré 're danomro. Tane nherẽ, ma tô 'Re ihâimana u'âsi mono hã iwasu'uwẽ hã dama waihu'u oto, isadawa 'mahârâ'wa norĩ nhimi'ui'éré hawimhã. Tahawa, te oto isimiwada'urizéb zarina si, da te 're waihu'u za'ra daro mono bâ, da te ãma 're isazei pese za'ra mono zéb da hã, duré da te 're iwapari pese za'ra mono zéb da hã oto.
Ãté te za ãne asima 're inharĩ za'ra wa'aba mo: “'Re ihâimana u'âsi mono hã simizawi pese uptabi di. Dasi'uihâ na dawasédé hã da te 're 'manharĩ u'âsi za'ra mono nherẽ, da'ãma 're wa'a su'u mono õ di. Tahawa, ĩwasédé te 're 'manharĩ mono nherẽ, te te 're ĩ'ahâri su'u mono õ di.” Ãne hã asi'uihâ na asi'ãma 're rosa'rata za'ra wa'aba mono õ di za. 'Re ihâimana u'âsi mono hã aiwasété wi 're aipizari za'ra wa'aba mono da si, te simi'ẽ na te te 're ai'madâ'â za'ra wa'wa, simizawi pese uptabi na. E ãne hã zahadu aima waihu'u za'ra wa'aba õ di bété.
Isazei'õ'wa norĩ nhimirosa'rata zarina, oto 're wahâimana za'ra mono õ di, wa norĩ hã. 'Re ihâimana u'âsi mono pẽ'ẽzani ré si, wa oto 're wahâimana za'ra, hâiwa hawi te te wei watẽme isatõrĩ ré si. Iwẽ hã te te wama 're i'anhomri mono na, wa te 're waihu'u za'ra mono da, ma tô Tipẽ'ẽzani hã wei watẽme satõrĩ za'ra, 'Re ihâimana u'âsi mono hã.
Taha zarina, 'Re ihâimana u'âsi mono hã te te siwi 're da'aba'a waihu'u mono õ di, zudeu norĩ hã, duré zudeu'õ norĩ hã, iwada'uri zarina si, pawa'âbâ ãna dama romhuri'wa norĩ hã, duré wada'uri ãna si'uihâ na 're ihâimana za'ra mono norĩ hã, aibâ norĩ hã, duré pi'õ norĩ hã. Simisutu Cristu Zezusihi nhib'a'uwẽ si, te 're aihâimana za'ra wa'aba mo. Tahawa, te oto Abra'ãhã nhihudu na te te 're asisi za'ra wa'wa, 'Re ihâimana u'âsi mono hã. Ãhã wa, iwẽ na si, Abra'ãhã ma te te iropisutuzéb zarina, te za iwẽ na si te te aima ãma 're a'uwaimrami 'wa, Aimama 'wa hã.
Cristu hã wedepo'o nhonhi'rãmi na wazada dâ'â wamhã, ma tô tidâ'âzém na wa'awa'â. Marĩ, wa te 're i'manharĩ wasété za'ra mono zé hã ma tô duré te te wama 're apari, wawasédé hã te te wa'ãma 're ab'madâ'â tõ mono da oto. Ãne wamhã, ma tô Wamama hã wa'ãma uwaimrami wẽ, sa'ẽtẽ na tãma 're hâimana mono wa, te te 're iwa'azawi pese mono zé hã.
Wamama te hã iwaihu'upe hã, te sa'ẽtẽ na 're hâimana tãma. Ãne wa, wa tiwi te 're rowaptẽrẽ u'âsi, aima za'ra wa'aba, Tipẽ'ẽzani na te te 're aipawaptob u'âsi za'ra wa'aba mono da, aihâimana nhiptete sina, ãma 're aihâimana u'âsi za'ra wa'aba mono da, Cristu hã aipẽ'ẽ 're, 're sãmra u'âsi za'ra wa'aba mono da, iwaihu'u pese na asina 're i'umnhasi za'ra wa'aba mono zéb zarina. Wa duré aima za'ra wa'aba, te tiwi 're rowaptẽrẽ u'âsi, te te 're aipawaptob u'âsi za'ra wa'aba mono da, dazawizé hã aima 're ihâimana za'ra wa'aba mono zéb zarina, dama 're 'manharĩ wẽ u'âsi za'ra wa'aba mono da. Dazawizé hã sa'ẽtẽ uptabi na, te Cristuhu ma 're hâimana. Ãne wamhã, uburé asiré isazei'wa norĩ me, te te 're asawi pese za'ra wa'aba mono na, 'râwi asina 're waihu'u za'ra wa'aba mono da, wa ĩsima te 're aiwẽ za'ra wa'wa, ti'ab ré wa te wasina 're waihu'u uptabi za'ra mono õ nherẽ, Cristu te te 're iwa'azawi pese mono zé hã. E marĩ da. Uburé marĩ iwẽ si, 'Re ihâimana u'âsi mono ma 're ihâimana za'ra mono ne, aima zama 're hâimana za'ra wa'aba mono da, dazawizé hã, duré dahâimanazém na rowaihu'u wẽ zéb zama hã.
Cristuhu ãma 're aihâimana za'ra wa'aba mono wa, te oto asiptete sina ãma 're anomro aba mo, tiwi 're aipizari za'ra wa'aba mono ãna. Cristu hã te te 're asawi pese za'ra wa'aba mono na, 'râwi asina 're iwaihu'u za'ra wa'aba mono zéb zarina, te duré aima 're rowẽ wairébé u'âsi 'wa, asina 're aihâtâ'â za'ra wa'aba mono ãna. 'Re ihâimana u'âsi mono pẽ'ẽzani siré te duré 're aihâimana za'ra wa'aba mo, simisutu. Da te 're robzépata za'ra mono wamhã, ma tô duré da'ãma 're aipẽ'ẽzé za'ra wa'aba mo, 're dapawaptob za'ra wa'aba mono da.
'Re ihâimana u'âsi mono te te ĩwẽsãmri da, uburé marĩ hã ĩsihawim na te 're i'ab'manharĩ mono zé hã taré uptabi oto ĩma hã. Misi te ipire uptabi hã ĩma 're hâimana oto. Ĩnhib'apito, Cristu Zezusi hã 'râwi te iwaihu'u pese da si, te ĩma 're hâimana oto, taha si. Marĩ zô 're ĩnhimipari mono õ di oto, ta hã ĩma tarére wa. Roprum ne, te ta hã ĩma 're hâimana oto, 're ĩhâimana 'rata mono zé hã. Tahawa, Cristuhu niwĩ ĩhâiba na te isaprĩ wẽ da si, wa 're ĩsi'madâ'â wẽ u'âsi.
'Re ihâimana u'âsi mono hã ma tô sima ãma roti, ãhã wasu'u hã iwẽ uptabi hã aré da te 're iwaihu'u za'ra mono õ hã te te oto dama awasu'u hâi'ré da sõ'awi, dapoto mono bâ da te oto 're waihu'u za'ra mono da, zudeu'õ norĩ zama. Ãhã wasu'u hã aré da te 're iwaihu'u za'ra mono õ hã, ãne: Cristu hã te oto aipẽ'ẽ 're, 're sãmra za'ra wa'wa. Tahawa, te za tô taha zô si 're asimipari za'ra wa'aba mo, 'Re ihâimana u'âsi mono, iwẽ uptabi hã za te te wama 're i'apisutu mono zô si. Ãne 'Re ihâimana u'âsi mono wasu'u hã, ã hã aré da te 're iwaihu'u za'ra mono õ.
Tahawa, aiwasu'u wẽ hã wa te iwapari na'rata za'ra wa'aba zém hawim haré, wa tô õne u'âsi ai'ãma 're wamreme zusi u'âsi 'wa, 'Re ihâimana u'âsi mono ma. Ta hã te te sima 're aiwẽ za'ra wa'aba mono zéb uwaibaba, niha oto ãma 're aihâimana za'ra wa'aba mono da, duré te te aima 're waihu'u za'ra wa'aba mono da, wa tô wa te tiwi aima 're rowaptẽrẽ u'âsi za'ra wa'wa. Ipẽ'ẽzani hã te za tô te te 're aipawaptob u'âsi za'ra wa'wa, hâiwa hawi dahâimanazém na rowaihu iwẽ uptabi hã oto ãma waihu'u za'ra wa'aba da, taha zarina 'Re ihâimana u'âsi mono te te sima 're aiwẽ za'ra wa'aba mono zé hã asina 're waihu'u za'ra wa'aba mono da oto, 'râwi.
Ta norĩ hã Cristuhu wasu'uwẽ si te te sima 're tété za'ra mono õ di. Cristu hã uburé tizazei'wa norĩ 'madâ'â'wa te pire na 're hâimana taha si, da'rã hã dahâiba ma pire na 're ihâimana za'ra mono ne. Dahâiba na danhorõ 're ihâimana za'ra mono hã te dahi hã te te sitẽme 're tété tete za'ra, danhiptete sina ãma 're dahâimana za'ra mono da, dahâiba na hã. Tane duré Cristu hã te za tinhib'a'uwẽ norĩ hã te te 're apawapto, ta norĩ hã 're sipawaptob za'ra mono da, siptete sina ãma 're hâimana u'âsi za'ra mono da. Te za duré te te 're apawapto, prédup sina ãma 're ihâimana za'ra mono zém na te te sima 're sa'ẽtẽ u'âsi za'ra mono da, 'Re ihâimana u'âsi mono te te tãma 're i'awẽ mono zéb zarina.
'Re ihâimana u'âsi mono ma, 're aimreme zusi aba mono wamhã, wa'ãma zama te za duré tãma 're aimreme zusi aba mo, ta hã te te wama 're a'ridawa mono da, isadawa wasu'u hã wa te dama 're wasu'u za'ra mono da, Cristuhu wasu'uwẽ aré dama iwaihu'u'õ hã wa te dama 're waihu'u za'ra mono da oto. Taha para, ma tô oto dasiwi ĩ'âri ni, dazazéb 're, da te dasiwi ĩnherẽ da. Tahawa, wa oto taha 're nhamra.
Zezusihi wasu'uwẽ na, wa te aima rowasu'u za'ra wa'aba wamhã, taré wamreme na si, wa te aima ãma rowasu'u za'ra wa'aba õ di. 'Re ihâimana u'âsi mono pẽ'ẽzani hã tiwaihu'u pese na te te 're iwapawaptob za'ra mono zém na, wa tô duré aima rowasu'u za'ra wa'aba ni. Zezusihi wasu'uwẽ hã tô sena na, wa te 're i'umnhasi za'ra mono zéb zarina, wa tô duré aima ãma rowasu'u za'ra wa'aba ni. Tahawa, wa tô ai'ãma waihu'u za'ra wa'aba ni, 'Re ihâimana u'âsi mono te te sima i'aiwẽ za'ra wa'aba na hã. Duré a norĩ wa'wa hã ma tô wa'ãma iwaihu'u za'ra wa'wa, ai'rata wahâimana za'ra wa'aba ré, 're iwanomro wẽ mono zém na, wa te aipawaptob za'ra wa'aba da.
Wasiré isazei'wa norĩ, wa za duré aima roti za'ra wa'aba ni. Ni'wam norĩ hã 're wa'a za'ra mono wamhã, te za tãma 're iroti pese za'ra wa'aba mo, simi'ẽ na si'uihâ na te te tô sima 're romhuri za'ra mono da. Duré ni'wam norĩ hã robzei ãna 're hâimana za'ra mono wamhã, te za tô duré 're ipawaptob za'ra wa'aba mo, robzei'õ u'âsi 're nomro mono tõ da. Duré ni'wam norĩ hã, 'Re ihâimana u'âsi mono zadawa wasu'u te te waihu'u za'ra nherẽ, iwẽ na si 're nomro tõ mono da, te te sima 're rosa'rata za'ra mono õ wamhã, te za 're ipawaptob za'ra wa'aba mo. Da'ãma 're aiwa'a za'ra wa'aba mono õ di za. Aiwaimri te za 're aihâimana za'ra wa'aba mo, sada.
Tô sena Zezu Cristuhu wasu'uwẽ hã wẽ uptabi di, aré dama sa'rese õ nherẽ, Wamama hã te te oto dama ihâi'ré hã wa te 're isaze za'ra mono zé hã, ãma 're iwanomro wẽ mono zéb da hã. Ãne te te dama iwaihu'uzé hã: “A'uwẽ na ma podo, ti'ai ãma. Duré tô sena i'ra 're imorĩ wẽ uptabi na, ma tô Tipẽ'ẽzani na dama waihu'u za'ra. Duré hâiwa ãma 'Re ihâimana u'âsi mono ma romhuri'wa norĩ hã ma tô titõmo na 'madâ'â za'ra. Duré a'uwẽ mono bâ 're idahâimana za'ra mono norĩ hã ma tô iwasu'uwẽ na da te 're dapo're pu'u za'ra, daro mono bâ. Ma tô duré da te dasina 're umnhasi za'ra. Duré rowẽ uptabi u ma tô mo, hâiwa u.”
Wawasété na 're wanomro mono wa, wapẽ'ẽ na 'râwi 're iwasisãmri za'ra mono na, 're iwasiwẽ'õ za'ra mono zé hã ma tô Cristu tiwapru na hã te te wama 're apari, duréihã sasedoti norĩ hã te te ãma 're dahâiba wẽ za'ra mono da, danhimizama wapru na suru na te te ãma 're idahâiba di'i za'ra mono ne. Sasedoti norĩ hã 're sihâiba wasété za'ra mono ãna, 'Re ihâimana u'âsi mono u 're sisisi mono da, 're isihâiba upsõi pese za'ra mono ne, wa oto wa norĩ hã wahâiba upsõi pese ne tãma 're wahâimana za'ra, 'Re ihâimana u'âsi mono ma si. Tahawa, wa za oto wapẽ'ẽ na 'râwi itẽme 're wasihutu, wahâimanazé sena ré si, 'Re ihâimana u'âsi mono u hã, õhõ si wa te oto wasina 're i'umnhasi za'ra mono zéb zarina.
Ĩsisãnawã norĩ, tô sena ma tô 'Re ihâimana u'âsi mono hã aipisutu za'ra wa'wa, isib'a'uwẽ 're anomro aba mono da. Ãne wa, te za sada 're asiptete za'ra wa'aba mo, ãma 're aihâimana wẽ za'ra wa'aba mono da, 'râwi isib'a'uwẽ na asina 're waihu'u za'ra wa'aba mono da. Ãne wamhã, Wanhib'apito hã 're rẽme za'ra wa'aba mono õ di za. Duré aiwasété u 're aipizari za'ra wa'aba mono õ di za oto.
Ma'ãpé, 're aihâimana wẽ u'âsi za'ra wa'aba mono, aihâimana wẽ hã asima 're sa'ẽtẽ za'ra wa'aba mono da, Wanhib'apito Zezu Cristu te te 're iwa'apawapto mono zém na. Duré Wanho'reptui'wa Zezu Cristuhu ãma rowaihu hã, te za asima 're isa'ẽtẽ za'ra wa'aba mo. Ta hã Wanho'reptui'wai wa, wa za ãma 're wawata u'âsi za'ra. Tane tô.
Õhõ na si 're wahâimana za'ra mono wamhã, 'Re ihâimana u'âsi mono 'ra, 're iwanomro mono na wa za wasina waihu'u pese za'ra ni, roti tô sena uptabi na si 're iwanomro mono na. Duré isõ'a 're wahâimana za'ra mono nherẽ, 'râwi wasina 're wahâtâ'â za'ra mono tõ da, te za wapẽ'ẽ 're wama 're siwaihu'u u'âsi za'ra, wapẽ hã i're wama 're simi'wara mono da.
ကြော်ငြာတွေ