Apocalipsi 9:20 - ꞌRe Ihâimana Uꞌâsi Mono Zadawa Wasuꞌu

²⁰ Tawamhã dahâiba ré idasi'atarẽme mono hã idadâ'â mono õ hã, 'râwi dasi'uihâ na 're dasisãmri za'ra mono õ di. Zahadu te wa'uburé norĩ ãma si 're dawata za'ra. Te duré zahadu ropoto hâiba 'manharĩ ãma si 're dawata za'ra, danhib'manharĩ nhipese na da te 're irob'manharĩ za'ra mono ãma, ẽtẽ waipo pré oru 'manharĩ ãma, duré ẽtẽ waipo prã prata 'manharĩ ãma, duré ẽtẽ topsada brõzi 'manharĩ ãma, duré ẽtẽ 'manharĩ ãma, duré wede 'manharĩ ãma. Zahadu da te rẽme mono õ di. Ropoto hâiba 'manharĩ hã te te rob'madâ'â õ nherẽ, duré simipari õ nherẽ, duré morĩ õ nherẽ, te zahadu ãma 're dawata za'ra, 'Re ihâimana u'âsi mono upana.

Apocalipsi 9:20 ပူးပေါင်းရင်းမြစ်များ

Daniéu 5:23

Tane nherẽ, hâiwa ãma Uburé Danhib'apito da, i'aihâimanazéb zarina, ma tô hâsizé 'Re ihâimana u'âsi mono nhorõwa 'ri 'rãihâ 're, 're isimasa mono, da te iwaibu za'ra hã dama i'ru, da te we 'wasari da, sô i'aihârâ za'ra dama ipire norĩ hã duré aimro norĩ, duré aimro prã aima 're ihâimana za'ra wa'aba norĩ te te uwa 'rãi wa'u isé iwa âhuri da hã, asiré. Taha nhipai u ma tô duré ihâiba'õ norĩ ãma hã aiwa, ẽtẽ waipo prã prata 'manharĩ na, ẽtẽ waipo pré oru 'manharĩ na, ẽtẽ topsada brõzi 'manharĩ na, isi'uwazi tete 'manharĩ na, wede 'manharĩ na, duré ẽtẽ 'manharĩ na, te te 're irob'madâ'â waihu'u mono õ na, duré 're isimipari waihu'u mono õ na, marĩ te te 're iwaihu'u za'ra mono õ na. Tane nherẽ, a hã, 'Re ihâimana u'âsi mono dapãrĩ waihu'u pese 'wa na duré dahâiba ré na te te 're ida'arẽme mono ãma aiwata õ di, uburé marĩ aima 're hâimana mono da, te te sima 're irowairébé mono ãma hã.

Daniéu 5:4

Ma tô ẽtẽ waipo pré oru 'manharĩ na, ẽtẽ waipo prã prata 'manharĩ na, ẽtẽ topsada brõzi 'manharĩ na, isi'uwazi tede ferru 'manharĩ na, wede 'manharĩ na, duré ẽtẽ 'manharĩ na ropodo ihâiba'õ norĩ ãma hã tiwata za'ra.

Mateu 21:32

Zuwã Batista hã ma tô aré atẽme timorĩ za'ra wa'wa, 'Re ihâimana u'âsi mono te te sima 're i'aiwẽ za'ra wa'aba mono zéb zarina 're anomro wẽ wa'aba mono zéb da hã, te te aima 're wasu'u za'ra wa'aba mono da. Tane nherẽ, isimirowasu'u na hã ãma 're saze za'ra wa'aba mono õ di. Rob'uiprazé arĩ ubumroi'wa norĩ si ma tô ãma saze za'ra isimirowasu'u na hã, pi'õ hã aibâ zô si siwa'ru 're ihâimana za'ra mono norĩ zama. Tawamhã ta norĩ hã atõmo na 're 'madâ'â za'ra wa'aba mono nherẽ, a norĩ wa'aba zama asimirosa'rata na 're saprĩ za'ra wa'aba mono õ di, isimirowasu'u na ãma 're isaze za'ra wa'aba mono zéb da hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:29

Tahawa, wa norĩ hã 'Re ihâimana u'âsi mono 'ra wamhã, e marĩ na wa za wa te ãma 're rosa'rata za'ra, 'Re ihâimana u'âsi mono ãma hã. E ẽtẽ waipo pré oru 'manharĩ na wa za wa te ãma 're rosa'rata za'ra. E ẽtẽ waipo prã prata 'manharĩ na, e ẽtẽ 'manharĩ na wa za wa te ãma 're rosa'rata za'ra. Mare di. Ãne, wa te ãma 're rosa'rata za'ra mono õ di za. Danhipese na da te 're irob'manharĩ za'ra mono nei õ di, 'Re ihâimana u'âsi mono hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 19:26

Ãhã na, asi'uihâ na ma tô Pauluhu nhimiroti hã iwapari za'ra wa'wa. Isimiromhuri hã ma tô duré i'madâ'â za'ra wa'wa, ãme Éfézu ãma hã duré uburé Azia 'remhã. Ta hã ma tô te te dama 're anharĩ, 're iwahâimana za'ra mono zém hawi, 're dasipizari za'ra mono da. Da'ahâ na ma tô saze za'ra ni, isimirowahutu na hã. Marĩ hã danhib'rata na da te 're i'manharĩ za'ra mono hã tô sena iwaihu'u pese õ di, u, ãma 're idawata za'ra mono da hã. Ãne te te dama 're rowahutu, ta hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:41

Tahawa, tame ma tô powawẽ zapu hâiba ne hã tãma 'manharĩ za'ra, ãma 're iwata za'ra mono zéb da hã, 'Re ihâimana u'âsi mono upana. Ãhã wamhã, ma te tinhimizama hã duré oto siwi simro, tinhimirob'manharĩ ãma wata za'ra da. Aimawi te te sima rob'manharĩ za'ra wẽ te, ma tô duré dasa hã siwi 'manha.

2 Corĩtu 12:21

Ãma atẽme ĩwisi aba wamhã, ãté ĩpẽ'ẽzé te, wa za aiwa'õ, ai'ãma ĩpẽ'ẽzé uptabi za'ra wa'aba wa. Duréihã ai'ahâ na ma tô aiwasédé hã 're i'manharĩ za'ra wa'aba mo aré. Ma tô duré asina 're asimisaihuri za'ra wa'aba mo, pi'õ na, aibâ na zama. Asiséb ãna, ma tô duré marĩ iwasétére zô si asima 're asõpré wa'aba mo. Ãne na aiwasédé hã 're 'manharĩ za'ra wa'aba mono nherẽ, aiwasété wi 're aipizari za'ra wa'aba mono õ wa, ãté te za ĩwi tirobzei'õ pese. Tahawa, ãté ĩnhiséb di za, Ĩnhib'apito ma hã, duré 'Re ihâimana u'âsi mono ma hã, ai'u'âbâ za'ra wa'aba hã.

1 Timotiu 4:1

'Re ihâimana u'âsi mono hã, Tipẽ'ẽzani na ma tô ãne dama waihu'u: “Rob'rãsutuzéb u romhuture wapsi, te za ni'wam norĩ hã tinhimizaze rẽme za'ra, Zezu Cristuhu nhimiroti te te aré 're isaze za'ra mono zé hã. Ihâiba'õ norĩ nhimiroti hã tô sena newa te za te te 're wapari za'ra, wa'uburé norĩ nhimiroti zarina 're nomro mono da oto.” Ãne ma tô dama waihu'u.

Apocalipsi 15:1

Tawamhã wa tô duré marĩ hã 'madâ, hâiwa nhirõtõ na dama isa'rese'õ hã ãma 're idatob'uzu za'ra mono hã. Hâiwa ãma romhuri'wa norĩ hã te 7 na aimasa. Ta norĩ ma, ma tô 'Re ihâimana u'âsi mono hã pisutu, 7 na rob'manharĩ pipa mono na hã, irẽme ma te te taha na dama ãma 're rob'manharĩ za'ra mono da. Ã norĩ hã 'Re ihâimana u'âsi mono nhimi'ahârizéb 'rãsudu, te wasu'u.

Apocalipsi 16:8

Taha pari, hâiwa ãma romhuri'wa hã maparane si'uiwa na ãma ma tô duré ta hã tinhi'u'awi wamhã sa'wa, bâtâ nhisiwi. Te te sa'wari wamhã, ma tô titõmo wa'ro pese. Tahawa, ma tô te te dahâiba zata, bâtâ tõmo wa'ro zé pire hã.

Apocalipsi 9:19

Ãne ma tô tizadai'ré ro'o nhipãrĩ na te te da'uprosi, tizamo na zama. Isamo mono hã wahi zamo ne hã. Tô wahi 'rã ne na isamo 'rãsutu mono hã. Taha na ma tô te te dahâzu.

Apocalipsi 9:21

Duré zahadu danhipãrĩ na hã 're dasiwẽ'õ za'ra mono õ di, duré simi'â na, duré dahâiba na dasina 're danhimisaihuri za'ra mono na hã, duré dasiwi romnhimi'uri na hã. Zahadu dawasété wi 're dasipizari za'ra mono õ di. Õne u'âsi te marĩ iwasété na si 're dahâimana za'ra.