Apocalipsi 9:18 - ꞌRe Ihâimana Uꞌâsi Mono Zadawa Wasuꞌu

¹⁸ Tawamhã ã hã, unhama ro'o ne hã duré isizé hã duré ẽtẽ ro'o nhizédé uzé pire hã ma tô te te da'uprosi, awaru zadai'ré hawi, iwairébé mono hã. Daro mono bâ da'ahâ uptabi prã na ma tô te te da'uprosi, daza'ratazé wãiwa prã na.

Apocalipsi 9:18 ပူးပေါင်းရင်းမြစ်များ

Apocalipsi 8:10

Tawamhã hâiwa ãma romhuri'wa hã si'ubdatõ ãma hã ma tô duré tinhimnhihârâzém na amnhihârâ. Simnhihârâ wi, ma tô wasi isa'ẽne hã waptãrã, hâiwa hawimhã. 'Rãsitõ ro'o ne, te ro'o'a'a. Waptã'ã wamhã, nima niwĩ panho'õmo norĩ nhisiwip si, ma tô waptãrã. Isa'ratazé wãiwa prã na panho'õmo nhisiwi, ma tô waptãrã, ub're nhisiwib zama.

Apocalipsi 8:11

Tawamhã pa nho'õmo norĩ nhisiwi iwaptã'ãzéb ãma hã ma tô dawi âwazari zé hâza'õtõ pese. Tahawa duré oto âzé uptabi di. Tawamhã da te âhuri wamhã, ma tô da'ahâ na dasi'utõrĩ, âzé pire uptabi wa. Wasi isa'ẽtẽ nhisi hã Âzé pese 'wa na isisi hã.

Apocalipsi 8:12

Tawamhã hâiwa ãma romhuri'wa hã maparane si'uiwa na ãma hã ma tô duré tinhimnhihârâzém na amnhihârâ. Simnhihârâ wi, ma tô bâdâ hã itõmo wãiwa prã na titobra. A'amo zama ma duré itõmo wãiwa prã na titobra. Wasi norĩ zama, ma duré itõmo wãiwa prã na tobra. Tahawa, te te rob'uiwẽ prã za'ra di wasi norĩ hã, bâtâ norĩ me, duré a'amo norĩ me.

Apocalipsi 8:7

Tawamhã imorĩ'rada hã ma tô tinhimnhihârâzém na amnhihârâ. Simnhihârâ wi, ma tô tãzâ hã rere ti'ai u, unhama zama. Dawaprui wazari, ma rere uzâ hã, duré tãzâ hã. Ti'ai u rere'e wamhã, daro mono bâ ma tô ti'a hã zada, iwãiwa prã na. Wede hã 're isimasa mono hã ma tô duré si'uzâ, isa'ratazé wãiwa prã na. Du zama hã ma tô uburé sihõmo, daro mono bâ.

Apocalipsi 8:8

Tawamhã isãna'remhã hâiwa ãma romhuri'wa hã ma tô duré amnhihârâ, tinhimnhihârâzém na. Simnhihârâ wi, ma tô marĩ hã ẽtẽ 'rãihâ ne hã âi ba waptãrã, unhama ro'o ré. Waptã'ã wamhã, â poré mono bâ ma tô â wãiwa prã na hã te te âwapru.

Apocalipsi 8:9

Tepe norĩ hã â 'rowi 're ihâimana za'ra mono hã ma tô duré si'utõrĩ, ahâ prã na, isa'ratazé wãiwa prã na. Ma tô duré uba're hã ahâ prã na si'utõrĩ, â nhisi baba 're isisa'rei mono hã. Isa'ratazé wãiwa prã na hã ma tô si'utõrĩ.

Apocalipsi 9:15

Tawamhã ãhã wamhã, ma tô oto tãma wasihu za'ra. Duréihã ma tô 'Re ihâimana u'âsi mono hã ãma ropisutu siromo za'ra, niwa bâdâ te te ipisutuzé hã, iwa waptã'ã wapsi, te te da'uprosi mono da. Tô ã bâtâ na iwa waptã'ã wa, ma tô ipawasisizé hã tãma wasihu za'ra. Tawamhã daro mono bâ da'ahâ uptabi prã na te za wa'uburé norĩ hã te te da'uprosi, daza'ratazé wãiwa prã na.

Apocalipsi 9:17

Tawamhã awaru, wa tô 'madâ'â za'ra, dasi'wapé zô ãma 're idasisa'rei mono zé hã. Ĩnhotõ 'rowim ne, wa tô 'madâ'â za'ra, isisiwi isi'ubumroi mono norĩ zama. Ta norĩ hã isi'uwazi tete 'manharĩ ne ré, te sõ'utu ubu ré isisiwi asimro. Isõ'utu ubu mono hã unhama ro'o pré ne na, iwamnarĩ mono hã. Duré sõté uzé ne na isõ'utu ubu zé wamnarĩ mono hã. Duré 'rẽnhipré nho'utu uzé ne na, isõ'utu ubu zé wamnarĩ mono hã. Duré awaru 'rãi mono hã, aiwa hu'u zérépa 'rã ne. Isadai'ré hawi mono hã te unhama ro'o mono ne hã nasi wairé, duré isizédé hã, ẽtẽ ro'o nhizédé uzé pire zama. Duré isizédé uzé pire hã te duré nasi wairé, dapãrĩzé hã.

Apocalipsi 9:19

Ãne ma tô tizadai'ré ro'o nhipãrĩ na te te da'uprosi, tizamo na zama. Isamo mono hã wahi zamo ne hã. Tô wahi 'rã ne na isamo 'rãsutu mono hã. Taha na ma tô te te dahâzu.