Apocalipsi 8:5 - ꞌRe Ihâimana Uꞌâsi Mono Zadawa Wasuꞌu

⁵ Tawamhã hâiwa ãma romhuri'wa hã ma tô pré'a 'manhe, u'awire ne hã oru 'manharĩ 're, wedewati isadaze nhemezéb 're. Wedeza ne na, wedewati zadaze hã da te 're izata za'ra mono zém hawi ma tô pré'a 'masisi. Te te 'masisi wamhã, ma tô õne haré ti'ai u sa'wa, uzâ hã. Te te sa'wari wamhã, ma tô tãiwapsa hã watobro, duré tãirãrã'ã hã. Tãsi'ubuzi zama, ma tô duré watobro. Ma tô duré ti'ai popo hã watobro.

Apocalipsi 8:5 ပူးပေါင်းရင်းမြစ်များ

Ezodu 19:16

Tawamhã si'ubdatõ bâtâ ãma mararé ma tô tãirãrã hã, duré tã si'ubuzi hã watobro. Hâiwa 'rãdâ hã ma tô duré ẽtẽ nhisiwimhã sihâi'ré. Tahawa, ma tô danhimnhihârâzé hârâ hã wapari za'ra ni. Tawamhã uburé 'ri nhoré ãma idahâimana za'ra hã ma tô dapahi te tarẽrẽ'ẽ za'ra ni.

Mateu 24:7

Danhipti'ai amoi u te za dasisô 're dapra, 're dasi'wapé za'ra mono da. Tawamhã daro mono bâ te za tô 're dasiwasutu za'ra. Nima niwĩmhã danho õ wa, te za duré da te 're robzépata za'ra, dasa surure wa. Nima niwĩm norĩ ré hã te za duré ti'a hã iré 're popo'o za'ra.

Luca 12:49

Te duré tãma nharĩ za'ra, ãne: — Ti'ai u, wa wei mo, ti'a na te sazu da, zata da. Zata siromo 'wa'âhã, aré ĩma wẽ di.

Zezusihi zadawa wasuꞌuꞌwa norĩ nhimiromhuri na robꞌuiꞌéré 16:26

Tawamhã te awa'awi ti'a hã 're wara. Ti'ai 'rowi, 'ri na'rata tétézé hã te sãsã'ã, dazazéb 'ri hã. Tawamhã awa'awi ma uburé 'ridawa nhitobzé hã si'ridawa za'ra. Dapawasisizé hã duré daparatétézé hã ma tô sisinarĩ, dazazéb 're isimasam norĩ ma, isi'uwazi nhorõ rudu hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:31

Tawamhã 'Re ihâimana u'âsi mono ma, mreme zusi pari, 'ri ma tô iré tisãsã'ã za'ra. Tawamhã 'Re ihâimana u'âsi mono pẽ'ẽzani na ma tô aptete za'ra, ipẽ'ẽ mono bâ. Pahi ãna, ma tô dama sadawa wasu'u za'ra oto, 'Re ihâimana u'âsi mono hã.

Apocalipsi 11:13

Tawamhã zasi zahuré wi, awa'awi te za sa'ẽtẽ uptabi ti'a sãsã hã watobro. Watobro wamhã, 'ri hã nima norĩ hã te za sina, Zeruzalẽ ãma, 'ri nho'õmo 'remhã 're isimasa mono hã. 10 na 'ri 'maihâimana wamhã, te za misi si dawi rere'e. Te za duré 7 miu na tadâ'â za'ra ni, ti'a sãsã'ã na hã. Tawamhã dadâ'â ãna idasi'atarẽme mono hã te za tapahi uptabi za'ra ni. 'Re ihâimana u'âsi mono ãma te za tawata za'ra ni, hâiwa ãma 're isãmra mono ãma, simi'manharĩ waihu'u pese uptabi wa.

Apocalipsi 11:19

Tawamhã hâiwa ãma 'Re ihâimana u'âsi mono nhorõwa 'ri ãma hã, ma tô ni'wa hã 'ridawa hã 'ridawa. Te te 'ridawa wamhã, te oto wedehâ're hã sõ'awi 'ri para za. Wedehâ're 're, te ẽtẽpo i'ui'éré ré hã da'wa, duréihã 'Re ihâimana u'âsi mono te te tinhib'a'uwẽ ma iropisutuzéb ui'éré ré hã. Tawamhã ma tô tãiwapsa hã watobro, tãirãrã'ã zama, tãsi'ubuzi zama. Ti'a hã ma tô duré sãsã'ã. Tãzâ hã ma duré asa'wa, ipire hã.

Apocalipsi 4:5

Duré danhib'apito simasisizém hawi te tã si'ubuzi ne hã nasi ai'ubuzi, iwapsa'a zama, duré irãrã'ã zama. 'Rãsitõ hã te duré isõ're tiro'o za'ra, 7 na ihâiba hã, iro'o hâ hã. Ta norĩ hã 'Re ihâimana u'âsi mono pẽ'ẽzani nhimiromhurizéb zarina hã 7 na. Â poré hã te duré isõ're nomro. Â hã isarob'a uptabi, simhi isarob'a uptabi ne hã. Maparane si'uiwa na ropoto na ihâiba norĩ hã te duré 'râwi imana wawi si'uiwada za'ra. Ã norĩ hã ihâiba nho're niwĩ itob ahâ. Duré ibabarã niwĩmhã tob ahâ di duré. Ã norĩ hã tob ahâ wa, ihâiba upsibi ré norĩ hã wa tô 'madâ'â za'ra.

Apocalipsi 6:12

Tawamhã wa tô duré 'madâ. Te 'madâ'â wamhã, ma tô Pone'ẽrebâ hã duré pru imropâ ãma hã, ibaihâ nhinha uptobzé hã. Te te pru wamhã, awa'awi ma tô ti'a hã sãsã'ã, sa'ẽtẽ uptabi. Bâdâ hã ma tô duré titoptâ'â, zazahâ ihâ 'rãdâ'â uptabi ne. A'amo hã ma tô duré titõmo wapru.

Apocalipsi 8:3

Tawamhã hâiwa ãma 'Re ihâimana u'âsi mono ma romhuri'wa hã ma tô wei mo, misi aimawi hã. Wedeza ne 'rata te za, 'Re ihâimana u'âsi mono ma, danhoprubzéb da, wedewati isadaze hã da te tãma 're izata za'ra mono zéb 'rata. U'awire ne hã ẽtẽ waipo pré oru 'manharĩ te 're ti'â, wedewati isadaze nhemezéb da hã. Tawamhã wedewati isadaze hã ma tô ahâ na tãma sõmri za'ra ni, 'Re ihâimana u'âsi mono ma, te te zata za'ra da. Tawamhã wedeza ne oru 'manharĩ ãma ma tô zata za'ra, danhib'apito simasisizém nho're. 'Re ihâimana u'âsi mono hã isadaze hã te te hã da, ma tô zata za'ra, wedewati isadaze hã. Te te zata za'ra wamhã, ma tô isizé hã si'ré hâimo, 'Re ihâimana u'âsi mono nhib'a'uwẽ 're imreme zusi mono mreme siré. Hâiwa ãma romhuri'wa nhib'rata hawi, te isizé hã si'ré hâimo, 'Re ihâimana u'âsi mono nho're isam nhib'rata hawi.