Apocalipsi 7:17 - ꞌRe Ihâimana Uꞌâsi Mono Zadawa Wasuꞌu

¹⁷ E marĩ wa, te te 're robzépata waihu'u za'ra mono õ di za oto. Pone'ẽrebâ hã danhib'apito simasisizéb ãma isa hã te te 're 'madâ'â pese za'ra mono wa, te te 're robzépata waihu'u za'ra mono õ di za. A'ubuni wi, danhimizama da te 're i'madâ'â pese za'ra mono ne, te za te te 're 'madâ'â pese za'ra. Te za duré ub're u te te 're simroi u'âsi, â u'âsi u, da te 're âhuri mono wa, 're idanomro u'âsi mono zéb u. 'Re da'ru'ru mono wa, da'upĩ hã da te dasima 're i'u'õ za'ra mono ne, te za duré te te 're apawapto, pẽ'ẽzé ãna oto 're nomro u'âsi mono da.

Apocalipsi 7:17 ပူးပေါင်းရင်းမြစ်များ

Salmu 22:26

Isimarĩ'õ norĩ te za tisa hã te te ãma 're huri, te te 're i'mahâpãrĩ za'ra mono zéb u. Duré Uburé Danhib'apito zô 're isõpré mono norĩ si, te za ãma 're wata u'âsi za'ra. Ta norĩ hã õne u'â rowẽ sina 're ihâimana za'ra mono da si, ĩma iwẽ hã.

Salmu 23:5

Dasa isa'ẽne hã te ĩma 're i'a'manharĩ u'âsi mo, ĩnhitob'ru norĩ tõmo nho'a hã. A hã te ĩpire na 're ĩnhimizusi mo. Te duré ĩnhimihâsizé hã ĩma 're i'masisi mo, taré 're ipu'u mono zéb u.

Mateu 2:6

“A norĩ wa'wa hã Belẽ ãma 're aihâimana za'ra wa'aba mono norĩ Zudaha nhihudu norĩ nhipti'ai ãma 're aihâimana za'ra wa'aba mono norĩ hã dama aiwapu na 're aihâimana za'ra wa'aba mono newa, te za oto dama asisi za'ẽtẽ na dama 're aihâimana u'âsi za'ra wa'aba mo. E marĩ wa. Tame danhib'apito da hã za poto wa, ĩnhib'a'uwẽ norĩ hã te te 're ab'madâ'â pese mono da, Izaraéu nhihudu norĩ hã.”

Mateu 5:4

— Duré, ni'wam norĩ hã ti'ab ré dawasété u'âsi 're danomro mono wa, da'ãma 're ipẽ'ẽzé za'ra mono norĩ hã ta norĩ ma si tãma 're rowẽ za'ẽtẽ za'ra mono di za. Ta norĩ ma si te za 'Re ihâimana u'âsi mono hã te te tãma 're pisutu za'ra, toi u'âsi ãma 're ihâimana za'ra mono zéb da hã.

Zuwã 10:11

— Wa hã pone'ẽrebâ 'madâ'â'wa iwẽ na, wa ĩsiwasu'u. Pone'ẽrebâ 'madâ'â'wa iwẽ, i'u'âbâ za'ra dâ'â da nherẽ, tihâiba te te 're sawi mono õ di.

Zuwã 10:14

Wa hã pone'ẽrebâ 'madâ'â'wa, isimizawi pese na, wa tô ĩsina simiré'é, ĩzazei'wa norĩ te 're azawi pese mono wa. Ĩmama hã ma tô ĩwaihu'u, ti'ra na. Wa hã wa duré õ hã waihu'u, Ĩmama na. Tane duré ĩzazei'wa norĩ hã wa tô te 're awaihu'u u'âsi, ĩnhib'a'uwẽ na. Ĩzazei'wa norĩ hã ma tô duré ĩwaihu'u za'ra, tinhib'apito na. Ta norĩ zada, wa za ĩsisawi ãna hã dârâ, te 're anho'reptui mono da.

Zuwã 4:10

Tahawa, ma tô Zezusi hã asa tãma tinha, ãne: — 'Re ihâimana u'âsi mono nhoprubzé hã waihu'u 'wa'âhã, duré ĩwaihu'u 'wa'âhã, te aré â hã ĩwi iwaptẽ. Tawamhã â u'â hã wa aré aima tisõ.

Zuwã 4:11

Tawamhã te duré pi'õ hã asa tãma tinha, ãne: — Â zô ab're hã, ab're 'rehâ di. A hã ai'ubana te asã. Tiha na â hã a'âri õ di za. E niha te za tawamhã i'a'â, â u'â hã.

Zuwã 4:14

Ĩnhib'â hã te dama 're anhomri mono wa, da te 're âhuri mono wamhã, 'rubu ãna te za iré 're dasi'ubumroi u'âsi. Ub're 're isidototo u'âsi za'ra mono ne, dawi 're si'utõrĩ waihu'u za'ra mono õ di za, da te 're âhuri mono wamhã. Tawamhã 're dadâ'â za'ra mono ãna, te za 're dasi'ubumroi u'âsi, hâiwa ãma.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:28

Tahawa, te za 're asi'madâ'â pese za'ra wa'aba mo, 're anomro wẽ wa'aba mono da. Duré isazei'wa norĩ hã te za 're i'madâ'â pese za'ra wa'aba mo, siré 're isi'rã'õtõ mono norĩ hã. 'Re ihâimana u'âsi mono pẽ'ẽzani hã ma tô sima aipisutu za'ra wa'wa, isazei'wa norĩ hã tãma 're 'madâ'â za'ra wa'aba mono da. Ti'ra wapru na ma tô isazei'wa norĩ hã wa'â, tite da. Tahawa, pone'ẽrebâ 'madâ'â'wa norĩ ne, te za 're ida'madâ'â pese za'ra wa'aba mo, 'Re ihâimana u'âsi mono nhib'a'uwẽ norĩ hã.

1 Pedru 5:2

Tahawa, wa za aima waihu'u za'ra wa'wa, 'Re ihâimana u'âsi mono hã tinhib'a'uwẽ te te aima 're ipisutu za'ra wa'aba mono hã ato sina tãma 're pawaptob za'ra wa'aba mono da, tãma 're aiwa'a za'ra wa'aba mono ãna. Ãne da, ma tô sima aiwẽ za'ra wa'wa, Wamama hã. Rob'uiprazéb zô tãma 're dapawaptob za'ra wa'aba mono õ di za. Tô sena asima 're iwẽ uptabi za'ra wa'aba mono zéb zarina si, te za tãma 're idapawaptob za'ra wa'aba mo.

Apocalipsi 14:4

à norĩ hã ma tô 're si'madâ'â pese za'ra, 're siwasété tõ za'ra mono da hã, pi'õ na 're idanhimisaihuri za'ra mono õ ne. Duré pi'õ za'rese'õ'wa 're ihâimana za'ra mono ne, ma tô 're si'madâ'â pese za'ra. Pone'ẽrebâ nhirã zarina si ma tô 're nomro. Ta norĩ si ma tô 're idanomro wasété mono zém hawi wa'âbâ za'ra. Ta norĩ hã ma tô 'Re ihâimana u'âsi mono ma sisõmri na'rata za'ra, Pone'ẽrebâi ma zama.

Apocalipsi 21:22

Tawamhã 'ri nho'õmo ãma 'Re ihâimana u'âsi mono nhorõwa 'ri hã iwa ihâimana hã sãmri õ di. Robaba di. Uburé Danhib'apito uptabi hã, 'Re ihâimana u'âsi mono iwaihu'u pe hã, duré Pone'ẽrebâi me oto 'râwi da'rata 're hâimana u'âsi zahuré mono na dâ'âsina, isõrõwa hã oto hâimana õ di.

Apocalipsi 21:23

Duré 'ri nho'õmo na hã bâdâ te te 're rob'uiwẽ mono õ di za oto, duré a'amo zama hã. 'Re ihâimana u'âsi mono nhimirowa'a si te za oto te te 're rowa'a, Pone'ẽrebâ nhimirowa'a zama.

Apocalipsi 21:4

Te za duré oto da'atõmo u'õ, dapẽ'ẽzé õ u'âsi 're dahâimana u'âsi za'ra mono da. Tawamhã duré oto 'Re dadâ'â za'ra mono õ di za. Duré 're dasiwa'õ za'ra mono õ di za oto. Duré dahâzé, da te 're sépata za'ra mono õ di za oto. E marĩ wa. Uburé 're iromhâimana 'rata mono zé hã si'utõrĩ pese wa oto.

Apocalipsi 21:6

Tawamhã te duré ĩma tinha, ãne: — Tâibâ oto. Wa tô te ãma a'uwaimrami. Wa hã isãna'rata hawimhã marĩ õ ré hã, wa tô 're ĩhâimana u'âsi. Uburé marĩ hã si'utõrĩ pese nherẽ, wa hã marĩ zarina ĩsi'utõrĩ õ di za. Õne u'âsi, wa za 're ĩhâimana. Tawamhã ni'wam norĩ hã te te 're 'rubu za'ra mono wamhã, wa za â u'â hã te tãma 're õb za'ra, wa'âbâ ãna, da te 're âhuri mono wa, ĩsiré rowẽ na 're idanomro u'âsi mono zéb da hã.

Apocalipsi 22:1

Tawamhã hâiwa ãma 'Re ihâimana u'âsi mono ma romhuri'wa hã, tô õ hã ma tô duré ĩzaprõ, â u'â hã te 'madâ'â da. Â u'â hã da te 're âhuri mono wa, dato sina 're idanomro u'âsi mono zé hã. Simhi zarob'a uptabi ne â zarob'a uptabi di, â u'â hã. Panho'u 're ipraba za'ra mono ne, te 'Re ihâimana u'âsi mono norĩ simasisizéb zahâpâ hawi tipraba, Pone'ẽrebâ simasisizéb zahâpâ hawi me.

Apocalipsi 4:11

Ãne te nasi ãma tiwata za'ra: “Wanhib'apito, 'Re ihâimana u'âsi mono, a hã aiwẽ uptabi di. Aiwaihu'u pese di. Aiwaihu'u pese na ma tô i'aropoto mo. Asima iwẽ zarina ma tô uburé pese i'aropoto mo. Asima iwẽ zarina te oto uburé marĩ hã 're hâimana za'ra, asimipoto mono bâ. Tahawa, uburé i'aropoto mono zéb zarina tô ibâre, wa ai'ãma si 're wawata u'âsi za'ra.”

Apocalipsi 5:6

Tawamhã wa tô 'madâ, Pone'ẽrebâ hã. Danhib'apito simasisizéb 'rata te za, maparane si'uiwa na ropoto na ihâiba norĩ wa'wab zama, duré 24 na dama ipire norĩ wa'wab zama. Da te dasiwi wĩrĩ wa, da te iwa'rézéb ré te za. 7 na i'õmo ré hã, Pone'ẽrebâ hã. Duré 7 na itõmo ré hã. 'Re ihâimana u'âsi mono pẽ'ẽzani hã danhipai u uburé marĩ na iwaihu'u pese zé, te wasu'u, itõmo za'ra hã.