Apocalipsi 6:12 - ꞌRe Ihâimana Uꞌâsi Mono Zadawa Wasuꞌu

¹² Tawamhã wa tô duré 'madâ. Te 'madâ'â wamhã, ma tô Pone'ẽrebâ hã duré pru imropâ ãma hã, ibaihâ nhinha uptobzé hã. Te te pru wamhã, awa'awi ma tô ti'a hã sãsã'ã, sa'ẽtẽ uptabi. Bâdâ hã ma tô duré titoptâ'â, zazahâ ihâ 'rãdâ'â uptabi ne. A'amo hã ma tô duré titõmo wapru.

Apocalipsi 6:12 ပူးပေါင်းရင်းမြစ်များ

Zuéu 2:10

Ta norĩ hã sisõré pese na we sisarina 're nomro mono ré, te duré ti'a hã 're popo'o, duré hâiwa hã. Bâtâ norĩ hã te duré 're tõmo 'rãdâ'â zahuré, a'amoi me. Wasi norĩ hã te duré 're ro'osipari za'ra.

Zuéu 3:15

Tawamhã bâtâ norĩ hã a'amoi me te za titõmo 'rãdâ'â zahuré. Duré wasi norĩ hã te za ro'ohaimani za'ra.

Mateu 11:21

Ãne te 'ri wa'õtõ ãma ma tinha Zezusi hã, 'ri wa'õtõ 're, 're idahâimana za'ra mono norĩ ma: — Corazĩ na 'ri wa'õtõ nhisi ãma 're aihâimana za'ra wa'aba mono norĩ ma, aima 're ropipa uptabi za'ra wa'aba mono di za, duré Besada na 'ri wa'õtõ nhisi ãma 're aihâimana za'ra wa'aba mono norĩ ma zama. Marĩ dama i'manharĩ waihu'u'õ hã asõ'a za'ra wa'aba, te 're i'ab'manharĩ wẽ mono ne, Tiru ãma 'ri nho'õmo ãma, duré Sidõ ãma 'ri nho'õmo ãma 're idahâimana za'ra mono norĩ nho'a, te dama 're ab'manharĩ mono 'wa'âhã, duréi te aré ta norĩ hã 're sipizari za'ra, tiwasété wi. Tiwasété wi 're isipizari za'ra mono zém na, da te 're waihu'u za'ra mono da, te aré 'ru'a hã ti'rã nhisiwi te te 're sa'wari za'ra. Te duré aré sa'u ihâiro na 're si'uza za'ra.

Mateu 24:29

Ãne na ma duré tãma waihu'u siromo za'ra: — Tawamhã da te 're robzépata za'ẽtẽ za'ra mono parip si, awa'awi te za bâtâ na tirobra. A'amo zama te te rob'uiwẽ õ di za oto. Wasi norĩ hã te za duré rere, hâiwa hawi. Uburé hâiwa na 're isimasa mono hã te za duré 're sisa're.

Mateu 24:7

Danhipti'ai amoi u te za dasisô 're dapra, 're dasi'wapé za'ra mono da. Tawamhã daro mono bâ te za tô 're dasiwasutu za'ra. Nima niwĩmhã danho õ wa, te za duré da te 're robzépata za'ra, dasa surure wa. Nima niwĩm norĩ ré hã te za duré ti'a hã iré 're popo'o za'ra.

Mateu 27:45

Tawamhã ma tô oto ti'abzuma. Abzuma wamhã, ma tô tirobra, daro mono bâ. Bâdâ siprazéb u, te oto robra si nomro.

Mateu 27:54

Tawamhã Zezusi te te dawi i'madâ'â za'ra norĩ hã da'wapéi'wa norĩ hã, duré da'wapéi'wa norĩ wada'uri'wai me, ti'a isãsã iwatobro hã te te 'madâ'â za'ra wamhã, duré uburé ropipa iwairébé mono te te 'madâ'â za'ra wamhã, ma tô tipẽ'ẽwara pese za'ra. Tawamhã ãne te sima nharĩ za'ra: — Nare õ hã, tô sena 'Re ihâimana u'âsi mono 'ra.

Mateu 28:2

Tawamhã simiza'rese õ ré, ma tô ti'a hã iré 're tiwara zahuré, hâiwa hawi Wanhib'apito ma romhuri'wa hã itẽme wisi zahuré wamhã. Tawamhã hâiwa ãma romhuri'wa hã ma tô ab're nhitobzé hã sa'ré, ẽtẽ tõmo wawẽ hã. Te te sa'réi wamhã, ma tô duré isisiwi nhamra.

Marcu 15:33

Tawamhã ma tô ti'abzuma. Abzuma wamhã, ma tô tirobra, daro mono bâ. Bâdâ siprazéb u, te oto robra si nomro.

Apocalipsi 11:13

Tawamhã zasi zahuré wi, awa'awi te za sa'ẽtẽ uptabi ti'a sãsã hã watobro. Watobro wamhã, 'ri hã nima norĩ hã te za sina, Zeruzalẽ ãma, 'ri nho'õmo 'remhã 're isimasa mono hã. 10 na 'ri 'maihâimana wamhã, te za misi si dawi rere'e. Te za duré 7 miu na tadâ'â za'ra ni, ti'a sãsã'ã na hã. Tawamhã dadâ'â ãna idasi'atarẽme mono hã te za tapahi uptabi za'ra ni. 'Re ihâimana u'âsi mono ãma te za tawata za'ra ni, hâiwa ãma 're isãmra mono ãma, simi'manharĩ waihu'u pese uptabi wa.

Apocalipsi 16:18

Tawamhã tãiwapsa hã ma tô watobro, duré tãirãrã'ã zama, duré tãsi'ubuzi zama. Ti'a hã ma tô duré sãsã'ã, sa'ẽtẽ uptabi. Niwamhã ãne hã watobro õ di isine hã, dapoto na'rata hawimhã, ti'a sãsã hã.

Apocalipsi 16:8

Taha pari, hâiwa ãma romhuri'wa hã maparane si'uiwa na ãma ma tô duré ta hã tinhi'u'awi wamhã sa'wa, bâtâ nhisiwi. Te te sa'wari wamhã, ma tô titõmo wa'ro pese. Tahawa, ma tô te te dahâiba zata, bâtâ tõmo wa'ro zé pire hã.

Apocalipsi 8:12

Tawamhã hâiwa ãma romhuri'wa hã maparane si'uiwa na ãma hã ma tô duré tinhimnhihârâzém na amnhihârâ. Simnhihârâ wi, ma tô bâdâ hã itõmo wãiwa prã na titobra. A'amo zama ma duré itõmo wãiwa prã na titobra. Wasi norĩ zama, ma duré itõmo wãiwa prã na tobra. Tahawa, te te rob'uiwẽ prã za'ra di wasi norĩ hã, bâtâ norĩ me, duré a'amo norĩ me.

Apocalipsi 8:5

Tawamhã hâiwa ãma romhuri'wa hã ma tô pré'a 'manhe, u'awire ne hã oru 'manharĩ 're, wedewati isadaze nhemezéb 're. Wedeza ne na, wedewati zadaze hã da te 're izata za'ra mono zém hawi ma tô pré'a 'masisi. Te te 'masisi wamhã, ma tô õne haré ti'ai u sa'wa, uzâ hã. Te te sa'wari wamhã, ma tô tãiwapsa hã watobro, duré tãirãrã'ã hã. Tãsi'ubuzi zama, ma tô duré watobro. Ma tô duré ti'ai popo hã watobro.