Apocalipsi 4:9 - ꞌRe Ihâimana Uꞌâsi Mono Zadawa Wasuꞌu

⁹ Ãne te ã norĩ hã maparane si'uiwa na ropoto na ihâiba norĩ hã nasi ãma tiwata za'ra, danhib'apito simasisizém na isãmra ãma, 'Re ihâimana u'âsi mono ãma. Waihu'u pese uptabi wa, te nasi ãma tiwata za'ra, duré sõpru uptabi wa.

Apocalipsi 4:9 ပူးပေါင်းရင်းမြစ်များ

Salmu 47:8

'Re ihâimana u'âsi mono, te tisimasisizé iwẽ uptabi iwazéb zahi na 're sãmra. Ta hã te a'uwẽ norĩ i'rãnho'õmo na hã te te 're ab'madâ'â.

Ezodu 15:18

A hã Uburé Danhib'apito, te za Danhib'apito na hã õne u'â 're aihâimana u'âsi mo!

Daniéu 12:7

Tawamhã hâiwa ãma romhuri'wa tinhib'rada hâimo te te wẽ sina, te 'Re ĩhâimana u'âsi mono idâ'â'õ nhisi na tinha ãne: — Wa za aima ropisutu. Ãne hã te za tô tiromhâiba, si'ubdatõ wahu aiwa ãma isipo'o u, 'Re ĩhâimana u'âsi mono tinhib'a'uwẽ da, te te ipisutu norĩ ma, da te tãma 're irob'manharĩ wasété za'ra mono zé hã si'utõrĩ wapsi.

Daniéu 4:34

Tawamhã te apito hã tinha ãne: — 7 na oto ĩ'ãma wahu pari, hâiwa u wa hã te rob'madâ'â wamhã, ma tô apâ ĩnhimiza'rese wẽ hã ĩma wi. Tahawa, wa tô uburé danhipai u isiptede 'Re ihâimana u'âsi mono ãma hã ĩwata, dâ'â ãna õne u'â 're ihâimana mono ãma. Tawamhã wa hã wa tinha ãne: “Danhipai u 'Re ihâimana u'âsi mono nhiptetezé hã si'utõrĩ õ di. Duré Danhib'apito na te te 're ida'a'madâ'â mono zé hã si'utõrĩ waihu'u õ di.

Hebreu 7:25

Tahawa, te te 're da'anho'reptui waihu'u pese mono di ta hã, da te dasina 're i'umnhasi za'ra mono zéb zarina, 'râwi dapẽ'ẽ 're itẽme 're idasihutu mono norĩ hã, 'Re ihâimana u'âsi mono u. 'Re ihâimana u'âsi mono ma, da'ãma 're mreme mono da, dama 're hâimana u'âsi mono wa, te te 're da'anho'reptui waihu'u pese mono di, ta hã oto.

Hebreu 7:8

Levita norĩ hã, sasedoti na da'ãma romhuri'wa norĩ hã te za tô te te dawi 're waibu danhibro hã, danhoprubzé da te tãma 're ipo'o za'ra mono hã. Tane nherẽ, te za uburé ta norĩ hã 're dâ'â za'ra, levita norĩ hã. Mequizédéquihi si, dâ'â ãna wama 're ihâimana mono ne, te wama 're hâimana sasedoti na hã, idâ'âzém na ãma irob'ui'éré hã ãma hâimana õ wa, ibaihâ na hã.

Apocalipsi 1:18

Wa tô dârâ aré. Ĩdâ'â nherẽ, wa oto tô 're ĩhâimana u'âsi. Duré oto ĩdâ'â waihu'u õ di za. Ma'ãpé, ãne na hã awaihu'u pese. Te ĩsima ipisutuzéb zarina, wa te te 're da'anho'reptu, adâ 're ihâimana za'ra mono zém hawi, 'Re ihâimana u'âsi mono 'rata, oto 're dahâimana u'âsi za'ra mono da.

Apocalipsi 10:6

Tawamhã simiwẽ sina, ma tô waihu'u: — 'Re ihâimana u'âsi mono hã za te te irob'manharĩzéb da hã sô rowaptâ'â õ di za oto. Tawamhã 7 ãma hâiwa ãma romhuri'wa hã tinhimnhihârâzém na simnhihârâ wamhã, te za 'Re ihâimana u'âsi mono hã ãma uwaimra, duréihã te te da'ãma sima iropisutuzé hã dama iwaihu'u'õ hã. Duréihã tizadawa 'mahârâ'wa norĩ ma, te te iropisutuzém na te za oto dama rob'manha. Ãne, wa tô sena na awaihu'u, 'Re ihâimana u'âsi mono nho'a, isimiropisutuzém na zama. — Ãne ma tô 'Re ihâimana u'âsi mono zadawa para waihu'u, hâiwa ãma romhuri'wa hã, hâiwa nho'õmo tinhib'rada te te iwẽ hã. 'Re ihâimana u'âsi mono hã ta hã hâiwa 'manharĩ'wa, duré ti'ai 'manharĩ'wa, duré â poré 'manharĩ'wa, duré uburé iwa 're idahâimana za'ra mono poto 'wa.

Apocalipsi 15:7

Tawamhã maparane si'uiwa na, ropoto na ihâiba norĩ siré hã misi ma tô 7 na hâiwa ãma romhuri'wa norĩ ma sõmri za'ra, oru 'manharĩ na u'awi hã, 7 na ihâiba za'ra na. U'awi hã uwa 'rãi wa'u isé pire ré hã. Uwa 'rãi wa'u isé pire hã, 'Re ihâimana u'âsi mono nhimihâzé, te wasu'u.

Apocalipsi 21:5

Tawamhã 'Re ihâimana u'âsi mono hã danhib'apito simasisizém na isãmra hã te ĩma tinha, ãne: — Ma'ãpé waihu'u. Wa hã wa za tô marĩ ité hã te ab'manharĩ, ãhã na hã. Tawamhã te duré ĩma ti'ru: — Ma'ãpé ãne ãma arob'ui'éré mono. Ãhã wasu'u hã uburé marĩ ité hã za te i'ab'manharĩ mono na hã, tô sena. Tô sena wa, ãhã na da te 're rob'umnhasi za'ra mono sina, da te 're ĩzazei pese za'ra mono da na, te za ãma i'arob'ui'éré mo.

Apocalipsi 4:2

Tawamhã 'Re ihâimana u'âsi mono pẽ'ẽzani hã ma tô duré ĩ'uihâ pi'ra, awa'awi. Te te ĩ'uihâ pi'rai wa, wa tô duré aimawi ĩhâiba, ĩhâiba waihu'u õ na. Tawamhã ma tô ĩzaprõ, hâiwa u. Hâiwa u, te te ĩzaprõni wamhã, danhib'apito simasisizé hã wa tô 'madâ. Ni'wa hã te ãma nhamra.

Apocalipsi 5:1

Tawamhã wa tô duré 'madâ, ibaihâ isinhai ré hã. Danhib'apito simasisizém na isãmra hã te tinhib'rata nhimire niwĩ tété. Ibaihâ nhinha hã, i'ui'éré si'uiwa ré hã. Duré 7 na ihâiba hã i'uptob ré hã siwasihu tõ da, ni'wa te te duré sõré tõ da hã.

Apocalipsi 6:16

Tawamhã ẽtẽ 'rãihâ norĩ ma, te nasi si'mahârâ za'ra, ẽtẽ tõmo wawẽ norĩ ma zama. Ãne te nasi tãma si'mahârâ za'ra: — Ma'ãpé, wanhisiwi we airere'e aba mono, wa'upsibi za'ra wa'aba mono da, hâiwa ãma danhib'apito simasisizém na isãmra hã te te wa'asãmri tõ da. Duré Pone'ẽrebâ nhimihâzé wi, wanhisiwi we asa'wari aba, tiwi wazuwa za'ra wa'aba da.

Apocalipsi 7:15

Tahawa, te ã norĩ hã 'Re ihâimana u'âsi mono simasisizém nho're aimasa, uza hâpa hâirã ré. Romhuri sahâri waihu'u ãna te te tãma 're romhuri u'âsi za'ra, isõrõwa ãma hã. Duré danhib'apito simasisizém na isãmra hã te za duré 'râwi ãma 're sisaprĩ u'âsi za'ra, i'uza hâpa hâirã ré norĩ ãma hã, i'rata za oto 're sãmra u'âsi za'ra mono wa.