Tawamhã Zezusi te asa tãma nharĩ za'ra, ãne: — Ãne, sena na wa za duré aima waihu'u za'ra wa'wa. Niwapsi ti'ai ãma Dasiré Ipodo hã te za ro itéb ãma danhib'apito simasisizém na 're sãmra. Isimasisizé iwẽ uptabi ãma hã te za 're sãmra, te te 're da'ab'madâ'â u'âsi mono da oto. Tame te za duré a norĩ wa'wa hã isiré 're anomro aba mono norĩ hã 12 na danhib'apito simasisizém na 're asimroi wa'aba mo, aipire na Izaraéu 'ra nhihudu mono bâ 're 'madâ'â za'ra wa'aba mono da.
Apocalipsi 4:4 - ꞌRe Ihâimana Uꞌâsi Mono Zadawa Wasuꞌu4 Tawamhã danhib'apito simasisizé mana wawi te dasimasisizé hã aimasa, 24 na danhib'apito norĩ te ne hã. Taha na te asimro, dama ipire norĩ 24 na ihâiba za'ra norĩ hã, 'Re ihâimana u'âsi mono nhimiroti na si 're isõpré pese mono norĩ hã. Uza hâpa hâirã ré te asimro. Ẽtẽ waipo pré oru 'manharĩ na da'rãzaza ré zama te asimro. အခန်းကိုကြည့်ပါ။ |
Apocalipsi 4:4
24 ပူးပေါင်းရင်းမြစ်များ
A norĩ wa'wa hã niwapsi, te za ĩsiré 're asimroi wa'aba mo, wedeza na wasiré 're wasaihuri mono da, duré wasiré wa te 're âhuri mono da zama. Danhib'apito simasisizém na, te za 're ai'ubumroi wa'aba mo, Izaraéu nhihudu norĩ ma, 're roti za'ra wa'aba mono da, wahi'rada Izaraéu hã, 12 na i'ra si'aibâ norĩ ma. Taha nhihudu norĩ hã te za 're i'madâ'â za'ra wa'aba mo.
Tawamhã 144 miu na ihâiba za'ra norĩ hã te danhib'apito simasisizém nho're asõré, maparane si'uiwa na ropoto na ihâiba norĩ nho'reb zama, duré dama ipire za'ra norĩ nho'reb zama. Tinho're itém na te tinho're za'ra, dama isa'rese'õ na. Ã norĩ si 're idanomro wasété mono zém hawi, 'Re ihâimana u'âsi mono te te iwa'âbâ za'ra norĩ si te te waihu'u pese za'ra di, isõ're hã.
Za 're irobzépata za'ra wa'aba mono zém na hã asina 're aipahi za'ra wa'aba mono õ di za. Ĩwapari pese za'ra wa'aba. Wa'uburé hã nimahã na te za dama ai'mai'ru wasété 'wa, da te ai'maimrami aba da, dazazéb 're, da te ai'manheme aba da, te te aipibu za'ra wa'aba da, tô sena ĩzaze za'ra wa'aba zô. Tawamhã 10 na bâdâ hã te za ai'ãma 'maihai'utõrĩ 'wa, dazazéb 're ai'masima'wara aba ré, niha aihâiba za'ra wa'aba na 're 'mairobzépata za'ra wa'aba mono ré hã. Ãne wamhã, ma'ãpé asiwi ĩrẽme aba tõ, tô'ã. Tawamhã da te ai'manhimroi wa'aba zém na ai'masi'utõrĩ aba nherẽ, ĩ'mairẽme aba õ wamhã, duré dawi ĩ'mai'udâ wa'aba õ wamhã, wa za aima wa'âbâ za'ra wa'wa. Rowẽ, wa za aima pisutu za'ra wa'wa, ĩ'rata 're i'ai'ubumroi u'âsi aba mono zéb da hã.
Tawamhã wa tô duré 'madâ danhib'apito simasisizém ne na 're idasi'ubumroi mono zé hã. Ãma isi'ubumroi mono ma, ma tô 'Re ihâimana u'âsi mono hã tãma pisutu za'ra, dahâimanazém na te te 're ida'awaihu'u mono zéb zarina, dama pire na te te dama 're arowairébé mono da, isadawa para. Tawamhã wa tô duré 'madâ'â za'ra, 'Re ihâimana u'âsi mono zadawa wasu'u te te 're sazei pese za'ra mono 'ru te, da te 're i'rãnhihâri za'ra mono norĩ pẽ'ẽzani hã, tô sena na Zezusihi zazei'wa na dama 're siwasu'u za'ra mono 'ru te. Ta norĩ hã â hawi ropoto siwamnarĩ ãma 're iwata za'ra mono õ. Duré ihâiba 'manharĩ na romhâiba ãma 're iwata za'ra mono õ. Duré â hawi ropoto siwamnarĩ nhisi na i'uihâ ui'éré za'ra õ, duré isib'rata ui'éré za'ra õ. Ta norĩ hã ma tô oto hâiba ré apâ 're hâimana za'ra. Ma tô tihâiwa'utu za'ra. Tawamhã Cristuhu siré te oto dama pire na te te dama 're roti za'ra, Satanasi hã pawasisi ré, miu na ãma iwahub u.
Tahawa, wa za oto aima roti pese za'ra wa'wa. Ẽtẽ waipo pré oru uptabi hã iwazari'õ hã da te 're i'ruiwapari za'ra mono zéb zarina, da te dawi 're i'uipra za'ra mono ne, te za ĩnhimiroti zô si 're asõpré wa'aba mo, iwẽ uptabi zô si, aipẽ'ẽ 're asibro pese ne, rowẽ na si ĩ'ãma 're aihâimana u'âsi za'ra wa'aba mono da. Duré da'uza hâirã hã te za da te dawi 're uipra za'ra, ãma 're dasi'uza za'ra mono wa, da te 're 'madâ'â ze za'ra mono da. Tane te za duré a norĩ wa'wa hã ĩwi 're irowaptẽrẽ u'âsi za'ra wa'aba mo, wa hã te 're aipawaptob za'ra wa'aba mono da, ĩ'ãma 're anomro wẽ wa'aba mono da, taha zarina, asisém na 're aihâimana za'ra wa'aba mono tõ da oto. Duré datõmo nhihâzém na 're dasitõmo wẽ za'ra mono da, 're dasitõmonhihâ za'ra mono da, da te dawi 're i'uipra za'ra mono ne, te za ĩzô si tô 're asõpré u'âsi aba mo, ĩnhimiroti hã waihu'u pese za'ra wa'aba da.
Tawamhã wa tô duré 'madâ. Te 'madâ'â wamhã, hâiwa ãma romhuri'wa norĩ hã te nemo tizadawa'a'a, ahâ uptabi na. Da te sa'rata waihu'u za'ra õ di ta norĩ hã. Danhib'apito simasisizé hã ma siwi uirĩ. Duré maparane si'uiwa na ropoto na ihâiba norĩ mana wawi te asõré, 24 na dama ipire za'ra norĩ hã isisõré mana wawib zama.
Tawamhã wa tô 'madâ, Pone'ẽrebâ hã. Danhib'apito simasisizéb 'rata te za, maparane si'uiwa na ropoto na ihâiba norĩ wa'wab zama, duré 24 na dama ipire norĩ wa'wab zama. Da te dasiwi wĩrĩ wa, da te iwa'rézéb ré te za. 7 na i'õmo ré hã, Pone'ẽrebâ hã. Duré 7 na itõmo ré hã. 'Re ihâimana u'âsi mono pẽ'ẽzani hã danhipai u uburé marĩ na iwaihu'u pese zé, te wasu'u, itõmo za'ra hã.
Te te âri wamhã, ma tô maparane si'uiwa na ropoto na ihâiba norĩ hã Pone'ẽrebâi ma, hi'rãtitõ ana. 24 na dama ipire norĩ zama, ma te duré tãma ana. Rowamremezéb ré ma tô tãma aiwẽ'ẽ za'ra, ẽtẽ waipo pré oru 'manharĩ u'awi ne ré zama. U'awi 'remhã wedewa'u isadaze, te i're tiro'o za'ra. Taha nhizé hã hâimo haré wahu na, ta hã 'Re ihâimana u'âsi mono nhib'a'uwẽ norĩ, tãma 're imreme zusi mono zé, te wasu'u.
Tawamhã da'uza hâirã hâpa, ma tô tãma sõmri za'ra ni, tidâ'âzéb u sipizari ãna, Zezusihi ãma 're hâimana za'ra mono wa. Ma tô duré tãma nharĩ za'ra ni: — Ma'ãpé, asimi'ẽ na a'â 're asimipari za'ra wa'aba mono. Da te 're isimroi mono norĩ za'ratazé hã 'Re ihâimana u'âsi mono te te ipisutuzé hã zahadu da te dasina azahutu õ di. Da te ai'uprosi aba ne, asiré isazei'wa norĩ, za da te 're isimroi mono norĩ za'ratazé wab õ wa, te za a'â asimi'ẽ na sô 're asimipari za'ra wa'aba mo.
Tawamhã hâiwa ãma romhuri'wa norĩ hã te zahadu danhib'apito simasisizé mana wawi aimasa. 24 na dama ipire za'ra norĩ hã isisõré mana wawib zama te zahadu aimasa, maparane si'uiwa na ropoto na ihâiba norĩ mana wawib zama. Ta norĩ hã hâiwa ãma romhuri'wa norĩ hã ma tô duré danhib'apito simasisizém nho're hi'rãtitõ ana, 'Re ihâimana u'âsi mono ãma wata za'ra da.
Taha parimhã, wa hã Zuwã, wa tô duré 'madâ. Te 'madâ'â wamhã, wa tô da'ab'madâ, da'ahâ uptabi na, da te idaza'rata waihu'u õ hã. Dapoto mono bâ te aimasam ni, damreme sipo'o mono bâ 're idahâimana za'ra mono hã. Danhib'apito simasisizém nho're te aimasam ni, duré Pone'ẽrebâ nho'reb zama. Da'uza hâpa hâirã ré te isõ're aimasam ni. Tawamhã wa'asu ne hã, da te tété za'ra sina, te damreme 'rãihâ na ãma tawata za'ra ni, ãne: — Wanhib'apito 'Re ihâimana u'âsi mono, danhib'apito simasisizém na isãmra hã ta hã, Wa'anho'reptui'wa. Duré Pone'ẽrebâ hã tô isiré Wa'anho'reptui'wa. Ã norĩ hã ma tô wawasété wi te te 're wa'anho'reptu zahuré, 're iwasi'utõrĩ za'ra mono zé wib zama.
ကြော်ငြာတွေ