Apocalipsi 3:20 - ꞌRe Ihâimana Uꞌâsi Mono Zadawa Wasuꞌu

²⁰ “Ma'ãpé duré, wapari pese za'ra wa'aba, te ãma isimiré hã. Aibâ te 'ridawab za. Tawamhã 'ri tede'wa hã te 'mahâ, sãmra zô, duré itẽme sébré da. Tawamhã 'ri tede'wa te te wapari wamhã, te za tãma 'ridawa, sitẽme te te 'mazébré da, siré sa zahuré wa, rowẽ na te te sima rowasu'u zahuré da. Tane wa hã aibâ, 'ridawa isam ne, wa asô 're ĩnhimipari za'ra wa'wa. Ĩmreme 're wapari za'ra wa'aba mono wa, ĩzô 're aihãsi aba mono zô, wa 're ĩnhimipari u'âsi. Tawamhã ĩzô 're aihãsi aba mono wapsi, duré asitẽme 're ĩ'mazasi za'ra wa'aba mono wapsi, wa za aipẽ'ẽ 're, 're ĩnhamra u'âsi za'ra wa'wa. Tawapsi, wa za wasiré rowẽ na 're wahâimana u'âsi za'ra.

Apocalipsi 3:20 ပူးပေါင်းရင်းမြစ်များ

Mateu 24:33

Tane duré, marĩ hã 're iromhâimana mono zéb da, te aima iwasu'u za'ra wa'aba zéb zarina, 'madâ'â za'ra wa'aba wamhã, te za iwaihu'u za'ra wa'wa, rob'rãsutuzé hã za oto iwatobro na hã.

Luca 17:8

Mare di. Ãne si te za tãma inha: “A'â ĩma asipi na. Asipi parip si, te za zazahâi wa'õtõ na asi'usi, ĩsa hã we ĩma iré âri da, duré â hã. Ĩsai parip si, te za asa. Te za duré ihâ'rẽ.” Ãne si te za tãma inha. Tawamhã te za aima ãma uwaimra, tãma i'ru zarina. Asiminhimi'ru hã te te ãma aima uwaimrami wa, e te za sô amnhasi, ãma aiwata zô hã. Mare di. Sô simnhasi õ di za.

Zuwã 10:3

Taha si 'ridawa u, sô 're simasisi mono wamhã, te za te te tãma 're 'ridawa, 'ridawa 'madâ'â'wa hã. Sô 're simasisi mono wamhã, imreme te za waihu'u za'ra, pone'ẽrebâ hã. Isisi mono bâ, te za sitẽme sô 're hârâ, rob u te te 're sani za'ra mono da hã.

Tiagu 5:9

Ĩsisãnawã norĩ, asima 're aiwapsari za'ra wa'aba mono õ di za, 'Re ihâimana u'âsi mono hã aiwasédé hã te te ai'ãma 're sa'ra za'ra wa'aba mono tõ da. Dahâimanazéb zarina da'ãma rowairébé'wa hã we imorĩzéb u hã romhuture di oto. Ãne wa, asima 're aiwapsari za'ra wa'aba mono õ di za.

Apocalipsi 19:9

Tawamhã hâiwa ãma 'Re ihâimana u'âsi mono ma romhuri'wa hã te ĩma tinha, ãne: — Ma'ãpé, ãne na ãma rob'ui'éré: “Pone'ẽrebâ imrozém na da te dasima ãma iromhu'u za'ra zéb u sihutu da, 'Re ihâimana u'âsi mono hã sô ihârâ za'ra norĩ ma, tãma 're rowẽ uptabi za'ra mono di za.” Ãne te duré ĩma tinha: — Ã hã 'Re ihâimana u'âsi mono mreme hã tô sena uptabi.