Apocalipsi 3:2 - ꞌRe Ihâimana Uꞌâsi Mono Zadawa Wasuꞌu

² Ĩ'ãma 're anomro zei wa'aba mono da, Ĩnhib'apito 'Re ihâimana u'âsi mono te te aima ipisutu za'ra wa'aba zéb zarina, ĩ'ãma 're anomro aba mono õ di. Tahawa, ma'ãpé ãma asipo're pu'u za'ra wa'aba. Marĩ hã 're i'manharĩ wẽ za'ra wa'aba mono zé hã, aiwi si'utõrĩ pese za'ra aba õ ré, ma'ãpé apâ ĩ'ãma romhuri wẽ zé hã asiwi sa'ẽtẽ aba.

Apocalipsi 3:2 ပူးပေါင်းရင်းမြစ်များ

Daniéu 5:27

TEQUEL na damreme hã te duré ãne hã wasu'u. Marĩ pire pibuzém na da te aipire pibui wamhã, aiwapu na aihâimana wa, za da te i'ai'upsibi mezé.

Mateu 23:5

Taré da te 're 'madâ'â wẽ za'ra mono da, te marĩ hã te te 're 'manharĩ za'ra, danho'a. Powawẽ hâ 'manharĩ hã 'Re ihâimana u'âsi mono nhimiroti ui'éré na ibaihâ nhemezébre hã isa'ẽtẽ uptabi na si te ãma 're si'uihâ wasisi za'ra, tipaihi wib zama, 're nomro wẽ mono newa, da te 're 'madâ'â wẽ za'ra mono da. Taha da, te duré ti'uza hâpa za'ru pa ré na 're si'uza za'ra.

Mateu 25:13

— Tahawa, a norĩ wa'wa hã aihâimana nhimiza'rese sina te za ĩzô 're asõpré u'âsi aba mo, bâdâ hã aima waihu'u za'ra wa'aba õ wa, apâ za we ĩmorĩzé hã.

Mateu 25:7

— Tawamhã pi'õ ipréduptém norĩ hã sô isimipari za'ra hã ma tô ti'utu za'ra wara sina. Utu za'ra wamhã, âro'ore na wedenhorõ hã ma tô sõrõ nhihâri za'ra, ro'o wẽ da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 18:23

Tawamhã Ãtioquia ãma sãmra parimhã, ma tô duré mo Paulu hã, Galasia na danhipti'a nho'õmo nhisi wa'wai baba, duré Prizia na danhipti'a nho'õmo nhisi wa'wai baba. Daza'rui wa'wai baba 're morĩ ré, ma tô Zezusihi zazei'wa norĩ hã te te 're apawapto, hâimana nhiptete na si 're nomro mono da.

1 Pedru 4:7

Ro isi'utõrĩzéb u hã, romhuture di oto. Tahawa, te za aihâiba na asina 're asiptete za'ra wa'aba mo. Duré aihâimana nhimiza'rese te za 're aihâimana za'ra wa'aba mo, 'Re ihâimana u'âsi mono ma, 're aimreme zusi u'âsi aba mono da.

1 Pedru 5:8

Ma'ãpé, aihâimana nhimiza'rese sina 're aihâimana za'ra wa'aba mono. Duré 're asi'madâ'â pese za'ra wa'aba mono. E marĩ wa. Da'rui'wa hã datẽme 're morĩ wa, wa'uburé norĩ nhib'apito hã. Hu'u zéré pa hã wairõ sina, tisa zô 're inomro mono ne, te ta hã datẽme 're morĩ u'â, Wanhib'apito si da te dasina 're i'madâ'â u'âsi za'ra mono zé hã te te dawi 're a'uprosi mono da.

Apocalipsi 16:15

Tawamhã ãne danhotõ 'rowim ne, da te 're irosawẽrẽ za'ra mono ne, te azabui mono ré, wa tô Zezusihi mreme hã wapa ĩpo're na, tizazei'wa norĩ te te ipo're pu'uzé hã. Ãne te tinha: “Ma'ãpé, aipo're pu'u za'ra wa'aba. Isimisaihuri zô 're danhimipari za'ra mono õ nherẽ, danhorõwa u 're isisisi mono ne, wa za wei mo apâ. Ãté ni'wa hã tisiwadi zô simipari wamhã, sõtõ ãna te za sô rob'madâ'â u'âsi. Tawamhã i'uza hã te za i'rata nomro 'râwi, isiwadi hã we itẽme wisi wa, si'aba'ré na te te sisada âri da, ãma isi'uzazéb da hã. Tane asimiza'rese sina, ĩzô 're asimipari za'ra wa'aba mono ré, we ĩmorĩ wamhã, aima 're rowẽ uptabi za'ra wa'aba mono di za. Ni'wa hã datõmo nho'a ai'uréiwi 're morĩ wa, 're isisé mono ne, ĩma aséb za'ra wa'aba tõ da, asimiza'rese sina ĩzô 're asimipari za'ra wa'aba mono ré, we ĩmorĩ wamhã, aima 're rowẽ uptabi za'ra wa'aba mono di za.”

Apocalipsi 2:4

Tane nherẽ, te oto marĩ hã misi pese ĩwi ro'wa'ré, te ai'ãma iwaihu'u za'ra wa'wa hã. Duréihã 're ĩzazei na'rata za'ra wa'aba mono zém hawimhã, aré asimizawi pese za'ra wa'aba di. Tane nherẽ, ma tô oto asiwi irẽme 'wa, 're asimizawi pese za'ra wa'aba mono zé hã.

Apocalipsi 3:1

— Te za duré irob'ui'é, Sadési na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzéb zarina te za tãma irob'ui'é, ãne: “Wa hã wasi hã 7 na ĩnhib'rata te itété za'ra hã, wa za oto aima waihu'u za'ra wa'wa. 'Re ihâimana u'âsi mono pẽ'ẽzani hã 7 na te te 're iromhuri mono zéb ré, te 're i'madâ'â mono, wa hã. Uburé marĩ hã 're i'manharĩ za'ra wa'aba mono zé hã, ĩma waihu'u pese di. Ĩnhimiroti na si 're anomro aba mono na, da te 're aiwasu'u za'ra wa'aba mono zahã, te aipẽ'ẽ 're, atâ'â ne 're anomro aba mo, ĩ'ãma 're anomro aba mono zahã.

Apocalipsi 3:3

Ma'ãpé duré ĩ'ãma 're anomro na'rata aba mono zém hawi ĩnhimiroti hã aipo're na 're iwapari za'ra wa'aba mono zém na, duré 're iwaihu'u za'ra wa'aba mono zém na, ĩ'ãma asipo're pu'u za'ra wa'aba. Ta hã ĩnhimiroti hã te za 're i'madâ'â pese za'ra wa'aba mo. Duré aiwasété wi te za 're aipizari za'ra wa'aba mo. Ãne na hã apâ ĩ'ãma asipo're pu'u za'ra wa'aba õ wamhã, wa za oto aihâ za'ra wa'wa. Nimahã na isimisaihuri norĩ hã sô 're danhimipari za'ra mono õ nherẽ, danhorõwa u 're isisisi mono ne, wa za atẽme ĩwisi 'wa, te aihâ za'ra wa'aba da hã. Bâdâ hã ãma atẽme ĩwisi za'ra wa'aba zéb da hã waihu'u za'ra wa'aba õ di za.