Apocalipsi 3:19 - ꞌRe Ihâimana Uꞌâsi Mono Zadawa Wasuꞌu

¹⁹ Wa hã te 're i'azawi pese mono norĩ hã wa tô te tãma 're aroti pese, tiwasété na 're sisãmri za'ra mono da. Wa duré te 're hâ za'ra, apâ 're nomro wẽ mono da. Tahawa, te za aiwasété wi aipizari za'ra wa'wa, sena na ĩ'ãma 're anomro u'âsi aba mono da oto.

Apocalipsi 3:19 ပူးပေါင်းရင်းမြစ်များ

Salmu 69:9

Asõrõwa zawi pe ĩma 're ihâimana mono hã te unhama ne ĩpẽ'ẽ 'remhã ĩma 're hâimana. Duré ai'ãma iwasété'wa norĩ, te te ai'ãma 're iwasété za'ra mono zé hã te duré ĩnhisiwimhã 're waptã'ã.

Salmu 94:10

E daro mono bâ a'uwẽ te te 're i'ahâ za'ra mono 'wa hã te za tinhimihâzém na hã te te dama 're aba'a. Duré uburé dama rowaihu'u wẽ nhomri'wa hã e te 'rãnhimiza'rese ãna 're hâimana bété. Mare di.

Provébiu 15:10

Ni'wa hã bâdâdi iwẽ te te rẽme zahi wamhã, te za rob'manharĩ pipa zé hã sitẽme ãwisi. Duré ni'wa tihâimanazé pese zé hã te te sina 're uzei mono õ wamhã, te za duré dârâ.

Provébiu 15:32

Ni'wa roti iwẽ te te siwi wẽ'õ wamhã, te za 'râwi tihâimanazé hã siwi wamna. Tane nherẽ, ni'wa tihâimana pese zé te te sina i'uzei pe hã te za rowaihu iwẽ hã te te sima 're sa'ẽtẽ u'âsi mono.

Provébiu 22:15

Ai'uté norĩ iharé na te tô simiza'rese ãna marĩ hã te te 're 'manharĩ za'ra. Tane nherẽ, i'ahâri zarina te za tinhimiza'rese wẽ zé hã te te 're waihu'u za'ra.

Mateu 25:7

— Tawamhã pi'õ ipréduptém norĩ hã sô isimipari za'ra hã ma tô ti'utu za'ra wara sina. Utu za'ra wamhã, âro'ore na wedenhorõ hã ma tô sõrõ nhihâri za'ra, ro'o wẽ da.

Zuwã 2:17

Tahawa, isiré 're inomro mono norĩ hã ma tô ãma tipo're pu'u za'ra, 'Re ihâimana u'âsi mono zadawa wasu'u'wai mreme ui'éré iwazéb zahi na. Ãne duréihã ma tô wahi'rada hã tinha, 'Re ihâimana u'âsi mono ma: “Asadawa wasu'uzé 'ri hã ĩma sawi uptabi di, unhama ro'o ne ĩpẽ'ẽ 'rem hã.”

Roma 12:11

Aiwa'a ãna, te za duré 're iromhuri pese za'ra wa'aba mo. Wanhib'apito ma si, te za asimi'ẽi uptabi na 're iromhuri u'âsi za'ra wa'aba mo, aihâiba tiwi 're sawi za'ra wa'aba mono ãna.

1 Corĩtu 11:32

Tane nherẽ, ti'ab ré te za tô wawasédé hã te te wa'ãma 're i'awaihu'u mono zéb zarina, te te 're wa'ahâ za'ra, 'Re ihâimana u'âsi mono hã. E marĩ wa. Te te 're wa'azawi pese mono wa, taha zarina, apâ wa te ãma 're sasõmri pese za'ra mono da. Nimahã na, uburé isazei'õ'wa norĩ zu, za te te siwi wa'awẽ'õ tõ da, te za tô ãne wa, te te 're wa'ahâ za'ra, ti'ai ãma 're wanomro mono ré.

2 Corĩtu 6:9

Wa norĩ hã daro mono bâ isazei'wa norĩ ma, wawaihu'u pese za'ra nherẽ, te ni'wam norĩ hã tarére na si te te wa'ãma 're rosa'rata za'ra. Wa te wasina 're romnhimimnhasi u'âsi za'ra mono wa, aré 're wadâ'â za'ra mono da nherẽ, wa zahadu wahâiba ré 're wahâimana za'ra. Da te 're wahâ za'ra mono nherẽ, da te dasiwi wa'uprosi waihu'u õ di.

2 Corĩtu 7:11

Ma'ãpé, ãne na ãma asipo're pu'u za'ra wa'aba, 'Re ihâimana u'âsi mono te te sima aiwẽ za'ra wa'aba zéb zarina, aiwi irobzei'õ pese za'ra wa'aba zém na hã. Taha zarina, ma tô oto asiwaihu'u za'ra wa'wa, uburé iwasédé hã 'râwi asiwi wẽ'õ pese za'ra wa'aba da. Tahawa, ma tô oto asima iwẽ uptabi za'ra wa'wa, aiwasédé hã 're i'manharĩ za'ra wa'aba mono zém na ĩma asiwasu'u za'ra wa'aba da, apâ asima ropese za'ra wa'aba da. Ma tô duré asiwẽ'õ pese za'ra wa'wa, aiwasédé hã aima ihâimana za'ra wa'aba zém na hã. 'Re ihâimana u'âsi mono nhimihâzém na, isadawa para ĩmreme na te aihâ za'ra wa'aba õ'umnhasite, ma tô ĩma aipahi za'ra wa'wa. Tane nherẽ, ma tô asima ĩwẽ za'ra wa'wa oto, apâ ãma atẽme ĩmorĩ aba da, wasisabu su'u za'ra da. I'uwaibaba na si, niha ãma rosa'rata za'ra wa'aba da, ma tô asi'madâ'â za'ra wa'wa, aibâ hã tiwasédé te te i'manharĩzém na hã asiwi wẽ'õ za'ra wa'aba da. Tahawa, aiwasédé hã ãma 'manharĩ za'ra wa'aba õ di. Ãne, wa tô ã hawim nherẽ ãma aiwaihu'u za'ra wa'wa.

Galata 4:18

Roti iwẽ na si, da te 're aipawaptob za'ra wa'aba mono da, da te dasima 're aiwẽ za'ra wa'aba mono wamhã, tô ĩma hã wẽ di za ãne hã, ai'rata ĩnhamra aba ré hã, duré niha wamhã tô ĩhâiba za're'ra wamhã.

Titu 2:14

Ta hã ma tô wazada sisõmri za'ra, wazada dâ'â za'ra da, 're iwanomro wasété mono hawi, te te 're wa'anho'reptui mono da, isib'a'uwẽ si 're wahâimana za'ra mono da oto. E marĩ da. Sena na 're wanomro mono da, duré wawa'a ãna iwẽ na si wa te oto 're dapawaptob za'ra mono da.

Tiagu 1:12

Wa za duré ãne aima waihu'u za'ra wa'wa. Marĩ ahâ na dazada 're hâimana za'ra mono wamhã, 'Re ihâimana u'âsi mono hã ro'wa'rudu hã te te dama 're ba'a za'ra mono õ nherẽ, te za danhiptete sina ãma 're dahâimana u'âsi za'ra. Ãne wamhã, 'Re ihâimana u'âsi mono hã te za ãne na da'awaihu'u. Tawamhã isawi pese 'wa 're dahâimana za'ra mono wa, te za tãma wa'âbâ za'ra oto, rowẽ uptabi na, i'rata 're idahâimana u'âsi za'ra mono zém na, te te dama iropisutuzéb zarina. Tawamhã dama 're rowẽ uptabi za'ra mono di za.

Apocalipsi 2:5

Ma'ãpé, ĩ'ãma asipo're pu'u za'ra wa'aba. 'Re ĩzawi pese za'ra wa'aba mono zém hawimhã ma tô oto asina irosapari pese za'ra wa'wa. Tahawa, aiwasété wi, te za oto 're aipizari za'ra wa'aba mo, apâ. 'Re ĩzazei na'rata za'ra wa'aba mono zém hawim haré, 're i'aihâimana wẽ za'ra wa'aba mono ne, te za tô oto apâ hã 're anomro wẽ wa'aba mo. Ãnei õ wamhã, aiwasété wi 're aipizari za'ra wa'aba mono ãna 're anomro aba mono wamhã, wa za ãma atẽme ĩmorĩ za'ra wa'wa, rob'uiwẽzé sima'warazé ate wa'wa hã te aiwi âri za'ra wa'aba da. Te aiwi âri za'ra wa'aba wamhã, baba di za oto, ate za'ra wa'wa rob'uiwẽzé hã. Ãne, wa aima waihu'u siromo za'ra wa'wa ãma.