Apocalipsi 3:1 - ꞌRe Ihâimana Uꞌâsi Mono Zadawa Wasuꞌu1 — Te za duré irob'ui'é, Sadési na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzéb zarina te za tãma irob'ui'é, ãne: “Wa hã wasi hã 7 na ĩnhib'rata te itété za'ra hã, wa za oto aima waihu'u za'ra wa'wa. 'Re ihâimana u'âsi mono pẽ'ẽzani hã 7 na te te 're iromhuri mono zéb ré, te 're i'madâ'â mono, wa hã. Uburé marĩ hã 're i'manharĩ za'ra wa'aba mono zé hã, ĩma waihu'u pese di. Ĩnhimiroti na si 're anomro aba mono na, da te 're aiwasu'u za'ra wa'aba mono zahã, te aipẽ'ẽ 're, atâ'â ne 're anomro aba mo, ĩ'ãma 're anomro aba mono zahã. အခန်းကိုကြည့်ပါ။ |
Apocalipsi 3:1
30 ပူးပေါင်းရင်းမြစ်များ
Duréihã wahi'rada Mozési hã ma tô te te dama 're roti, 'Re ihâimana u'âsi mono nhimiroti zarina. 'Re ihâimana u'âsi mono te te tãma iwaihu'uzéb zarina, ma tô te te dama 're roti, ãma 're danomro wẽ mono da. Zezu Cristu hã ma tô õhõ si te te dama 're waihu'u, dawasété nherẽ, 'Re ihâimana u'âsi mono te te 're ida'azawi pese mono zém na. Simizawi pese uptabi wa, te te 're wa'apawaptob u'âsi, ãma 're wanomro wẽ mono da, Zezu Cristu hã.
'Re ihâimana u'âsi mono hã ma tô sitẽme ti'â apâ, isimire niwĩ oto 're sãmra u'âsi mono da. Tawamhã Tipẽ'ẽzani hã ma tô ti'ra ma tisõ, te te tãma ãma iropisutu siro hã, te te sima 're ida'awẽ mono zéb uwaibaba, te te dama 're anhomri mono da. Ãhã na, Zezusi hã ma tô wama sõmri za'ra, Tipẽ'ẽzani hã. Tahawa, ma tô ãne wa'ãma asõpré wa'wa. Ma tô duré ãne iwawapari za'ra wa'wa, aimreme mono bâ wa'aba.
A norĩ wa'wa hã aipẽ'ẽ 're, 're atâ'â za'ra wa'aba mono ne, ma tô aré 're anomro aba mo, aiwasété si 're 'manharĩ u'âsi za'ra wa'aba mono wa, duré 'Re ihâimana u'âsi mono nhiti 're aihâimana u'âsi za'ra wa'aba mono wa aré. Taha ré, ma tô oto 'Re ihâimana u'âsi mono hã te te aima 're pisutu za'ra wa'wa, 're anomro aba mono zép téb da hã, aipẽ'ẽ 're ato sina ãma 're anomro u'âsi aba mono da, Cristu hã dâ'â uptabi nherẽ, apâ te te ihâiwa'utu ne. Tahawa, wawasédé wa te 're i'manharĩ za'ra mono zé hã te te oto wa'ãma 're ab'madâ'â mono õ di za, ta hã.
Wa za duré aima romnhimiré'é za'ra wa'wa. Ni'wa hã dâ'â wamhã, oto ipẽ'ẽzani hã tãma hâimana õ wa, ihâiba hâ si te za tihâiba. Tane ni'wa hã Zezu Cristuhu zazei'wa na dama 're siwasu'u mono nherẽ, marĩ iwẽ na dapawaptob ãna 're hâimana mono wamhã, dama 're isiwasu'u mono zép si, te za taré tãma 're hâimana.
Ãne te ta norĩ hã te te sima 're nharĩ za'ra: “E 'wa hã, Danho'reptui'wa za. E niwa te za tawamhã te te 're da'anho'reptu.” Ãne te ta norĩ hã te te sô 're rosa'rata pese za'ra, te te waihu'u za'ra da. Cristuhu pẽ'ẽzani hã ipẽ'ẽ 're, 're hâimana za'ra mono wa, ma tô tãma waihu'u siromo za'ra, Cristu hã za te te irobzépatazém na. Taha pari, rowẽ uptabi hã hâiwa ãma za tãma 're ihâimana mono na ma tô duré tãma waihu'u siromo za'ra.
A norĩ wa'wa hã te asiré isazei'wa norĩ me 're asisawi za'ra wa'aba mono sina, asa hã asima 're i'manharĩ za'ra wa'aba mo, simisutu. Tane nherẽ, te iwasété norĩ hã atẽme 're sihutu 'wa, asa hã asima 're 'manharĩ za'ra wa'aba mono ré. Siséb za'ra õ zarina te ta norĩ hã te te aiwi 're ro'wa'rutu za'ra wa'wa, siwa'ru. A norĩ wa'wa hã zazahâ ihâirã ne te 're aihâimana wẽ za'ra wa'aba mo, iwẽ na si. Tane nherẽ, ta norĩ hã zazahâ ihâirã, da te 're ihâ'uptob za'ra mono ne, te 're hâimana wasété za'ra, sima si te te 're rosa'rata wasété za'ra mono wa. Ta norĩ hã hâiwa nhirõno hã, tã ihawi 're ta'a za'ra mono ãna, rowa'u te te 're i'mapraba za'ra mono ne, marĩ iwẽ hã te te 're 'manharĩ za'ra mono õ di. Duré rob'rã, 're i'rã prédu mono zéb u, wede hã 'rãi ãna 're isimasa mono ne, duré da te oto 're sariza'o'o za'ra mono wa, 're i'ré pese za'ra mono ne, marĩ iwẽ hã te te 're 'manharĩ za'ra mono õ di, ta norĩ hã.
Ãne te tawamhã ĩma tinha: — Ãhã na marĩ hã te za i'ab'madâ'â mo. Tawamhã uburé i'ab'madâ'â mono hã te za ibaihâ na ãma irob'ui'é. Ãma rob'ui'éré parimhã, Zezusihi zazei'wa norĩ, 'ri nho'õmo mono bâ siré 're isi'rã'õtõ mono norĩ ma, te za ibaihâ hã isõmri za'ra, 'Ri nho'õmo nhisi mono bâ, ãne isisi norĩ ma: Éfézu, duré Esmina, duré Pegamu, duré Tiatira, duré Sadési, duré Filadéufia, duré Laudiséa. Ã norĩ ma, te za asimi'ui'éré hã tãma isõmri za'ra, isazei'wa norĩ ma, 7 na 'ri nho'õmo ãma 're isi'rã'õtõ mono norĩ ma hã.
Ãhã na wa za duré aima waihu'u. Wasi hã ĩnhib'rata nhimire niwĩ te itété za'ra i'madâ hã, te ãma isimiré'ézé hã waihu'u õ di, a hã. Duré rob'uiwẽ uparizé i'madâ'â za'ra hã te ãma isimiré'ézé hã, waihu'u õ di tô duré aima. Tahawa, wa za oto aima waihu'u, te ãma isimiré'é zahuré zém na hã, waihu'u da. Wasi hã 7 na ihâiba za'ra hã, ĩnhib'rata nhimire niwĩ te itété za'ra hã, isazei'wa norĩ 'madâ'â'wai mono, te wasu'u, tô 7 na ihâiba za'ra hã. Duré rob'uiwẽzé sima'warazé hã, duré isisiwimhã iro'o ré hã 7 na ihâiba za'ra hã, isazei'wa norĩ te wasu'u, 'ri nho'õmo mono bâ siré 're isi'rã'õtõ mono norĩ. Ãne te ãma isimiré'é zahuré zé hã.
Wa hã, Zuwã. Ĩnhimi'ui'éré na wa ãma asawi za'ra wa'wa, Azia na danhipti'a nho'õmo nhisi ãma, Zezusihi zazei'wa, asiré 're asi'rã'õtõ u'âsi aba mono norĩ hã, 7 na daza'rui mono bâ 're i'ai'rã'õtõ aba mono norĩ hã. Wa hã wa ai'ãma 're ĩmreme u'âsi za'ra wa'wa, 'Re ihâimana u'âsi mono ma, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, ãma 're anomro aba mono da. Ta hã duréihã marĩ õ uptabi ré, ma tô 're hâimana u'âsi. Õne u'âsi te za duré ãhã mono na zama hã 're hâimana. Hâiwa ãma te ta hã 're sãmra u'âsi, danhib'apito simasisizém na. Duré Ipẽ'ẽzani zama te te 're aipawaptob u'âsi za'ra wa'aba mono da, wa duré ai'ãma te 're rosa'rata u'âsi za'ra wa'wa. Ta hã te 'Re ihâimana u'âsi mono simasisizé uiwada 're hâimana u'âsi. Taha pẽ'ẽzani hã 7 na isimiromhuri hã.
Ĩma waihu'u pese di, 're i'ai'ubumroi wa'aba mono zé hã. Tame te Satanasihi nhimiwada'uri na 're dahâimana za'ra. Tame ma tô Ãtipasi hã dasiwi wĩrĩ ni asõ'a za'ra wa'aba, simi'ẽ na te te dama 're ĩzadawa wasu'u mono hã. Tane nherẽ, asõ'a za'ra wa'aba da te dasiwi wĩrĩ nherẽ, tãma aipahi za'ra wa'aba õ di. Ĩrẽme za'ra wa'aba õ di duré. Õne haré te ĩnhimiroti na si 're aihâimana za'ra wa'aba mo.
Marĩ hã 're i'manharĩ wẽ za'ra wa'aba mono zé hã ĩma waihu'u pese di. Te 're asisawi pese za'ra wa'aba mo. Te duré 're ĩzawi pese za'ra wa'aba mo. Te duré asina 're ĩ'umnhasi za'ra wa'aba mo. Te duré ĩma 're iromhuri pese za'ra wa'aba mo. Da te aima 're rob'manharĩ wasété u'âsi za'ra wa'aba mono nherẽ, te ĩ'ãma si 're anomro u'âsi aba mo. 'Re ĩzaze na'rata za'ra wa'aba mono hawi, ĩma 're iromhuri za'ra wa'aba mono zém nhipai u, te oto ĩma 're iromhuri pese za'ra wa'aba mo. Ãne wa tô ĩsi'ãma aiwaihu'u za'ra wa'wa.
Éfézu ãma ĩzazei'wa norĩ, uburé 're i'aihâimana za'ra wa'aba mono zé hã ĩma waihu'u pese di. Asimi'ẽ na te ĩma 're iromhuri pese za'ra wa'aba mo. Da te aima 're rob'manharĩ za'ẽtẽ za'ra wa'aba mono nherẽ, aiwasété u 're aipizari za'ra wa'aba mono õ di, apâ. 'Re idanomro wasété mono norĩ nhimiroti hã te 're iwẽ'õ pese za'ra wa'aba mo. Ni'wa hã Zezusihi zadawa wasu'u'wa na aima siwasu'u za'ra wa'aba nherẽ, awa'awi 're saze za'ra wa'aba mono õ di. Isimiroti hã te a'â 're iwapari za'ra wa'aba mo. Tawamhã i'uwaibaba'õ na te te aima 're sadawa wasu'u za'ra wa'aba mono wamhã, awa'awi te asina 're iwaihu'u za'ra wa'aba mo, isadawa nhipese na hã. Tahawa, te ã norĩ hã 're iwẽ'õ za'ra wa'aba mo.
Ĩma waihu'u pese di, da te aima 're irob'manharĩ wasété za'ra wa'aba mono zém hawi, 're irobzépata za'ra wa'aba mono zé hã. Duré, ĩma waihu'u pese di, asibrob'õ na 're irobzépata za'ra wa'aba mono zé hã. Tane nherẽ, te asibrob ahâ ne, rowẽ na 're aihâimana za'ra wa'aba mo, ĩnhimipawaptobzém na si 're aihâimana za'ra wa'aba mono wa. Duré ni'wam norĩ hã te te dama 're aiwasu'u wasété za'ra wa'wa. Te te dama 're aiwasu'u wasété za'ra wa'aba mono zé hã ĩma waihu'u pese di. Ta norĩ hã zudeu na 're poto za'ra mono zahã, te Satanasihi nhimiroti zarina si, siwa'ru 're hâimana za'ra.
'Re i'manharĩ za'ra wa'aba mono zé hã ĩma waihu'u pese di. Wa za oto ãma aima romnhimiré'é za'ra wa'wa. Â wahâ hã dama se ti, da te 're i'âhuri mono da hã. Duré â wa'ro hã marĩ ise da, da te 're i'âwa'ro za'ra mono da hã, dama wẽ di. Tane nherẽ, â wapu hã dama sei õ di, da te 're i'âhuri mono da hã. Dama sei õ wa, te za sa'wari ni. “Tane, te a norĩ wa'wa hã â wapu dama isei õ ne, ĩma 're aihâimana za'ra wa'aba mo. Ĩ'ãma si 're anomro aba mono na dama 're asiwasu'u za'ra wa'aba mono zahã, te 're aihâimana wasété za'ra wa'aba mo. Ĩ'ãma si 're anomro aba mono na dama 're asiwasu'u za'ra wa'aba mono õ 'wa'âhã, aré ĩma wẽ di. Tane nherẽ, 're aihâimana wasété za'ra wa'aba mono nherẽ, ĩzazei'wa na asadawa nhipese na dama 're asiwasu'u za'ra wa'aba mono wa, te da te 're ĩwasu'u wasété za'ra. “Tahawa, â wapu isei'õ hã da te 're isa'wari za'ra mono ne, wa za oto ai'ãma ĩnho'o'o za'ra wa'wa, te aiwẽ'õ pese za'ra wa'aba wa.
Ĩ'ãma 're anomro zei wa'aba mono da, Ĩnhib'apito 'Re ihâimana u'âsi mono te te aima ipisutu za'ra wa'aba zéb zarina, ĩ'ãma 're anomro aba mono õ di. Tahawa, ma'ãpé ãma asipo're pu'u za'ra wa'aba. Marĩ hã 're i'manharĩ wẽ za'ra wa'aba mono zé hã, aiwi si'utõrĩ pese za'ra aba õ ré, ma'ãpé apâ ĩ'ãma romhuri wẽ zé hã asiwi sa'ẽtẽ aba.
“Duré 're i'manharĩ za'ra wa'aba mono zé hã ĩma waihu'u pese di. Ai'umrore wa'aba nherẽ, dama aipire na 're aihâimana za'ra wa'aba mono õ nherẽ, te ĩ'ãma si 're anomro wẽ wa'aba mo. Te duré ĩnhimiroti si 're iwapari pese za'ra wa'aba mo. Ma'ãpé, waihu'u pese za'ra wa'aba. Wa tô asõwa 'ridawa za'ra wa'wa, Ĩmama, da'ãma 're isib'a'uwẽ mono zéb u 're i'asisisi aba mono zéb da hã ãma. Taha 'ridawa hã ni'wa te te aiwi 'ridawa nhito waihu'u za'ra wa'aba õ di.
Duré danhib'apito simasisizém hawi te tã si'ubuzi ne hã nasi ai'ubuzi, iwapsa'a zama, duré irãrã'ã zama. 'Rãsitõ hã te duré isõ're tiro'o za'ra, 7 na ihâiba hã, iro'o hâ hã. Ta norĩ hã 'Re ihâimana u'âsi mono pẽ'ẽzani nhimiromhurizéb zarina hã 7 na. Â poré hã te duré isõ're nomro. Â hã isarob'a uptabi, simhi isarob'a uptabi ne hã. Maparane si'uiwa na ropoto na ihâiba norĩ hã te duré 'râwi imana wawi si'uiwada za'ra. Ã norĩ hã ihâiba nho're niwĩ itob ahâ. Duré ibabarã niwĩmhã tob ahâ di duré. Ã norĩ hã tob ahâ wa, ihâiba upsibi ré norĩ hã wa tô 'madâ'â za'ra.
Tawamhã wa tô 'madâ, Pone'ẽrebâ hã. Danhib'apito simasisizéb 'rata te za, maparane si'uiwa na ropoto na ihâiba norĩ wa'wab zama, duré 24 na dama ipire norĩ wa'wab zama. Da te dasiwi wĩrĩ wa, da te iwa'rézéb ré te za. 7 na i'õmo ré hã, Pone'ẽrebâ hã. Duré 7 na itõmo ré hã. 'Re ihâimana u'âsi mono pẽ'ẽzani hã danhipai u uburé marĩ na iwaihu'u pese zé, te wasu'u, itõmo za'ra hã.
ကြော်ငြာတွေ