Tawamhã tame Uburé Danhib'apito, rowede i'madâ'â ze iwẽ uptabi sipu'u pese na i'rãi mono bâ iwẽ, isi da hã, ma tô 're prédub za'ra mono da hã ab'manha. Tane nherẽ, te rob're wa'wamhã rowede 're idahâimana u'âsi za'ra mono zém nhomri'wa da hã 're sa. Te duré ihâiba amo rowede hã 're sa, iwẽ hã, iwasédé hã da te ãma 're iwaihu'u za'ra mono zéb da hã.
Apocalipsi 22:2 - ꞌRe Ihâimana Uꞌâsi Mono Zadawa Wasuꞌu2 'Ri nho'õmo wa'wa, 'ri nhi'ridi inomro wa'wa, te tipraba. Duré wede hã â praba zada'ré si'uiwa na isãna'rata si'uiwa sisa'ridi hã te tame 're sa, i'rã hã da te 're huri mono wa, 'Re ihâimana u'âsi mono 'rata, dato sina 're idanomro u'âsi mono zé hã. A'amo sidâpâsi i'rãzé ta hã. Duré wahub sidâpâsi te 're 'rãi u'âsi. Duré isu hã daro mono bâ apâ ãma 're idazéptâ'â za'ra mono zéb da hã te 're hâimana za'ra. အခန်းကိုကြည့်ပါ။ |
Apocalipsi 22:2
20 ပူးပေါင်းရင်းမြစ်များ
“'Re ihâimana u'âsi mono, ma tô ĩma tisõ, Tipẽ'ẽzani hã. Ta hã ma tô ĩpisutu, iwasu'uwẽ na, isibrob'õ norĩ hã te 're apo're pu'u mono da. Ma tô we ĩzatõ, dama romhuri'wa da, da te iwaibu za'ra norĩ hã te 're apawapto mono da, apâ oto 're nomro mono da, robze u'âsi. Duré itob'a hã te 're ato pese mono da, ma tô we ĩzatõ, datõmo wẽ na apâ oto 're danomro mono da, robze na. Duré ma tô we ĩzatõ, da te tãma 're i'manharĩ wasété za'ra mono zém hawi, te 're da'awaibui mono da.
Cristu hã wedepo'o nhonhi'rãmi na dâ'â wamhã, ma tô wawasété wa, wawa'âbâ za'ra, wawasédé hã wa te oto 're 'manharĩ tõ za'ra mono da, wahâimana wẽ na si oto 're wahâimana za'ra mono da. Ihâiba na da te tãma irob'manharĩ wasétézém na, ma tô robzépata za'ẽtẽ. Taha zarina, a norĩ wa'wa hã rowẽ na te oto 're aihâimana za'ra wa'aba mo.
“A norĩ wa'wa hã asimipari pese aba wamhã, ma'ãpé wapari pese za'ra wa'aba, Ĩmama pẽ'ẽzani hã ĩzazei'wa norĩ ma, te te irotizém na hã. Ãne isimiroti hã: Ni'wam norĩ hã tidâ'âzéb u ĩwi sipizari ãna Satanasihi ãma te te i'ai'uté za'ra norĩ hã ta norĩ ma si, wa za tãma pisutu za'ra, rob'rãi u'â hã te te 're huri u'âsi mono da. Taha wede hã 'Re ihâimana u'âsi mono 're isãmra u'âsi mono zéb ãma te 're sa, rowẽ uptabi ãma hã, i'rã hã da te 're huri mono wa, dadâ'â ãna 're idanomro u'âsi mono zé hã. Ãne Ĩmama pẽ'ẽzani te te irotizé hã.”
Tawamhã hâiwa ãma 'Re ihâimana u'âsi mono ma romhuri'wa hã, tô õ hã ma tô duré ĩzaprõ, â u'â hã te 'madâ'â da. Â u'â hã da te 're âhuri mono wa, dato sina 're idanomro u'âsi mono zé hã. Simhi zarob'a uptabi ne â zarob'a uptabi di, â u'â hã. Panho'u 're ipraba za'ra mono ne, te 'Re ihâimana u'âsi mono norĩ simasisizéb zahâpâ hawi tipraba, Pone'ẽrebâ simasisizéb zahâpâ hawi me.
Duré, ni'wam norĩ hã ti'uzazé hâirã da, te te 're i'upsõi pese za'ra mono norĩ ma si hã tãma 're rowẽ uptabi za'ra mono di za. Tane tiwasété wi, 're isipizari za'ra mono hã, 'Re ihâimana u'âsi mono, iwasédé te te tãma 're i'a'upsõi mono zé, te wasu'u, i'uza hâirã hã. Ta norĩ si te za rob'rãi u'â hã te te 're huri, da te 're huri mono wa, 'Re ihâimana u'âsi mono 'rata ãma 're idanomro u'âsi mono zé hã. Ta norĩ si te za duré õne haré 'ri nho'õmo u 're sisisi, 'ridawa za'ẽtẽ na, ni'wa te te tiwi sitob za'ra ãna.
Duré ni'wam norĩ hã ãhã wasu'u hã za iromhâimana mono zém na te i'arob'ui'éré mono hawimhã tô senai õ newa, te te 're sani za'ra mono wamhã, te za 'Re ihâimana u'âsi mono hã rob'rãi u'â hã te te tiwi 're sawi za'ra, te te dame 're huri tõ mono da, 'Re ihâimana u'âsi mono 'ratamhã rowẽ na 're danomro u'âsi tõ mono da. Te za duré 'ri nho'u ité hã iwẽ uptabi hã te te tiwi 're sawi za'ra, iwasédé hã iwa 're ihâimana mono õ hã. Ãhã na, wa tô ã ibaihâ na ãma rob'ui'éré pa, ã 'ri nho'õmo na hã, duré ã rob'rãi u'âsi na hã.
ကြော်ငြာတွေ