Apocalipsi 22:11 - ꞌRe Ihâimana Uꞌâsi Mono Zadawa Wasuꞌu

¹¹ Ãne na za romhutu na iromhâimana mono zém na dama 're awaihu'u mono nherẽ, ni'wam norĩ hã tiwasété si õne haré te te 're 'manharĩ u'âsi za'ra mono wamhã, õhõ na si tô ãma 're hâimana za'ra mono, wẽ te bâ. Duré ni'wam norĩ hã tihâiba na 're hâimana siwamnarĩ u'âsi za'ra mono wamhã, õhõ na si tô duré 're hâimana za'ra mono tinhimi'manharĩzém na, te te ãma 're i'uzusi za'ra mono zém na hã wẽ te bâ, rob'rãsutu u hã. Duré ni'wam norĩ hã te te 're 'manharĩ wẽ u'âsi za'ra mono wamhã, wẽ u'âsi ãma 're hâimana u'âsi za'ra mono. Duré ni'wam norĩ hã 'Re ihâimana u'âsi mono ãma si 're nomro u'âsi mono wamhã, tô õhõ na si 're nomro u'âsi mono tô, rob'rãsutu u hã.

Apocalipsi 22:11 ပူးပေါင်းရင်းမြစ်များ

Provébiu 14:32

Ropire hã iwasété norĩ zô 're pusi mono wamhã, te za te te 're uprosi. Tane nherẽ, sena na 're ihâimana za'ra mono norĩ, tãma romnhimimnhasi na 're hâimana za'ra mono nherẽ, te i'uwaibaba na si 're ihâimana za'ra mono zéb zarina isimapazé hã tãma 're hâimana za'ra.

Provébiu 4:18

I'uwaibaba na si 're inomro mono norĩ nhibâdâdi hã te tãma 're hâimana za'ra, bâtâ ro te te 're irowapré mono wim ne, te te 're irowa'a pese mono zéb u hã.

Daniéu 12:10

Da'ahâ na te za tasipese za'ra ni. Ãhã wa, dawẽ uptabi na te za oto 're dahâimana za'ra. Tane nherẽ, iwasété norĩ hã te za tô tihâimana wasété na si te te ãma 're uzusi za'ra. Duré ãne na za iromhâimana mono zé hã ta norĩ hã te te siwi iwaihu'u za'ra da hã mare di za. 'Rãiwaihu'u wẽ na 're ihâimana za'ra mono norĩ si te za ãne na iromhâimanazé hã waihu'u za'ra.

Mateu 15:14

Farizeu norĩ ãma 're aihâtâ'â za'ra wa'aba mono õ di za. Tô si'uihâ na 're hâimana za'ra mono. Ni'wa hã tob'a na 're ihâimana mono hã te za tisiré itob'a hã saprõ. Te te saprõni wamhã, te za ab're 're siré tiwaptã'ã zahuré. Tane te farizeu norĩ hã itob'a ne hã te te 're danhimro.

Mateu 21:19

Tawamhã figuera wede hã ma tisã, bâdâdi zada'ré isa hã. Figuera na wede nhisi hã. Te te sãmri wamhã, ma tô itẽme apa, te te sabu da, i'rã zô. Tane nherẽ, 'rãi ãna te za, isui ré si. Tahawa, te figuera wede ma, tinha ãne: — Niwa i'ai'rã da hã, mare di za oto. Ai'rã'õ u'âsi, te za oto 're asa mo. Tawamhã awa'awi ma tô oto wede hã tiwede'ré.

Mateu 25:10

— Tawamhã pi'õ ipréduptém norĩ hã hâimana nhimiza'rese ãna 're ihâimana za'ra mono norĩ hã ma tô ai'aba'ré, rob'rãi wa'u tob zô, te te sima 'mai'uipra za'ra da. Tawamhã ta norĩ za'u si ma tô oto aibâ hã wi, timro zô. Wisi wamhã, pi'õ ipréduptém norĩ hã 5 na ihâiba hã hâimana nhimiza'rese 're ihâimana za'ra mono norĩ hã ma tô isiré asisi 'ri para u, isiré saihuri da, sina imro zahuré zém na. Sisisi wamhã, ma tô oto iré 'ridawa nhitop tete za'ra ni.

Mateu 5:45

Ãne te za dama 're i'manharĩ za'ra wa'aba mo, Aimama aba 'ra na sena na da te 're aiwaihu'u za'ra wa'aba mono da, hâiwa ãma 're isãmra mono 'ra na. E marĩ wa, te za ai'ruiwapari'wa norĩ hã 're isawi pese za'ra wa'aba mo. Ni'wai ma, isawi hã te te 're ba'a mono õ wa, 'Re ihâimana u'âsi mono hã. Uburé te te 're da'azawi pese, te te 're isawi pese za'ra mono norĩ hã, duré te te 're isawi õ za'ra mono norĩ zama. Aiwapsi te bâdâ hã te te dama 're rob'uiwẽ za'ra, 're inomro wẽ mono norĩ ma, duré 're inomro wasété mono norĩ ma zama, 'Re ihâimana u'âsi mono nhimipisutuzéb zarina. Aiwapsi te duré tã hã dama 're ta'a za'ra, 'Re ihâimana u'âsi mono nhimiroti te te 're i'madâ'â pese za'ra mono norĩ ma, duré te te 're iwapari za'ra mono õ norĩ ma zama, isimipisutuzéb zarina.

Mateu 5:6

— Duré, ni'wam norĩ hã 'Re ihâimana u'âsi mono te te sima 're iwẽ za'ra mono zéb uwaibaba, uburé marĩ iwẽ hã te te tãma 're i'manharĩ za'ra mono da si, te te sima 're wẽ za'ra mono wamhã, ta norĩ ma si, tãma 're rowẽ za'ẽtẽ za'ra mono di za. Ta norĩ ma si, te za 'Re ihâimana u'âsi mono hã te te tãma ãma 're a'uwaimrami, rowẽ te te tãma 're i'apisutu mono zém na hã.

Zuwã 8:21

Tawamhã Zezusi hã te duré tãma nharĩ za'ra, farizeu norĩ ma, ãne: — Aihawi wa za ĩmorĩ za'ra wa'wa. Tawamhã aiwasété ré, te za 're atâ'â za'ra wa'aba mo, 'Re ihâimana u'âsi mono hã aiwasédé hã te te aima 're pari za'ra wa'aba mono ãna. Aiwasété ré, 're atâ'â za'ra wa'aba mono wamhã, nimomo ĩmorĩzéb u hã, ãma ĩzarina 're anomro waihu'u aba mono õ di za.

Éfézu 5:27

Ãne ma tô sina uwaimra dama, zazahâ ihâi uptob õ ne, duré ihâ'rã'ru'õ ne zama, hâimana wẽ uptabi na 're hâimana za'ra mono da, isib'a'uwẽ norĩ hã.

Colosu 1:22

Tane nherẽ, i'ra hã dasiré a'uwẽ hâiba na dazada idâ'âzéb zarina, te oto ai'ãma 're siwadi za'ra wa'wa, romhutu'õmhã sisõ're te te asõré wa'aba da, aiwasédé hã da te ai'ãma sa'ra waihu'u aba õ wa za tamemhã oto, Cristu hã tidâ'âzém na aiwasédé te te aima 're i'apari aba mono zéb zarina.

2 Timotiu 3:13

Iwasété norĩ hã, duré ihâimana nhipese norĩ hã te za 're siwasété pese za'ra. Isadawa nhipese na te za da te ãma 're sasõmri za'ra. Te za duré dapẽ'ẽ 're dasima 're dazadawa nhipese za'ra.

Zuda 1:24

'Re ihâimana u'âsi mono ãma si 're wawata u'âsi za'ra wa'aba mono. Taha si uburé Danhib'apito hã te 're hâimana, Wa'anho'reptui'wa hã. Wanhib'apito Zezu Cristu we te te wazada isõmrizém na ma tô ta hã te te 're wa'anho'reptu, tô wazada idâ'âzém na. Ta hã wẽ uptabi di. Wẽ uptabi wa, uburé wa te 're wazéb u'âsi za'ra wa'aba mono za. Waihu'u pese uptabi di duré. Danhipai u dama pire uptabi di, õhõ si. Ãne 'Re ihâimana u'âsi mono hã, marĩ õ ré 're ihâimana mono zé hã, duré ãhã na zama hã. Õne u'â te 're hâimana u'âsi, tiwaihu'u pese uptabi na. Tahawa, ãma 're wawata u'âsi za'ra wa'aba mono za. Taha ma, uburé marĩ hã tãma waihu'u pese di, te te 're aipawaptob za'ra wa'aba mono zéb da hã, 're rẽme za'ra wa'aba mono tõ da, aiwasété u 're aipizari za'ra wa'aba mono tõ da. Te za duré sitẽme aiwaibui wa'wa, aiwasété ãna isõ'a 're aihâimana u'âsi za'ra wa'aba mono da, duré ato sina i'rata 're anomro u'âsi aba mono da, rowẽ ãma. Tane tô.

Apocalipsi 16:21

Duré tãzâ hã isa'ẽtẽ uptabi hã ma danhisiwi sisa'wari. Inhama pire pibuzé hã 35 na. Tawamhã 'Re ihâimana u'âsi mono hã tinhimirob'manharĩ pipa uptabi na te te dama rob'manharĩ 'ru te, te ãma wasété za'ra ni.

Apocalipsi 22:3

Duré marĩ iwasédé hã 'Re ihâimana u'âsi mono te te 're i'awẽ'õ pese mono hã, iwa 're hâimana za'ra mono õ di za, 'ri nho'õmo ãma hã. Duré te te 're ida'awẽ'õ pese mono hã iwa 're dahâimana za'ra mono õ di za. Taha 're te za 'Re ihâimana u'âsi mono norĩ simasisizé hã 're hâimana, Pone'ẽrebâi me iwa 're isimasisi zahuré mono zéb da hã, danhib'apito simasisizém ne hã, te te ãma 're ida'ab'madâ'â u'âsi zahuré mono zéb da hã. Tahawa, te za isib'a'uwẽ norĩ hã ãma 're wata u'âsi za'ra.