Apocalipsi 2:16 - ꞌRe Ihâimana Uꞌâsi Mono Zadawa Wasuꞌu

¹⁶ Ma'ãpé ãhã na hã aihâimana wasédé hã sahâri za'ra wa'aba, aiwasété wi 're aipizari za'ra wa'aba mono da, 'Re ihâimana u'âsi mono u. Aihâimana wasédé hã sahâri za'ra wa'aba õ wamhã, wa za ãma atẽme ĩmorĩ su'u za'ra wa'wa, 're aihâimana wasété za'ra wa'aba mono norĩ hã ĩzadai'ré hawi sib'ézé 'wa si'uiwa isa'o na te ai'wapé za'ra wa'aba da.

Apocalipsi 2:16 ပူးပေါင်းရင်းမြစ်များ

Éfézu 6:17

Da'rãzaza itete na te za 're asi'rãzaza za'ra wa'aba mo. Da'rãzaza itede hã wanho'reptuzé, te duré ta hã wasu'u. Duré sib'ézé 'wa pa hã te za asiré 're i'wasari u'âsi aba mo. Sib'ézé 'wa pa hã 'Re ihâimana u'âsi mono zadawa wasu'u, te duré ta hã wasu'u, Ipẽ'ẽzani te te wama 're awaihu'u mono da, isimiroti hã.

2 Tesalonita 2:8

Tawamhã iwasété uptabi hã te za we sihâi'ré oto, danho'a te te romhuri da. Tane nherẽ, Wanhib'apito Zezusi hã wei morĩ wamhã, tizadawa wa'u'u na te za tiwĩ. Rowa'a za'ẽtẽ ré wei wisi wamhã, taha wamhã iwasété uptabi hã tâibâ za oto.

Apocalipsi 1:16

Wasi hã 7 na te tété za'ra, tinhib'rata nhimire niwĩ. Duré isadai'ré hawimhã, sib'ézé 'wa si'uiwa 'wa pa te da'o, i'wa pe hã. Duré i'ubu hã te rowa'a za'ẽtẽ. Abzuma bâdâ te te 're irowa'a mono ne, te rowa'a za'ẽtẽ.

Apocalipsi 16:9

Ma tô duré te te dahâpré pese. Tawamhã ma tô 'Re ihâimana u'âsi mono hã 'ruiwapti za'ra ni, rob'manharĩ pipazém na te te dazada ãma 're rowairébé mono wa. Tane nherẽ, dawasété wi dasipizari za'ra õ di. Duré siptete uptabi nherẽ, 'Re ihâimana u'âsi mono ãma 're dawata za'ra mono õ di.

Apocalipsi 19:15

Duré awaru irã na isãmra zadai'ré hawimhã, te sib'ézé 'wa si'uiwa i'wa pe hã aipra. Taha na, te za da'ãma ai'uté, daro mono bâ 're idahâimana wasété za'ra mono norĩ ãma hã. Simiwada'uri nhiptete na te za duré te te 're da'awada'uri. Uwa 'ru 'rã hã ẽtẽ're 're, iwa'u zô da te 're wati za'ra mono wamhã, te za iwa'u hã 're pu'u za'ra. Tane te za dawapru hã dawi 're pu'u za'ra, 'Re ihâimana u'âsi mono isiptete uptabi hã sa'ẽtẽ te te 're da'ahâ za'ra mono wamhã.

Apocalipsi 19:21

Tawamhã awaru irã na isãmra hã tizadai'ré hawi sib'ézé 'wapa i'wa pese si'uiwa zahuré na ma tô uprosi, uburé pese da'wapéi'wa norĩ hã. Uburé ma sõ'rebzâri pese. Tawamhã si norĩ hã danhi na saihuri mono wa, ma tô te te 'mahâpãrĩ pese.

Apocalipsi 2:12

— Te za oto irob'ui'é, Pegamu na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzéb zarina te za tãma irob'ui'é, ãne: “Wa hã sib'ézé 'wa si'uiwa 'wa pa pese ré ĩza hã, wa aima roti za'ra wa'wa, i'wa pese ré hã.

Apocalipsi 2:5

Ma'ãpé, ĩ'ãma asipo're pu'u za'ra wa'aba. 'Re ĩzawi pese za'ra wa'aba mono zém hawimhã ma tô oto asina irosapari pese za'ra wa'wa. Tahawa, aiwasété wi, te za oto 're aipizari za'ra wa'aba mo, apâ. 'Re ĩzazei na'rata za'ra wa'aba mono zém hawim haré, 're i'aihâimana wẽ za'ra wa'aba mono ne, te za tô oto apâ hã 're anomro wẽ wa'aba mo. Ãnei õ wamhã, aiwasété wi 're aipizari za'ra wa'aba mono ãna 're anomro aba mono wamhã, wa za ãma atẽme ĩmorĩ za'ra wa'wa, rob'uiwẽzé sima'warazé ate wa'wa hã te aiwi âri za'ra wa'aba da. Te aiwi âri za'ra wa'aba wamhã, baba di za oto, ate za'ra wa'wa rob'uiwẽzé hã. Ãne, wa aima waihu'u siromo za'ra wa'wa ãma.

Apocalipsi 22:20

Tawamhã Zezusi hã te duré irẽme ma siwasu'u, ã te ãma i'arob'ui'éré mono na te te ĩma i'awaihu'u mono 'wa hã. Ãne te siwasu'u: — Tô sena, wa za wei morĩ su za apâ. Tane tô. Wanhib'apito Zezusi apâ we aimorĩ su'u za tô.

Apocalipsi 22:7

Tawamhã Zezusihi mreme hã wa tô wapa, tizazei'wa norĩ te te ipo're pu'u za'ra zém na hã. Ãne te tinha: — Ma'ãpé, waihu'u pese za'ra wa'aba. Wa za wei morĩ su za apâ hã. Ãhã wasu'u hã tô sena, ibaihâ na za iromhâimana mono zém na ãma irob'ui'éré hã ni'wa ta hã te te 're wapari pese mono wamhã, tãma 're rowẽ u'âsi mono di za.

Apocalipsi 3:19

Wa hã te 're i'azawi pese mono norĩ hã wa tô te tãma 're aroti pese, tiwasété na 're sisãmri za'ra mono da. Wa duré te 're hâ za'ra, apâ 're nomro wẽ mono da. Tahawa, te za aiwasété wi aipizari za'ra wa'wa, sena na ĩ'ãma 're anomro u'âsi aba mono da oto.