Apocalipsi 2:10 - ꞌRe Ihâimana Uꞌâsi Mono Zadawa Wasuꞌu

¹⁰ Za 're irobzépata za'ra wa'aba mono zém na hã asina 're aipahi za'ra wa'aba mono õ di za. Ĩwapari pese za'ra wa'aba. Wa'uburé hã nimahã na te za dama ai'mai'ru wasété 'wa, da te ai'maimrami aba da, dazazéb 're, da te ai'manheme aba da, te te aipibu za'ra wa'aba da, tô sena ĩzaze za'ra wa'aba zô. Tawamhã 10 na bâdâ hã te za ai'ãma 'maihai'utõrĩ 'wa, dazazéb 're ai'masima'wara aba ré, niha aihâiba za'ra wa'aba na 're 'mairobzépata za'ra wa'aba mono ré hã. Ãne wamhã, ma'ãpé asiwi ĩrẽme aba tõ, tô'ã. Tawamhã da te ai'manhimroi wa'aba zém na ai'masi'utõrĩ aba nherẽ, ĩ'mairẽme aba õ wamhã, duré dawi ĩ'mai'udâ wa'aba õ wamhã, wa za aima wa'âbâ za'ra wa'wa. Rowẽ, wa za aima pisutu za'ra wa'wa, ĩ'rata 're i'ai'ubumroi u'âsi aba mono zéb da hã.

Apocalipsi 2:10 ပူးပေါင်းရင်းမြစ်များ

Daniéu 1:12

— Wa ĩsima wẽ, te aiwi waptẽrẽ da, niha na pé we wa'ãma rob'madâ'â za'ra da. Ma'ãpé 10 bâtâ 'remhã rob're na si dasa norĩ hã wama a za'ra na, wa te ihuri da hã nasi. Â si te za duré wama isõmri za'ra, wa te nasi i'âhuri da hã.

Daniéu 1:14

Tawamhã Daniéu norĩ 'madâ'â'wa, tame te te ãma sazei wa, ma tô 10 bâtâ 'remhã niha zô pibu za'ra, te te tiwi iwaptẽrẽzéb zarina.

Mateu 10:22

Uburé te za da te 're ai'ruiwapari za'ra wa'wa, ĩzazei'wa 're anomro aba mono wa. Tane nherẽ, asiptete sina õne u'â ĩ'ãma si 're anomro aba mono wamhã, te za asina 're i'uwaimrami za'ra wa'aba mo, asõ'reptu za'ra wa'aba zé hã.

Mateu 10:28

Dahâiba te te dawi 're isimroi mono norĩ ma hã, tãma 're aipahi za'ra wa'aba mono õ di za, dapẽ'ẽzani hã te te dawi 're simroi waihu'u mono dai õ wa. 'Re ihâimana u'âsi mono si te za asima 're ipipa za'ra wa'aba mo. Taha ma si waihu'u pese di, dahâiba hã duré dapẽ'ẽzani zama, te te dawi 're i'a'uprosi mono zéb da hã.

Mateu 24:13

Tane nherẽ, ni'wam norĩ hã rob'rãsutu u siptete sina ĩ'ãma 're nomro u'âsi mono wamhã, duré ĩwi 're sipizari za'ra mono õ wamhã, ta norĩ si te za ropipa hawi tinho'reptuzé hã te te sina 're uwaimrami za'ra.

Marcu 13:13

Ĩzazei'wa oto 're anomro aba mono wa, te za uburé da te 're ai'ruiwapari za'ra wa'wa. Tane nherẽ, õne haré ĩ'ãma 're anomro u'âsi aba mono wamhã, te za asõ'reptuzé hã asina 're i'uwaimrami za'ra wa'aba mo.

Marcu 8:35

Ni'wam norĩ hã si'uihâ na tihâimanazép si te te sima 're sawi za'ra mono wamhã, rowẽ isi'utõrĩ'õ hã te te sina 're uwaimrami za'ra mono õ di za. Ni'wam norĩ hã ĩzarina 're nomro mono da, duré ĩzadawa wasu'u'wa 're nomro mono wa, 're sihâiba zawi za'ra mono õ wapsi, te za te te sina 're uwaimrami za'ra, rowẽ hã.

Luca 21:12

— Ãne na romhâimana õ ré, te za da te 're aiwaibui wa'wa. Rowasédé hã te za duré da te aima 're 'manharĩ za'ra wa'wa. Rowahutuzéb u, te za da te 're ai'mazasi za'ra wa'wa, aihâimanazém na da te 're aiwaihu'u za'ra wa'aba mono da. Tahawa, te za taré da te 're aiwẽ'õ za'ra wa'wa. Taha pari, te za da te 're aséme 'wa, dazazéb 're, 're aimasa wa'aba mono da. Ĩzazei'wa 're anomro aba mono 'ru te, te za duré da te 're asimroi wa'wa, danhib'apito norĩ u. Roti'wa, si'upana te te ipisutu norĩ u zama, te za da te 're asimroi wa'wa.

Zuwã 12:25

— Ni'wam norĩ hã tihâimanazé te te sima 're sawi za'ra mono wamhã, rowẽ isi'utõrĩ'õ hã te te sina 're uwaimrami za'ra mono õ di za. Ni'wam norĩ hã ĩzarina 're nomro mono da, tihâimanazé te te sima 're sawi za'ra mono õ wapsi, te za rowẽ hã te te sina 're uwaimrami za'ra.

Zuwã 13:2

Tawamhã tisa, te te huri da hã, ma tô asimro bara na, Zezusihi siré 're inomro mono norĩ hã. Tisa hã te te huri õ ré, ma tô Zuda Icarioti hã rosa'rata, Zezusihi zô te te danhimroi mono da, te te dama hâiba nhomri da. Wa'uburé nhimirosa'rata hawim na, te ãne sima ãma rosa'rata. Simahã 'ra, Zuda hã.

Zuwã 13:27

Te te tãma sõmri pari, ma oto Satanasihi nhimiroti hã wapari pese Zuda hã, ipẽ'ẽ 're, oto sébré wa. Tahawa, te Zezusi hã Zudaha ma tinha, ãne: — Marĩ hã 'manharĩ su'u pé.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:24

Tane nherẽ, ĩhâiba ré 're ĩmorĩ siroptu da hã, ĩhâiba te ĩsima sawi õ di, tarére wa, ĩma hã. Wanhib'apito Zezusi hã ma tô ĩnhimiromhuri hã ĩma tisõ, 'Re ihâimana u'âsi mono nhimizawi pese zé wasu'u na te dama 're sadawa wasu'u mono da. Ĩnhimiromhuri hã te tãma ãma uwaimrami da, wa tô ĩsima wẽ pese, taha si.

Zezusihi zadawa wasuꞌuꞌwa norĩ nhimiromhuri na robꞌuiꞌéré 21:13

Tawamhã asa te wama nharĩ za'ra, ãne: — E niha da, te aiwa'õ za'ra wa'wa. Ma tô ãma ĩwi irobzei'õ za'ra wa'wa. Zeruzalẽ u hã ĩmorĩ da si, wa tô ĩsima rowẽ upta. Zezusi hã, Wanhib'apito na te 're sisi mono wa, ãté te za dasiwi ĩnherẽ ni, dazazéb 're. Ãté, wa za dârâ. Tane nherẽ, ĩma hã wẽ di tô, tamomo ĩmorĩ da hã.

1 Corĩtu 9:25

Ni'wa hã dawara na dame hâimana da, te te sima wẽ wamhã, te za nasi sihâiba wairo, dazada sihâiba wapu da. Tawamhã dawi watobro wamhã, ropsu 'manharĩ na te za ãma sõpre ni, te te da'mairẽme wẽ te. Tane nherẽ, te za tiwi tiwasété su'u, ropsu 'manharĩ hã. Tanei õ di, wa norĩ hã. Isi'utõrĩ'õ zô si, wa za Cristuhu ãma si wasina 're wanhiptete u'âsi za'ra, 'Re ihâimana u'âsi mono, marĩ iwẽ uptabi hã te te wama 're i'apisutu mono zô si.

Éfézu 2:2

Isazei'õ'wai hâimanazém na ma tô aré 're aihâimana za'ra wa'aba mo, wa'uburé norĩ nhib'apito nhimiroti na zama. Hâiwa nho're ãma te ta norĩ hã 're hâimana za'ra. Isimiroti hã tãma pire za'ra di, ipo're'õ norĩ ma hã. Tahawa, te ta norĩ hã isimiroti na si 're nomro, 'Re ihâimana u'âsi mono wapari'õ'wa norĩ hã.

Éfézu 6:12

Wa norĩ hã wasiré 're iwahâimana za'ra mono norĩ me, 're wasi'wapé za'ra mono õ di. Wa'uburé norĩ me si, wa za 're wasi'wapé za'ra, hâiwa nho're ãma simiroti wasété na 're ihâimana za'ra mono norĩ me. Wa'uburé norĩ hã ti'ai ãma dapo're'õ na 're idanomro mono norĩ ma hã, simiroti pire di, Wanhib'apito nhimiroti waihu'u'õ'wa ta norĩ hã 're nomro mono wa.

Tiagu 1:12

Wa za duré ãne aima waihu'u za'ra wa'wa. Marĩ ahâ na dazada 're hâimana za'ra mono wamhã, 'Re ihâimana u'âsi mono hã ro'wa'rudu hã te te dama 're ba'a za'ra mono õ nherẽ, te za danhiptete sina ãma 're dahâimana u'âsi za'ra. Ãne wamhã, 'Re ihâimana u'âsi mono hã te za ãne na da'awaihu'u. Tawamhã isawi pese 'wa 're dahâimana za'ra mono wa, te za tãma wa'âbâ za'ra oto, rowẽ uptabi na, i'rata 're idahâimana u'âsi za'ra mono zém na, te te dama iropisutuzéb zarina. Tawamhã dama 're rowẽ uptabi za'ra mono di za.

1 Pedru 5:4

Tawamhã Da'madâ'â'wai uptabi hã apâ wei morĩ wapsi, tãma 're idapawapto wẽ za'ra wa'aba mono zé wa'rãmi, te za oto aima wa'âbâ za'ra wa'wa, iwẽ uptabi na, si'utõrĩ'õ na oto aima 're hâimana u'âsi za'ra wa'aba mono da.

1 Pedru 5:8

Ma'ãpé, aihâimana nhimiza'rese sina 're aihâimana za'ra wa'aba mono. Duré 're asi'madâ'â pese za'ra wa'aba mono. E marĩ wa. Da'rui'wa hã datẽme 're morĩ wa, wa'uburé norĩ nhib'apito hã. Hu'u zéré pa hã wairõ sina, tisa zô 're inomro mono ne, te ta hã datẽme 're morĩ u'â, Wanhib'apito si da te dasina 're i'madâ'â u'âsi za'ra mono zé hã te te dawi 're a'uprosi mono da.

Apocalipsi 13:14

Ãne 'Re ihâimana u'âsi mono hã ma tô tãma waprosi, â hawi ropoto siwamnarĩ nho'a te te 're romhõsi mono da. Ãne ma tô tinhimiromhõsi na dama 're sadawa nhipese, 'Re ihâimana u'âsi mono zadawa para newa, ti'ai ãma daro mono bâ 're idahâimana za'ra mono norĩ ma hã. Ma tô duré dama ti'ru, romhâiba, da te dasiwi 'manharĩ da, â hawi ropoto siwamnarĩ hâiba na, sib'ézé 'wapa na da te dasiwi wĩrĩ nherẽ, apâ ihâiwa'utu hâiba na.

Apocalipsi 13:2

Duré ihâiba hã, hu'u hâiba ne. Ipara hã robzahi para ne hã ursu para ne. Duré isadai'ré hã, aiwa hu'u zérépa zadai'ré ne, isadai'ré hã. Tawamhã ho'orã hâiba ne ropoto siwamnarĩ hã, Satanasi hã ma tô tinhiptetezé hã tãma tisõ, isadawa para siré te te da'ãma 're romhuri wasété zahuré mono da, isimiromhuri waihu'u pese zém na.

Apocalipsi 13:7

Tawamhã 'Re ihâimana u'âsi mono hã ma tô duré tãma waprosi, â hawi ropoto siwamnarĩ ma, isib'a'uwẽ te te 'wapé za'ra da, te te ãma ai'uté za'ra da, isib'a'uwẽ norĩ ãma. Ma tô duré tãma waprosi, simiwada'uri wasété nhiptete sina te te 're da'awada'uri mono da, dapoto mono bâ, duré damreme sipo'o mono bâ 're idahâimana za'ra mono hã.

Apocalipsi 17:14

Te za duré ropoto siwamnarĩ siré siwi 'wapé, Pone'ẽrebâ hã. Tane nherẽ, te za Pone'ẽrebâ hã ãma ai'uté za'ra. Ta hã Pone'ẽrebâ danhipai u Uburé Danhib'apito uptabi na 're hâimana mono wa, duré danhipai u dama pire na 're hâimana mono wa, te za ãma ai'uté za'ra. Ni'wam norĩ hã isirã zarina si 're nomro mono da, Pone'ẽrebâ te te 're i'apisutu mono norĩ hã, duré simi'ẽ na õhõ ãma si 're inomro mono norĩ hã, te za Pone'ẽrebâ siré ãma ai'uté za'ra, ropoto siwamnarĩ norĩ ãma hã.

Apocalipsi 2:13

Ĩma waihu'u pese di, 're i'ai'ubumroi wa'aba mono zé hã. Tame te Satanasihi nhimiwada'uri na 're dahâimana za'ra. Tame ma tô Ãtipasi hã dasiwi wĩrĩ ni asõ'a za'ra wa'aba, simi'ẽ na te te dama 're ĩzadawa wasu'u mono hã. Tane nherẽ, asõ'a za'ra wa'aba da te dasiwi wĩrĩ nherẽ, tãma aipahi za'ra wa'aba õ di. Ĩrẽme za'ra wa'aba õ di duré. Õne haré te ĩnhimiroti na si 're aihâimana za'ra wa'aba mo.

Apocalipsi 2:9

Ĩma waihu'u pese di, da te aima 're irob'manharĩ wasété za'ra wa'aba mono zém hawi, 're irobzépata za'ra wa'aba mono zé hã. Duré, ĩma waihu'u pese di, asibrob'õ na 're irobzépata za'ra wa'aba mono zé hã. Tane nherẽ, te asibrob ahâ ne, rowẽ na 're aihâimana za'ra wa'aba mo, ĩnhimipawaptobzém na si 're aihâimana za'ra wa'aba mono wa. Duré ni'wam norĩ hã te te dama 're aiwasu'u wasété za'ra wa'wa. Te te dama 're aiwasu'u wasété za'ra wa'aba mono zé hã ĩma waihu'u pese di. Ta norĩ hã zudeu na 're poto za'ra mono zahã, te Satanasihi nhimiroti zarina si, siwa'ru 're hâimana za'ra.