Apocalipsi 18:9 - ꞌRe Ihâimana Uꞌâsi Mono Zadawa Wasuꞌu

⁹ Tawamhã daro mono bâ danhib'apito norĩ hã dama ipire za'ra norĩ hã ã pi'õ na 're ihâimana wasété za'ra mono norĩ hã pi'õ izata nhizé te te sãmri za'ra wamhã, te za ãma aiwa'õ za'ra.

Apocalipsi 18:9 ပူးပေါင်းရင်းမြစ်များ

Zenezi 19:28

Tawamhã Sodoma norĩ nho'õmoi baba Gomora me, uburé romharé na zama ma tô te te rob'madâ'â. Tahawa, ma tô ti'ai hawimhã unhama nhizé 're isi'ré mono hã 'madâ, robzebrezém hawi unhama nhizé 're isi'réi mono ne hã.

Daniéu 4:14

Ta hã ma tô mreme 'rãihâ na tinha ãne: ‘Ma'ãpé wede hã asiwi 'morõwĩrĩ aba. Asiwi 'morõwĩrĩ aba wamhã, te za ipanhipti asiwi isihâri aba mo. Te za duré isu hã asiwi isinarĩ aba mo. Duré i'rã asiwi sãmra aba wamhã, te za ãma asiwi iropéi wa'aba mo. Iwede awã zahâpâ abaze norĩ 're iwa'utu za'ra mono hã te za duré ta hawi asiwi iwano'õ aba mo, si norĩ ipanhipti na 're isimasa mono norĩ zama.

1 Timotiu 5:11

Pi'õi mrotõ hâiba tém norĩ nhisi na ihi norĩ nhisi zu, ãma 're rob'ui'éré za'ra mono õ di za. E marĩ wa. Ãté hâiba téb uptabi ré, 're mrotõ za'ra mono wa, te za te te sima 're wẽ za'ra, timro na te te 're sahu za'ra mono da. Ãté Cristuhu ma si te te 're romhuri za'ra mono da, te te sima 're wẽ za'ra mono õ di za oto.

Apocalipsi 14:11

Tawamhã unhama ro'o nhizé hã te te ãma 're irobzépata za'ra mono nhizé hã te õne u'âsi 're sizédé 'rãti u'âsi, hâimo. Unhama ro hã ro'o nhimizazâri waihu'u õ di, â hawi ropoto siwamnarĩ ãma 're iwata za'ra mono norĩ ma hã, duré ihâiba 'manharĩ na romhâiba ãma 're iwata za'ra mono norĩ ma hã, duré isisi na i'ui'éré za'ra norĩ ma hã. Õne u'âsi te ã norĩ hã robzépata wi 're wairébé waihu'u mono ãna, te te 're robzépata u'âsi za'ra.

Apocalipsi 17:2

Aibâ hã pi'õi hâimana wasété na 're ihâimana wasété mono ne, ma tô daro mono bâ danhib'apito norĩ dama ipire za'ra hã Babilonia ãma 're idahâimana wasété za'ra mono norĩ siré 're wasété uptabi za'ra. Âzé nhipãrĩ para da'uihâ idi'iti zarina, da te 're irobzanhamri za'ra mono ne, ma tô daro mono bâ Babilonia ãma 're idahâimana wasété za'ra mono norĩ siré, 're dahâimana to za'ra, dawasété na hã. Pi'õ iwasédé hã timro upana aibâ aimawi zô si, te te 're irowasutu mono hã, Babilonia ãma 're idahâimana za'ra mono norĩ marĩ iwasété zô si da te dasima 're irob'ruiwapari za'ra mono, te wasu'u.

Apocalipsi 18:18

Tawamhã ã norĩ hã 'ri nho'õmo nhizé, te te sãmri za'ra wamhã, te za duré 're sadari za'ra. 'Re sadari za'ra mono sina, te za ãne sima nharĩ za'ra: — Õ hã 'ri nho'u hã iwẽ uptabi aré. Isine hã 'ri nho'u hã i'maihâimana waihu'u õ.

Apocalipsi 18:20

Ãne te i'awapari mono hã, ĩnhotõ 'rowim ne, ĩpo're na. Tahawa, ma'ãpé hâiwa ãma 're aihâimana za'ra wa'aba mono hã ãma 're atoi u'âsi za'ra wa'aba mono, 'ri nho'õmo za'ẽne hã isi'utõrĩzém na. Duré 'Re ihâimana u'âsi mono nhib'a'uwẽ norĩ, ma'ãpé 're atoi u'âsi za'ra wa'aba mono, isadawa wasu'u'wa norĩ zama, duré Cristuhu zadawa wasu'u'wa norĩ zama. E marĩ wa. Babilonia ãma da te aima 're rob'manharĩ wasété za'ra wa'aba mono wa, 'Re ihâimana u'âsi mono hã te te da'uprosi wa oto. Tahawa, te za ãma 're atoi u'âsi za'ra wa'aba mo.

Apocalipsi 18:3

Uburé dapoto wamri mono bâ ma tô uwa nho'u isé nhimi'rãiwamnarĩ ne, dawasété si da te iwa 're 'manharĩ za'ra. Ma tô duré daro mono bâ danhib'apito norĩ hã dama ipire za'ra hã siré 're wasété uptabi za'ra. Aibâ hã timro upana pi'õ aimawi zô si te te 're irowasutu za'ra mono ne, ma tô 'Re ihâimana u'âsi mono upana, marĩ iwasété zô si da te 're rob'ruiwapari za'ra. Duré Babilonia ãma marĩ zô si, da te 're irob'ruiwapari za'ẽtẽ uptabi za'ra mono zarina, ma tô marĩ hã da te 're uipra za'ẽtẽ uptabi za'ra, siwa'ru. Taha na da te tiwi 're irob'uipra za'ra mono zém na, ma tô daro mono bâ dama rowede'wa norĩ hã 're sisibro pese uptabi za'ra. Ãne wa, ma oto Babilonia hã ai'utõ.

Apocalipsi 18:7

Ta norĩ hã ma tô sina 're wata pese za'ra. Tinhimirosa'rata wasété zarina ma tô sina 're hâimana wasété uptabi za'ra. 'Re ihâimana wasété za'ra mono zarina, te za aiwab da, tãma 're irob'manharĩ wasété za'ra wa'aba mo, te te 're robzépata za'ẽtẽ za'ra mono da, duré tiwi 're robzei'õ pese za'ra mono da. Tawamhã pi'õ te nasi si'ãma tinha, ãne: Wa hã dama ĩpire na, wa 're ĩnhamra. Duré imrotõ hã timro zô 're isiwa'õ za'ra mono ne, 're ĩhâimana mono õ di. Ĩsiré norĩ hã ahâ uptabi di. Niwamhã ĩwi robzei'õ waihu'u õ di za. Ãne te pi'õ hã si'ãma nasi tinha, Babilonia ãma 're idahâimana za'ra mono norĩ ãma isimiré'é na.

Apocalipsi 19:3

Tawamhã te duré damreme 'rãihâ na nharĩ za'ra ni, ãne: — 'Re ihâimana u'âsi mono ãma 're wawata u'âsi za'ra wa'aba mono. 'Ri nho'õmo za'ẽtẽ ro'o nhizé hã õne u'âsi hâimo 're sizédé si'réi mono wẽ te, ãma 're wawata u'âsi za'ra wa'aba mono.

Apocalipsi 2:22

Ma'ãpé, waihu'u pese za'ra wa'aba. Pi'õ hã tiwasété wi sipi'rai õ wa, wa za oto azâ, te te robzépata za'ẽtẽ da. Si'ãma 're ihâimana wasété za'ra mono norĩ zama ã pi'õi hawi sipizari za'ra õ wamhã, wa za isu hâ za'ra, te te robzépata za'ẽtẽ za'ra da.