Apocalipsi 18:2 - ꞌRe Ihâimana Uꞌâsi Mono Zadawa Wasuꞌu

² Tawamhã mreme 'rãihâ na te 'mahâ. Ãne te 'mahâ: — Babilonia hã dahu nho'u dama isa'rese za'ẽne hã ma tô daré ai'utõ. Ma tô uprosi ni. Ahâ uptabi na te oto iwasété norĩ hã iwa 're hâimana za'ra, wa'uburé norĩ hã. Sipahutu norĩ zama, duré si'õmo norĩ zama te oto ahâ uptabi na iwa 're hâimana za'ra, uburé pese si iwasété norĩ hã.

Apocalipsi 18:2 ပူးပေါင်းရင်းမြစ်များ

Zuéu 3:16

Uburé Danhib'apito te za Siã na sa'a nhisi ãma mreme 'rãihâ na tinha, tãirãrã'ã ne. Zeruzalẽ hawi te za mreme 'rãihâ na mreme watobro. Tawamhã, hâiwa norĩ ti'ai me te za tipopo'o zahuré. Tane nherẽ, te za tinhib'a'uwẽ Izaraéu nhihudu norĩ 'wawimhã aimapa, 'Re ihâimana u'âsi mono hã.

Apocalipsi 1:15

Duré ipara hã ẽtẽ topsada brõzi ne, te 're si'ubuzi zahuré. Duré imreme hã, â'a'a 'rãihâ ruru'u ne.

Apocalipsi 10:3

Tawamhã mreme 'rãihâ na te hâ. Hu'u zérépa wairõ 'rãihâ ne, ihârâ hã. Hârâ wamhã, awa'awi ma tô tãiwapsa hã tiwapsa'a za'ra, wapsa'a 'rãihâ na. 7 na iwapsa'a za'ra hã.

Apocalipsi 11:8

Tawamhã 'ri nhi'riti 're za'ẽtẽ ãma, te za taré ihâiba hâ hã tiza'wari zahuré, 'ri nho'õmo za'ẽtẽ ãma, wede nhonhi'rãmi na Isib'apito za'ra, da te dasiwi iwĩrĩzém nho'õmo ãma, dama isa'rese za'ẽtẽ ãma. Sodoma na 'ri nho'õmo nhisi ãma, 're idahâimana wasété za'ra mono ne, ã 'ri nho'u hã. Duré Ezitu na romnhisi ãma 're idahâimana wasété za'ra mono ne hã, ã 'ri nho'u hã. Ãne 'ri nho'õmo zahuré na ãma isimiré'ézé hã, Zeruzalẽ hã.

Apocalipsi 14:15

Tawamhã hâiwa ãma romhuri'wa ihâiba amo hã ma tô hâiwa ãma 'Re ihâimana u'âsi mono 're isãmra mono zém hawi watobro, 'ri hawi. Watobro wamhã, te mreme 'rãihâ na 'mahâ, hâiwa'a na isãmra hã. Ãne te 'mahâ: — Ti'ai ãma daro mono bâ hã ma tô amnho 'rãi'ré pese mono. Tahawa, ma tô oto iwa waptãrã, iroptehâri mono zéb da hã, bâdâ. Tahawa, ma'ãpé roptehâri mono, asimiroptehârizém na.

Apocalipsi 14:8

Tawamhã te duré isãna'remhã 're wara, hâiwa ãma romhuri'wa hã ihâiba amo hã. Ãne te duré ta hã te te rob'mahârâ: — Ma tô daré ai'utõ. 'Ri nho'õmo za'ẽne hã ma tô daré ai'utõ, Babilonia hã. Ma tô uprosi ni. Âsipãrĩ na si pi'õ hã 're isai mono hã te za tihâiba amo norĩ ma ti'ru, isiré te te âhuri wa, si'rã idi'iti pese za'ra da, isiré. Tane ma tô Babilonia ãma 're idahâimana wasété za'ra mono norĩ hã te te 're dawada'uri za'ra daro mono bâ, da'rã idi'iti wa, siwa'ru 're idanomro mono ne, isine 're danomro wasété mono da. Tahawa, ma tô daré ai'utõ, Babilonia hã.

Apocalipsi 16:13

Tawamhã wa tô duré 'madâ, si'ubdatõ wa'uburé norĩ hã, iwasété norĩ hã. Uti hâiba ne ihâiba za'ra hã. Ropoto siwamnarĩ zadai'ré mono hawi, ma tô misi si wairébé, ho'orã hâiba ne ropoto siwamnarĩ hâiba za'ẽtẽ zadai'ré hawi, duré â hawi ropoto siwamnarĩ zadai'ré hawi, duré ti'ai hawi ropoto pipa zadai'ré hawi. Ti'ai hawi ropoto pipa hã, ta hã 'Re ihâimana u'âsi mono zadawa wasu'u uptabi õ 'wa, 'Re ihâimana u'âsi mono nhimipisutu newa sadawa nhipese na hã te te 're ida'a'rãmi mono.

Apocalipsi 16:19

Tawamhã Babilonia na 'ri nho'õmo za'ẽtẽ nhisi ãma, ma ti'a sãsã'ã na ti'a sipo'o. Si'ubdatõ iwa'õtõ na ma tô ãma sipo'o. Ãne ma tô 'Re ihâimana u'âsi mono hã tinhimi'ahâri pipa zém na te te dama arob'manharĩ, Babilonia ãma 're idahâimana wasété za'ra mono norĩ ma. 'Re idahâimana wasété za'ra mono zé hã tiwi simani õ di. Tahawa, uwa 'rãi wa'u isé pire hã da te 're huri mono wa, da te 're isépata za'ra mono ne, ma tô 'Re ihâimana u'âsi mono nhimihâzé hã da te 're sépata za'ra. Duré daro mono bâ 'ri nho'õmo mono bâ ma duré ropsisa'wari. Tahawa, ma uburé ropsi'utõrĩ pese, 'ri nho'õmo mono bâ.

Apocalipsi 17:18

— Duré ã pi'õ i'madâ hã ã 'ri nho'õmo za'ẽne hã te wasu'u, dama isa'rese za'ẽne hã. Ã 'ri nho'õmo ãma danhib'apito hã dama ipire hã, daro mono bâ dama ipire norĩ nhipai u 're ihâimana mono. Õ norĩ hã te te 're i'awada'uri mono.

Apocalipsi 17:5

Duré pi'õi uihâ na rob'ui'éré hã dama iwaihu'u'õ na, ãma isimiré'ézém na hã iwamri. Ãne iwamrizé, imorĩ'rada hã: Babilonia na 'ri nho'õmo za'ẽtẽ na. Duré daro mono bâ dawasété 'ru na'rata 'wa na, iwamrizéb amo hã. Duré iwamrizéb amo hã pi'õi wasété norĩ na na, iwamrizéb amo hã, isine aibâ na 're hâimana wasété za'ra mono da, pi'õ norĩ te te 're wada'uri za'ra mono wa, ta hã.

Apocalipsi 18:10

Tawamhã pi'õ te te irobzépata pipa te, te za romhâ na aimasa. Ãne te za ipibu ma 're sadari za'ra: — Ropipa uptabi hã ma tô asô tiwatobro 'wa, Babilonia ãma 're i'aihâimana za'ra wa'aba mono norĩ zô hã. Ropipa uptabi di. Misi bâtâ na ma ropipa uptabi hã õne haré asô tiwatobro 'wa, 'ri nho'õmo za'ẽtẽ ãma 're i'aihâimana za'ra wa'aba mono norĩ zô. Taha na ma tô irobzépata za'ẽtẽ za'ra wa'wa.

Apocalipsi 18:21

Tawamhã ãne, wa tô duré te azabu. Hâiwa ãma romhuri'wa isimiwada'uri pire hã ma tô ẽtẽ tõmo wawẽ uptabi hã sarõtõ. Te te sarõtõ wamhã, ma tô âi ba time, â poré ãma. Te te me sina, te ãne tinha: — Ãne te za Babilonia hã 'ri nho'õmo za'ẽne hã sa'ẽtẽ uptabi daré uprosi, si'utõrĩ da. Tawamhã ropsi hã te za oto sô nomro.

Apocalipsi 5:2

Tawamhã wa tô duré 'madâ, hâiwa ãma 'Re ihâimana u'âsi mono ma romhuri'wa, isimiwada'uri pire hã. Ãne te nasi anha ta hã, mreme 'rãihâ na: — E 'wa hã danhipai u iwẽ uptabi, duré iwaihu'u pese uptabi hã te za 7 na ibaihâ nhinha uptobzé hã prub za'ra, ibaihâ te te sõ'a da. E 'wa hã te ãhã da hã sada tihâiba.