Apocalipsi 15:4 - ꞌRe Ihâimana Uꞌâsi Mono Zadawa Wasuꞌu

⁴ Wanhib'apito, dama aipire uptabi wa, te da te dasiwi 're aiwazé. Uburé pese, te da te 're aiwasu'u wẽ za'ra, danhipai u pese, aiwẽ uptabi wa. Aiwétési tô sena aiwẽ uptabi hã. Daro mono bâ 're idahâimana za'ra mono norĩ hã te za we ai'ãma 're dawata u'âsi za'ra, upai ãna dama 're i'arob'manharĩ wẽ mono zé hã da te 're 'madâ'â za'ra mono wa.”

Apocalipsi 15:4 ပူးပေါင်းရင်းမြစ်များ

Salmu 22:23

“Uburé Danhib'apito 're iwazéb za'ra wa'aba mono norĩ, uburé te za ãma 're aiwata za'ra wa'aba mo. Zacoho nhihudu norĩ, 'Re ihâimana u'âsi mono ãma 're aiwata za'ra wa'aba mono! Izaraéu nhihudu norĩ, Uburé Danhib'apito hã asiwi 're wazé pese za'ra wa'aba mono!

Salmu 22:27

Niwa apto'o ré daro mono bâ 're idahâimana za'ra mono norĩ, te za Uburé Danhib'apito ãma 're po're pu'u za'ra. Te za duré apâ itẽme hã 're dasipizari za'ra. Duré te za a'uwẽ mono bâ ãma 're dawata za'ra.

Salmu 22:3

Tane nherẽ, a hã marĩ iwasédé, ai'ãma 're ihâimana mono õ, Danhib'apito simasisizéb ãma 're i'asãmra mono. Duré Izaraéu nhihudu norĩ, ai'ãma 're iwata za'ra mono zé hã te 're i'awapari mo.

Salmu 89:7

A hã aiwazé pese na, te ta norĩ 're isi'rã'õtõ mono zéb ãma tãma 're aihâimana za'ra mo. Tame te te siwi 're i'ai'uirĩ za'ra mono norĩ hã te duré uburé te te siwi 're aiwazé pese.

Roma 15:9

Duré zudeu'õ norĩ hã 'Re ihâimana u'âsi mono, da'ãma 're ipẽ'ẽzé mono zé hã te te oto sina 're waihu'u za'ra mono wa, ãma 're wata za'ra mono da, ma tô we Cristu hã zudeu norĩ u satõ, 'Re ihâimana u'âsi mono hã. Duréihã ãne rob'ui'éré na iwasu'u hã: “Wa hã zudeu'õ norĩ siré 're ĩhâimana mono ré, wa za isiré za'ra, ai'ãma 're ĩwata u'âsi. Ĩnho're na zama, wa za duré ai'ãma 're ĩwata u'âsi.”

1 Pedru 1:16

Duréihã ma tô ãne siwasu'u, 'Re ihâimana u'âsi mono hã: “Wa hã ĩhâimana wẽ uptabi na, wa 're ĩhâimana. Tahawa, a norĩ wa'aba zama te za aihâimana wẽ uptabi na 're aihâimana za'ra wa'aba aba mo, ĩsine.”

Apocalipsi 11:15

Tawamhã 7 ãma hâiwa ãma romhuri'wa hã ma tô tinhimnhihârâzém na amnhihârâ. Simnhihârâ wi, hâiwa ãma damreme 'rãihâ hã wa tô wapa. Ãne te nharĩ za'ra: — Satanasihi nhimi'madâ, 're danomro mono da, ma tô da te dasima 're wẽ za'ra aré, daro mono bâ. Tane nherẽ, ropâ te za oto 'Re ihâimana u'âsi mono nhimi'madâ'â si 're danomro, Wanhib'apito nhimi'madâ hã. Danho'reptui'wa da, te te ipisutu nhimi'madâ'â zama te za 're dahâimana za'ra oto. Wanhib'apito hã te za tô te te 're da'ab'madâ'â u'âsi oto, õne u'âsi.

Apocalipsi 14:7

Ãne te mreme 'rãihâ na te te dama 'mahârâ: — 'Re ihâimana u'âsi mono nhimiroti hã 're wazé pese za'ra wa'aba mono. Duré wẽ uptabi wa, ãma 're aiwata pese u'âsi za'ra wa'aba mono. Ma tô iwa waptãrã, 'Re ihâimana u'âsi mono te te da'ãma i'arowairébézéb u da hã, uburé pese. Tahawa, te za Ropoto'wai ãma 're aiwata u'âsi za'ra wa'aba mo, hâiwa 'manharĩ'wai ãma, duré ti'ai 'manharĩ'wai ãma, duré â poré 'manharĩ'wai ãma, duré ub're 'manharĩ'wai ãma.

Apocalipsi 16:5

Tawamhã wa tô wapa, hâiwa ãma romhuri'wa hã, â mono bâ, â 'madâ'â'wa hã. 'Re ihâimana u'âsi mono ãma te tiwata, ãne: — A hã tô sena te marĩ na upai ãna i'uwaibaba si dama 're i'arowairébé mo. A hã 're aiwasété mono õ. Marĩ õ ré hã te 're aihâimana u'âsi mo. Ai'utõrĩ waihu'u õ di. Õne u'âsi te 're aihâimana mo.

Apocalipsi 16:7

Tawamhã wa tô duré wapa ni'wai mreme hã, wedeza ne hawi, 'Re ihâimana u'âsi mono ma, danhoprubzé nomrizém hawi. Te duré 'Re ihâimana u'âsi mono ãma tiwata, ãne: — Uburé Danhib'apito uptabi, 'Re ihâimana u'âsi mono, tô sena aiwaihu'u pese uptabi di. Marĩ na upai ãna te i'uwaibaba si dama 're i'arowairébé mo, sena na.

Apocalipsi 19:2

Marĩ na te te upai ãna, te i'uwaibaba si te te dama 're arowairébé, sena na. Pi'õ siwa'âbâ zô 're isisõmri mono 're ihâimana wasété mono zéb zarina, isine daro mono bâ 're dahâimana wasété za'ra mono wa, ma tô 'Re ihâimana u'âsi mono hã iwasédé hã ãma tihi. Ma tô wẽ'õ pese. Isib'a'uwẽ norĩ te te 're simroi mono wa, ma tô 'Re ihâimana u'âsi mono hã uprosi, pi'õ hã.

Apocalipsi 19:8

Za ãma imro ma hã, ma tô 'Re ihâimana u'âsi mono hã tãma tisõ, i'uzazé hâirã wẽ uptabi hã, ãma isi'uza da hã. Ãma imro da uzazé hã 'Re ihâimana u'âsi mono nhib'a'uwẽ te te 're iromhuri wẽ za'ra mono zé, te wasu'u.

Apocalipsi 3:7

— Te za oto duré irob'ui'é, Filadéufia na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne: “Wa hã 're ĩwasété mono õ, wa za oto aima roti za'ra wa'wa, ĩnhimiropisutuzéb zarina, sena na te dama ãma 're i'a'uwaimrami mono 'wa hã. Duréihã Dawi hã te 're hâimana, dama ipire hã. Isõrõwa hã i'ri za'ẽtẽ uptabi. Tame te ni'wa hã 're sãmra, 'ridawazéb ré hã, te te dama 're i'ridawa mono da hã, duré te te dawi 're i'ridawa nhito mono da hã. Tane wa hã, wa hâiwa ãma Ĩmama nhorõwa 'ridawazéb ré 're ĩhâimana u'âsi, ĩwétési. Wa hã te dama 'ridawa wamhã, ni'wa apâ te te dawi sito waihu'u õ di. Duré te 'ridawa nhito wamhã, ni'wa hã te te 'ridawa waihu'u õ di.

Apocalipsi 6:10

Tawamhã mreme 'rãihâ na te hã: — Wanhib'apito, danhipai u aiwaihu'u pese di. Duré aiwẽ uptabi di. Tô sena, a hã. Tahawa, e nimahã na hã wa'uprosi'wa norĩ ãma iwasédé hã sa'ra õ di za, ti'ai ãma 're ihâimana wasété za'ra mono ãma. E niwamhã wa'ruiwa'âbâ za'ra õ di za, asimi'ahârizém na hã.

1 Samuéu 2:2

Ni'wa Uburé Danhib'apito sine iwẽ uptabi iwasété'õ hã hâimana õ di. Tawamhã duré aimawi ihâiba'õ hã hâimana õ di, tô õhõ si wa. Duré ni'wa hã hâimana õ di isine, da'wawi rowasété wa 're isimapa mono hã, 'Re ihâimana u'âsi mono ne hã.