Apocalipsi 15:1 - ꞌRe Ihâimana Uꞌâsi Mono Zadawa Wasuꞌu

¹ Tawamhã wa tô duré marĩ hã 'madâ, hâiwa nhirõtõ na dama isa'rese'õ hã ãma 're idatob'uzu za'ra mono hã. Hâiwa ãma romhuri'wa norĩ hã te 7 na aimasa. Ta norĩ ma, ma tô 'Re ihâimana u'âsi mono hã pisutu, 7 na rob'manharĩ pipa mono na hã, irẽme ma te te taha na dama ãma 're rob'manharĩ za'ra mono da. Ã norĩ hã 'Re ihâimana u'âsi mono nhimi'ahârizéb 'rãsudu, te wasu'u.

Apocalipsi 15:1 ပူးပေါင်းရင်းမြစ်များ

Daniéu 6:27

Taha si, siminho'reptu waihu'u pese di. Hâiwa ãma, duré ti'ai ãma te dama isa'rese'õ na te te 're romhõsi. Taha si ma tô Daniéu hã sõ'reptu, hu'u zérépa nhiptetezé wi hã.”

Apocalipsi 10:3

Tawamhã mreme 'rãihâ na te hâ. Hu'u zérépa wairõ 'rãihâ ne, ihârâ hã. Hârâ wamhã, awa'awi ma tô tãiwapsa hã tiwapsa'a za'ra, wapsa'a 'rãihâ na. 7 na iwapsa'a za'ra hã.

Apocalipsi 11:14

Tawamhã ropipa hã maparane ipu hã tâibâ oto. Tane nherẽ, zahadu si'ubdatõ ãma zô, te rowaptâ. Romhuture di oto, duré ropipa iwatobro da hã. Ma'ãpé ãne waihu'u pese za'ra wa'aba.

Apocalipsi 14:19

Tawamhã hâiwa ãma romhuri'wa hã ma tô te te anhimizuhâri tô, uwa 'ru 'rã hã daro mono bâ, ti'ai ãma hã. Te te anhimizuhâri mono wamhã, ma tô te te anhamra ẽtẽ're 're, iwa'u zô, dapara na da te 're iwati za'ra mono zéb 're.

Apocalipsi 16:1

Tawamhã wa tô duré wapa, 'Re ihâimana u'âsi mono mreme hã, imreme 'rãihâ hã hâiwa ãma, isõrõwa 'ri hawi. 7 na hâiwa ãma tãma iromhuri'wa norĩ ma, te rob'ru za'ra. Ãne te tãma rob'ru za'ra: — Mo oto ai'aba'réi wa'aba ti'ai u, 7 na u'awi hawi ĩnhimihâzé hã sa'wari za'ra wa'aba mono da.

Apocalipsi 17:1

Tawamhã 7 na hâiwa ãma romhuri'wa norĩ siré hã ma tô we ĩtẽme 'maimo, u'awi ré ihâimana za'ra norĩ siré hã. Tawamhã te ĩzatõ, ãne: — We ĩsiré aimorĩ, Babilonia na 'ri nho'õmo za'ẽtẽ nhisi ãma 're idahâimana wasété za'ra mono norĩ ma, 'Re ihâimana u'âsi mono te te irob'manharĩ pipa zé hã sabu da. Panho'õmo si'rutu 'rata, te 'ri nho'õmo za'ẽne hã 're hâimana. Pi'õi wasédé iwa'âbâ zô aibâ ma, 're isisõmri mono ne, te Babilonia ãma hã 're dahâimana wasété uptabi za'ra.

Apocalipsi 19:15

Duré awaru irã na isãmra zadai'ré hawimhã, te sib'ézé 'wa si'uiwa i'wa pe hã aipra. Taha na, te za da'ãma ai'uté, daro mono bâ 're idahâimana wasété za'ra mono norĩ ãma hã. Simiwada'uri nhiptete na te za duré te te 're da'awada'uri. Uwa 'ru 'rã hã ẽtẽ're 're, iwa'u zô da te 're wati za'ra mono wamhã, te za iwa'u hã 're pu'u za'ra. Tane te za dawapru hã dawi 're pu'u za'ra, 'Re ihâimana u'âsi mono isiptete uptabi hã sa'ẽtẽ te te 're da'ahâ za'ra mono wamhã.

Apocalipsi 21:9

Tawamhã 7 na hâiwa ãma romhuri'wa norĩ siré hã ma tô misi we ĩtẽme 'maimo, 7 na u'awi ré ihâimana za'ra norĩ siré hã, rob'manharĩ pipa na te te dama 're irob'manharĩ wasété za'ra mono norĩ siré hã. Tawamhã ta hã te ãne ĩzatõ: — Ma'ãpé we ĩsiré aimorĩ, Pone'ẽrebâ mro da hã, za te aima ihâi'ré hã sabu da.

Apocalipsi 8:13

Taha pari, wa tô duré 'madâ, si'u hã, hâimo uptabi 're iwara hã. Ta hã te wara sina, mreme 'rãihâ na dama rob'mahâ, ãne: — Ni'ãpé, ni'ãpé, ni'ãpé. Ti'ai ãma uburé pese 're i'aihâimana za'ra wa'aba mono norĩ ma, aima ropipa uptabi za'ra wa'aba di za. Hâiwa ãma romhuri'wa norĩ si'ubdatõ isimnhihãsi õ, tinhimnhihârâzém na oto simnhihãsi wamhã, isimnhihãsi sidâpâsi te za ropipa uptabi hã asô wairébé 'wa. Ãne ĩnhotõ 'rowim ne, te i'azabui mono hã, duré ĩpo're na te i'awapari mono hã.

Apocalipsi 8:2

Tawamhã wa tô duré 'madâ'â za'ra, 7 na hâiwa ãma romhuri'wa norĩ hã 'Re ihâimana u'âsi mono nho're, isimasam norĩ hã. Ta norĩ ma, ma tô 7 na danhimnhihârâzé hã sõmri za'ra ni.

Apocalipsi 8:6

Tawamhã 7 na hâiwa ãma romhuri'wa norĩ hã ma tô oto asõré pese, tinhimnhihârâzém na simnhihãsi da.

Apocalipsi 9:20

Tawamhã dahâiba ré idasi'atarẽme mono hã idadâ'â mono õ hã, 'râwi dasi'uihâ na 're dasisãmri za'ra mono õ di. Zahadu te wa'uburé norĩ ãma si 're dawata za'ra. Te duré zahadu ropoto hâiba 'manharĩ ãma si 're dawata za'ra, danhib'manharĩ nhipese na da te 're irob'manharĩ za'ra mono ãma, ẽtẽ waipo pré oru 'manharĩ ãma, duré ẽtẽ waipo prã prata 'manharĩ ãma, duré ẽtẽ topsada brõzi 'manharĩ ãma, duré ẽtẽ 'manharĩ ãma, duré wede 'manharĩ ãma. Zahadu da te rẽme mono õ di. Ropoto hâiba 'manharĩ hã te te rob'madâ'â õ nherẽ, duré simipari õ nherẽ, duré morĩ õ nherẽ, te zahadu ãma 're dawata za'ra, 'Re ihâimana u'âsi mono upana.