Apocalipsi 14:4 - ꞌRe Ihâimana Uꞌâsi Mono Zadawa Wasuꞌu

⁴ Ã norĩ hã ma tô 're si'madâ'â pese za'ra, 're siwasété tõ za'ra mono da hã, pi'õ na 're idanhimisaihuri za'ra mono õ ne. Duré pi'õ za'rese'õ'wa 're ihâimana za'ra mono ne, ma tô 're si'madâ'â pese za'ra. Pone'ẽrebâ nhirã zarina si ma tô 're nomro. Ta norĩ si ma tô 're idanomro wasété mono zém hawi wa'âbâ za'ra. Ta norĩ hã ma tô 'Re ihâimana u'âsi mono ma sisõmri na'rata za'ra, Pone'ẽrebâi ma zama.

Apocalipsi 14:4 ပူးပေါင်းရင်းမြစ်များ

Salmu 45:14

Apito siwẽ uza hã i'manharĩ ihâiwamnarĩ sipu'u pese ré te za apito u hã saprõni ni. Te za duré dasina damro wa, ipawapto'wa norĩ hã isiré ai'aba'ré.

Mateu 19:12

Aibâ ni'wam norĩ hã 're ipoto za'ra mono zém hawim haré, 're 'ra waihu'u za'ra mono õ wa, te za ta norĩ si mro ãna hã 're nomro, õne haré. Duré aibâ ni'wam norĩ hã da te 're sihâri za'ra mono wamhã, oto 're 'ra waihu'u za'ra mono õ wa, te za duré ta norĩ si hã mro ãna 're nomro. Duré ni'wam norĩ hã te za tihâiba hã te te 're sawi pese za'ra 'râwi, 're mro za'ra mono tõ da, 'Re ihâimana u'âsi mono nhib'a'uwẽ si 're nomro mono da. Ni'wam norĩ hã ãne hã te te 're waihu'u pese za'ra mono wamhã, te za tô ãma 're sõpré u'âsi.

Mateu 25:1

Tawamhã Zezusi hã ma tô tinhimiromnhimiré'é na tãma rowasu'u za'ra, tisiré 're inomro mono norĩ ma, ãne: — Nimahã na 'Re ihâimana u'âsi mono, oto da'ãma 're sib'a'uwẽ mono da, apâ we dazô ĩmorĩ wamhã, ni'wam norĩ si te za, ĩzô 're simipari za'ra mono sina, hâimana nhimiza'rese 're hâimana za'ra. Ã norĩ wasu'u zarina, wa za ãma aima romnhimiré'é za'ra wa'wa, ãne. Pi'õ ipréduptém norĩ hã bara na ma tô ai'aba'ré, dasina damro u, 10 na ihâiba za'ra na, imro'õ norĩ hã. Aibâ hã za azarutu na imro zô simipari za'ra da, ma tô itẽme ai'aba'ré, pi'õ nhorõwa u. Âro'ore hã te siré 'wasa hâiba bâ, aibâ hã za pi'õ na imro u wisi wa, te te tãma ãma rob'uiwẽ za'ra da, zudeu norĩ hâimanazéb zarina.

Mateu 8:19

Tawamhã 'Re ihâimana u'âsi mono nhimiroti na rowahutu'wa hã ma tô itẽme wi, Zezusihi u. Ãne te tãma tinha: — Rowahutu'wa, ãhã na wa ĩsima aiwẽ, asiré 're ĩmorĩ da oto, daro mono bâ.

Zuwã 10:27

Ĩnhib'a'uwẽ si te za ĩmreme hã te te 're wapari pese za'ra. Duré pone'ẽrebâ tede'wa, tinhimizama te te 're i'awaihu'u mono ne, wa tô ĩnhib'a'uwẽ norĩ hã waihu'u za'ra. Ta norĩ si te za ĩnhimiroti hã te te 're 'madâ'â pese za'ra.

Zuwã 12:26

Duré ni'wam norĩ hã te te ĩma 're romhuri za'ra mono da, te te sima 're ĩwẽ za'ra mono wamhã, 're ĩmorĩzém na si te za 're nomro, ĩnhirã zarina si. Tawamhã ĩ'rata te za 're hâimana u'âsi za'ra, hâiwa ãma. Te te ĩma 're romhuri pese za'ra mono wa, te za Ĩmama hã ãma 're wata za'ra. Te za duré te te tãma 're wa'âbâ za'ra, isimiromhuri hã.

Zuwã 13:37

Tawamhã Sima Pedru te duré asa tãma tinha, ãne: — E marĩ wa bété, ãhã na asarina ãma ĩmorĩ waihu'u õ di. Te asõ'reptu da, asada ĩdâ'â da hã ĩma wẽ di.

Zuwã 8:12

Tawamhã Zezusi te duré dama tinha, ãne: — Wa hã uburé dama rob'uiwẽ'wa na wa ĩsiwasu'u. Ĩnhimiroti zarina 're danomro mono wamhã, dawasété na 're danomro mono õ di za, robra na. Rowa'a na si te za ĩ'ãma 're danomro u'âsi, rowẽ na.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:28

Tahawa, te za 're asi'madâ'â pese za'ra wa'aba mo, 're anomro wẽ wa'aba mono da. Duré isazei'wa norĩ hã te za 're i'madâ'â pese za'ra wa'aba mo, siré 're isi'rã'õtõ mono norĩ hã. 'Re ihâimana u'âsi mono pẽ'ẽzani hã ma tô sima aipisutu za'ra wa'wa, isazei'wa norĩ hã tãma 're 'madâ'â za'ra wa'aba mono da. Ti'ra wapru na ma tô isazei'wa norĩ hã wa'â, tite da. Tahawa, pone'ẽrebâ 'madâ'â'wa norĩ ne, te za 're ida'madâ'â pese za'ra wa'aba mo, 'Re ihâimana u'âsi mono nhib'a'uwẽ norĩ hã.

1 Corĩtu 16:15

Estéfanasihi ãma, wa za oto aipo're pu'u za'ra wa'wa, isõrõwa ãma isiré 're ihâimana za'ra mono norĩ ãma zama. Ta norĩ hã ma tô sazei 'rata za'ra, Ataza na danhipti'a nho'õmo nhisi ãma, 're isi'ubumroi mono norĩ hã. Ta norĩ hã, 'Re ihâimana u'âsi mono nhib'a'uwẽ 're ihâimana za'ra mono norĩ hã simi'ẽ na te te 're pawaptob u'âsi za'ra mono da si, ma tô 're si'madâ'â za'ra. Ãne hã aima waihu'u pese za'ra wa'aba di. Tahawa, ĩsisãnawã norĩ, ta norĩ nhimiroti hã te za 're i'madâ'â pese za'ra wa'aba mo, isiré norĩ hã simi'ẽ na te te 're iromhuri pese za'ra mono norĩ nhimiroti zama.

1 Corĩtu 6:20

E marĩ wa, aihâiba hã ate za'ra wa'aba õ di oto. 'Re ihâimana u'âsi mono, ma tô aiwa'âbâ za'ra wa'wa, Cristuhu dâ'âzém na. Tahawa, uburé marĩ hã aihâiba na tãma 're i'manharĩ wẽ za'ra wa'aba mono zém na, te za ãma 're aiwata u'âsi za'ra wa'aba mo, 'Re ihâimana u'âsi mono ãma hã.

1 Corĩtu 7:28

Tane nherẽ, ãté te za tô asima 're iwẽ za'ra wa'aba mo, 're aimro za'ra wa'aba mono da. E tawamhã aiwasédé te za 're i'manharĩ za'ra wa'aba mo. Mare di. Iwẽ si te za tô 're i'manharĩ za'ra wa'aba mo. Duré pi'õi hâiba préduptém norĩ hã 're mro za'ra mono wamhã, e te za tiwasédé hã te te 're 'manharĩ za'ra. Mare di. Tiwasédé hã te te 're 'manharĩ za'ra mono õ di za. Ãne, wa hã wa tô aré te ĩsima 're aiwẽ za'ra wa'wa, asina 're aimro za'ra wa'aba mono wa, 're robzépata za'ra wa'aba mono tõ da. Ãne tõ da, wa tô aima roti za'ra wa'wa, asina 're aimro za'ra wa'aba mono tõ da hã.

2 Corĩtu 11:2

Wa hã te 're asawi pese za'ra wa'aba mono wa, wa tô te ai'ãma 're rosa'rata u'âsi za'ra wa'wa, 'Re ihâimana u'âsi mono te te 're i'asawi pese za'ra wa'aba mono ne. Ni'wa hã aibâ ma, ti'ra hâiba ubuni hã mro da, te te tãma ipisutu ne, wa tô aipisutu za'ra wa'wa, Cristuhu ma si oto 're aihâimana za'ra wa'aba mono da.

Éfézu 1:14

Tawamhã niwapsi te za uburé marĩ iwẽ hã te te wama 're anhomri, tizazei'wai mono bâ. Duré isib'a'uwẽ 're wahâimana za'ra mono wa, te za rowasété hawi wa'awaibui pese. Tawapsi wama 're rowẽ uptabi za'ra mono di za. Ãne tô sena za te te wama ãma i'a'uwaimramizém na, wa te ãma waihu'u za'ra da, ma tô Tipẽ'ẽzani hã te te wama 're anhomri. Tahawa, ãma 're wawata u'âsi za'ra wa'aba mono.

Éfézu 5:27

Ãne ma tô sina uwaimra dama, zazahâ ihâi uptob õ ne, duré ihâ'rã'ru'õ ne zama, hâimana wẽ uptabi na 're hâimana za'ra mono da, isib'a'uwẽ norĩ hã.

1 Timotiu 4:3

Ta norĩ hã te za dasina 're idamro za'ra mono zé hã dawi sawi za'ra, dasina 're damro za'ra mono tõ da, dasiwaprosi 're dahâimana za'ra mono da. Te za duré dasazé hã dawi sawi za'ra, marĩ mono bâ 're dasaihuri tõ mono da, 'Re ihâimana u'âsi mono hã uburé dasazé hã te te apoto mono nherẽ, ãma 're idasaihuri mono zéb da hã. Isazei'wai mono bâ wama waihu'u pese za'ra di, dasazém na isimiroti hã. Ãne wa, sõpru wa, ãma 're wawata za'ra mono pari, wa za isimipoto na 're wasaihuri.

Hebreu 12:23

Tame te oto 'Re ihâimana u'âsi mono nhib'a'uwẽ norĩ hã to sina 're si'rã'õtõ, aibâ hã dama 're poto 'rata za'ra mono wa, dama isawi pese ne, 'Re ihâimana u'âsi mono te te 're i'azawi pese mono norĩ hã, hâiwa ãma sisi ui'éré ré 're ihâimana za'ra mono norĩ hã. Tamomo ma tô itẽme 're irob'umhutu za'ra wa'aba mo, dahâimanazém na i'uwaibaba si te te 're ida'awaihu'u mono zéb zarina, da'ãma rowairébé'wai u hã. Duré ti'ai ãma ré iwẽ si te te 're i'manharĩ za'ra mono norĩ hã 're ihâimana za'ra mono zéb u, ma tô duré 're irob'umhutu za'ra wa'aba mo, 'Re ihâimana u'âsi mono te te tãma 're iwẽ za'ra mono zéb zarina si, rowẽ uptabi na oto 're ihâimana za'ra mono norĩ u hã.

Tiagu 1:18

Te te sima 're ida'awẽ mono zéb uwaibaba, ma tô timreme na te te 're wa'apoto té, wapẽ'ẽ 're, uburé isimipoto norĩ nhipai u, isib'a'uwẽ tãma 're wahâimana za'ra mono da oto. Ma tô, tô sena na timreme na te te 're wa'apoto té, wapẽ'ẽ 'remhã.

1 Pedru 2:9

Tanei õ di, a norĩ wa'wa hã. 'Re ihâimana u'âsi mono, ma tô sima aipisutu za'ra wa'wa, isib'a'uwẽ si oto tãma 're anomro aba mono da. Sasedoti norĩ hã te te sima 're i'apisutu mono ne, te oto a norĩ wa'wa hã uburé Danhib'apito ma romhuri'wa, 're anomro aba mo, õhõ ãma si 're anomro aba mono da, ite da. Ta hã robra hawi ma tô rowa'a u sitẽme asô tihârâ za'ra wa'wa, 're anomro wasété aba mono zém hawi, rowẽ uptabi na si 're anomro aba mono da oto. Taha wasu'u na, tiwaihu'u pese na te te aima ãma 're i'uwaimrami wẽ za'ra wa'aba mono zém na, ma tô sima aipisutu za'ra wa'wa, ãma 're dapo're pu'u u'âsi za'ra wa'aba mono da.

Apocalipsi 17:14

Te za duré ropoto siwamnarĩ siré siwi 'wapé, Pone'ẽrebâ hã. Tane nherẽ, te za Pone'ẽrebâ hã ãma ai'uté za'ra. Ta hã Pone'ẽrebâ danhipai u Uburé Danhib'apito uptabi na 're hâimana mono wa, duré danhipai u dama pire na 're hâimana mono wa, te za ãma ai'uté za'ra. Ni'wam norĩ hã isirã zarina si 're nomro mono da, Pone'ẽrebâ te te 're i'apisutu mono norĩ hã, duré simi'ẽ na õhõ ãma si 're inomro mono norĩ hã, te za Pone'ẽrebâ siré ãma ai'uté za'ra, ropoto siwamnarĩ norĩ ãma hã.

Apocalipsi 21:22

Tawamhã 'ri nho'õmo ãma 'Re ihâimana u'âsi mono nhorõwa 'ri hã iwa ihâimana hã sãmri õ di. Robaba di. Uburé Danhib'apito uptabi hã, 'Re ihâimana u'âsi mono iwaihu'u pe hã, duré Pone'ẽrebâi me oto 'râwi da'rata 're hâimana u'âsi zahuré mono na dâ'âsina, isõrõwa hã oto hâimana õ di.

Apocalipsi 21:23

Duré 'ri nho'õmo na hã bâdâ te te 're rob'uiwẽ mono õ di za oto, duré a'amo zama hã. 'Re ihâimana u'âsi mono nhimirowa'a si te za oto te te 're rowa'a, Pone'ẽrebâ nhimirowa'a zama.

Apocalipsi 3:4

Tane nherẽ, nima norĩ si Sadési ãma 're aihâimana za'ra wa'aba mono norĩ hã te ĩ'ãma 're anomro wẽ wa'aba mo, ai'umro na wa'aba nherẽ. Da'uza hâirã, ihâ upto wi da te 're i'madâ'â pese za'ra mono ne, te aiwẽ na ĩ'ãma si 're anomro aba mo. A norĩ wa'aba si da'uza hâirã ne aiwasété ãna 're anomro aba mono si, te za ĩsiré 're aihâimana za'ra wa'aba mo. 'Re ihâimana u'âsi mono te te 're aiwẽsãmri za'ra wa'aba mono wa, te za ĩ'rata 're anomro u'âsi aba mo.

Apocalipsi 5:9

Tawamhã ta norĩ hã te Pone'ẽrebâi ma tinho're za'ra, tinho're itém na. Ãne te tãma tinho're za'ra: “A hã ma tô dasiwi aiwĩrĩ ni. Ma tô dazada hã atâ. Dazada atâ'âzém na ma tô ida'awa'â, dawasédé hã dama 're apari mono da ãma, 'Re ihâimana u'âsi mono nhib'a'uwẽ oto 're danomro mono da. Dapoto mono bâ a hã ma tô ida'awa'â, damreme sipo'o mono bâ 're idahâimana za'ra mono hã. Danhipai u aiwẽ uptabi di, a hã. Aiwaihu'u pese uptabi di duré. Tahawa, te aiwétési sada hã aihâiba, ibaihâ isinhai ré i'âri da hã, duré i'uptobzé hã aprub da.