Apocalipsi 14:13 - ꞌRe Ihâimana Uꞌâsi Mono Zadawa Wasuꞌu

¹³ Tawamhã wa tô duré wapa, hâiwa hawi ni'wai mreme hã. Ãne te ĩma ti'ru: — Ma'ãpé, ãne ãma rob'ui'éré: “Ãhã na te iwaihu'uzém hawi, ni'wam norĩ hã Wanhib'apito ma, te te 're romhuri pese za'ra mono zawéré ré, 're dâ'â za'ra mono wamhã, tãma 're rowẽ uptabi za'ra mono di za.” Tawamhã 'Re ihâimana u'âsi mono pẽ'ẽzani hã ma ãma saze, timreme na. Ãne ma ãma saze: “Tane tô. Tãma 're rowẽ uptabi za'ra mono di za tô. Simi'ẽ na tinhimiromhuri wẽ ré, te za hâiwa u iré 're sisisi. Tahawa, te za oto romhuri na tisiwasudu hã te te 're sahâri za'ra.” Ãne 'Re ihâimana u'âsi mono pẽ'ẽzani te te ãma isazezé hã. Ãne te za ãma irob'ui'é.

Apocalipsi 14:13 ပူးပေါင်းရင်းမြစ်များ

Salmu 19:11

Taha na te wa hã asib'a'uwẽ ãma 're ĩpo're pu'u wẽ u'âsi mo. Duré aimreme te 're iwapari pese mono zarina, wa ĩpawa'âbâzé iwẽ hã te ĩsima te 're awaibui u'âsi.

Daniéu 12:13

— A hã Daniéu, ma'ãpé rob'rãsutu u asiptete na ãma 're aihâimana mono. Te za tô atâ. Tane nherẽ, te za apâ hã aihâiwa'u, aipawa'âbâzé âri da hã.

Mateu 3:17

Tawamhã hâiwa hawi te we tinha ãne: — Ã hã ĩ'ra. Ĩma sawi uptabi di. Tãma ĩto za'ẽtẽ uptabi di. — Ãne te we tinha, Imama hã.

Luca 16:25

— Tahawa, ma tô Abra'ã hã asa tãma tinha, isibro pese ma, ãne: “Ĩnhihudu, aihâiba ré, aima 're rowẽ mono di. Uburé marĩ iwẽ hã ma tô asô 're simi'wara. Lazaru ma hã, marĩ iwasétére si, ma tô da te tãma 're sõmri za'ra. Ãhã na hã rowẽ na te oto 're hâimana. A hã te oto tô ropipa hã 're isépata mo.

Luca 16:9

Tahawa, ti'ab ré te za asimarĩ na 're idazawi za'ra wa'aba mo, ãma 're asiwadi za'ra wa'aba mono da. Asimarĩ hã asipara 're rẽme za'ra wa'aba mono wapsi, hâiwa u, asõrõwa u 're asisisi aba mono wi, te za asô 're tob'uzu za'ra wa'wa, asawi'wa norĩ wa'wa hã. — Ãne Zezusi te tãma roti za'ra, tisiré 're inomro mono norĩ ma.

1 Corĩtu 15:18

Duré, Cristuhu hâiwa'utuzé hã senai õ 'wa'âhã, uburé isazei'wa, 're idâ'â za'ra mono norĩ hã te aré ipẽ'ẽ 're, dâ'â u'âsi 're hâimana za'ra, 'Re ihâimana u'âsi mono nhiti.

1 Corĩtu 15:20

Tazahã, 'Re ihâimana u'âsi mono hã ma tô apâ hâiwa'utu tô sena, Cristu hã. E marĩ te tawamhã, wama wasu'u za'ra, Cristu apâ ihâiwa'utuzé hã. Niwapsi uburé isazei'wa 're idâ'â za'ra mono norĩ hã, tô sena za apâ 'Re ihâimana u'âsi mono te te ihâiwa'utu za'ra zé, te wama wasu'u za'ra. Taréi õ di, ã hã.

1 Corĩtu 15:58

Ĩsisãnawã norĩ, ĩma asawi pese za'ra wa'aba norĩ hã, tahawa, te za asiptete u'âsi Cristuhu ãma si 're anomro aba mo, tiwi 're aipizari za'ra wa'aba mono ãna. Wanhib'apito ma, 're iromhuri za'ra wa'aba mono zé hã taréi õ di. Ãne na asina waihu'u za'ra wa'aba wa, te za tãma 're iromhuri pese u'âsi za'ra wa'aba mo, asimi'ẽ na.

2 Corĩtu 5:8

Wa norĩ hã wato sina, wa oto 're wahâimana u'âsi za'ra. E marĩ wa. Ti'ab ré, wahâiba hã wawi 're si'utõrĩ pese za'ra mono nherẽ, wẽ uptabi di za, taha nhowa're're, hâiwa ãma Wanhib'apito 'rata 're iwahâimana u'âsi za'ra mono zé hã.

Filipu 2:17

Sasedoti norĩ hã 'Re ihâimana u'âsi mono ma, da'ãma romhuri'wa norĩ hã danhimizama na tãma danhoprubzé te te tãma 're izata za'ra mono ne, ma tô a norĩ wa'wa hã tãma 're asisõmri u'âsi za'ra wa'aba mo, tiwi 're asisawi za'ra wa'aba mono ãna, asina 're i'umnhasi za'ra wa'aba mono zéb zarina. Duré sasedoti norĩ hã uwa 'rãi wa'u isé hã, 'Re ihâimana u'âsi mono ma danhoprubzé, danhimizama te te tãma 're izata za'ra mono nhisiwi, te te 're isa'wari za'ra mono ne, ãté ĩwapru hã wa za sa'wa, sena na za da te dasiwi ĩwĩrĩ wamhã, ĩdâ'âzém na 'Re ihâimana u'âsi mono ma, ĩsina ĩnhoprubzéb da. Ãne na za ĩma romhâimana nherẽ, ĩma rowẽ uptabi di za. Duré aima ĩtoi uptabi za'ra wa'aba di za, ãne na ĩma romhâimana nherẽ.

1 Tesalonita 4:14

Zezusi hã ma tô dârâ. Ma tô pẽ'ẽhai'utõ. Pẽ'ẽ si'utõrĩ nherẽ, ma tô apâ hâiwa'udu. Ãhã na te oto 're morĩ u'â. Ãne na hã wa tô saze za'ra ni. Tahawa, wa tô duré waihu'u za'ra ni, isazei'wa norĩ hã 're dâ'â za'ra mono wamhã, apâ 're ihâiwa'utu za'ra mono zém na hã. 'Re ihâimana u'âsi mono hã te za apâ te te 're ahâiwa'utu, Zezusi te te apâ ihâiwa'utu ne.

1 Tesalonita 4:16

Tô sena, Wanhib'apito hã te za wei wazô si'ra za'ra, hâiwa hawi. Tawamhã te za tãma wa'ru za'ra, hâiwa ãma tãma iromhuri pese 'wai ma. Hâiwa ãma tãma iromhuri pese 'wa hã, te za wei hâ, hârâ 'rãihâ na, 'Re ihâimana u'âsi mono nhimnhihârâzém na. Tawamhã isazei'wa norĩ hã 're idâ'â za'ra mono norĩ hã, te za uimrehẽne apâ hã hâiwa'utu za'ra za.

1 Tesalonita 5:10

Ta hã ma tô wazada tidâ'â za'ra, i'rata 're wasi'ubumroi mono da. Tawamhã apâ wei wazô morĩ wapsi, wahâiba ré 're iwanomro mono norĩ hã, wawana 're idadâ'â za'ra mono norĩ me, wa za i'rata wasiré 're wasi'ubumroi u'âsi.

Apocalipsi 1:11

Ãne te tawamhã ĩma tinha: — Ãhã na marĩ hã te za i'ab'madâ'â mo. Tawamhã uburé i'ab'madâ'â mono hã te za ibaihâ na ãma irob'ui'é. Ãma rob'ui'éré parimhã, Zezusihi zazei'wa norĩ, 'ri nho'õmo mono bâ siré 're isi'rã'õtõ mono norĩ ma, te za ibaihâ hã isõmri za'ra, 'Ri nho'õmo nhisi mono bâ, ãne isisi norĩ ma: Éfézu, duré Esmina, duré Pegamu, duré Tiatira, duré Sadési, duré Filadéufia, duré Laudiséa. Ã norĩ ma, te za asimi'ui'éré hã tãma isõmri za'ra, isazei'wa norĩ ma, 7 na 'ri nho'õmo ãma 're isi'rã'õtõ mono norĩ ma hã.

Apocalipsi 10:4

Wapsa'a za'ra wamhã, damreme ne hã wa tô wapa. Tahawa, wa tô imreme za'ra hã te iwapari na aré rob'ui'éré. Tane nherẽ, te ni'wa hã hâiwa hawimhã ĩma tinha, te rob'ui'éré tõ da. Ãne te ĩma tinha: — Tô'ã. Rob'ui'éré tõ. Taré asi'repsi asima si hã waihu'u, tãiwapsa'a norĩ mreme hã.

Apocalipsi 11:15

Tawamhã 7 ãma hâiwa ãma romhuri'wa hã ma tô tinhimnhihârâzém na amnhihârâ. Simnhihârâ wi, hâiwa ãma damreme 'rãihâ hã wa tô wapa. Ãne te nharĩ za'ra: — Satanasihi nhimi'madâ, 're danomro mono da, ma tô da te dasima 're wẽ za'ra aré, daro mono bâ. Tane nherẽ, ropâ te za oto 'Re ihâimana u'âsi mono nhimi'madâ'â si 're danomro, Wanhib'apito nhimi'madâ hã. Danho'reptui'wa da, te te ipisutu nhimi'madâ'â zama te za 're dahâimana za'ra oto. Wanhib'apito hã te za tô te te 're da'ab'madâ'â u'âsi oto, õne u'âsi.

Apocalipsi 11:19

Tawamhã hâiwa ãma 'Re ihâimana u'âsi mono nhorõwa 'ri ãma hã, ma tô ni'wa hã 'ridawa hã 'ridawa. Te te 'ridawa wamhã, te oto wedehâ're hã sõ'awi 'ri para za. Wedehâ're 're, te ẽtẽpo i'ui'éré ré hã da'wa, duréihã 'Re ihâimana u'âsi mono te te tinhib'a'uwẽ ma iropisutuzéb ui'éré ré hã. Tawamhã ma tô tãiwapsa hã watobro, tãirãrã'ã zama, tãsi'ubuzi zama. Ti'a hã ma tô duré sãsã'ã. Tãzâ hã ma duré asa'wa, ipire hã.

Apocalipsi 16:17

Tawamhã da'rãirẽme hã 7 ãma hâiwa ãma romhuri'wa hã ma tô duré tinhi'u'awi wamhã sa'wa, hâiwa nho're 're iromhâimana mono nhisiwi. Te te sa'wari wamhã, hâiwa ãma 'Re ihâimana u'âsi mono nhorõwa 'ri 're, danhib'apito simasisizém hawi te tinha, mreme 'rãihâ na, ãne: — Tâibâ za oto. Ã hã, da'rãsutu'wa.

Apocalipsi 19:9

Tawamhã hâiwa ãma 'Re ihâimana u'âsi mono ma romhuri'wa hã te ĩma tinha, ãne: — Ma'ãpé, ãne na ãma rob'ui'éré: “Pone'ẽrebâ imrozém na da te dasima ãma iromhu'u za'ra zéb u sihutu da, 'Re ihâimana u'âsi mono hã sô ihârâ za'ra norĩ ma, tãma 're rowẽ uptabi za'ra mono di za.” Ãne te duré ĩma tinha: — Ã hã 'Re ihâimana u'âsi mono mreme hã tô sena uptabi.

Apocalipsi 2:1

Tawamhã Zezusi hã ĩtẽme iwi hã ma tô duré ĩma roti, ãne: — Zuwã, te za oto irob'ui'é, Éfézu na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne: “Wa hã wa ĩsi'uihâ na aima roti za'ra wa'wa, wasi hã 7 na ihâiba za'ra hã ĩnhib'rata nhimire niwĩ te itété za'ra hã, duré 7 na rob'uiwẽzé sima'warazé wa'wa 're ĩmorĩ hã, oru 'manharĩ wa'wamhã.

Apocalipsi 2:7

“A norĩ wa'wa hã asimipari pese aba wamhã, ma'ãpé wapari pese za'ra wa'aba, Ĩmama pẽ'ẽzani hã ĩzazei'wa norĩ ma, te te irotizém na hã. Ãne isimiroti hã: Ni'wam norĩ hã tidâ'âzéb u ĩwi sipizari ãna Satanasihi ãma te te i'ai'uté za'ra norĩ hã ta norĩ ma si, wa za tãma pisutu za'ra, rob'rãi u'â hã te te 're huri u'âsi mono da. Taha wede hã 'Re ihâimana u'âsi mono 're isãmra u'âsi mono zéb ãma te 're sa, rowẽ uptabi ãma hã, i'rã hã da te 're huri mono wa, dadâ'â ãna 're idanomro u'âsi mono zé hã. Ãne Ĩmama pẽ'ẽzani te te irotizé hã.”

Apocalipsi 20:6

Tawamhã 're idahâiwa'utu 'rata za'ra mono norĩ ma hã, tãma 're rowẽ uptabi za'ra mono di za. Ta norĩ hã 're idadâ'â zahu za'ra mono ne, unhama ro'o u'âsi u, da te 're idanhamra za'ra mono norĩ zu 're sisisi mono õ di za. miu na wahub u te za 'Re ihâimana u'âsi mono ma sasedoti na 're hâimana za'ra, duré Cristuhu ma zama. Te za duré isiré dama pire na te te dama 're roti za'ra, miu na wahub u.

Apocalipsi 21:5

Tawamhã 'Re ihâimana u'âsi mono hã danhib'apito simasisizém na isãmra hã te ĩma tinha, ãne: — Ma'ãpé waihu'u. Wa hã wa za tô marĩ ité hã te ab'manharĩ, ãhã na hã. Tawamhã te duré ĩma ti'ru: — Ma'ãpé ãne ãma arob'ui'éré mono. Ãhã wasu'u hã uburé marĩ ité hã za te i'ab'manharĩ mono na hã, tô sena. Tô sena wa, ãhã na da te 're rob'umnhasi za'ra mono sina, da te 're ĩzazei pese za'ra mono da na, te za ãma i'arob'ui'éré mo.

Apocalipsi 22:17

'Re ihâimana u'âsi mono pẽ'ẽzani hã te Pone'ẽrebâi mro da me, dazô 're hârâ u'âsi zahuré, ãne: — We 're anomro aba mono, â u'âsi u. Tawamhã ni'wam norĩ hã ãne hã te te 're wapari za'ra mono wa, â u'âsi u 're nomro mono wamhã, te za duré ihârâ zahuré na dazô 're hãsi u'âsi. Da te 're 'rubu za'ra mono wa, da te 're i'âhuri mono ne, ni'wam norĩ hã te te sima 're wẽ za'ra mono wamhã, te za tô â u'âsi u 're nomro, te te 're âhuri u'âsi mono da, wa'âbâ ãna. Â u'â hã da te 're âhuri mono wa, 'Re ihâimana u'âsi mono 'rata 're idanomro u'âsi mono zé.

Apocalipsi 6:11

Tawamhã da'uza hâirã hâpa, ma tô tãma sõmri za'ra ni, tidâ'âzéb u sipizari ãna, Zezusihi ãma 're hâimana za'ra mono wa. Ma tô duré tãma nharĩ za'ra ni: — Ma'ãpé, asimi'ẽ na a'â 're asimipari za'ra wa'aba mono. Da te 're isimroi mono norĩ za'ratazé hã 'Re ihâimana u'âsi mono te te ipisutuzé hã zahadu da te dasina azahutu õ di. Da te ai'uprosi aba ne, asiré isazei'wa norĩ, za da te 're isimroi mono norĩ za'ratazé wab õ wa, te za a'â asimi'ẽ na sô 're asimipari za'ra wa'aba mo.