Apocalipsi 13:7 - ꞌRe Ihâimana Uꞌâsi Mono Zadawa Wasuꞌu

⁷ Tawamhã 'Re ihâimana u'âsi mono hã ma tô duré tãma waprosi, â hawi ropoto siwamnarĩ ma, isib'a'uwẽ te te 'wapé za'ra da, te te ãma ai'uté za'ra da, isib'a'uwẽ norĩ ãma. Ma tô duré tãma waprosi, simiwada'uri wasété nhiptete sina te te 're da'awada'uri mono da, dapoto mono bâ, duré damreme sipo'o mono bâ 're idahâimana za'ra mono hã.

Apocalipsi 13:7 ပူးပေါင်းရင်းမြစ်များ

Ezodu 9:16

Tane nherẽ, a'â 're aihâimana mono da hã wa tô bâdâ hã aima apraba, ĩwaihu'u pese na 're ĩhâimana mono zé hã te a'â aima hâi'ré da, duré uburé daro mono bâ ĩnhisi, da te waihu'u za'ra da hã.

Daniéu 12:1

Hâiwa hawi romhuri'wa hã te zahadu duré ĩma rowasu'u ãne: — Ãne na we 're romhâimana mono ré hã, te za hâiwa ãma romhuri'wa Migueu hã we oto sihâi'ré, 'Re ĩhâimana u'âsi mono nhib'a'uwẽ 'wawi 're isimapa mono 'wa hã. Taha ré, ropire uptabi na te za tiromhâiba za, niwa daza'rui mono bâ a'uwẽ 're ihâimana za'ra mono ma, ãne hã we iromhâimana mono õ, ã wamhã. Tane nherẽ, tô we iromhâimana mono zém na hã te za 'Re ĩhâimana u'âsi mono te, ibaihâ 're, isisi ui'éré ré norĩ hã uburé sõ'reptu za'ra, tinhib'a'uwẽ hã.

Daniéu 7:21

Tawamhã zahadu te 'madâ'â ré, ma tô i'u hã 'Re ihâimana u'âsi mono nhib'a'uwẽ a'wapé. Tawamhã ropoto siwamnarĩ upsuru, zahadu we te te tô da'ãma ai'uté,

Daniéu 7:25

Ta hã te za uburé danhipai u Isiptede 'Re ihâimana u'âsi mono zada hã 're hâimana. Te za duré isib'a'uwẽ norĩ ma hã te te 're arob'manharĩ wasété. Duré te za 'Re ihâimana u'âsi mono nhimiroti na duré isib'a'uwẽ nhibâtâ norĩ na te te ãma tiwi saprĩ za'ra da hã, te te 're pibui u'âsi za'ra, Te za duré si'ubdatõ wahu aiwa ãma isipo'o na 'Re ihâimana u'âsi mono nhib'a'uwẽ norĩ isib'ratamhã a'â tihâimana za'ra.

Luca 4:6

Tawamhã te te rob'madâ'â mono pari, te duré tãma tinha, ãne Zezusihi ma: — Uburé danhipti'a hã ma tô ĩma sõmri ni, ĩte da. Tawamhã te ĩsima iwẽzéb uwaibaba, wa za dama te 're anhomri. Aihi'rãtitõ, te za ĩnho're ĩma aime, asib'apito na ĩ'ãma aiwata da. Tawamhã wa za aima tisõ danhipti'ai mono bâ, ate da. Tawamhã danhipai u, dama aipire di za. Duré asibrob ahâ uptabi di za.

Zuwã 19:11

Tawamhã Zezusi asa te tãma tinha, ãne: — 'Re ihâimana u'âsi mono, ma tô aipisutu, ĩma aipire da. Ĩma aipire da, te te aipisutu õ 'wa'âhã, aré ĩma aipire õ di. Tawamhã ĩma aipire da, te te aipisutu nherẽ, ĩ'ãma asimiroti wasété wamhã, tãma aiwẽ õ di za, aiwasédé hã ĩ'ãma 'manharĩ wa. Tane nherẽ, aibâ hã si'uihâ na te te aima ĩhâiba nhomri hã aiwasété nhipai u wasété uptabi di, ta hã.

Apocalipsi 10:11

Tawamhã ni'wa hã te ĩma tinha: — Te za duré 'Re ihâimana u'âsi mono hã dama 're isadawa wasu'u mo, dapoto mono bâ za dama 're iromhâimana za'ra mono zém na hã, damreme sipo'o mono bâ. Daro mono bâ dama ipire za'ra norĩ ma, za 're iromhâimana mono zém na zama te za duré dama 're isadawa wasu'u mo.

Apocalipsi 11:18

Ai'ãma 're idawata za'ra mono õ norĩ hã ma tô asada tizahi pese za'ra. Tahawa, ma tô oto iwa waptãrã, asiwi ida'awẽ'õ pese zéb zarina, dama irob'manharĩ wasété zéb da hã. Ma tô duré iwa waptãrã, dahâimanazéb zarina dama i'arowairébézéb da hã, uburé adâ'â norĩ ma hã, asimiroti hã te te 're iwapari za'ra mono õ norĩ hã uburé 're ahâ za'ra mono da, duré uburé asimiroti wapari pese 'wa norĩ ma, tãma 're ab'manharĩ wẽ mono da. Ma tô iwa waptãrã, asadawa wasu'u'wa norĩ ma, marĩ iwẽ hã 're anhomri mono da, te te aima 're iromhuri pese za'ra mono zé wa'rãmi. Uburé pese asib'a'uwẽ norĩ ma, marĩ iwẽ hã 're anhomri mono da, ma tô iwa waptãrã, ai'ãma 're iwata za'ra mono norĩ ma, dama ipire norĩ ma, dama iwapu norĩ ma zama. Ma tô duré iwa waptãrã, ti'ai ãma da te 're irowasété za'ra mono norĩ hã uprosi da.”

Apocalipsi 11:7

Tawamhã te te sadawa wasu'u zahuré mono pari, te za ropoto siwamnarĩ hã ab're 'rehâ hawi iwatobro hã sô tisusi zahuré, te te 'wapé zahuré da. Tawamhã ropoto siwamnarĩ hã aibâ norĩ ma, siptete zahuré wa, te za pãrĩ zahuré.

Apocalipsi 12:17

Tawamhã ho'orã hâiba ne ropoto siwamnarĩ hã ma tô pi'õ da tizahi pese, tiwi simani wa. Tahawa, ma tô isihudu norĩ zô mo, te te 'wapé za'ra da. E 'wam norĩ hã te wasu'u, isihudu norĩ hã. Ta norĩ hã 'Re ihâimana u'âsi mono nhimiroti te te 're iwapari pese za'ra mono, duré tô sena na Zezusihi zazei'wa na 're isiwasu'u za'ra mono, te wasu'u. Ta norĩ zô te mo, ho'orã hâiba ne ropoto siwamnarĩ hã te te 'wapé za'ra da.

Apocalipsi 17:15

Tawamhã hâiwa ãma romhuri'wa hã te duré ĩma tinha, ãne: — Ã pa nho'õmo si'rudu hã i'madâ hã pi'õi wasédé iwa'âbâ zô 're isisõmri mono isisiwi isãmra hã, daro mono bâ damreme sipo'o mono bâ 're idahâimana za'ra mono, te wasu'u, ã pa nho'u hã.

Apocalipsi 5:9

Tawamhã ta norĩ hã te Pone'ẽrebâi ma tinho're za'ra, tinho're itém na. Ãne te tãma tinho're za'ra: “A hã ma tô dasiwi aiwĩrĩ ni. Ma tô dazada hã atâ. Dazada atâ'âzém na ma tô ida'awa'â, dawasédé hã dama 're apari mono da ãma, 'Re ihâimana u'âsi mono nhib'a'uwẽ oto 're danomro mono da. Dapoto mono bâ a hã ma tô ida'awa'â, damreme sipo'o mono bâ 're idahâimana za'ra mono hã. Danhipai u aiwẽ uptabi di, a hã. Aiwaihu'u pese uptabi di duré. Tahawa, te aiwétési sada hã aihâiba, ibaihâ isinhai ré i'âri da hã, duré i'uptobzé hã aprub da.