Apocalipsi 13:6 - ꞌRe Ihâimana Uꞌâsi Mono Zadawa Wasuꞌu

⁶ Taha ré, ma tô 'Re ihâimana u'âsi mono hã wa'ẽi wasété tô, isisi na zama. 'Re isãmra mono zém na ma tô duré timreme wasété, duré hâiwa ãma 're ihâimana za'ra mono norĩ ãma zama.

Apocalipsi 13:6 ပူးပေါင်းရင်းမြစ်များ

Daniéu 11:36

— Tame te za tô apito marĩ hã te te sima iwẽzéb zarina te te 're ab'manharĩ. Ta hã 're isi'madâ'â zei mono zarina, te za ihâiba'õ norĩ nhipai'u pire na 're ihâimana mono na, te te sina 're rosa'rata. Tahawa, te za duré 'Re ihâimana u'âsi mono ãma hã te te 're wasété, timreme wasété uptabi na. Ãne hã te za uburé te te 're ab'manharĩ, 'Re ihâimana u'âsi mono te te i'azârizéb u. Te te ãma sima irowairébé siromo zéb zarina, te za tô oto tãma rob'manha.

Daniéu 7:25

Ta hã te za uburé danhipai u Isiptede 'Re ihâimana u'âsi mono zada hã 're hâimana. Te za duré isib'a'uwẽ norĩ ma hã te te 're arob'manharĩ wasété. Duré te za 'Re ihâimana u'âsi mono nhimiroti na duré isib'a'uwẽ nhibâtâ norĩ na te te ãma tiwi saprĩ za'ra da hã, te te 're pibui u'âsi za'ra, Te za duré si'ubdatõ wahu aiwa ãma isipo'o na 'Re ihâimana u'âsi mono nhib'a'uwẽ norĩ isib'ratamhã a'â tihâimana za'ra.

Daniéu 7:8

Tawamhã i'õmo norĩ te 'madâ'â ré, wa tô duré 'madâ, i'õmo hâiba amo i'up surure hã, i'õmo za'ẽtẽ norĩ wa'wa iwatobro hã. Tahawa, i'õmo za'ẽne si'ubdatõ hã ma tô õmo zani za'ra ni, i'õmo surure ma, ropese da. Taha ma, te oto a'uwẽ tõmo ne hã tãma tihâimana zahuré. Duré isadawa hã 'râwi 're isi'madâ'â zei mono zéb zarina te te ãma 're inharĩ mono da hã te tãma tihâiba.

Mateu 12:34

A norĩ wa'wa hã te wahi ne 're anomro aba mo. Dapẽ'ẽ 're, da te 're irosa'rata za'ra mono zéb zarina te za 're damreme zusi. Tahawa, aiwasété na 're aihâimana za'ra wa'aba mono wa, marĩ iwẽ na 're aimreme zusi waihu'u aba mono õ di. Aipẽ'ẽ 're, 're irosa'rata wasété za'ra wa'aba mono zéb zarina si, te a norĩ wa'wa hã marĩ iwasété na si hã 're aimreme zusi aba mo.

Mateu 15:19

Dapẽ'ẽ 're, danhimirosa'rata wasété hawim na si, te za dawasédé hã uburé da te ãma 're 'manharĩ za'ra, dasipãrĩ na hã, duré dasina danhimisaihuri na hã, duré marĩ na danhimisaihuri na hã, duré dazadawa nhipese na hã, duré da te da'ãma 're iwasété za'ra mono na hã.

Zuwã 1:14

'Re ihâimana u'âsi mono mreme hã wa'rata 're sãmra mono da, ma tô sihâiba. Simizawi pese uptabi di. Isimiroti hã wẽ uptabi di. 'Re ihâimana u'âsi mono 'ra wa, õhõ si 're morĩ wẽ uptabi di. Misire i'ra hã. Õhõ si, waihu'u pese uptabi di. Wa norĩ hã wa tô wasiwi waihu'u za'ra ni, 're imorĩ wẽ uptabi na. Iwaihu'u pese na zama, wa tô duré wasiwi waihu'u ni.

Roma 3:13

Uburé danhoto hã wasété di. Wasété uptabi di. Danhoto wasété na te dazadawa nhipese na, da te dasima 're nharĩ wasété za'ra. Duré wahi hã te te 're dahâzu mono wa, ti'wa wa'u na te te 're idanhimroi mono ne, te damreme na da te dasima 're nharĩ wasété za'ra, rowẽ hã da te dasiwi ãma 're uprosi za'ra mono da.

Colosu 1:19

'Re ihâimana u'âsi mono hã te te sima iwẽzéb zarina, ma tô ti'ra hã pisutu, isine uptabi 're hâimana mono da, aiwa.

Colosu 2:9

Cristu hã ti'ai ãma a'uwẽ hâiba na 're morĩ ré, te tô 'Re ihâimana u'âsi mono ne 're hâimana, aiwa uptabi wa. Tahawa, marĩ zô tiwi 're rowaptâ'â mono õ di, Cristuhu wi hã.

Hebreu 9:2

Duréihã romhâ 'manharĩ na 'ri hã danhimizahâri sidâpâsi, 'Re ihâimana u'âsi mono ma, da te dasiwi 're isimizusi mono hã maparane te 'ri 're wa'wa hã 're hâimana zahuré. 'Ri 're wa'wa imorĩ'rata ãma, te rob'uiwẽzé sima'warazé hã 're sa. Wedeza hã te duré iwa 're sa, i'u'ẽtẽ wapu 'Re ihâimana u'âsi mono ma, iwa da te 're isa'ra mono zéb da hã. 'Re ihâimana u'âsi mono te, 'ri 're wa'wa hã iwẽ uptabi na isisi hã.

Hebreu 9:24

Ãhã wa, Cristu hã dâ'â pari oto duré hâiwa'utu wamhã, ti'ai ãma danhib'rata na da te 're i'ri za'ra mono 'remhã, sébré õ di, 'Re ihâimana u'âsi mono iwa 're isãmra mono zéb u hã. E marĩ wa. Ta hã ti'ai ãma 'ri hã, hâiwa ãma 'ri i'uptabi ne si 're hâimana mono wa, duré i'uptabi õ wa. Hâiwa ãma 'Re ihâimana u'âsi mono hã iwa 're isãmra mono zéb u si ma tô ãzé Cristu hã, tame te te oto wa'ãma 're romhuri u'âsi mono da, Timama nho'a.

Apocalipsi 11:12

Tawamhã 'Re ihâimana u'âsi mono zadawa 'mahârâ'wa norĩ hã te za wapari zahuré, hâiwa hawi ni'wai mreme hã. Mreme 'rãihâ na te za sô tihârâ zahuré, ãne: — We ane wa'aba, hâimo. Tawamhã i'ruiwapari'wa norĩ hã te te 'madâ'â za'ra mono ré, te za hâiwa'a na tizasi zahuré, hâiwa u.

Apocalipsi 12:12

Tahawa, ma'ãpé 're ato za'ra wa'aba mono, hâiwa ãma 're aihâimana za'ra wa'aba mono norĩ hã. Tane nherẽ, ti'ai ãma 're aihâimana za'ra wa'aba mono norĩ hã aima 're ropipa uptabi za'ra wa'aba mono di za, â poré na 're aihâimana za'ra wa'aba mono norĩ ma zama. E marĩ wa. Wa'uburé hã sahi uptabi na atẽme morĩ aba na dâ'âsina, ti'ai u. Ti'ai ãma te te aima 're rob'manharĩ wasété za'ra wa'aba mono da, za 're ihâimana hutu mono zém na te te sina waihu'u wa, ma tô tizahi pese. Tahawa, aima 're ropipa uptabi za'ra wa'aba mono di za.

Apocalipsi 15:5

Taha parimhã, wa tô duré 'madâ, hâiwa ãma 'Re ihâimana u'âsi mono nhorõwa 'ri hã, duré 'ri paramhã 'ri 're wa'wa ãma, 'Re ihâimana u'âsi mono 're isãmra mono zé hã. Ta hã ni'wa ma tô 'ridawa hã 'ridawa.

Apocalipsi 18:20

Ãne te i'awapari mono hã, ĩnhotõ 'rowim ne, ĩpo're na. Tahawa, ma'ãpé hâiwa ãma 're aihâimana za'ra wa'aba mono hã ãma 're atoi u'âsi za'ra wa'aba mono, 'ri nho'õmo za'ẽne hã isi'utõrĩzém na. Duré 'Re ihâimana u'âsi mono nhib'a'uwẽ norĩ, ma'ãpé 're atoi u'âsi za'ra wa'aba mono, isadawa wasu'u'wa norĩ zama, duré Cristuhu zadawa wasu'u'wa norĩ zama. E marĩ wa. Babilonia ãma da te aima 're rob'manharĩ wasété za'ra wa'aba mono wa, 'Re ihâimana u'âsi mono hã te te da'uprosi wa oto. Tahawa, te za ãma 're atoi u'âsi za'ra wa'aba mo.

Apocalipsi 21:3

Tawamhã damreme 'rãihâ hã wa tô duré wapa, danhib'apito simasisizém hawi we te te inharĩ hã. Ãne te we ĩma tinha: — Ma'ãpé, waihu'u. 'Re ihâimana u'âsi mono hã te za oto dasiré 're hâimana u'âsi, 'râwi. Isib'a'uwẽ te za oto 're dahâimana u'âsi za'ra. Te za tô oto duré dasiré 're hâimana u'âsi. Isib'apito za'ra te za oto 're hâimana, 'Re ihâimana u'âsi mono hã.

Apocalipsi 4:1

Taha za'u si, wa tô duré marĩ hã te ab'madâ'â, ĩnhotõ 'rowim ne. Hâiwa u wa tô rob'madâ. Te rob'madâ'â wamhã, wa tô 'madâ, hâiwa 'ridawa hã. Õne haré 'ridawa u'âsi na ihâiba hã. Tawamhã ni'wai mreme, mreme 'rãihâ na isimnhihârâzém hârâ ne te iwapari 'rata ne hã wa tô duré wapa. Ãne te ĩ'mahâ: — We ãwa aimorĩ hâimo, te aima awasu'u mono da, za 're iromhâimana mono zéb da hã ab'madâ'â mono da.

Apocalipsi 4:4

Tawamhã danhib'apito simasisizé mana wawi te dasimasisizé hã aimasa, 24 na danhib'apito norĩ te ne hã. Taha na te asimro, dama ipire norĩ 24 na ihâiba za'ra norĩ hã, 'Re ihâimana u'âsi mono nhimiroti na si 're isõpré pese mono norĩ hã. Uza hâpa hâirã ré te asimro. Ẽtẽ waipo pré oru 'manharĩ na da'rãzaza ré zama te asimro.

Apocalipsi 5:13

Tawamhã wa tô duré wapa, uburé pese 'Re ihâimana u'âsi mono te te ida'apoto mono bâ, duré te te i'apoto mono bâ, ihâiba ré mono hã, hâiwa ãma, duré ti'ai ãma, duré ti'ai 'rowi adâ 're ihâimana za'ra mono zéb ãma, duré â 'rowi uburé pese ihâiba ré mono hã. Uburé pese te simisutu dasiwazari tazadawa'a'a ni, 'Re ihâimana u'âsi mono te te ida'apoto mono bâ. Ãne te tazadawa'a'a ni, ta norĩ hã: “Danhib'apito simasisizém na isãmra ãma, 're wawata u'âsi za'ra wa'aba mono. Duré Pone'ẽrebâi ãma, 're wawata u'âsi za'ra wa'aba mono. Wẽ uptabi zahuré wa ta norĩ hã, duré waihu'u pese uptabi zahuré wa, wa za ãma 're wawata u'âsi za'ra, õ norĩ ãma.”

Apocalipsi 7:15

Tahawa, te ã norĩ hã 'Re ihâimana u'âsi mono simasisizém nho're aimasa, uza hâpa hâirã ré. Romhuri sahâri waihu'u ãna te te tãma 're romhuri u'âsi za'ra, isõrõwa ãma hã. Duré danhib'apito simasisizém na isãmra hã te za duré 'râwi ãma 're sisaprĩ u'âsi za'ra, i'uza hâpa hâirã ré norĩ ãma hã, i'rata za oto 're sãmra u'âsi za'ra mono wa.

Apocalipsi 7:9

Taha parimhã, wa hã Zuwã, wa tô duré 'madâ. Te 'madâ'â wamhã, wa tô da'ab'madâ, da'ahâ uptabi na, da te idaza'rata waihu'u õ hã. Dapoto mono bâ te aimasam ni, damreme sipo'o mono bâ 're idahâimana za'ra mono hã. Danhib'apito simasisizém nho're te aimasam ni, duré Pone'ẽrebâ nho'reb zama. Da'uza hâpa hâirã ré te isõ're aimasam ni. Tawamhã wa'asu ne hã, da te tété za'ra sina, te damreme 'rãihâ na ãma tawata za'ra ni, ãne: — Wanhib'apito 'Re ihâimana u'âsi mono, danhib'apito simasisizém na isãmra hã ta hã, Wa'anho'reptui'wa. Duré Pone'ẽrebâ hã tô isiré Wa'anho'reptui'wa. Ã norĩ hã ma tô wawasété wi te te 're wa'anho'reptu zahuré, 're iwasi'utõrĩ za'ra mono zé wib zama.