Apocalipsi 11:18 - ꞌRe Ihâimana Uꞌâsi Mono Zadawa Wasuꞌu

¹⁸ Ai'ãma 're idawata za'ra mono õ norĩ hã ma tô asada tizahi pese za'ra. Tahawa, ma tô oto iwa waptãrã, asiwi ida'awẽ'õ pese zéb zarina, dama irob'manharĩ wasété zéb da hã. Ma tô duré iwa waptãrã, dahâimanazéb zarina dama i'arowairébézéb da hã, uburé adâ'â norĩ ma hã, asimiroti hã te te 're iwapari za'ra mono õ norĩ hã uburé 're ahâ za'ra mono da, duré uburé asimiroti wapari pese 'wa norĩ ma, tãma 're ab'manharĩ wẽ mono da. Ma tô iwa waptãrã, asadawa wasu'u'wa norĩ ma, marĩ iwẽ hã 're anhomri mono da, te te aima 're iromhuri pese za'ra mono zé wa'rãmi. Uburé pese asib'a'uwẽ norĩ ma, marĩ iwẽ hã 're anhomri mono da, ma tô iwa waptãrã, ai'ãma 're iwata za'ra mono norĩ ma, dama ipire norĩ ma, dama iwapu norĩ ma zama. Ma tô duré iwa waptãrã, ti'ai ãma da te 're irowasété za'ra mono norĩ hã uprosi da.”

Apocalipsi 11:18 ပူးပေါင်းရင်းမြစ်များ

Salmu 103:11

Hâiwa, ti'a nhisiwi romhâ uptabi na 're isa'wari mono ne, te isimizawizé hã sa'ẽtẽ na 're hâimana, te te 're iwazéb za'ra mono norĩ ãma hã.

Salmu 110:5

Uburé Danhib'apito te asimire niwĩ asababamhã 're sãmra. Ta hã te za isiti'rui watobrozé bâtâ na apito norĩ hã ahâpâ pese.

Salmu 2:5

Tawamhã siti'rui pese wa, te za tinhimi'amhâzépa na hã duré da'a'rãmi pese.

Daniéu 11:44

Tane nherẽ, bâtâ pusizém hawi duré hâiwa nhimi'e hawi te za romreme hã wi, apito u hã. Wisi wamhã, te za romreme ma tipahi pese. Tahawa, sahi sina te za tite dasi'wapéi 'manharĩ'wa norĩ ré watobro, te te sima irowairébézéb zarina da'ahâ na te te da'a'uprosi da hã.

Daniéu 7:26

Tane nherẽ, ãne na romhâimana parip si, te za da'ãma rowairébé'wa norĩ, niha hã tãma pisutu za'ra. Taha zarina te za tinhimi'madâ'âzé hã siwi simini. Te za duré isiptetezé hã õne u'â tiwi 're si'utõrĩ.

Daniéu 8:25

Ti'rã nhipese zarina te za tô sima te te 're irowa'õtõ mono zé hã ãma sima te te 're a'uwaimrami. Te za duré 're isi'madâ'â zei mono na, we te te sina 're hâimo u'âsi. Te za duré te te 're ida'ahâiba za'réi mono zarina, da'ahâ na te te 're da'a'mapãrĩ. Uburé apito norĩ nhipai u Isiptede 'Re ihâimana u'âsi mono zada, te za duré tihâiba, ti'ai ãma apito iwasédé hã. Tane nherẽ, ti'ai ãma apito iwasédé hã te za wamnarĩ ni, a'uwẽ nhiptete nai õ na hã.

Mateu 5:12

Tahawa, ma'ãpé atoi u'âsi, ãma 're anomro aba mono za. 'Re ihâimana u'âsi mono hã te za marĩ iwẽ hã sa'ẽtẽ na te te aima 're sõmri za'ra wa'wa, hâiwa ãma asô 're isimi'wara aba mono hã. Duréihã 'Re ihâimana u'âsi mono zadawa 'mahârâ 'rata 'wa norĩ ma, ma tô da te tãma 're rob'manharĩ u'âsi za'ra, da te aima 're irob'manharĩ wasété za'ra wa'aba mono ne. — Ãne na ma tô Zezusi hã tãma waihu'u siromo za'ra romhâ ré, te te waihu'u zara da.

Luca 1:50

Imreme, da te 're 'madâ'â pese za'ra mono wamhã, te za da'ãma 're pẽ'ẽzé u'âsi. Õne u'âsi.

Hebreu 9:27

Misi haré te za aihĩni 're dadâ'â za'ra. Taha parip si te za 'Re ihâimana u'âsi mono hã niwapsi da'awaihu'u, dawẽ na duré dawasété na zama, taha zarina te te oto dama 're arowairébé mono da hã.

Apocalipsi 11:2

Tane nherẽ, 'ri 'wawi wa'ra 're, 'ri nho'remhã pibui mono õ di za. Ta hã wa tô pisutu, ĩnhib'a'uwẽ'õ norĩ si te te iwa 're ubumroi mono da. Ta norĩ hã niwapsi te za Zeruzalẽ ãma hã 'ri nho'u iwẽ uptabi ãma hã da'ãma ai'uté za'ra. Tahawa, te za te te sina dawasi za'ra. 42 na a'amo ihâimana u te za te te da'ãma rowamnarĩ za'ra, 1.260 na bâdâ za da'ãma isi'utõrĩzéb u.

Apocalipsi 13:10

Ni'wa hã isazei'wai wamhã, dazazéb 're da te 're séme mono da, 'Re ihâimana u'âsi mono te te dawi 're sawi za'ra mono õ wamhã, te za tô da te 're sé. Duré sib'ézé 'wapa na da te 're simroi mono da, 'Re ihâimana u'âsi mono te te dawi 're sawi za'ra mono õ wamhã, te za tô da te 're simro. Ãne da nherẽ, te za sipizari ãna ãma 're nomro, 'Re ihâimana u'âsi mono ãma.

Apocalipsi 13:16

Tawamhã ti'ai hawi ropoto pipa hã ma tô te te da'awada'uri, da te dasima waprosi za'ra da, ni'wam norĩ hã isib'rata nhimire niwĩ da te sib'rata ui'éré za'ra mono da, duré ni'wam norĩ hã i'uihâi mono na da te uihâ ui'éré za'ra mono da. Tawamhã ma tô da te a'ui'éré tô, daro mono bâ 're idahâimana za'ra mono hã, dama iwapu mono bâ duré dama ipire mono bâ, duré danhibro pese mono bâ, duré danhibrob'õ mono bâ, duré dapawa'âbâ ãna dawada'uri zarina si da te dama 're iromhuri za'ra mono bâ, duré dawada'uri ãna dasi'uihâ na 're idahâimana za'ra mono bâ. Da'upsãtã mono bâ ma tô da te da'ui'éré za'ra.

Apocalipsi 15:1

Tawamhã wa tô duré marĩ hã 'madâ, hâiwa nhirõtõ na dama isa'rese'õ hã ãma 're idatob'uzu za'ra mono hã. Hâiwa ãma romhuri'wa norĩ hã te 7 na aimasa. Ta norĩ ma, ma tô 'Re ihâimana u'âsi mono hã pisutu, 7 na rob'manharĩ pipa mono na hã, irẽme ma te te taha na dama ãma 're rob'manharĩ za'ra mono da. Ã norĩ hã 'Re ihâimana u'âsi mono nhimi'ahârizéb 'rãsudu, te wasu'u.

Apocalipsi 15:7

Tawamhã maparane si'uiwa na, ropoto na ihâiba norĩ siré hã misi ma tô 7 na hâiwa ãma romhuri'wa norĩ ma sõmri za'ra, oru 'manharĩ na u'awi hã, 7 na ihâiba za'ra na. U'awi hã uwa 'rãi wa'u isé pire ré hã. Uwa 'rãi wa'u isé pire hã, 'Re ihâimana u'âsi mono nhimihâzé, te wasu'u.

Apocalipsi 18:6

Ma'ãpé Babilonia ãma 're idahâimana za'ra mono norĩ ma, tãma ãma wa'rãmi za'ra wa'aba asa, aiwab da, ĩnhib'a'uwẽ norĩ ma, te te 're irob'manharĩ za'ra mono ne. Ta norĩ nhimirob'manharĩzéb zarina ma tô ĩnhib'a'uwẽ norĩ hã te te 're robzépata za'ẽtẽ za'ra. Tahawa, ĩnhib'a'uwẽ norĩ ma, te te tãma 're irob'manharĩ za'ra mono zém nhipai u, te za tãma ãma iwa'rãmi za'ra wa'wa, Babilonia ãma 're idahâimana za'ra mono norĩ ma, isipai u te te 're robzépata za'ẽtẽ za'ra mono da.

Apocalipsi 19:15

Duré awaru irã na isãmra zadai'ré hawimhã, te sib'ézé 'wa si'uiwa i'wa pe hã aipra. Taha na, te za da'ãma ai'uté, daro mono bâ 're idahâimana wasété za'ra mono norĩ ãma hã. Simiwada'uri nhiptete na te za duré te te 're da'awada'uri. Uwa 'ru 'rã hã ẽtẽ're 're, iwa'u zô da te 're wati za'ra mono wamhã, te za iwa'u hã 're pu'u za'ra. Tane te za dawapru hã dawi 're pu'u za'ra, 'Re ihâimana u'âsi mono isiptete uptabi hã sa'ẽtẽ te te 're da'ahâ za'ra mono wamhã.

Apocalipsi 19:18

Tawamhã daro mono bâ da'upsãtã mono nhi na te za asaihuri 'wa, adâ'â norĩ nhi na, duré ti'ai ãma danhib'apito norĩ nhi na, duré da'wapéi'wa norĩ nhib'apito nhi na, duré da'wapéi'wa norĩ nhi na, duré awaru nhi na, duré awaru 'mapraba'wa norĩ nhi na, duré dapawa'âbâ ãna dawada'uri zarina si da te dama 're iromhuri za'ra mono norĩ nhi na, duré dawada'uri ãna dasi'uihâ na 're idahâimana za'ra mono norĩ nhi na, duré dama ipire norĩ nhi na, duré dama iwapu norĩ nhi na zama. Uburé pese daro mono bâ 're idahâimana wasété za'ra mono norĩ dâ'â nhi na te za asaihuri 'wa.

Apocalipsi 19:5

Tawamhã danhib'apito simasisizém hawi te ni'wa hã tinha, ãne: — Ma'ãpé, Wanhib'apito 'Re ihâimana u'âsi mono ãma si 're aiwata u'âsi za'ra wa'aba mono, uburé isib'a'uwẽ norĩ hã, duré dama aipire za'ra wa'aba norĩ hã, duré dama aiwapu na 're i'aihâimana za'ra wa'aba norĩ hã, duré uburé 'Re ihâimana u'âsi mono 're ihâimana wazéb za'ra wa'aba mono norĩ zama hã.

Apocalipsi 20:12

Tawamhã wa tô duré 'madâ'â za'ra, 're idadâ'â za'ra mono hã, dama ipire norĩ hã, duré dama iwapu norĩ hã. Da'upsãtã mono bâ, te aihĩni pese danhib'apito simasisizém nho're aimasam ni. Â poré mono bâ, â na 're idasi'utõrĩ mono norĩ zama te aimasam ni, adâ 're ihâimana za'ra mono zém hawib zama. Tawamhã ibaihâ ahâ na ma tô sõzi za'ra ni, ti'ab ré uburé marĩ, da te 're i'manharĩ za'ra mono zém na rob'ui'éré ré hã, marĩ iwẽ na, duré marĩ iwasété na zama. Ma tô duré sõzi ibaihâ hã, 'Re ihâimana u'âsi mono 'rata za rowẽ na 're idahâimana u'âsi za'ra mono norĩ nhisi ré hã. Tawamhã ibaihâ na da te 're i'manharĩ wẽ za'ra mono zéb ui'éré zarina, ma tô da'ãma rowairébé za'ra ni. Da te 're i'manharĩ wasété za'ra mono zéb ui'éré zarina zama, ma tô aihĩni pese da'ãma rowairébé za'ra ni.

Apocalipsi 22:12

Tawamhã Zezusihi mreme hã wa tô duré wapa, tizazei'wa norĩ te te ipo're pu'u za'ra zém na hã. Ãne te tinha: — Ma'ãpé waihu'u pese za'ra wa'aba. Wa za wei morĩ su za apâ hã. We ĩmorĩ wamhã, ĩnhimipawa'âbâzéb da hã wa za we ĩsiré âri siro za, da te ĩma 're iromhuri wẽ za'ra mono zéb zarina te ãma ida'apawa'âbâ mono zéb da hã.