Apocalipsi 11:17 - ꞌRe Ihâimana Uꞌâsi Mono Zadawa Wasuꞌu17 Ãne te ãma tiwata za'ra: “Uburé Danhib'apito uptabi, 'Re ihâimana u'âsi mono, a hã danhipai u asiptete uptabi di. Duréihã marĩ õ ré hã, te 're aihâimana u'âsi mo. Ai'utõrĩ waihu'u õ di. Õne u'âsi te 're aihâimana mo. A hã aiwaihu'u pese zé hã, duré danhipai u asiptetezé hã ma tô oto dama ihâi'ré, da te oto 're 'madâ'â za'ra mono da. Taha zarina ma tô oto danhipai u da'madâ'â pire na ãma isãna'ra, ãhã na hã. Tahawa, wa ai'ãma wawata za'ra ni. အခန်းကိုကြည့်ပါ။ |
Apocalipsi 11:17
27 ပူးပေါင်းရင်းမြစ်များ
Tawamhã apito tinhimirotizém na isisi hâtâzém na te te waihu'u wamhã, ma tô tinhorõwa u apâ hã mo. Hâimo ãma 'ri 're wa'õno ihâimana ãma te nhamra, zanela 'ri zadazâri norĩ Zeruzalẽ nho'õmoi baba ihâimana za'ra ãma. Tawamhã Daniéu ma tô 'ri zadazâri hã sima 'ridawa za'ra. Taha pari ma tô hi'rãtitõ nhamra. Ma tô duré tite 'Re ihâimana u'âsi mono ma hã mre, awẽ sidâpâsi si'ubdatõ na ãma isahu na tãma 're imreme u'âsi mono ne.
Tawamhã Zezusi hã te duré ãne Timama ma hã mre: — Ĩmama, a hã Danhib'apito uptabi, hâiwa ãma hã, duré ti'ai ãma zama. A hã ma tô rowaihu'u pese 'wa norĩ wi roti iwẽ hã 're i'anhito mo, te te 're waihu'u za'ra mono tõ da hã. Rowaihu'u prãi 'wa na 're ihâimana za'ra mono norĩ ma si, ma tô marĩ iwẽ hã 're i'awaihu'u mo. Tahawa, wa ai'ãma ĩwata, asõpru wa.
Tame 'Re ihâimana u'âsi mono pẽ'ẽzani te te tãma iwaihu'uzéb zarina, te 're to, Zezusi hã. Toi uptabi di oto. Tahawa, te Timama ma tinha, ãne: — Ĩmama, a hã Danhib'apito uptabi, hâiwa ãma zama, ti'ai ãma zama. Ã norĩ hã marĩ te te waihu'u za'ẽtẽ za'ra õ di. Tane nherẽ, ma tô marĩ iwẽ hã tãma iwaihu'u za'ra. Rowaihu'u pese 'wa norĩ ma hã, marĩ hã iwẽ tãma waihu'u za'ra õ di. Tane tô, Ĩmama. Asima iwẽzéb uwaibaba, ma tô ã norĩ ma si a'â iwaihu'u za'ra, marĩ iwẽ hã. Tahawa, wa ai'ãma ĩwata, asõpru wa.
Tawamhã isitobzé ma tô dasiwi sa'ré ni. Ãhã wamhã, te hâimo oto rob'madâ, Timama ma mreme da, Zezusi hã. Ãne te tawamhã tãma tinha: — Ĩmama, da'ãma aima 're ĩmreme mono wamhã, ĩmreme te ĩma ãma 're i'a'uwaimrami u'âsi mo. Ãhã na te za duré ĩmreme hã iwapa. Ãne wa, ĩma rowẽ di. Tahawa, wa duré danho'a, ãne aima rowasu'u, aima ĩmreme ré, da te ĩwapari za'ra da. E marĩ da. Aibâ ãma aima ĩmremezé hã ãma ĩma uwaimrami wamhã, a hã we ĩzatõrĩ'wa na dama 're ĩsiwasu'u mono zém na, da te 're ĩzaze za'ra mono da.
Tane nherẽ, 'Re ihâimana u'âsi mono ãma si, wa za 're ĩwata u'âsi. Ta hã te za sisarina te te 're wa'anhimroi u'âsi, Cristuhu ãma 're iwahâimana za'ra mono zéb zarina, wa'ãma 're sib'a'uwẽ za'ra mono wa. Da'wapéi'wa norĩ nhib'apito hã tinhitob'ru norĩ ãma te te ai'uté za'ra wẽ te, da'ahâ nho'a sisarina te te 're isimroi mono ne, taha ma si wa te oto tãma 're romhuri za'ra mono da, te za sisarina si te te 're wanhimroi u'âsi, 'Re ihâimana u'âsi mono hã. Te duré te te 're wapawaptob u'âsi za'ra, Cristuhu wasu'uwẽ si daro mono bâ wa te dama ãma 're ropéi mono da, Cristu hã aihĩni da te oto 're waihu'u za'ra mono da. Wedewa'u isadaze hã da te 're zata za'ra mono wa, 're isadazei pu'u za'ra mono ne, wa za wa te dama ãma 're ropé, Cristuhu wasu'uwẽ hã.
Ãhã na wa za ãma ĩwata, Wanhib'apito Cristu Zezusihi ãma hã. Ta hã ma tô ĩwaihu'u siro, ĩnhimiromhuri hã za te tãma ãma 're i'uwaimrami mono na hã. Taha zarina ma tô ĩpisutu, dapawaptom na te tãma 're romhuri mono da. Taha da, ma tô te te 're ĩnhiptete u'âsi. Tahawa, wa za ãma 're ĩwata u'âsi, ĩma 're rowẽ mono wa. Wanhib'apito ãma wa tô aré te ãma 're wasété, ĩmreme wasété na. Isazei'wa norĩ hâiba u'âbâ, wa tô aré te tãma 're rob'manharĩ wasété. Ta norĩ hâiba u'âbâ, wa tô aré duré sada 're ĩsima'wara. Wanhib'apito Danho'reptui'wa na 're imorĩ na hã ĩma waihu'u õ di aré. Te duré sazei õ di aré. Tahawa, zahadu ĩnhimiza'rese ãna 're ĩmorĩ wa, ma tô ĩ'ãma tipẽ'ẽzé, 'Re ihâimana u'âsi mono hã, te te ĩ'azâri tõ da.
Wa hã, Zuwã. Ĩnhimi'ui'éré na wa ãma asawi za'ra wa'wa, Azia na danhipti'a nho'õmo nhisi ãma, Zezusihi zazei'wa, asiré 're asi'rã'õtõ u'âsi aba mono norĩ hã, 7 na daza'rui mono bâ 're i'ai'rã'õtõ aba mono norĩ hã. Wa hã wa ai'ãma 're ĩmreme u'âsi za'ra wa'wa, 'Re ihâimana u'âsi mono ma, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, ãma 're anomro aba mono da. Ta hã duréihã marĩ õ uptabi ré, ma tô 're hâimana u'âsi. Õne u'âsi te za duré ãhã mono na zama hã 're hâimana. Hâiwa ãma te ta hã 're sãmra u'âsi, danhib'apito simasisizém na. Duré Ipẽ'ẽzani zama te te 're aipawaptob u'âsi za'ra wa'aba mono da, wa duré ai'ãma te 're rosa'rata u'âsi za'ra wa'wa. Ta hã te 'Re ihâimana u'âsi mono simasisizé uiwada 're hâimana u'âsi. Taha pẽ'ẽzani hã 7 na isimiromhuri hã.
Tawamhã 7 ãma hâiwa ãma romhuri'wa hã ma tô tinhimnhihârâzém na amnhihârâ. Simnhihârâ wi, hâiwa ãma damreme 'rãihâ hã wa tô wapa. Ãne te nharĩ za'ra: — Satanasihi nhimi'madâ, 're danomro mono da, ma tô da te dasima 're wẽ za'ra aré, daro mono bâ. Tane nherẽ, ropâ te za oto 'Re ihâimana u'âsi mono nhimi'madâ'â si 're danomro, Wanhib'apito nhimi'madâ hã. Danho'reptui'wa da, te te ipisutu nhimi'madâ'â zama te za 're dahâimana za'ra oto. Wanhib'apito hã te za tô te te 're da'ab'madâ'â u'âsi oto, õne u'âsi.
Te duré tizadawa'a'a, Mozésihi nho'rezém na, 'Re ihâimana u'âsi mono ma romhuri'wa nho'rezém na, Ezitu hawi isib'a'uwẽ norĩ, 'Re ihâimana u'âsi mono te te dawi isõ'reptu za'ra zém na. Te duré tizadawa'a'a, Pone'ẽrebâ te te 're ida'anho'reptui mono zém na. Ãne te ãma tizadawa'a'a: “Uburé Danhib'apito uptabi, 'Re ihâimana u'âsi mono, aiwaihu'u pese uptabi di. 'Re i'ab'manharĩ mono zé hã wẽ uptabi di. A hã daro mono bâ uburé pese Danhib'apito. Tô sena uptabi na si te dama 're i'aroti wẽ uptabi mo. Upai ãna, te duré 're ida'ab'madâ'â wẽ mo.
Ta norĩ hã si'ubdatõ wa'uburé norĩ hã simiromhõsi waihu'u pese za'ra di. Ta norĩ hã niwamhã te za te te ropé daro mono bâ, dama ipire za'ra norĩ zô, da'wapéi'wa norĩ zô zama te te ubumroi mono da, 'Re ihâimana u'âsi mono hã te te siwi 'wapé da hã, bâdâ isa'ẽne, 'Re ihâimana u'âsi mono danhipai u isiptete uptabi nhimipisutu na.
Tawamhã wa tô wapa, hâiwa ãma romhuri'wa hã, â mono bâ, â 'madâ'â'wa hã. 'Re ihâimana u'âsi mono ãma te tiwata, ãne: — A hã tô sena te marĩ na upai ãna i'uwaibaba si dama 're i'arowairébé mo. A hã 're aiwasété mono õ. Marĩ õ ré hã te 're aihâimana u'âsi mo. Ai'utõrĩ waihu'u õ di. Õne u'âsi te 're aihâimana mo.
Tawamhã wa tô duré wapa ni'wai mreme hã, wedeza ne hawi, 'Re ihâimana u'âsi mono ma, danhoprubzé nomrizém hawi. Te duré 'Re ihâimana u'âsi mono ãma tiwata, ãne: — Uburé Danhib'apito uptabi, 'Re ihâimana u'âsi mono, tô sena aiwaihu'u pese uptabi di. Marĩ na upai ãna te i'uwaibaba si dama 're i'arowairébé mo, sena na.
Taha pari, wa tô duré 'madâ. Te 'madâ'â wamhã, ma tô ĩma si'ridawa, hâiwa hã. Tawamhã awaru irã hã wa tô 'madâ. I'mapraba'wa nhisi hã, sena na Dama i'umnhasi na. Duré isisi amo hã, Tô sena uptabi na, isisi hã. Ta hã dawasédé hã da te 're i'manharĩ za'ra mono zéb zarina te te 're da'awẽ'õ mono wamhã, tô i'uwaibaba si te te 're da'awẽ'õ. Tô isarina si te duré te te 're da'ahâ za'ra, te te ãma 're upai mono ãna. Duré dawasété na 're idanomro mono norĩ hã te te 're 'wapé za'ra mono wamhã, tô isarina si te te tãma 're rob'manharĩ za'ra, te te ãma 're upai mono ãna.
Tawamhã wa tô duré wapa, da'ahâ uptabi na 're idamreme zusi mono mreme hã. Â'a'a 'rãihâ ruru'u ne, damreme hã. Duré tãiwapsa'a za'ẽtẽ rãrã'ã ruru'u ne, damreme hã. Ãne te damreme 'rãihâ na nharĩ za'ra ni: — Uburé Danhib'apito uptabi, iwaihu'u pese uptabi hã ta hã danhipai u, pire uptabi na te 're hâimana, 'Re ihâimana u'âsi mono hã. Tahawa, ãma 're wawata u'âsi za'ra wa'aba mono za.
ကြော်ငြာတွေ