Apocalipsi 10:5 - ꞌRe Ihâimana Uꞌâsi Mono Zadawa Wasuꞌu

⁵ Tawamhã hâiwa ãma romhuri'wa hã â nhisiwi isa hã ti'a nhisiwib zama isa hã te i'madâ hã ta hã ma tô hâiwa nho'õmo tinhib'rada hã wẽ, tinhimire niwĩ hã.

Apocalipsi 10:5 ပူးပေါင်းရင်းမြစ်များ

Zenezi 14:22

Tane nherẽ, Abrã ma te ãne asa ãma tãma wa'rã: — Uburé Danhib'apito, danhipai u 're ihâimana mono, hâiwa 'manharĩ'wa, duré ti'ai 'manharĩ'wa, taha nho'a wa za ĩnhib'rada hã hâimo wẽ,

Neemia 9:6

Tawamhã Izaraéu nhihudu norĩ, ma tô ãne mreme zu: “'Re ihâimana u'âsi mono, aiwétési Uburé Danhib'apito! A hã ma tô hâiwa i'manha. Wasi norĩ hã ma tô duré i'apoto mo. Ti'a hã, âporé hã, duré iwa 're ihâimana za'ra mono hã ma tô i'apoto mo. A hã ma tô uburé asimipoto mono bâ hâiba ré, 're ihâimana za'ra mono da hã tãma i'manharĩ za'ra. Duré hâiwa ãma ihâiba ré norĩ hã te hi'rãtitõ aima 're si'ubumroi mono sina ai'ãma 're wata u'âsi za'ra.

Ezodu 20:11

Wa hã, Uburé Danhib'apito, 6 bâtâ 're, wa tô hâiwa hã, ti'a hã, duré â wa 're ihâimana za'ra mono da hã ab'manha. Tawamhã 7 bâtâ ãma wa tô oto wa'udu. Tahawa wa tô sabadu bâdâ iwazéb zahi na aimawi 're ihâimana mono da hã pisutu.

Ezodu 6:8

Tawamhã wa hã wa za Abra'ãhã ma, Izaquihi ma, duré Zacoho ma, ti'a za te tãma isõmri za'ra zém na te iropisutu u hã te asimroi wa'wa. Tawamhã õ hã ti'a hã wa za aima sõmri za'ra wa'wa, ate na oto aima 're hâimana za'ra wa'aba mono da. Wa hã Uburé Danhib'apito.”

Daniéu 12:7

Tawamhã hâiwa ãma romhuri'wa tinhib'rada hâimo te te wẽ sina, te 'Re ĩhâimana u'âsi mono idâ'â'õ nhisi na tinha ãne: — Wa za aima ropisutu. Ãne hã te za tô tiromhâiba, si'ubdatõ wahu aiwa ãma isipo'o u, 'Re ĩhâimana u'âsi mono tinhib'a'uwẽ da, te te ipisutu norĩ ma, da te tãma 're irob'manharĩ wasété za'ra mono zé hã si'utõrĩ wapsi.

Zezusihi zadawa wasuꞌuꞌwa norĩ nhimiromhuri na robꞌuiꞌéré 14:15

— Aibâ norĩ, e marĩ da, te za tane i'manharĩ za'ra wa'wa. Tô'ã. 'Manharĩ za'ra wa'aba tõ. Wa norĩ hã aibâ, asine za'ra wa'aba hã. Zezusihi wasu'uwẽ na wa te aima rowasu'u za'ra wa'aba da, wa tô we wanem ni, atẽme za'ra wa'aba. Wa tô duré aima roti za'ra wa'aba ni, taré romhâiba na ãma 're aiwata za'ra wa'aba mono zém hawi 're aipizari za'ra wa'aba mono da, iwaihu'upese newa ãma 're aiwata tõ za'ra wa'aba mono da, 'Re ihâimana u'âsi mono niwĩ 're anomro aba mono da oto. Ta hã ropoto na'rata 'wa, duré hâiwa nhirõtõ 'manharĩ'wa, duré ti'ai 'manharĩ'wa, duré âporé 'manharĩ'wa. Uburé ti'ai ãma 're idanomro mono da hã, ma tô te te da'apoto, hâiwa nhirõtõ ãma 're idahâimana za'ra mono da zama, duré â 'râwi 're inomro mono da zama.

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:23

'Ri baba 're ĩmorĩ wa, wa tô te azabu, ãma 're i'aiwata za'ra wa'aba mono zé hã. Nimame, wa tô wedeza ne hã sabu, romhâiba 'manharĩ ma, marĩ hã isisiwimhã da te 're isa'ra za'ra mono zé hã. Taha ãma rob'ui'éré hã wa tô duré sabu. Ãne rob'ui'éré hã: “Iwaihu'upe hã wa te waihu'u za'ra õ nherẽ, ãma 're iwawata za'ra mono zé, ã hã.” Waihu'u õ nherẽ, ãma 're i'aiwata za'ra wa'aba mono hã wa za oto aima waihu'u za'ra wa'wa sõ'awi.

Roma 1:20

Duréihã isãna'rata hawimhã, 'Re ihâimana u'âsi mono, ma tô te te ro'apoto, tiwaihu'u pese na. Tiwaihu'u pese na te te ro'apoto mono wa, ta hawim haré te isimiwaihu'u pese zém na, duré tô sena 're ihâimana mono na, da te ãma 're waihu'u pese za'ra, ihâiba hã da te 're 'madâ'â waihu'u za'ra mono õ nherẽ. E marĩ zarina tawamhã, 'Re ihâimana u'âsi mono, 're ihâimana mono na te za tô sena na da te ãma 're waihu'u pese za'ra. 'Re ihâimana u'âsi mono hã uburé marĩ hã te te i'apoto mono hã da te 're i'madâ'â za'ra mono zéb zarina, te oto da te ãma 're waihu'u za'ra, iwaihu'u pese na, duré tô sena õne u'âsi 're ihâimana mono na. Tahawa, tô sena 're hâimana mono nherẽ, da te dasiwi 're udâ waihu'u za'ra mono õ di za, 'Re ihâimana u'âsi mono hã.

Hebreu 6:13

Duréihã 'Re ihâimana u'âsi mono hã Abra'ãhã ma, te te ropisutu wamhã, tinhisi na ma tô tãma ropisutu, ni'wa hã 'Re ihâimana u'âsi mono ma isisi pire hã tãma 're hâimana mono õ wa, tinhisi na te te tãma iropisutu da hã.

Apocalipsi 1:18

Wa tô dârâ aré. Ĩdâ'â nherẽ, wa oto tô 're ĩhâimana u'âsi. Duré oto ĩdâ'â waihu'u õ di za. Ma'ãpé, ãne na hã awaihu'u pese. Te ĩsima ipisutuzéb zarina, wa te te 're da'anho'reptu, adâ 're ihâimana za'ra mono zém hawi, 'Re ihâimana u'âsi mono 'rata, oto 're dahâimana u'âsi za'ra mono da.

Apocalipsi 10:2

Tawamhã ibaihâ nhinha isurure te sõzi haré 're ti'â, tinhib'rata. Tawamhã â poré nhisiwi ma tô tipara nhimire niwĩmhã tipara hã tisã. Ti'a nhisiwi ma tô duré tipara nhimi'e niwĩmhã tipara hã tisã.

Apocalipsi 14:7

Ãne te mreme 'rãihâ na te te dama 'mahârâ: — 'Re ihâimana u'âsi mono nhimiroti hã 're wazé pese za'ra wa'aba mono. Duré wẽ uptabi wa, ãma 're aiwata pese u'âsi za'ra wa'aba mono. Ma tô iwa waptãrã, 'Re ihâimana u'âsi mono te te da'ãma i'arowairébézéb u da hã, uburé pese. Tahawa, te za Ropoto'wai ãma 're aiwata u'âsi za'ra wa'aba mo, hâiwa 'manharĩ'wai ãma, duré ti'ai 'manharĩ'wai ãma, duré â poré 'manharĩ'wai ãma, duré ub're 'manharĩ'wai ãma.

Apocalipsi 16:17

Tawamhã da'rãirẽme hã 7 ãma hâiwa ãma romhuri'wa hã ma tô duré tinhi'u'awi wamhã sa'wa, hâiwa nho're 're iromhâimana mono nhisiwi. Te te sa'wari wamhã, hâiwa ãma 'Re ihâimana u'âsi mono nhorõwa 'ri 're, danhib'apito simasisizém hawi te tinha, mreme 'rãihâ na, ãne: — Tâibâ za oto. Ã hã, da'rãsutu'wa.

Apocalipsi 4:11

Ãne te nasi ãma tiwata za'ra: “Wanhib'apito, 'Re ihâimana u'âsi mono, a hã aiwẽ uptabi di. Aiwaihu'u pese di. Aiwaihu'u pese na ma tô i'aropoto mo. Asima iwẽ zarina ma tô uburé pese i'aropoto mo. Asima iwẽ zarina te oto uburé marĩ hã 're hâimana za'ra, asimipoto mono bâ. Tahawa, uburé i'aropoto mono zéb zarina tô ibâre, wa ai'ãma si 're wawata u'âsi za'ra.”

Apocalipsi 4:9

Ãne te ã norĩ hã maparane si'uiwa na ropoto na ihâiba norĩ hã nasi ãma tiwata za'ra, danhib'apito simasisizém na isãmra ãma, 'Re ihâimana u'âsi mono ãma. Waihu'u pese uptabi wa, te nasi ãma tiwata za'ra, duré sõpru uptabi wa.