Apocalipsi 10:1 - ꞌRe Ihâimana Uꞌâsi Mono Zadawa Wasuꞌu

¹ Tawamhã wa tô duré 'madâ, hâiwa ãma 'Re ihâimana u'âsi mono ma romhuri'wa aimawi hã isimiwada'uri pire hã. Hâiwa hawi ma we si'ra, hâiwa'a na ubu ré. Tãiwaipore te duré i'rã nhisiwimhã za. Duré i'ubu hã aiwa bâtâ ro'o ne. Duré unhama ro'o nhoto pa ne, iza hã.

Apocalipsi 10:1 ပူးပေါင်းရင်းမြစ်များ

Salmu 104:3

 're isa'wari mono nhisiwimhã 're i'asãmra mono zé 'ri hã ma tô isã. Duré wedewara zapore na dasi'wapézém na 're idasisa'rei mono ne, te hâiwa'a na 're ane mo. Te duré asaripi na ne rowa'u'u nhisiwi 're asamroi mo.

Ezodu 16:10

Tawamhã Arã te te dama nharĩ za'ra ré, ma tô rop si 're irosa'wari mono u hã rob'mâdâ'â za'ra ni. Taha ré, Uburé Danhib'apito hawi rowa'a hã ma tô hâiwa'a na sihâi'ré.

Daniéu 10:6

Ihâiba hã te nasi rowa'a za'ẽtẽ, ẽtẽ si'ubuzi waipo iwa'âbâ za'ẽtẽ ne hã. I'ubu hã duré tã si'ubuzi ne hã. Ito hã duré 'rãsitõ ro'o ne. Duré ipaihi, iza norĩ me hã te nasi rowa'a za'ẽtẽ za'ra, ẽtẽ topsada brõzi 'manharĩ ne. Duré imreme hã da'ahâ uptabi na da te dasima 're robzanhamri za'ra mono wa, da te ãma 're irobruru'u za'ra mono ne.

Daniéu 7:13

Tawamhã tô taha mara na ĩnhotõ 'rowim na, wa tô duré ni'wa hã 'madâ, a'uwẽ hâiba ne hâiwa nhirõtõ na we imorĩ hã. Ta hã ma tô Duréi 're Ihâimana mono u we sina rotété. Tahawa, ma tô ta hã dasiwi saprõni ni, Duréi 're Ihâimana mono nho're u.

Mateu 17:2

Tawamhã tame si'ubumroi ré, ma tô Zezusi hã isõ'a za'ra aimawi tihâiba na hã saprĩ. Ma tô ti'uburã pese, bâtâ ro'o ne. Duré i'uza hã hâ zarob'a uptabi di, bâtâ ro te te 're irowa'a pese mono ne.

Luca 21:27

Tawamhã ti'ai ãma Dasiré Ipodo hã hâiwa'a na, te za wei apâ mo, danho'a. Tiwaihu'u pese uptabi na, te za wei mo apâ, duré ihâiba na hã rowa'a sa'ẽtẽ uptabi na.

Zezusihi zadawa wasuꞌuꞌwa norĩ nhimiromhuri na robꞌuiꞌéré 26:13

Apito, tane nherẽ, ma tô aimawi ĩma tiromhâiba. Damascu u ĩmorĩ ré, abzuma wa'wa ma tô rowa'a za'ẽtẽ uptabi hã ĩma ai'ubuzi, hâiwa hawi. Bâtâ nhimirowa'a nhipai u, rowa'a za'ẽtẽ uptabi na. Ĩsiré isi'aba'ré norĩ uwaibaba zama ma tô ai'ubuzi.

Apocalipsi 1:7

Ma'ãpé, asiwi waihu'u pese za'ra wa'aba. Zezusi hã te za wei mo, hâiwa'a na. Wei morĩ wamhã, uburé te za dasiwi 'madâ'â za'ra ni. I'a're wi, siwi iwa'ré'wa norĩ hã te za duré 'madâ'â za'ra, siwi iwĩrĩ'wa norĩ hã. Tawamhã da'upsãtã mono bâ te za sô aiwa'õ za'ra ni, daro mono bâ. Tô sena te za ãne hã tiromhâiba.

Apocalipsi 18:1

Taha pari, wa tô duré 'madâ, hâiwa ãma 'Re ihâimana u'âsi mono ma romhuri'wa aimawi hã. Hâiwa hawi te wei mo, isimiwada'uri pire hã. Ihâiba hã te rowa'a za'ẽtẽ, ti'ai mono bâ.

Apocalipsi 18:21

Tawamhã ãne, wa tô duré te azabu. Hâiwa ãma romhuri'wa isimiwada'uri pire hã ma tô ẽtẽ tõmo wawẽ uptabi hã sarõtõ. Te te sarõtõ wamhã, ma tô âi ba time, â poré ãma. Te te me sina, te ãne tinha: — Ãne te za Babilonia hã 'ri nho'õmo za'ẽne hã sa'ẽtẽ uptabi daré uprosi, si'utõrĩ da. Tawamhã ropsi hã te za oto sô nomro.

Apocalipsi 20:1

Tawamhã wa tô duré 'madâ, hâiwa ãma 'Re ihâimana u'âsi mono ma romhuri'wa hã. Hâiwa hawi te wei mo, ab're 'rehâ zô 'ridawazéb ré, duré isi'uwazi nhorõ rutu ipire ré zama.

Apocalipsi 4:3

Tawamhã ãma isãmra hã te nasi hâibahai'ubuzi, ẽtẽ'ubuzi zarob'a uptabi ne hã. Duré ẽtẽ'ubuzi itobro'o préro'o ne hã te nasi ai'ubuzi. Tawamhã isimasisizé mana wawi, te tãiwaipo ne hã nasi ai'ubuzi, ẽtẽ'ubuzi ro'o uzé ne hã.

Apocalipsi 5:2

Tawamhã wa tô duré 'madâ, hâiwa ãma 'Re ihâimana u'âsi mono ma romhuri'wa, isimiwada'uri pire hã. Ãne te nasi anha ta hã, mreme 'rãihâ na: — E 'wa hã danhipai u iwẽ uptabi, duré iwaihu'u pese uptabi hã te za 7 na ibaihâ nhinha uptobzé hã prub za'ra, ibaihâ te te sõ'a da. E 'wa hã te ãhã da hã sada tihâiba.

Apocalipsi 8:13

Taha pari, wa tô duré 'madâ, si'u hã, hâimo uptabi 're iwara hã. Ta hã te wara sina, mreme 'rãihâ na dama rob'mahâ, ãne: — Ni'ãpé, ni'ãpé, ni'ãpé. Ti'ai ãma uburé pese 're i'aihâimana za'ra wa'aba mono norĩ ma, aima ropipa uptabi za'ra wa'aba di za. Hâiwa ãma romhuri'wa norĩ si'ubdatõ isimnhihãsi õ, tinhimnhihârâzém na oto simnhihãsi wamhã, isimnhihãsi sidâpâsi te za ropipa uptabi hã asô wairébé 'wa. Ãne ĩnhotõ 'rowim ne, te i'azabui mono hã, duré ĩpo're na te i'awapari mono hã.