Apocalipsi 1:5 - ꞌRe Ihâimana Uꞌâsi Mono Zadawa Wasuꞌu

⁵ Zezu Cristuhu zama te te 're aipawaptob u'âsi za'ra wa'aba mono da, wa duré ai'ãma te 're rosa'rata u'âsi za'ra wa'wa. Ta hã dama i'umnha, te simi'ẽ na 're hâimana, 'Re ihâimana u'âsi mono zadawa wasu'uwẽ 'wa da hã. Ta hã ma tô dawana tihâiwa'utu 'rata, ihâiba si'utõrĩ waihu'u õ na. Uburé ti'ai ãma danhib'apito norĩ nhipai u, Zezusi hã te 're hâimana. Misi Danhib'apito uptabi na, te tô 're hâimana. Ta hã te te 're wa'azawi pese. Tahawa, ma tô wazada dârâ. Wazada dâ'â wamhã, iwapru ma tiwi puru. Tawamhã wawasété na 're wanomro mono ré, ma tô tiwapru na tidâ'âzém na te te 're wa'a'upsõ, wawasété ãna ãma 're wanomro mono da oto.

Apocalipsi 1:5 ပူးပေါင်းရင်းမြစ်များ

Salmu 51:2

Ma'ãpé uburé marĩ te 're i'ab'manharĩ wasété mono zé hã ĩma pari pese. Duré ma'ãpé ĩ'upsõ na, 're ĩwasété mono zém na hã.

Salmu 72:11

Aihĩni pese te za apito norĩ hã isõ're tãma aiwẽ'ẽ za'ra. Te za duré daro mono bâ uburé a'uwẽ norĩ hã imreme na 're nomro.

Salmu 89:27

Wa za duré ĩ'ra ĩma ipoto'rata ne hã pisutu, ta hã. Duré uburé apito norĩ nhipai u dama sa'ẽtẽ na 're hâimana mono da hã wa za tãma pisutu.

Provébiu 14:5

Sena na dama dawasu'u hã dazadawa nhipese na hãi õ di. Tane nherẽ, senai'õ na dama dawasu'u hã te dazadawa nhipese na hã da te 're nhipti ahâ za'ra.

Daniéu 2:2

Tahawa, i'rãiwaihu'u pese norĩ zô, marĩ 'manharĩ nhipese 'wa norĩ zô, simi'â ré norĩ zô, duré wasi na romnhoré'wa norĩ zô hã ma tô sô tihârâ za'ra, te te irosawẽrẽzém na te te ãma tãma saprĩ za'ra da. Tawamhã ta norĩ hã apito u sihutu wamhã, isõ're oto simasa wa,

Daniéu 7:14

Ma tô isimiroti pire na 're ihâimana mono zé, duré apito wa, da te ãma 're iwazé mono zé duré te te 're ida'a'madâ'â mono zé hã tãma pisutu ni. Tawamhã dapoto mono bâ, duré daro mono bâ 're idahâimana za'ra mono hã, duré damreme mono bâ 're idamreme zusi mono hã ma tô uburé ãma 're dawata za'ra. Ĩsiptetezé hã isi'utõrĩ waihu'u'õ. Duré te te 're ida'a'madâ'â mono zé isi'utõrĩ waihu'u'õ na.

Mateu 20:28

Tane duré, ti'ai ãma Dasiré Ipodo hã da te tãma 're romhuri za'ra mono da, we morĩ õ di, ti'ai u. Te te 're da'apawapto mono da si, te we datẽme mo, sihâiba zawi ãna dazada dâ'â da, da'upana te te da'awa'âbâ da.

Mateu 28:18

Tawamhã Zezusi hã ma tô 'râwi itẽme timorĩ za'ra oto. Taha wamhã, ma tô tãma nharĩ za'ra, ãne: — Ĩmama hã ma tô ĩma pisutu, isadawa para dama ĩpire na 're ĩhâimana mono da, ti'ai ãma, duré hâiwa ãma zama.

Zuwã 13:1

Awẽ te za oto dato hã dasiwi 'manharĩ za'ra ni, Pascowa na dato nhisi hã. Zezusi hã ma tô sina waihu'u, romhuture wa oto apâ imorĩzé hã, Timama u. Õne u'âsi te Zezusi hã tinhib'a'uwẽ te te 're azawi pese, ti'ai ãma 're ihâimana za'ra mono norĩ hã, õ tihâimanazéb 'rãsutu u.

Zuwã 13:34

Ĩnhimiroti tém na, wa za oto aima roti za'ra wa'wa, 're asisawi pese za'ra wa'aba mono zéb da hã. Wa hã te 're i'asawi pese za'ra wa'aba mono ne, te za 're asisawi pese za'ra wa'aba mo.

Zuwã 15:9

Ĩmama, te te 're ĩzawi pese mono ne, wa tô te 're asawi pese za'ra wa'wa. Ma'ãpé ĩ'ãma 're anomro u'âsi aba mono, te 're i'asawi pese za'ra wa'aba mono zém na asina 're ĩwaihu'u u'âsi za'ra wa'aba mono da.

Zuwã 18:37

Tahawa, ma tô Pilatu hã asa duré sadanha, ãne: — E a hã danhib'apito. Zezusi te duré tãma tinha, ãne: — Tahata ma tô tane hã ĩ'ãma iwaihu. Taha da, wa tô ti'ai ãma podo. Taha da, wa tô we ti'ai u datẽme mo, roti tô sena uptabi hã te dama 're wasu'u mono da. Ni'wam norĩ hã roti tô sena uptabi hã te te sima 're wẽ za'ra mono wamhã, ta norĩ si te za te te 're ĩwapari ze za'ra.

Zuwã 3:11

Tô sena, wa aima waihu'u za'ra wa'wa. Wama marĩ hã wama waihu'u pese wa, duré wa te 're 'madâ'â mono wa, wa ãne wa te dama 're wasu'u. Tane nherẽ, wa te aima 're rowasu'u za'ra wa'aba mono nherẽ, ãma 're wazaze za'ra wa'aba mono õ di.

Zuwã 3:16

'Re ihâimana u'âsi mono ma, tãma dazawi pese uptabi wa, ma tô ti'ra hã misi nherẽ, we tisõ, dazada dâ'â da. Tawamhã i'ra, da te dasina 're umnhasi za'ra mono wamhã, dadâ'â ãna te za hâiwa ãma i'rata 're dasi'ubumroi u'âsi. Ropipa ãma isiti 're dasi'ubumroi mono õ di za.

Zuwã 3:32

Hâiwa ãma uburé te te 're i'ab'madâ'â mono na, duré te te 're i'awapari mono na, te za sena na te te dama 're wasu'u. Tahawa, te te dama ãma 're arowasu'u mono wamhã, mreme pire uptabi di. Tane nherẽ, aihĩni imreme hã da te 're saze za'ra mono õ di.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:28

Tahawa, te za 're asi'madâ'â pese za'ra wa'aba mo, 're anomro wẽ wa'aba mono da. Duré isazei'wa norĩ hã te za 're i'madâ'â pese za'ra wa'aba mo, siré 're isi'rã'õtõ mono norĩ hã. 'Re ihâimana u'âsi mono pẽ'ẽzani hã ma tô sima aipisutu za'ra wa'wa, isazei'wa norĩ hã tãma 're 'madâ'â za'ra wa'aba mono da. Ti'ra wapru na ma tô isazei'wa norĩ hã wa'â, tite da. Tahawa, pone'ẽrebâ 'madâ'â'wa norĩ ne, te za 're ida'madâ'â pese za'ra wa'aba mo, 'Re ihâimana u'âsi mono nhib'a'uwẽ norĩ hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 26:23

“Danho'reptui'wa da, 'Re ihâimana u'âsi mono te te ipisudu hã te za robzépata za'ẽtẽ. Te za dasiwi wĩrĩ ni. Dadâ'â nherẽ, apâ te te 're idahâiwa'utu mono zéb da na te za sãna'rata. Tawamhã te za dama waihu'u, rowa'a na 're idanomro wẽ mono zé hã. Apâ ihâiwa'utuzéb za'u si, te za ãne hã zudeu norĩ ma waihu'u za'ra, zudeu'õ norĩ ma zama.” Ãne ma tô romhâ ré dama sadawa wasu'u za'ra. Taha na wa tô duré wa hã dama rowasu'u.

Roma 3:25

'Re ihâimana u'âsi mono hã ma tô Zezusi hã pisutu, dazada idâ'âzém na dawasédé, da te 're i'manharĩ za'ra mono zé hã te te dama 're apari mono da, taha zarina tiwi 'rusimani da, iwa'rãmi da'ãma 're pẽ'ẽzé mono da. Duré taha na si te te 're ida'awẽsãmri mono zé hã, 'râwi da te dasina 're waihu'u za'ra mono da, ma tô ãne da pisutu, Zezusi hã. Zezusi hã da te 're sazei pese za'ra mono wapsi, te za dawasédé hã te te dama 're apari. 'Re ihâimana u'âsi mono hã da'ãma 're wa'a su'u mono õ wa, dawasédé hã te te da'ãma 're ab'madâ'â mono õ di aré.

Roma 8:37

E tawamhã, uburé marĩ iwasédé hã wazada 're ihâimana za'ra mono zéb zarina, te za Cristu te te 're iwa'azawi pese mono zé hã wawi 're si'utõrĩ za'ra. Mare di. Uburé marĩ na da te wama 're rob'manharĩ wasété za'ra mono da nherẽ, ta hã te te 're iwa'azawi pese mono, te za te te 're wa'apawapto, Cristuhu si, wanhitob'ru norĩ ãma wa te ãma 're ai'uté pese za'ra mono da.

1 Corĩtu 6:11

Ãne na si, ma tô ni'wam norĩ a norĩ wa'wa aré 're aihâimana wasété u'âsi za'ra wa'aba mo, 're saze za'ra wa'aba mono õ ré hã. Tane nherẽ, 'Re ihâimana u'âsi mono hã Zezusihi dâ'âzém na, ma tô oto te te 're ai'upsõ za'ra wa'wa, aiwasété hawi. Ma tô duré te te 're aipisutu za'ra wa'wa, isib'a'uwẽ si oto ãma 're anomro wẽ wa'aba mono da. Aiwasédé hã te te oto ai'ãma 're i'ab'madâ'â aba mono õ zéb zarina, ma tô duré te te 're aiwẽsãmri za'ra wa'wa, Wanhib'apito Zezu Cristuhu zadawa para, 'Re ihâimana u'âsi mono pẽ'ẽzani nhimipawaptobzém na hã.

Éfézu 2:4

Tane nherẽ, wawasété na 're wanomro mono wa, 're iwadâ'â za'ra mono ne, 're wahâimana za'ra mono nherẽ, ma tô Cristu te te ihâiwa'utuzém ne wapẽ'ẽ 're te te 're wa'ahâiwa'utu, rowẽ na si oto ãma 're wanomro mono da. Ãne ma tô wama ãma uwaimrami wẽ za'ra 'Re ihâimana u'âsi mono hã, ipẽ'ẽzézé hã sa'ẽtẽ na tãma 're hâimana mono wa, duré tãma wazawi uptabi za'ra wa. Tahawa, te te 're iwa'anho'reptui mono zé wa'rãmi, marĩ zô 're simipari mono ãna, ma tô, tô te te 're wa'anho'reptu.

Éfézu 5:2

Cristu te te 're iwa'azawi pese mono zéb zarina, te za oto 're idazawi pese za'ra wa'aba mo. Ta hã te te 're wa'azawi pese mono wa, ma tô sisawi ãna, wazada za'ra hã sisõ, dâ'â da. Tahawa, 'Re ihâimana u'âsi mono ma 're idanhoprub za'ra mono zéb zarina, sisawi ãna sisõmri wa, Wamama ma wẽ uptabi di, wazada idâ'âzé hã.

Colosu 1:18

Ta hã uburé tizazei'wa norĩ 'madâ'â'wa te 're hâimana, pire uptabi na. Ta hã dapisutu'wa duré, 're idapoto téb za'ra mono na 're idanomro mono da hã. Dâ'â nherẽ, apâ hâiwa'utu wa, te oto dama pire na 're hâimana u'âsi, uburé za idahâiwa'utu za'ra norĩ nhipai u. Tahawa, te oto danhipai u pire uptabi na 're hâimana tô.

1 Timotiu 6:13

Ãhã na, wa za aima pisutu, uburé te aima iroti mono zé hã asina 're 'madâ'â u'âsi mono da. 'Re ihâimana u'âsi mono nho'a, wa aima pisutu, ti'ai ãma 're idanomro mono zé hã te te dama 're i'apisutu mono nho'a. Cristu Zezusihi nho'a zama wa aima pisutu, Põsiu hã Pilatuhu ma, tihâimanazém na isiwaihu'u wẽ nho'a zama. Uburé te aima iroti mono zé hã te za asina 're i'madâ'â u'âsi mo, apâ we imorĩzéb u, Wanhib'apito Zezu Cristu hã. Asina 're 'madâ'â u'âsi mono wamhã, tawamhã da te aima 're nharĩ za'ra mono õ di za, asina 're i'madâ'â mono õ zém na hã.

1 Timotiu 6:15

Bâdâ te te ipisutuzém na te za 'Re ihâimana u'âsi mono hã tãma tinha, apâ wei morĩ da, Wanhib'apito hã. Wẽ uptabi di, 'Re ihâimana u'âsi mono hã. Õhõ si uburé Danhib'apito uptabi. Uburé ti'ai ãma danhib'apito norĩ nhipai u, pire uptabi di. Duré uburé dama ipire norĩ nhipai u, pire uptabi di.

Hebreu 10:29

Ãne, duréihã 'Re ihâimana u'âsi mono nhimiroti 'rata wẽ'õ'wa norĩ ma hã, 're ropipa za'ra mono di. E niha tawamhã za, 'Re ihâimana u'âsi mono 'ra, te te siwi 're i'ruiwapari za'ra mono norĩ ma, 're iromhâimana za'ra mono zé hã za. Tãma 're ropipa uptabi za'ra mono di za tô. 'Re ihâimana u'âsi mono hã te za tô ta norĩ hã hâ za'ra za'ẽtẽ, rob'rãsutuzéb ãma hã. Duré 'Re ihâimana u'âsi mono te te dama iropisutuzép tém na, Cristu hã dazada idâ'âzé hã taré newa, te ta norĩ hã te te ãma 're rosa'rata upa za'ra. Ta norĩ hã te duré 'Re ihâimana u'âsi mono pẽ'ẽzani ãma te te 're wasété u'âsi za'ra, isimizawi uptabi ãma hã.

Hebreu 9:14

Ãne hã duréihã danhimizama wapru na dahâiba mana wawi marĩ na 're idasihâiba wasété za'ra mono parizéb da hã, wẽ nherẽ, taha nhipai u, Cristuhu wapru si siptete uptabi di, dawasété parizéb da hã oto. E marĩ wa. Taha si wasété ãna 're hâimana u'âsi mono wa. Tahawa, 'Re ihâimana u'âsi mono pẽ'ẽzani waihu'u pese zarina ma tô wazada sisõmri za'ra 'Re ihâimana u'âsi mono ma, wazada za'ra dâ'â da, tiwapru na te te 're wa'a'upsõi mono da, wapẽ'ẽ 're wadâ'â u'âsi ne 're iwanomro mono zéb zarina, wawasété si wa te 're 'manharĩ za'ra mono wa, 'râwi 're iwasiwẽ'õ u'âsi za'ra mono zé hã te te oto wama 're apari mono da. Taha zarina, wa za oto 'Re ihâimana u'âsi mono ma si, wa te 're romhuri za'ra, wawẽ na wahâimanazém na wa te oto 're upa za'ra mono ãna.

1 Pedru 1:19

Dazada idâ'âzém na si ma tô aiwa'âbâ za'ra wa'wa, iwapru hã tiwi ipu'uzém na. Ta hã te 're mo, pone'ẽrebâ iwẽ uptabi ne, da te dasiwi iwĩrĩ da hã, dawasété wa, dawa'âbâzéb da. Cristu hã wẽ uptabi na 're ihâimana mono hã ma tô tidâ'âzém na aiwasédé hã wa'âbâ za'ra wa'wa. Ta hã te te iwawa'âbâ za'ra zé hã wẽ uptabi di.

1 Zuwã 1:7

Tane nherẽ, 'Re ihâimana u'âsi mono nhimiroti zarina 're wahâimana za'ra mono wamhã, rowa'a na 're ihâimana mono ne, wa za duré wa norĩ hã rowa'a na 're wahâimana za'ra. Taha zarina, wa za duré 'râwi wasiré ãma 're wahâimana za'ra, wasisawi pese za'ra sina. 'Re ihâimana u'âsi mono 'ra hã te za duré wawasédé hã te te wama 're apari tidâ'âzém na Zezusi hã, wawasété ãna oto ãma 're wanomro mono da.

1 Zuwã 4:10

Wa norĩ hã 'Re ihâimana u'âsi mono, wama sawi pese za'ra di. Tane nherẽ, te taha nhipai u te te 're wa'azawi pese uptabi. Tahawa, ma tô ti'ra we satõ ti'ai u, wazada dâ'â da, wazada dâ'â wa, wawasété na te te oto 're wa'ab'madâ'â tõ mono da. Tô sena isimizawi pese zé hã siwaprosi te tãma 're hâimana, danhipai u.

Apocalipsi 11:15

Tawamhã 7 ãma hâiwa ãma romhuri'wa hã ma tô tinhimnhihârâzém na amnhihârâ. Simnhihârâ wi, hâiwa ãma damreme 'rãihâ hã wa tô wapa. Ãne te nharĩ za'ra: — Satanasihi nhimi'madâ, 're danomro mono da, ma tô da te dasima 're wẽ za'ra aré, daro mono bâ. Tane nherẽ, ropâ te za oto 'Re ihâimana u'âsi mono nhimi'madâ'â si 're danomro, Wanhib'apito nhimi'madâ hã. Danho'reptui'wa da, te te ipisutu nhimi'madâ'â zama te za 're dahâimana za'ra oto. Wanhib'apito hã te za tô te te 're da'ab'madâ'â u'âsi oto, õne u'âsi.

Apocalipsi 11:3

Taha ré, wa za ĩzadawa wasu'u'wa norĩ hã satõrĩ zahuré, tô 1.260 na bâdâ isi'utõrĩzéb u simi'ẽ na te te ĩzadawa wasu'u zahuré mono da. Tawamhã pone'ẽrebâ zéré 'manharĩ na uza wasété ré, te za tineb zahuré, pẽ'ẽzé uptabi zahuré wa, da te dasiwi 're ĩwẽ'õ pese za'ra mono wa.

Apocalipsi 17:14

Te za duré ropoto siwamnarĩ siré siwi 'wapé, Pone'ẽrebâ hã. Tane nherẽ, te za Pone'ẽrebâ hã ãma ai'uté za'ra. Ta hã Pone'ẽrebâ danhipai u Uburé Danhib'apito uptabi na 're hâimana mono wa, duré danhipai u dama pire na 're hâimana mono wa, te za ãma ai'uté za'ra. Ni'wam norĩ hã isirã zarina si 're nomro mono da, Pone'ẽrebâ te te 're i'apisutu mono norĩ hã, duré simi'ẽ na õhõ ãma si 're inomro mono norĩ hã, te za Pone'ẽrebâ siré ãma ai'uté za'ra, ropoto siwamnarĩ norĩ ãma hã.

Apocalipsi 19:11

Taha pari, wa tô duré 'madâ. Te 'madâ'â wamhã, ma tô ĩma si'ridawa, hâiwa hã. Tawamhã awaru irã hã wa tô 'madâ. I'mapraba'wa nhisi hã, sena na Dama i'umnhasi na. Duré isisi amo hã, Tô sena uptabi na, isisi hã. Ta hã dawasédé hã da te 're i'manharĩ za'ra mono zéb zarina te te 're da'awẽ'õ mono wamhã, tô i'uwaibaba si te te 're da'awẽ'õ. Tô isarina si te duré te te 're da'ahâ za'ra, te te ãma 're upai mono ãna. Duré dawasété na 're idanomro mono norĩ hã te te 're 'wapé za'ra mono wamhã, tô isarina si te te tãma 're rob'manharĩ za'ra, te te ãma 're upai mono ãna.

Apocalipsi 19:16

Tawamhã duré i'uza hâpa na isisi na rob'ui'éré, duré izada'õtõ na zama. Ãne isisi na rob'ui'éré hã, uburé danhipai u Danhib'apito. Duré isisi amo na rob'ui'éré hã, Danhipai u dama ipire.

Apocalipsi 2:13

Ĩma waihu'u pese di, 're i'ai'ubumroi wa'aba mono zé hã. Tame te Satanasihi nhimiwada'uri na 're dahâimana za'ra. Tame ma tô Ãtipasi hã dasiwi wĩrĩ ni asõ'a za'ra wa'aba, simi'ẽ na te te dama 're ĩzadawa wasu'u mono hã. Tane nherẽ, asõ'a za'ra wa'aba da te dasiwi wĩrĩ nherẽ, tãma aipahi za'ra wa'aba õ di. Ĩrẽme za'ra wa'aba õ di duré. Õne haré te ĩnhimiroti na si 're aihâimana za'ra wa'aba mo.

Apocalipsi 3:14

— Te za oto irob'ui'é, Laudiséa na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne: “Wa hã tô sena, ĩ'umnhasi sina, sena na 'Re ihâimana u'âsi mono te dama 're sadawa wasu'u wẽ mono da, 're ĩhâimana mono. Wa hã 'Re ihâimana u'âsi mono nhimiropoto waihu'u pese zarina, ropoto na'rata 'wa, 're ĩhâimana mono.

Apocalipsi 7:14

Tawamhã asa wa tãma tinha, ãne: — Me. Wa hã te waihu'u õ di. Aima waihu'u pese di, a hã. Tawamhã ma tô oto ĩma waihu'u, ãne: — Ã norĩ hã ropsi'utõrĩzéb ãma, ti'ai ãma da te 're irobzépata za'ẽtẽ za'ra mono zéb 'rãsutu u, hâiba ré 're ihâimana za'ra mono. Da te dasima 're irob'manharĩ wasété za'ra mono zém na 're idasi'utõrĩ mono zém hawib õ di. Te te 're robzépata za'ẽtẽ za'ra mono nherẽ, hâiba ré we iwairébé, ã norĩ hã. 'Re ihâimana u'âsi mono ma, ma tô sihâiba 'ru za'ra, Pone'ẽrebâ wapru na dazada idâ'âzém na iwasété wi te te 're a'upsõi pese mono da, da'uza hã hâirã da, da te 're i'upsõi pese za'ra mono ne.