Apocalipsi 1:17 - ꞌRe Ihâimana Uꞌâsi Mono Zadawa Wasuꞌu

¹⁷ Tawamhã õ hã te 'madâ'â wamhã, wa tô ipapara aime sa'ẽtẽ, ĩdâ'â ne, ĩpahi te. Tane nherẽ, ma tinhib'rata nhimire niwĩ ĩ'upi, ĩpahi tõ da. Ãne te ãhã wamhã ĩma tinha: — Ĩma aipahi tõ. Wa hã romna'rada duré rob'rãsudu.

Apocalipsi 1:17 ပူးပေါင်းရင်းမြစ်များ

Zenezi 15:1

Tawamhã ãhã parip si Abrã ma tô sõtõ 'rowim ne marĩ 'madâ. Taha na te Uburé Danhib'apito ãne tãma tinha: — Abrã, aipahi tõ. Marĩ isimimnhasi wi wa za wa hã 're ĩsimapa, ai'wawi. Duré iwẽ wa za te aima 're anhomri.

Ezodu 14:13

Tane nherẽ, Mozési, ma te ãne ãma sada'âbâ za'ra: — Aipahi za'ra wa'aba tõ. Ma'ãpé asiptete na aihâimana za'ra wa'aba. Tawamhã te za i'madâ'â za'ra wa'wa, ã bâtâ na Uburé Danhib'apito te te i'asõ'reptu za'ra wa'aba zé hã. Tahawa ã hã ezipsiu norĩ, niwamhã ihâiba pibu zahu za'ra wa'aba da hã, mare di za.

Ezodu 20:20

Tawamhã Mozési, ma ãma da'azada'â ãne: — Aipahi za'ra wa'aba tõ. E marĩ wa. 'Re ihâimana u'âsi mono hã te sima wẽ, te te aipibu za'ra wa'aba da, tãma 're i'aipahi za'ra wa'aba mono zéb ré 're aihâimana u'âsi za'ra wa'aba mono wa, aiwasété wi 're aipizari za'ra wa'aba mono da.

Ezodu 3:6

— Wa hã aihi'rata norĩ nhib'apito 'Re ĩhâimana u'âsi mono, Abra'ãhã nhib'apito, Izaquihi nhib'apito, duré Zacoho nhib'apito. Tawamhã Mozési ma tô si'ubu zuwa, pahi wa, 'Re ihâimana u'âsi mono te te i'madâ'â da hã.

Daniéu 10:12

Ãne te ĩma tinha: — Daniéu, aipahi tõ. 'Re ihâimana u'âsi mono ma tô aimreme hã wapa, tiwi irowaptẽrẽzé hã, imorĩ'rata na asina tãma ti'awi wa, rowaihu iwẽ hã te te aima isõmri zô, isõ're i'aihâimana hawim haré. Tahawa, tiwi irowaptẽrẽzém na te te ãma i'asada'âbâzéb ré wa tô we atẽme mo.

Daniéu 10:15

Ãne na te te ĩma nharĩ ré, wa tô ari'iwi ĩhâiba. Ti'ai u si wa tô rob'madâ'â pese.

Mateu 14:27

Ãhã wamhã, awa'awi ma tô Zezusi hã tãma si'mahârâ za'ra, ãne: — Wa hã wa we atẽme ĩmorĩ za'ra wa'wa. Ĩma aipahi za'ra wa'aba õ di za.

Mateu 28:4

Tawamhã ab're 'madâ'â'wa norĩ hã ma tô tipahi za'ra. Pahi uptabi za'ra wa, ma tô duré tirẽrẽ'ẽ za'ra. Tawamhã ti'ai u ma tô tãma ana. Dadâ'â wa, darési ãna 're idanhimi'wara mono ne, ma tô rési ãna daba'wara.

Mateu 28:5

Tawamhã hâiwa ãma romhuri'wa hã ma tô tãma nharĩ zahuré, pi'õ norĩ ma, ãne: — Ĩma aipahi wa'aba tõ. Zezusi hã da te dasiwi wĩrĩ wa, wedepo'o nhonhi'rãmi na da te dasiwi isasõmri zô robzabui wa'aba da, te we ane wa'wa. Wa hã wa tô aiwaihu'u 'wa, we sô irobzabui wa'aba mono na hã.

Zuwã 13:23

Isati te 'manhamra, isiré 're inomro mono norĩ siré hã, Zezusi te te 're isawi pese mono hã.

Zuwã 21:20

Tawamhã nimomo simisutu si'aba'réi ré, ma tô Pedru hã aipi'ra. Sipi'rai wamhã, ma tô 'madâ, Zezusihi siré 're imorĩ te te 're isawi pese mono hã. Bara na si'ubumroi ré saihuri da, ma tô isõ're ãma nhamra. Duré ãhã wamhã ma tô sadanha ãne: “Wanhib'apito, e 'wa hã te za asô te te danhimro, te te dama aihâiba nhomri da.” Ãne ma tô tawamhã sadanha. Tawamhã Pedru te te 'madâ'â wamhã, te Zezusi ãma sadanha, ãne: — Wanhib'apito. Ã hã bété, e niha za tãma iromhâimanazé hã.

Apocalipsi 1:11

Ãne te tawamhã ĩma tinha: — Ãhã na marĩ hã te za i'ab'madâ'â mo. Tawamhã uburé i'ab'madâ'â mono hã te za ibaihâ na ãma irob'ui'é. Ãma rob'ui'éré parimhã, Zezusihi zazei'wa norĩ, 'ri nho'õmo mono bâ siré 're isi'rã'õtõ mono norĩ ma, te za ibaihâ hã isõmri za'ra, 'Ri nho'õmo nhisi mono bâ, ãne isisi norĩ ma: Éfézu, duré Esmina, duré Pegamu, duré Tiatira, duré Sadési, duré Filadéufia, duré Laudiséa. Ã norĩ ma, te za asimi'ui'éré hã tãma isõmri za'ra, isazei'wa norĩ ma, 7 na 'ri nho'õmo ãma 're isi'rã'õtõ mono norĩ ma hã.

Apocalipsi 1:4

Wa hã, Zuwã. Ĩnhimi'ui'éré na wa ãma asawi za'ra wa'wa, Azia na danhipti'a nho'õmo nhisi ãma, Zezusihi zazei'wa, asiré 're asi'rã'õtõ u'âsi aba mono norĩ hã, 7 na daza'rui mono bâ 're i'ai'rã'õtõ aba mono norĩ hã. Wa hã wa ai'ãma 're ĩmreme u'âsi za'ra wa'wa, 'Re ihâimana u'âsi mono ma, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, ãma 're anomro aba mono da. Ta hã duréihã marĩ õ uptabi ré, ma tô 're hâimana u'âsi. Õne u'âsi te za duré ãhã mono na zama hã 're hâimana. Hâiwa ãma te ta hã 're sãmra u'âsi, danhib'apito simasisizém na. Duré Ipẽ'ẽzani zama te te 're aipawaptob u'âsi za'ra wa'aba mono da, wa duré ai'ãma te 're rosa'rata u'âsi za'ra wa'wa. Ta hã te 'Re ihâimana u'âsi mono simasisizé uiwada 're hâimana u'âsi. Taha pẽ'ẽzani hã 7 na isimiromhuri hã.

Apocalipsi 1:8

'Re ihâimana u'âsi mono, dama isiwaihu'uzé hã, ãne: “Wa hã imorĩ'rata na, wa tô 're ĩhâimana u'âsi. Õne u'â, wa za duré 're ĩhâimana u'âsi. Uburé marĩ hã si'utõrĩ pese nherẽ, duré wa hã isarina za'ra ĩsi'utõrĩ da hã mare di za.”

Apocalipsi 2:8

— Te za oto irob'ui'é, Esmina na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne: “Wa hã wa aima roti za'ra wa'wa, duréihã marĩ õ ré 're ĩhâimana mono. Uburé marĩ hã si'utõrĩ pese nherẽ, wa hã, marĩ zarina ĩsi'utõrĩ õ di za. Wa za 're ĩhâimana u'âsi. Wa tô dârâ aré. Ĩdâ'â nherẽ, wa tô apâ duré hâiwa'udu, 're ĩhâimana u'âsi mono da oto apâ.

Apocalipsi 22:13

Wa hã duréihã marĩ õ ré hã wa tô 're ĩhâimana. Uburé marĩ hã si'utõrĩ pese nherẽ, marĩ norĩ zarina ĩsi'utõrĩ õ di za wa hã. Õne u'âsi, wa za 're ĩhâimana u'âsi.