Zezusihi zadawa wasuꞌuꞌwa norĩ nhimiromhuri na robꞌuiꞌéré 8:37 - ꞌRe Ihâimana Uꞌâsi Mono Zadawa Wasuꞌu

³⁷ Tahawa, te Filipi hã asa sadanharĩ pese: — E tô sena, ma tô isazei pe. Sazei pese wamhã, â dawabzuri te za tô i'manha. Tawamhã aibâ, te duré tãma tinha, ãne: — Tô sena wa saze, Zezu Cristu, 'Re ihâimana u'âsi mono 'ra hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:37 ပူးပေါင်းရင်းမြစ်များ

Mateu 16:16

Tawamhã Sima Pedru ma te ãne asa ãma sada'â: — A hã Cristu, 'Re ihâimana u'âsi mono te te i'aipisudu, Danho'reptui'wa da. A hã 'Re ihâimana u'âsi mono 'ra.

Mateu 28:19

Tahawa, te za 're iropéi wa'aba mo a'uwẽ mono bâ, dama 're ĩzadawa wasu'u za'ra wa'aba mono da, duré a'uwẽ mono bâ da te 're ĩzaze za'ra mono da, taha zarina ĩnhimiroti 'madâ'â'wa 're dahâimana za'ra mono da oto. Da te 're ĩzaze za'ra mono sidâpâsi, te za â dawabzuri hã dama 're i'manharĩ za'ra wa'aba mo, Ĩmama nhisi na, duré ĩnhisi na, duré Ĩmama pẽ'ẽzani nhisi na, ta norĩ zadawa para wa.

Marcu 16:16

Tawamhã Danho'reptui'wa na da te dasina 're ĩ'umnhasi za'ra mono wa, â dawabzuri hã da te 're 'manharĩ za'ra mono wamhã, te za te te 're da'anho'reptu, 'Re ihâimana u'âsi mono hã. Da te dasina 're ĩ'umnhasi za'ra mono õ wamhã, 'Re ihâimana u'âsi mono te za te te 're da'awẽ'õ.

Zuwã 11:27

Tawamhã Marta ma asa ãma tãma wa'rã ãne: — Ĩhe. Tô sena, wa aimreme hã saze. A hã Danho'reptui'wa da, 'Re ihâimana u'âsi mono te te i'aipisudu. A hã 'Re ihâimana u'âsi mono 'ra. Wahi'rata norĩ hã asô 're isimipari za'ra mono, a hã, ti'ai u we aimorĩ da hã.

Zuwã 20:31

Danho'reptui'wa da, 'Re ihâimana u'âsi mono te te ipisutu na, Zezusihi si 're saze za'ra wa'aba mono da, duré 'Re ihâimana u'âsi mono 'ra na 're saze za'ra wa'aba mono da, ma tô rob'ui'éré'wa hã ãne na ãma romnhihâtâ. E marĩ da, te za Zezusihi si asina 're i'umnhasi za'ra wa'aba mo. Rowẽ u'âsi ãma 're anomro aba mono da, duré 're atâ'â za'ra wa'aba mono ãna 're aihâimana u'âsi za'ra wa'aba mono da, 'Re ihâimana u'âsi mono 'rata, hâiwa ãma. Taha da, te za Zezusihi si asina 're i'umnhasi za'ra wa'aba mo.

Zuwã 6:68

Tawamhã Sima Pedruhu si te asa tãma tinha, ãne: — Mare di. Wa te airẽme za'ra õ di za. Wa te airẽme za'ra wamhã, e 'wa tẽme, wa za 're wanomro, rowasu'uwẽ hã wa te 're iwapari za'ra mono da hã. Aimreme si wama pire za'ra di. Aimreme na si da te 're asaze za'ra mono wamhã, rowẽ u'âsi te za ai'ãma 're danomro. Te za duré hâiwa ãma 're dadâ'â za'ra mono ãna 're dahâimana u'âsi za'ra, 'Re ihâimana u'âsi mono 'rata.

Zuwã 9:35

Tawamhã te te ito pese wi, te te tiwi irosawi za'ra zé hã ma tô wapa, Zezusi hã. Tahawa, te sô rob'madâ, tinhimito pese zô. Te te sãmri wamhã, te tãma tinha, ãne: — E ti'ai ãma Dasiré Ipodo hã ma tô isaze.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:38

Tawamhã Pedru te duré asa dama tinha, ãne: — Aiwasété wi, te za aipizari za'ra wa'wa, rẽme pese za'ra wa'aba da, Zezusihi nhimiroti na si oto 're anomro aba mono da. Zezu Cristuhu zazei uptabi 'wa na asiwasu'u za'ra wa'aba sina, te za â dawabzuri hã i'manharĩ za'ra wa'wa. Aihâiba mono bâ te za ãne i'manharĩ za'ra wa'wa, aiwasédé hã te te aima pari za'ra wa'aba da, 'Re ihâimana u'âsi mono hã. Tawamhã Tipẽ'ẽzani te za aima sõmri za'ra wa'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:12

Tane nherẽ, 'Re ihâimana u'âsi mono, da'ãma 're isib'a'uwẽ mono zé wasu'u na, duré Zezu Cristuhu wasu'u na, Filipi hã te te dama rowasu'u wamhã, ma tô saze za'ra ni. Isimirowasu'u hã da te saze za'ra wamhã, â dawabzuri ma tô 'manharĩ za'ra ni, aibâ norĩ hã, duré pi'õ norĩ zama.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:21

'Re ihâimana u'âsi mono, ma tô aiwaihu'u, asima asimirosa'rata wasété na. Tahawa, a hã wanhimiromhuri zarina, romhuri waihu'u õ di za, ta hã atei õ wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:36

Tawamhã bâdâdi na neb zahuré ré, ma tô â u aimasisi zahuré. Tawamhã aibâ hã ma tô â hã tãma 'mahâ, Filipihi ma: — Ãhãta â. E wanhimizahâri õ di za a'â, â dawabzuri hã ĩma 'manharĩ da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:38

Tahawa, aibâ hã ma tô tãma iromhuri'wai ma tinha, awaru na wedewara zapore hã a'â simizazâri da. Tahawa, ma tô iré mazazâri za'ra. Âi ba, ma tô oto si'ra zahuré. Tawamhã â dawabzuri, ma tô Filipi hã tãma 'manha, aibâ ma. Tawamhã apâ ma tô pu.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:20

Tawamhã awa'awi ma tô iwasu'uwẽ na dama ãma sãna'rata oto, rowahutuzé mono bâ, Zezusi hã 'Re ihâimana u'âsi mono 'ra, 're ihâimana mono na hã.

Roma 10:10

Zezusi hã wapẽ'ẽ 're, wa te wasina 're i'umnhasi za'ra mono zém na, 'Re ihâimana u'âsi mono hã te te 're iwa'awẽsãmri mono zé hã. Zezusi hã Wanhib'apito na danho'a, wa te dama 're isisi za'ra mono zém na, 'Re ihâimana u'âsi mono te te 're iwa'anho'reptui mono zé hã.

1 Corĩtu 12:3

Tane nherẽ, wa ĩsima aiwẽ za'ra wa'wa, aimawi roti hã waihu'u za'ra wa'aba da oto. Ãté ni'wam norĩ hã te za ãne na Zezusi hã te te dama 're wasu'u za'ra: “Zezusihi ma, marĩ iwasétére si tãma 're hâimana mono neza, 'Re ihâimana u'âsi mono nhimirob'manharĩzém na.” Ãne na hã ni'wam norĩ hã 'Re ihâimana u'âsi mono pẽ'ẽzani nhimipawaptobzéb ré, 're inomro mono norĩ hã, te te dama 're wasu'u waihu'u za'ra mono õ di. Mare di. Duré ãté ni'wam norĩ hã te za ãne na te te dama 're wasu'u za'ra, Zezusi hã: “Zezusi hã, taha Wanhib'apito, danhipai u.” Ni'wam norĩ hã 'Re ihâimana u'âsi mono pẽ'ẽzani nhimipawaptobzéb zarinai õ nherẽ, ãne na tô sena te te dama 're wasu'u waihu'u za'ra mono õ di.

1 Pedru 3:21

Ta hã â hã, â dawabzuri, te wasu'u, danho'reptuzé. E da'u're wa, da'upsõzé, te â dawabzuri hã wasu'u. Mare di. 'Re ihâimana u'âsi mono ma, da te dasi'ãma 're iropisutu za'ra mono zé te wasu'u, â dawabzuri hã. Dawasédé te te dama 're apari mono wa, 'râwi 're dasiwaihu'u za'ra mono õ di oto, dawasété na hã. Tahawa, dama 're irowẽ za'ra mono zéb zarina, te za oto dasina da te tãma 're ropisutu za'ra, ãma 're idanomro mono zéb da hã. Zezu Cristu hã dâ'â uptabi nherẽ, Imama hã ab're hawi te te hâiwa'utu wa, duré apâ 're morĩ wa, te oto asõ'reptuzé hã aima tihâimana za'ra wa'wa.

1 Zuwã 4:15

Ni'wam norĩ hã te za ãne te te dama 're wasu'u za'ra: “Zezusi hã 'Re ihâimana u'âsi mono 'ra. Ta hã ma tô 'Re ihâimana u'âsi mono hã we ti'ai u satõ, Danho'reptui'wa da.” Ãne na ni'wam norĩ hã te te dama 're wasu'u za'ra mono wamhã, ta norĩ 'ratap si te 'Re ihâimana u'âsi mono hã 're hâimana, 'râwi. Ta norĩ si te duré 'Re ihâimana u'âsi mono siré hã 're hâimana u'âsi za'ra, 'râwi.

1 Zuwã 5:1

Ni'wam norĩ hã, Zezu Cristu, Danho'reptui'wa da, 'Re ihâimana u'âsi mono te te ipisutu na te te 're sazei pese za'ra mono wamhã, ta norĩ si te 'Re ihâimana u'âsi mono 'ra, 're hâimana za'ra. Ni'wa hã aibâ hã wama sawi pese za'ra wamhã, taha u'âbâ, wa za duré i'ra norĩ hã wa te 're sawi pese za'ra.

1 Zuwã 5:10

Ni'wam norĩ hã, Zezusi, 'Re ihâimana u'âsi mono 'ra hã te te sina 're umnhasi za'ra mono wamhã, ta norĩ si te za tipẽ'ẽ na sena na te te 're waihu'u za'ra, â na ipotozé wasu'u na, duré iwapru, tiwi ipu'uzé wasu'u na. 'Re ihâimana u'âsi mono pẽ'ẽzani te te tãma 're i'awaihu'u mono zéb zarina si, te za sena na te te 're waihu'u za'ra, a'uwẽ hâiba na ipoto na, Zezusi hã. Tane nherẽ, ti'ra na Zezusi te te dama 're iwaihu'u mono zém na, ni'wam norĩ hã 'Re ihâimana u'âsi mono hã te te ãma 're saze za'ra mono õ wamhã, isadawa nhipe hã te te ãma 're sa'ra za'ra, ta norĩ hã.

1 Zuwã 5:5

E 'wam norĩ hã te za tawamhã 'Re ihâimana u'âsi mono wẽ'õ'wa norĩ zada hã, siptete sina 're hâimana za'ra. Zezusi hã, 'Re ihâimana u'âsi mono 'ra na te te 're isaze za'ra mono norĩ si, te za sada 're hâimana u'âsi za'ra, 'Re ihâimana u'âsi mono wẽ'õ'wa norĩ zada hã.