Zezusihi zadawa wasuꞌuꞌwa norĩ nhimiromhuri na robꞌuiꞌéré 8:36 - ꞌRe Ihâimana Uꞌâsi Mono Zadawa Wasuꞌu

³⁶ Tawamhã bâdâdi na neb zahuré ré, ma tô â u aimasisi zahuré. Tawamhã aibâ hã ma tô â hã tãma 'mahâ, Filipihi ma: — Ãhãta â. E wanhimizahâri õ di za a'â, â dawabzuri hã ĩma 'manharĩ da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:36 ပူးပေါင်းရင်းမြစ်များ

Mateu 3:11

Te duré dama tinha: — Wa hã wa tô â uptabi na si, â dawabzuri hã te aima 're ab'manharĩ 'wa, aiwasété wi 're aipizari za'ra wa'aba mono zém na, da te oto ãma 're aiwaihu'u za'ra wa'aba mono da. Tane nherẽ, ĩza'u si te za ĩma ipire uptabi hã wei wi. Taha si te za oto 'Re ihâimana u'âsi mono pẽ'ẽzani na te te duré 're aihâiba ubu za'ra wa'wa, unhama ne na zama, â na te aima 're i'ab'manharĩ aba mono ne hã. Ta hã ĩma pire uptabi wa, ipara'uza hã te tãma mrami waihu'u õ di za, tãma ĩwapure wa, wa hã.

Mateu 3:6

Tahawa, dawasété na sõ'awimhã ma tô 're dasiwẽ'õ za'ra 'râwi, 'Re ihâimana u'âsi mono ma. Dawasété na 're dasiwẽ'õ za'ra mono sidâpâsi, ma tô Zuwã Batista â dawabzuri hã te te dama 're ab'manharĩ, Zodã pa ãma.

Zuwã 3:23

Zuwã Batista hã te duré te te dama 're ab'manharĩ â dawabzuri hã, wanhiti. Sarĩ na 'ri nhisi 'rata â hã, te isa'ẽne hã 're hâimana. Tahawa, te tame a'â nhamra, Eno na â nhisi 'rata, Zuwã Batista hã. Tawamhã te nasi itẽme dasito, â dawabzuri hã te te dama ab'manharĩ da. Zahadu Zuwã hã danhib'apito te te 'rui õ di, da te dasiwi sẽrẽ da, dazazéb 're. Tahawa, te zahadu te te dama 're ab'manharĩ.

Zuwã 3:5

Tawamhã Zezusi te duré asa tãma tinha, ãne: — Tô sena, wa aima waihu'u za'ra wa'wa. Ai'uté hã dama 're poto za'ra mono wamhã, 'Re ihâimana u'âsi mono nhib'a'uwẽ, 're nomro siromo mono õ di za. Tipẽ'ẽzani hã te te dama 're anhomri mono wapsi, te za 're dapoto téb za'ra, dapẽ'ẽ 're. Tawapsi te za oto isib'a'uwẽ si 're danomro. 'Re ihâimana u'âsi mono hã 're idanomro wasété mono hawi te te 're da'a'upsõi mono wa, duré Tipẽ'ẽzani hã te te dama 're anhomri mono wapsi, te za oto dapẽ'ẽ 're, 're dapoto téb za'ra. Tawapsi te za oto duré isib'a'uwẽ 're danomro. Dapẽ'ẽ 're, 're dapoto téb za'ra mono õ wamhã, 'Re ihâimana u'âsi mono nhib'a'uwẽ, 're danomro mono õ di za.

Zezusihi zadawa wasuꞌuꞌwa norĩ nhimiromhuri na robꞌuiꞌéré 10:47

— 'Re ihâimana u'âsi mono ma tô Tipẽ'ẽzani hã tãma sõmri za'ra, te te wama isõmri za'ra ne hã. E 'wa hã te za tawamhã â hã tiwi sawi za'ra, â dawabzuri te te 'manharĩ tõ za'ra da, iwa. Mare di. Te za tô 'manharĩ za'ra, ta norĩ hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:37

Tahawa, te Filipi hã asa sadanharĩ pese: — E tô sena, ma tô isazei pe. Sazei pese wamhã, â dawabzuri te za tô i'manha. Tawamhã aibâ, te duré tãma tinha, ãne: — Tô sena wa saze, Zezu Cristu, 'Re ihâimana u'âsi mono 'ra hã.

1 Zuwã 5:6

Zezu Cristu hã ti'ai u wei morĩ wamhã, a'uwẽ hâiba na ma tô podo. E niha wa za tawamhã wasiwi waihu'u pese za'ra ni, sena na Zezusi hã a'uwẽ hâiba na ipoto na, duré ti'ai ãma a'uwẽ hâiba na 're imorĩ na. Si'ubdatõ iwaihu'uzé hã. Imorĩ'rata na iwaihu'uzé hã ãne: Ti'ai ãma poto wamhã, â na ma podo, tina dub're hawi, dasine. Duré maparane ãma iwaihu'uzéb da hã ãne: Õ hã dâ'â wamhã, iwapru hã ma tô tiwi puru, da te dasiwi iwa'rézéb ãma hã. Taha na wa za wasiwi waihu'u pese za'ra ni, a'uwẽ hâiba na 're imorĩzém na. Duré si'ubdatõ ãma iwaihu'uzéb da hã ãne: 'Re ihâimana u'âsi mono pẽ'ẽzani, tô sena na si te te wama 're i'awaihu'u mono zém na, wa za duré wa te ãma 're waihu'u pese za'ra. Ta hã te sadawa nhipese ãna 're hâimana u'âsi. Tô sena uptabi na si isimiroti hã. Â na ipotozé wasu'u hã, duré dâ'â wa, iwapru tiwi ipu'uzé wasu'u hã, duré 'Re ihâimana u'âsi mono pẽ'ẽzani nhimirowasu'u hã, ã norĩ waihu'uzém na marĩ aimawi na wa te ãma 're waihu'u za'ra mono õ di. Ãhã wasu'u si wa tô upsãtã pese na wasiwi waihu'u pese za'ra ni, Zezusi hã a'uwẽ hâiba na ipotozé wasu'u si.