Zezusihi zadawa wasuꞌuꞌwa norĩ nhimiromhuri na robꞌuiꞌéré 7:42 - ꞌRe Ihâimana Uꞌâsi Mono Zadawa Wasuꞌu

⁴² Tahawa, 'Re ihâimana u'âsi mono, ma tô tiwi aipi'ra za'ra, aimawi na si si'uihâ na za 're wata za'ra mono da, i'upana. Bâtâ ãma i'upana 're wata za'ra mono da, ma tô duré tiwi aipi'ra za'ra, duré a'amoi ãma, duré wasi ãma zama. Taha na ma tô 'Re ihâimana u'âsi mono zadawa 'mahârâ 'rata 'wa hã ãma rob'ui'éré, duréihã imreme na, ãne: “Izaraéu nhihudu norĩ, e ĩ'ãma si 're aiwata za'ra wa'aba mono da, ma tô ĩnhimipodo hã asiwi 're isimroi wa'aba mo, a'ubuni wi 're anomro aba mono ré hã. Mare di. Ĩ'upana aimawi ãma si 're aiwata za'ra wa'aba mono da, ma tô ãne hã 're i'manharĩ za'ra wa'aba mo. Ãne 're anomro aba mono ré, ma tô 40 na ai'ãma tiwahub za'ra wa'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:42 ပူးပေါင်းရင်းမြစ်များ

Salmu 95:10

A'uwẽ norĩ 40 wahub 'remhã ma tô sina ĩnhiti'rui wazere pese za'ra. Tahawa, wa tô tinha ãne: ‘A'uwẽ norĩ ipẽ'ẽ 'remhã wasété uptabi za'ra di! Ĩnhimiroti te te 're iwapari za'ra mono da hã te te sima wẽ za'ra õ di!’

Zuwã 6:45

Duréihã ma tô ãne na rob'ui'éré, 'Re ihâimana u'âsi mono zadawa 'mahârâ 'rata 'wa hã: “Timreme te za te te dama 're awaihu'u, 'Re ihâimana u'âsi mono hã.” Ãne ma tô ãma rob'ui'éré. Tawamhã Ĩmama, timreme te te dama 're i'awaihu'u mono na, da te ãma 're sazei pese za'ra mono wamhã, ĩmreme na zama te za duré da te 're ĩzazei pese za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 13:40

Duréihã 'Re ihâimana u'âsi mono zadawa 'mahârâ 'rata 'wa hã ma tô ãne na ãma rob'ui'éré, 'Re ihâimana u'âsi mono mreme na, ãne: “'Re aihâimana za'ra wa'aba mono ré, wa za niha dama rob'manha, ipipa na. Tawamhã za te dama irob'manharĩzém na te za ãma 're asiwawã za'ra wa'aba mo, ni'wa hã te te ãma 're aipo're pu'u za'ra wa'aba mono nherẽ. 'Madâ'â za'ra wa'aba. A norĩ wa'wa hã ĩ'ãma aiwa'ẽ za'ra wa'aba norĩ hã, te za tãma 're a'rãmi za'ra wa'aba mo, ĩnhimirob'manharĩ pipa ma. Tawamhã ĩzadawa para te za ai'utõrĩ 'wa.”

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:36

Tahawa, ma tô Mozési hã te te danhimro tô, Ezitu hawi. Duré Ezitu ãma zahadu 're sãmra mono ré, ma tô marĩ hã dama i'manharĩ waihu'u'õ hã te te dama 're ab'manharĩ. Â pré na â poré nhisi ãma, ma duré dama rob'manha, iwaihu'u'õ na. A'ubuni wi siwa'ru 're danomro mono ré, ma duré marĩ dama i'manharĩ waihu'u'õ hã te te dama 're ab'manharĩ, 40 na da'ãma wahub za'ra ré.

Hebreu 3:9

Ãne duré, 'Re ihâimana u'âsi mono mreme na rob'ui'éré hã: “Aihi'rata norĩ hã ma tô siwi ĩpibu, ãma ĩwa'a su'u za'ra õ zarina, niha te tãma rob'manharĩ za'ra õ zô pé, 40 na ãma wahub za'ra ré, marĩ iwẽ na si te 're pawaptob u'âsi za'ra mono nherẽ.

Zozué 24:20

'Re ihâimana u'âsi mono, Uburé Danhib'apito 're rẽme za'ra wa'aba mono wamhã, duré asiré a'uwẽ'õ norĩ te, ihâiba'õ na si 're aiwata za'ra wa'aba mono wamhã, te za apâ õ hã asada 're hâimana za'ra wa'wa. Te za duré te te 're aihâ za'ra wa'wa. Iwẽ na aima 're hâimana za'ra wa'aba mono parim nherẽ, te za tawamhã ai'uprosi 'wa.