Zezusihi zadawa wasuꞌuꞌwa norĩ nhimiromhuri na robꞌuiꞌéré 7:10 - ꞌRe Ihâimana Uꞌâsi Mono Zadawa Wasuꞌu

¹⁰ Tahawa, te te irobzépata mono zéb sidâpâsi ma tô nasi pawapto, tiwi robzei'õ tõ da. Tawamhã apito Fara'oho nho're nasi hâimana wamhã, 'Re ihâimana u'âsi mono ma tô tiwaihu'u pe hã tãma tisõ, ihâimana wẽ zéb da hã. Tahawa, apito Fara'o hã ma tô wẽsã, Zuzé hã. Taha zarina ma tô tãma pisutu, Ezitu ãma roti'wa da oto, isadawa para. Isibro hã duré isõrõwa zama te te tãma 're 'madâ'â mono da zama, ma tô duré pisutu.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:10 ပူးပေါင်းရင်းမြစ်များ

Zenezi 39:21

Tane nherẽ, tame 'Re ihâimana u'âsi mono, isiré 're hâimana mono wa, ma tô iwẽ hã te te tãma 're apisutu. Taha zarina, ma tô oto dazazé 'madâ'â'wa Zuzé hã wẽsã.

Zenezi 42:6

Tahawa, Zuzé dama i'rãnho'õmo dâ'âsina daza'rui amoi hawi 're idasihutu mono ma hã ma tô amnho te te dama 're awede. Tawamhã idub'rata norĩ itẽme sihutu wamhã, ma tô isõ'remhã hi'rãtitõ tãma asimro. Ma tô duré ti'ubu na ti'ai u hã tãma roptob za'ra.

Zenezi 44:18

Tawamhã Zuda, Zuzéhé u 'râwi pesere te te sina ropto wamhã, te ãne tãma tinha: — Apito, ma'ãpé ĩzawi na hã a'â bâdâ ĩma sa'ré na, ĩsima iwẽ na ĩnhiptete sina te aima nharĩ da. Ĩzada asahi tõ, a hã danhipai u apito uptabi ne aihâimana dâ'âsina.

Zenezi 48:16

Hâiwa ãma romhuri'wa uburé marĩ iwasété wi te te 're ĩpawapto mono 'wa hã, ã hã 'watébrémi norĩ iwẽ na te te 're ipawapto zahuré mono da si, ĩma iwẽ hã. Ĩnhisi na duré ĩmama norĩ Abra'ãhã nhisi na Izaquihi nhisi me ã norĩ hâiba u'âbâmhã ãma 're idasipo're pu'u u'âsi za'ra mono da si, ĩma iwẽ hã. Duré i'ra norĩ isihudu norĩ zama daro mono bâ isitébré za'ẽtẽ za'ra mono da hã wa aiwi waptẽ.”

Salmu 22:24

Ta hã isimarĩ'õ norĩ hã te te 're arẽme waihu'u mono õ di. Duré 're po're simrami mono õ di, te te 're irobzépata za'ra mono ãma hã. Tiwi hã 're sima'uri waihu'u za'ra mono õ di. Mreme 'rãihâ na te te isõ'reptu za'ra zé te te tiwi 're waptẽrẽ za'ra mono wamhã, te za te te 're amreme wapari.”

Provébiu 16:7

Uburé Danhib'apito hã, ni'wa ihâimanazém na te te wẽsãmri wamhã, te za isitob'ru norĩ ime rowẽ na 're hâimana za'ra mono da hã te te ãma tiwi 're azaprĩ, ihâimanazém na hã.

Provébiu 2:6

Uburé Danhib'apito si rowaihu'u wẽ nhomri'wa hã. Ta hawip si te duré da'rã nhimiza're hã we 're ne.

Provébiu 3:4

Ãne hã 're 'manharĩ mono wamhã, te za 'Re ihâimana u'âsi mono ma, sa'ẽtẽ na asina tãma 're irowẽ zani mo. Duré ti'ai ãma zama te za asina dama 're irowẽ zani mo. Te za duré da te dasima 're aiwasu'u wẽ za'ra.

2 Timotiu 4:18

Tane te za Wanhib'apito hã duré rowasété hawi ĩnho'reptu, hâiwa u te te ĩ'ãwisi wẽ da, tinhib'a'uwẽ norĩ te te 're i'ab'madâ'â mono zéb u hã. Ta hã si wẽ uptabi wa, aihĩni wa za ãma 're wawata u'âsi za'ra.

Tiagu 5:11

Ta norĩ hã te te 're robzépata za'ẽtẽ za'ra mono nherẽ, siptete sina ma tô Wamama ãma si 're hâimana u'âsi za'ra. Tahawa, tãma 're rowẽ za'ra mono di oto. Taha wasu'u hã wama waihu'u pese za'ra di. A norĩ wa'wa hã ma tô Zoho wasu'u hã 're iwapari za'ra wa'aba mo. 'Re ihâimana u'âsi mono umnhasi sina ma tô ãma 're mo, Zo hã. 'Re ihâimana u'âsi mono hã, isimizawizé hã sa'ẽtẽ uptabi di. Duré da'ãma 're ipẽ'ẽzé mono zé hã sa'ẽtẽ di. Ãne wa, Zo hã te te robzépata za'ẽtẽ pari, ma tô marĩ iwẽ na hã apâ tãma tinhopru.

Apocalipsi 7:14

Tawamhã asa wa tãma tinha, ãne: — Me. Wa hã te waihu'u õ di. Aima waihu'u pese di, a hã. Tawamhã ma tô oto ĩma waihu'u, ãne: — Ã norĩ hã ropsi'utõrĩzéb ãma, ti'ai ãma da te 're irobzépata za'ẽtẽ za'ra mono zéb 'rãsutu u, hâiba ré 're ihâimana za'ra mono. Da te dasima 're irob'manharĩ wasété za'ra mono zém na 're idasi'utõrĩ mono zém hawib õ di. Te te 're robzépata za'ẽtẽ za'ra mono nherẽ, hâiba ré we iwairébé, ã norĩ hã. 'Re ihâimana u'âsi mono ma, ma tô sihâiba 'ru za'ra, Pone'ẽrebâ wapru na dazada idâ'âzém na iwasété wi te te 're a'upsõi pese mono da, da'uza hã hâirã da, da te 're i'upsõi pese za'ra mono ne.