Zezusihi zadawa wasuꞌuꞌwa norĩ nhimiromhuri na robꞌuiꞌéré 6:1 - ꞌRe Ihâimana Uꞌâsi Mono Zadawa Wasuꞌu

¹ Tawamhã ahâ uptabi na ma tô zudeu norĩ hã saze za'ra, gregu norĩ mreme na 're imreme zusi mono norĩ hã, duré hebreu norĩ mreme na 're imreme zusi mono norĩ zama. Tawamhã gregu norĩ mreme na 're imreme zusi mono norĩ hã ma tô aiwapsari za'ra, dazari'wa norĩ hã gregu norĩ imrotõ norĩ ãma 're po're simrami u'âsi za'ra mono wa. Awẽ sidâpâsi, isazei'wa norĩ hã ro te te sima 're waibui mono wamhã, te ãma 're po're simrami u'âsi za'ra. Tahawa, ma tô dama nharĩ za'ra, aibâ norĩ hã gregu norĩ mreme na 're imreme zusi mono norĩ hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 6:1 ပူးပေါင်းရင်းမြစ်များ

Salmu 110:3

Nimahã na asitob'ru norĩ zada aihâimana da, bâdâ pisutu wamhã, te za asib'a'uwẽ norĩ hã oto aima sihâi'ré za'ra, sihawim na isipisutu za'ra norĩ hã. Awẽ wi atébré 're ihâimana mono ne, te za ihâiba tém norĩ hã ẽne iwazéb zahi ãma siwi asõpẽtẽ.

Salmu 72:16

Amnho, ti'ai wa'õtõ nho'õmo mono na sa'wari 'rãihâ na 're isa'wari 'rãtâi mono da si! Duré ẽtẽ 'rãihâ nhisiwi mono hã, amnho rowa'u te te 're isihi za'ra mono da si. Duré Libanu ãmam ne, rob'rã 'rãi pese uptabi na 're i'rã za'ra mono da si! 'Ri nho'õmo mono wa, dasina dahâ'â pese da si, ĩma iwẽ hã, du te te 're irob'ubu mono ne!

Mateu 23:13

— Farizeu norĩ, duré dama rowahutu'wa norĩ, aihâimana uptabi õ na dama 're aihâimana za'ra wa'aba mono wa, aima 're ropipa uptabi za'ra wa'aba mono di za. 'Ridawa hã 're danhisisi tõ mono da, da te dawi 're isitob za'ra mono ne, te a norĩ wa'wa hã dawi 're isawi za'ra wa'aba mo, 'Re ihâimana u'âsi mono, da'ãma 're isib'a'uwẽ mono zéb u 're danomro tõ mono da hã. A norĩ wa'aba zama te 'Re ihâimana u'âsi mono wi 're asihâiba zawi za'ra wa'aba mo, ai'ãma 're sib'a'uwẽ za'ra wa'aba mono tõ da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 11:20

Tane nherẽ, ihâiba amo norĩ hã, Sipri na danhipti'a nho'õmo nhisi ãma aré 're ihâimana za'ra mono norĩ hã, duré Sireni ãma danhipti'a nho'õmo amoi ãma aré 're ihâimana za'ra mono norĩ hã, ma tô ai'aba'ré, Ãtioquia u. Ta norĩ hã zudeu norĩ ma si, te te rowasu'u za'ra õ di, Wanhib'apito Zezusihi wasu'uwẽ na hã. Zudeu'õ norĩ ma zama, ma tô ãma rowasu'u za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 11:26

Tawamhã tamomo wisi wamhã, ma tô sõpẽtẽ. Ta hawi, ma tô apâ saprõ, Ãtioquia u. Tame te aimasisi zahuré oto. Isazei'wa norĩ, siré 're isi'rã'õtõ mono norĩ 'rata te 're simasisi zahuré, te te dama 're rowahutu zahuré mono da. Misi ma tô ãma tiwahub zahuré, te te 're da'apawaptob zahuré mono ré hã. Tame ma tô Cristuhu nhib'a'uwẽ na da te 're sisi na'rata za'ra, Zezusihi nhirã zarina 're inomro mono norĩ hã, Ãtioquia ãma hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 11:29

Tahawa, Zezusihi zazei'wa norĩ hã ma tô sima roti za'ra, isibro hã ihâiba mono bâ tãma 're ihâimana za'ra mono zéb zarina, te te po'o mono da, Zudéa ãma isazei'wa norĩ ma, te te tãma sõmri za'ra da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:41

Tawamhã da'ahâ na ma tô Zezusi hã saze za'ra ni, Pedru te te dama isadawa wasu'uzém na hã. Tahawa, ma oto â dawabzuri hã 'manharĩ za'ra ni, 3 miu na dahâiba hã. Tawamhã Zezusihi zazei na'rata 'wa norĩ me, ma tô oto sitẽme atob za'ra. Taha wamhã, ahâ uptabi di oto, isazei'wa norĩ hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:45

Ni'wam norĩ hã ma tô tinhipti'a hã te te dama 're wede za'ra, duré tinhibrob zama, iwa'âbâ zô. Tawamhã iwa'â hã ma tô te te sima 're po'o za'ra, marĩ zô tiwi 're iro'wanhi'riti za'ra mono zéb zarina.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:47

'Re ihâimana u'âsi mono ãma te duré siré ãma 're wata za'ra, uburé isõprubzém na hã. Tawamhã aihĩni, ma tô isazei'wa norĩ hã wẽsãmri za'ra ni. Tawamhã awẽ sidâpâsi, ma tô isazeté'wa dasina hã tahâ'â ni, 'Re ihâimana u'âsi mono hã rowasété hawi te te 're i'anho'reptui mono norĩ hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:4

Tane nherẽ, da'ahâ na ma tô saze za'ra ni, Zezusihi wasu'uwẽ hã da te iwapari za'ra norĩ hã. Isazei'wa norĩ hã ahâ uptabi di. Aibâ norĩ za'rata si hã 5 miu na ihâiba za'ra na.

Zezusihi zadawa wasuꞌuꞌwa norĩ nhimiromhuri na robꞌuiꞌéré 5:14

Tahawa, ma tô da'ahâ uptabi na saze za'ra ni, Wanhib'apito niwĩ 're danomro mono da oto. Aibâ hã ahâ uptabi na ma tô saze za'ra, pi'õ zama. Tahawa, isazei'wa norĩ hã ma tô sina hâ.

Zezusihi zadawa wasuꞌuꞌwa norĩ nhimiromhuri na robꞌuiꞌéré 5:28

— Wa tô aré aiwi sawi za'ra wa'aba ni, Zezusihi nhimiroti na dama 're rowahutu tõ za'ra wa'aba mono da. Tazahã dama 're wasu'u za'ra wa'aba mono wa, iwasu'u hã ma tô te te ropé 'ri pâ, ãme Zeruzalẽ ãma hã. Tahawa, ma tô da te dasima 're wawasu'u za'ra. Wa norĩ hã, u, Zezusihi wĩrĩ'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 6:2

Tawamhã Zezusihi zadawa wasu'u'wa norĩ hã, 12 na ihâiba za'ra hã ma tô sô tihârâ za'ra, tisiré isazei'wa norĩ zô. Hâiba mono bâ itẽme si'aba'ré da, te sô tihârâ za'ra. Itẽme sihutu wamhã, te tãma nharĩ za'ra, ãne: — I'uwaibaba õ di, 'Re ihâimana u'âsi mono wasu'uwẽ hã wa te dama 're wasu'u za'ra mono ãna, 're iwahâimana za'ra mono da hã, taha upana rob'uiprazé 'madâ'â na si wa te 're iromhuri za'ra mono da hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 6:7

Tawamhã 'Re ihâimana u'âsi mono zadawa wasu'u hã ma tô duré te te ropé, 'ri baba. Zezusihi nhirã zarina 're inomro mono norĩ hã ma tô sina hâ, Zeruzalẽ ãma hã. Sasedoti norĩ hã ahâ na ma tô duré Zezusi hã saze za'ra oto.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:29

Zudeu norĩ, gregu norĩ mreme na 're imreme zusi mono norĩ ma, ma tô duré te te 're rowasu'u. Ta norĩ hã ma tô nasi asa tãma nharĩ za'ra, isimirowasu'u wa'rãmi. Tawamhã ta norĩ hã te sima 'ru za'ra, te te siwi wĩrĩ da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:39

Tawamhã Pedru te sima wẽ, ime morĩ zahuré da. Tawamhã tamomo wisi wi, ma tô siwi saprõ hâimo, 'ri 're wa'wa u. Tame, uburé pi'õi mrotõ norĩ hã ma tô siwi uirĩ Pedru hã, siwa'õ za'ra sina. 'Ru'ru sina, te nasi zazahâ hã tãma wẽ za'ra, te te 'madâ'â za'ra da, hâiba ré Docasi te te dama 're i'ab'manharĩ mono hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:41

Tahawa, Pedru hã ma tô pa'â, te te iwahutu na hã ãma sime da, hâiwi para na sab da. Tawamhã wahutu wamhã, Pedru ma tô dazô hâ, uburé Zezusihi zazei'wa norĩ zô, duré imrotõ norĩ zô zama, ihâiwa'udu hã te te siwi 'madâ'â da. Tahawa, ma tô oto siwi 'madâ ihâiwa'udu hã, tihâibazém na apâ hâimana wa.

Roma 12:7

Duré ni'wam norĩ hã isazei'wa norĩ pawapto'wa da, te te sima 're apisutu mono wamhã, ta norĩ zama te za tô taha zarina si te te tãma 're dapawaptob u'âsi za'ra. Duré 'Re ihâimana u'âsi mono nhimiroti na dama rowahutu'wa da, te te sima 're i'apisutu mono norĩ hã te za tô ta norĩ zama isarina si te te ãma 're dapawaptob za'ra.

1 Corĩtu 10:10

Wahi'rata norĩ hã ma tô duré Mozésihi ma nharĩ wasété za'ra. Ma tô duré taha wamhã tãma aiwapsari za'ra. Tahawa, ma tô 'Re ihâimana u'âsi mono hã hâiwa ãma tãma iromhuri'wa hã we satõ, Dapãrĩ'wa na isisi hã, ta hã te te da'uprosi da. Ãne õ'umnhasite, wa norĩ zama hã 'Re ihâimana u'âsi mono ma, wa te tãma 're nharĩ wasété za'ra mono õ di za.

2 Corĩtu 11:22

Zezusihi zadawa wasu'u'wa newa, tô senai'õ na te te aima 're iroti za'ra wa'aba mono norĩ hã te sina aima 're wata za'ra wa'wa, hebreu na 're ihâimana za'ra mono na hã, duré Izaraéu nhihudu 're ihâimana za'ra mono na hã, duré Abra'ãhã nhihudu 're ihâimana za'ra mono na hã. Tane, wa duré wa hã hebreu na, duré Izaraéu nhihudu na, duré Abra'ãhã nhihudu na ĩwamri na hã 're ĩhâimana. Ãne na wawamri na 're iwahâimana za'ra wa'aba mono hã aiwa tô wama za'ra hã.

Filipu 3:5

E marĩ wa. Ĩwaptã'ãzém na 8 na bâdâ hã ĩ'ãma ne parimhã, ma tô ĩnhihâiwata nhizâri ni, zudeu norĩ 're ihâimana za'ra mono zéb zarina. Wa hã Izaraéu nhihudu 're ĩhâimana mono. Duré i'ra Bẽzamihĩ nhihudu 're ĩhâimana mono. Wa hã duré hebreu uptabi. E marĩ wa. Ĩhi'rata norĩ hã uburé hebreu uptabi 're hâimana za'ra mono wa, da te 're wa'ru za'ra mono ãna. Duré farizeu na dame 're ĩhâimana mono wa, wa tô 'Re ihâimana u'âsi mono nhimiroti 'rada hã te 're 'madâ'â pese, Mozési te te ãma irob'ui'éré hã, isimiroti na hã.

1 Timotiu 5:3

Pi'õi mrotõ norĩ pawapto'wa da hã ni'wa hâimana õ wamhã, te za marĩ na 're i'apawapto pese mo.

1 Timotiu 5:9

Pi'õi mrotõ hâiba tém norĩ nhisi na 're rob'ui'éré za'ra mono õ di za, pi'õi mrotõ si'ihi norĩ nhisi zu hã. 60 na ãma 're wahub za'ra mono parip si, te za isisi na da te 're rob'ui'éré za'ra, ti'amo'aba si te te 're 'madâ'â pese za'ra mono wamhã, duré ti'ra norĩ hã te te 're warahu wẽ za'ra mono wamhã, duré te te 're da'mazasi su'u za'ra mono wamhã, duré dawi 're sipa zawi za'ra mono ãna, isazei'wa norĩ ma, te te 're romhuri za'ra mono wamhã, dapara upsõ na zama, duré robzei'õ na 're idanomro mono norĩ hã te te 're pawaptob za'ra mono wamhã, duré simi'ẽ na te te dama 're 'manharĩ wẽ u'âsi za'ra mono wamhã. Ãne wamhã, pi'õi mrotõ norĩ hã dama waihu'u pese za'ra di za, siwaptom na te te 're idapawaptob za'ra mono zém na hã. Tawapsi, te za isisi na da te 're rob'ui'éré za'ra, pi'õi mrotõ si'ihi norĩ nhisi zu.

Hebreu 13:1

'Re i'asisawi pese za'ra wa'aba mono zém na, te za ãma 're i'uzusi u'âsi za'ra wa'aba mo, Cristuhu ãma 're asisãnawã za'ra wa'aba mono wa oto.

Tiagu 1:27

Ãne 're hâimana za'ra mono õ di za, 'Re ihâimana u'âsi mono nhimiroti 'madâ'â pese 'wa norĩ hã. Ãne te za ta norĩ hã 're hâimana za'ra. Imama'õ norĩ hã duré ina'õ norĩ hã te za te te 're pawaptob za'ra. Pi'õi mrotõ norĩ zama te za duré te te 're pawaptob za'ra, ropire hã tãma 're hâimana za'ra mono wamhã. Tihâimanazém na te za duré 're sipibui pese za'ra, Wanhib'apito zazei'õ'wa norĩ nhimirosa'rata zarina 're hâimana wasété za'ra mono tõ da. Ãne wamhã, te za Wamama hã te te 're da'awaihu'u, tô sena isimiroti 'madâ'â pese 'wa 're idahâimana za'ra mono na hã.

Tiagu 4:5

Duréihã ma tô ãne imreme na rob'ui'éré, 'Re ihâimana u'âsi mono zadawa 'mahârâ'wa hã, ãne: “Wamama, Tipẽ'ẽzani te te wama 're isõmri mono hã, wapẽ'ẽ 're wama 're hâimana za'ra mono da, te te sima 're wa'awẽ uptabi, Wamama zawi'wa na oto 're wanomro mono da.” E taré ma tô ãne na hã rob'ui'éré, ibaihâ na hã. Mare di. Taré te te ãma rob'ui'éré õ di. Tô sena ma tô ãma rob'ui'éré.

Tiagu 5:9

Ĩsisãnawã norĩ, asima 're aiwapsari za'ra wa'aba mono õ di za, 'Re ihâimana u'âsi mono hã aiwasédé hã te te ai'ãma 're sa'ra za'ra wa'aba mono tõ da. Dahâimanazéb zarina da'ãma rowairébé'wa hã we imorĩzéb u hã romhuture di oto. Ãne wa, asima 're aiwapsari za'ra wa'aba mono õ di za.