Zezusihi zadawa wasuꞌuꞌwa norĩ nhimiromhuri na robꞌuiꞌéré 5:16 - ꞌRe Ihâimana Uꞌâsi Mono Zadawa Wasuꞌu

¹⁶ Zeruzalẽ 'rata 'ri wa'õtõ mono hawi, ma tô da'ahâ na dasito, Zeruzalẽ u. Ihâzé ré norĩ hã ma tô dasiré 'wasari ni. Duré wa'uburé ré 're ihâimana za'ra mono norĩ zama, ma tô 'wasari ni, dasiré. Tawamhã aihĩni ma tô tapese za'ra ni oto.

Zezusihi zadawa wasuꞌuꞌwa norĩ nhimiromhuri na robꞌuiꞌéré 5:16 ပူးပေါင်းရင်းမြစ်များ

Mateu 2:16

Tawamhã apito Erodi aibâ norĩ, bâtâ pusizém hawi we isi'aba'ré norĩ pi'uriwi tiwi isi'aba'ré na te te ãma rowaihu'u za'ra wa, ma tô ab'rui pese. Sib'rui wa, tãma da'wapéi'wa norĩ hã ma tô satõrĩ za'ra Belẽ u, 'watébrémi zô si'aba'ré da, uburé te te dawi uprosi mono da, maparane ãma iwahu mono õ hã, Belẽ ãma 're idahâimana za'ra mono norĩ 'ra hã, duré Belẽ 'rata 're idahâimana za'ra mono norĩ 'ra zama. Aibâ norĩ hã wasi te te i'madâ'â za'ra zém na te te tãma iwaihu'u za'ra zéb zarina, ma tô apito Erodi hã ãne 'manha.

Mateu 4:24

Tawamhã Zezusi te te ida'apesezém na, ma tô rowasu'u hã te te ropé, Siria na danhipti'a nho'õmo nhisi ãma. Tahawa, ma tô itẽme da te 're 'wasari dahâzé mono bâ, uburé aimawi hã dahâzé da te 're isépata za'ra mono norĩ hã, wa'uburé te te 're iwamnarĩ za'ra mono norĩ hã, duré da'rã siwamnarĩ wa, 're idahâiba popo'o za'ra mono norĩ hã, duré imorĩ'õ norĩ hã. Uburé ma tô taha wamhã da'apese, Zezusi hã.

Mateu 8:16

Tawamhã bâdâ sébrézéb u, ma tô wa'uburé ré 're idanomro mono hã da te simro, Zezusihi u, ahâ uptabi na. Tawamhã misi si te nasi dama azatõ wa'uburé hã, misi haré timreme na. Uburé ihâzé ré norĩ zama te duré apese.

Luca 5:17

Tawamhã apâ datẽme wisi wamhã, te nimahã bâtâ na dama rowasu'u, Zezusi hã. Te te dama rowasu'u ré, te i'rata ai'ubumro, farizeu norĩ hã. Rowahutu'wa norĩ me, te i'rata ai'ubumro, 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã. Ta norĩ hã ma tô itẽme sito Galiléa hawi, duré Zudéa hawi, duré Zeruzalẽ hawi. Tawamhã 'Re ihâimana u'âsi mono tiwaihu'u pe hã, te te tãma isõmri na, ma tô da'apese, Zezusi hã.

Luca 6:18

Zezusihi mreme hã da te wapari za'ra da, ma tô itẽme dasito. Duré te te da'apese da zama, ma tô itẽme ai'aba'ré ni, duré wa'uburé te te dama anhamra da. Tawamhã ma tô dama anhamra.

Luca 9:11

Tazahã ma tô iwasu'u hã wapari za'ra ni. Tahawa, da'ahâ na te isarina ai'aba'ré ni. Itẽme dasihutu wamhã, uburé ma tô Zezusi hã da'azawi. 'Re ihâimana u'âsi mono hã da'ãma 're isib'a'uwẽ mono zém na, te dama rowasu'u, Zezusi hã. Duré, ihâzé ré norĩ hã ma tô apese.

Zuwã 14:12

Tô sena wa za aima rowasu'u za'ra wa'wa. Asina 're ĩ'umnhasi za'ra wa'aba mono wamhã, te za ĩwaihu'u pese zarina 're idapawaptob u'âsi za'ra wa'aba mo. A norĩ wa'wa hã 're idapawaptob za'ra wa'aba mono zé hã, ĩnhimipawaptobzé ma, sa'ẽtẽ di za. E marĩ wa. Wa hã Ĩmama u za oto apâ ĩmorĩ wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:30

Zezusihi zadawa para, wa te 're dapese za'ra mono da, wei wapawaptob za'ra na. Zezusi hã aima romhuri wẽ 'wa, taha zadawa para, marĩ iwẽ hã dama i'manharĩ waihu'u'õ hã wa te dama 're 'manharĩ za'ra mono da, wei wapawaptob za'ra na.

Zezusihi zadawa wasuꞌuꞌwa norĩ nhimiromhuri na robꞌuiꞌéré 5:15

Ãne hã Zezusihi zadawa wasu'u'wa norĩ hã te te dama 're 'manharĩ za'ra mono wa, ma tô ihâzé ré norĩ hã da te 're sa'ra, 'ri nhi'riti wa, 're simi'wara mono da, isa'warizé wa, duré wetenhamri wa. Pedru hã iwa'wai baba za'ra te te ro'razâri wa, i'awã hã te te hâiba upsibi za'ra da, te tame 're simi'wara, te te pese za'ra da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 5:17

Tawamhã sasedoti tisiré norĩ nhipai u ipire uptabi hã, duré uburé saduseu norĩ me, ma tô ta Zezusihi zadawa wasu'u'wa norĩ hã ãma sõ'ru za'ra. Tawamhã ma tô sima ãma roti za'ra, niha te te tãma rob'manharĩ za'ra da.

1 Corĩtu 12:9

Ni'wam norĩ si, te duré 'Re ihâimana u'âsi mono hã te te 're pisutu za'ra, ta norĩ hã Cristu te te sina 're umnhasi pese za'ra mono da, tisiré isazei'wa norĩ nhipai u. Ni'wam norĩ si te duré te te 're pisutu za'ra, iwaihu'u pese zarina, te te ãma 're dapese za'ra mono da, 're dahâzé za'ra mono wa.

Tiagu 5:16

Ãne wa, Wanhib'apito hã aihâzé wa, te te 're aipese za'ra wa'aba mono da, marĩ 're 'manharĩ wasété za'ra wa'aba mono wamhã, te za asima 're asiwasu'u za'ra wa'aba mo. Te za duré asima tiwi 're irowaptẽrẽ za'ra wa'aba mo, Wanhib'apito wi. Tawamhã dahâimana wẽ sina, da te tiwi 're rowaptẽrẽ za'ra mono wamhã, da te tiwi 're irowaptẽrẽ za'ra mono zéb zarina, te za tô te te dama ãma 're a'uwaimrami, Wanhib'apito hã.