Zezusihi zadawa wasuꞌuꞌwa norĩ nhimiromhuri na robꞌuiꞌéré 5:11 - ꞌRe Ihâimana Uꞌâsi Mono Zadawa Wasuꞌu11 Tawamhã uburé pese, ma tô tapẽ'ẽwara za'ra ni oto, isazei'wa norĩ, siré 're isi'rã'õtõ mono norĩ hã. Duré iwasu'u hã da te wapari za'ra wamhã, aihĩni ma tô tapahi za'ra ni. အခန်းကိုကြည့်ပါ။ |
Zezusihi zadawa wasuꞌuꞌwa norĩ nhimiromhuri na robꞌuiꞌéré 5:11
14 ပူးပေါင်းရင်းမြစ်များ
Tawamhã taha wasu'u hã da te wapari za'ra wamhã, ma tô tapahi za'ra ni, Zezusihi zadawa para newa, marĩ hã duré da te 're 'manharĩ za'ra mono tõ da. Aihĩni, ma tô iwasu'u hã wapari za'ra ni, Éfézu ãma 're isi'ubumroi mono norĩ hã, zudeu norĩ hã, duré zudeu'õ norĩ hã. Tawamhã da te sazei uptabi za'ra õ nherẽ, ma tô aihĩni ãma tawata za'ra ni, Wanhib'apito Zezusihi ãma.
Tawamhã Pedruhu mreme te te wapari wi, ma tô waptãrã ti'ai wa, Anania hã. Waptã'ã wamhã, ma tô dârâ. Tawamhã ipréduptém norĩ hã ma tô sô tiwahutu za'ra, te te siwi ubu da hã. Taha pari, ma tô duré oto siwi ti'â, te te siwi sẽrẽ da. Tawamhã taha wasu'u hã da te wapari za'ra wamhã, aihĩni pese ma tô tãma tapẽ'ẽwara za'ra ni.
Tawamhã isazei'wa norĩ ma, rowẽ di oto, Zudéa ãma, duré Galiléa ãma, duré Samaria ãma zama. Uburé tãma rowẽ za'ra di oto, siré 're isi'rã'õtõ mono norĩ ma hã daro mono bâ. 'Re ihâimana u'âsi mono pẽ'ẽzani nhimipawaptobzém na ma tô isazei'wa norĩ hã 're hâimana nhiptete za'ra. Taha zarina, ma tô duré isazei'wa norĩ za'rada hã sina hâimo. Ta norĩ hã ma tô Wanhib'apito Zezusi hã te te 're wazé pese za'ra.
Ĩsisãnawã norĩ, ĩma asawi pese za'ra wa'aba norĩ hã, ma'ãpé ĩwapari pese za'ra wa'aba za. Wa hã tame ai'rata ĩhâimana za'ra wa'aba ré, ma tô ĩnhimiroti hã iwapari pese za'ra wa'wa. Tane nherẽ, ãhã na oto ai'rata ĩhâimana za'ra wa'aba õ nherẽ, te duré ĩnhimiroti hã 're iwapari pese za'ra wa'aba mo, ãma atẽme ĩwisi za'ra wa'aba õ nherẽ. Aihâimana prédup sina, te za 're iromhuri pese za'ra wa'aba mo, 'Re ihâimana u'âsi mono te te asõ'reptu za'ra wa'aba zéb zarina, 're anomro wẽ wa'aba mono zém na tãma ãma asina 're uwaimrami u'âsi za'ra wa'aba mono da.
Nowé hã, 'Re ihâimana u'âsi mono si te te sina 're i'umnhasi mono zéb zarina, ma tô duré ãma saze, ropipa hã za dazô iwatobrozém na 'Re ihâimana u'âsi mono hã romhâ ré te te ãma ipo're pu'uzém na, zahadu marĩ hã titõmo na te te 'madâ'â õ nherẽ, Nowé hã. Tahawa, isimiroti zarina ma tô uba're za'ẽne hã 'manha, ti'ra norĩ hã te te ãma sõ'reptu za'ra da, duré timro zama hã, duré tisani'aba norĩ zama hã te te ãma sõ'reptu za'ra da. Taha zarina, ma tô 'Re ihâimana u'âsi mono hã siwi da'awẽ'õ pese, dawasété na si 're dahâimana za'ra mono wa, Nowéhé si isimiroti hã te te 're 'madâ'â pese mono wa. Tawamhã Nowé hã, 'Re ihâimana u'âsi mono si te te sina 're umnhasi mono wa, ma tô 'Re ihâimana u'âsi mono hã ãma tiwata, ãne: “Ãhã si te 're timorĩ wẽ.” Ãne 'Re ihâimana u'âsi mono hã, Nowéhé ãma iwatazé wasu'u hã.
'Re aihâimana za'ra wa'aba mono zém na, 'Re ihâimana u'âsi mono ma, asina tãma ãma 're uwaimrami za'ra wa'aba mono õ wa, tinhoprubzéb zarina, iwẽ uptabi hã te te aima 're ipisutu za'ra wa'aba mono hã 're simini za'ra wa'aba mono tõ da, te za 're asi'madâ'â pese za'ra wa'aba mo. Wede pa hã, ti'ai 'rowi 're simi'wara mono ré hã, taha wa'u isé hã dama simimnhasi õ di. Tane nherẽ, ipa hã da te oto 're sa'o'o za'ra mono wa, da te oto 're huri mono wamhã, te za te te 're da'rãiwamnarĩ za'ra, taha pa wa'u hã sé wa. Tane duré, a norĩ wa'wa hã te za ni'wam norĩ wi 're asi'madâ'â pese za'ra wa'aba mo, ta norĩ hã te te aiwi 're rowasété za'ra wa'aba mono tõ da, duré taha zarina a norĩ wa'wa hã 'râwi aiwasété na 're asi'uptob za'ra wa'aba mono tõ da, ta norĩ zu.
'Re ihâimana u'âsi mono hã 'râwi te te 're wa'ab'madâ'â mono da, i'rata 're iwahâimana u'âsi za'ra mono zéb da hã, ma tô te te wama 're apisutu, da te wawi ãma i'ai'uté waihu'u za'ra õ hã. Tahawa, wa za 'Re ihâimana u'âsi mono ãma 're wawata u'âsi za'ra, sõpru wa. Te te sima 're iwa'awẽ mono zéb zarina, wa za ãma 're wawata u'âsi za'ra, wa te wasiwi 're wazéb za'ra mono sina, wama 're toi u'âsi mono da.
Duréihã wahi'rata norĩ ma, te te ropisutu wamhã, e ta norĩ ma si ma tô rowẽ hã tãma pisutu za'ra, 'Re ihâimana u'âsi mono hã. Mare di. Wa norĩ ma zama ma tô wama pisutu za'ra oto, 're idawa'utu u'âsi za'ra mono ne, 're wahâimana za'ra mono da hã oto, rowẽ uptabi na. Tahawa, 'râwi te za 're asi'madâ'â pese za'ra wa'aba mo, 'Re ihâimana u'âsi mono te te wama iropisutu za'ra zé hã asiwi 're simini za'ra wa'aba mono tõ da, duréihã wahi'rata norĩ te te siwi isimini za'ra ne.
A norĩ wa'wa hã, 'Re ihâimana u'âsi mono ma 're aimreme zusi aba mono wamhã, Wamama na te 're isisi za'ra wa'aba mo. Ta hã dahâimanazéb zarina da'ãma rowairébé'wa, te 're hâimana. Ãhã wa, 're idahâimana za'ra mono zéb zarina, te za dahâiba mono bâ te te dama ãma 're a'uwaimrami, dahâimana wẽ zarina, duré dahâimana wasété zarina zama. Tahawa, te za 're ihâimana mono zém na asiwi 're iwazéb za'ra wa'aba mo, Wamama hã, ti'ai ãma 're anomro aba mono ré.
Wanhib'apito, dama aipire uptabi wa, te da te dasiwi 're aiwazé. Uburé pese, te da te 're aiwasu'u wẽ za'ra, danhipai u pese, aiwẽ uptabi wa. Aiwétési tô sena aiwẽ uptabi hã. Daro mono bâ 're idahâimana za'ra mono norĩ hã te za we ai'ãma 're dawata u'âsi za'ra, upai ãna dama 're i'arob'manharĩ wẽ mono zé hã da te 're 'madâ'â za'ra mono wa.”
ကြော်ငြာတွေ