Zezusihi zadawa wasuꞌuꞌwa norĩ nhimiromhuri na robꞌuiꞌéré 3:25 - ꞌRe Ihâimana Uꞌâsi Mono Zadawa Wasuꞌu

²⁵ A norĩ wa'wa hã, wasiré wahi'rata norĩ nhihudu te 're aihâimana za'ra wa'aba mo. Tahawa, wahi'rata norĩ ma, 'Re ihâimana u'âsi mono te te 're i'apisutu mono zé hã te duré wama 're hâimana za'ra. Abra'ãhã ma, uimrehẽne ma tô tãma ropisutu 'rata. Ãne ma tô tãma ropisutu: “Romhutu'õpsi te za ni'wa hã asihudu hã te te 're da'apawapto, daro mono bâ rowẽ na 're danomro mono da.” Ãne ma tô taha ma ropisutu na'rata siro.

Zezusihi zadawa wasuꞌuꞌwa norĩ nhimiromhuri na robꞌuiꞌéré 3:25 ပူးပေါင်းရင်းမြစ်များ

Zenezi 12:3

Duré iwẽ te te aima 're i'manharĩ za'ra mono norĩ ma, wa hã wa za duré iwẽ hã te tãma 're 'manharĩ u'âsi za'ra, isimi'manharĩ za'ra zé wa'rãmimhã aima. Duré te te aima 're irob'manharĩ wasété za'ra mono norĩ ma, wa za duré iwẽ'õ hã te tãma 're pisutu za'ra, isimi'manharĩ wasété za'ra zé wa'rãmi, aima hã. Tawamhã duré ai'u'âbâmhã, wa hã wa za ti'ai ãma uburé a'uwẽ mono bâ 're idahâimana za'ra mono norĩ ma, iwẽ hã te dama 're anhomri u'âsi.

Zenezi 17:19

Tane nherẽ, 'Re ihâimana u'âsi mono, ma te ãne asa ãma tãma wa'rã: — Te inharĩzéb zarina te za tô aimro Sara aima ti'ra. Tawamhã a hã te za isisi, Izaqui na. Tawamhã taha ma, wa za ĩnhimiropisutu zahi isi'utõrĩ'õ õne u'â te tãma 're 'manharĩ, isihudu norĩ ma ropibu ma.

Zenezi 18:18

Isihudu sidâpâsi ahâ uptabi na 're hâimana za'ra mono wa, te za a'uwẽ misi ãma isitom na dama siptete na 're hâimana za'ra. Ta norĩ u'âbâ wa za uburé a'uwẽ mono bâ iwẽ hã te tãma 're sõmri za'ra, ti'ai mono bâ.

Zenezi 20:7

Ma'ãpé ãhã na apâ imro ma, pi'õ hã tãma sõmri. Õ hã ĩzadawa 'mahârâ'wa, te za ai'ãma ĩwi hã rowaptẽ, atâ'â tõ da hã. Ãne na hã wa za aipo're pu'u siro. Apâ imro tãma sõmri õ wamhã, te za tô atâ za. Duré uburé aima 're ihâimana za'ra mono norĩ hã te za ai'utõ za.

Zenezi 22:18

Asihudu norĩ u'âbâmhã wa za a'uwẽ mono bâ ropâ 're ĩdahâimana za'ra mono iwẽ hã te tãma 're apisutu, a hã te aima iwaihu'uzém na ĩwapari pese wa, ãne hã 'manharĩ wa.

Zenezi 26:4

Wa hã wa za pisutu, asihudu norĩ ahâ na 're hâimana za'ra mono da hã, wasi hâiwa na 're isimasa mono ne. Wa za duré uburé ã hã ti'a te tãma 're anhomri. Asihudu norĩ u'âbâmhã, wa za a'uwẽ mono bâ iwẽ hã te tãma 're pisutu za'ra, ro pâ.

Zenezi 28:14

Asihudu norĩ hã ti'a zapru ropâ 're ihâimana za'ra mono ne, ahâ uptabi na te za 're hâimana za'ra. Ta norĩ te za hâiwa nhimi'e niwĩb ãma ro 're ihâimana mono u hã, hâiwa nhimire niwĩb ãma ro 're ihâimana mono u hã, bâtâ pusizém niwĩb ãma, ro 're ihâimana mono u hã, duré bâtâ zasizém niwĩb ãma ro 're ihâimana mono u hã te te ropé. Tawamhã ai'u'âbâ, asihudu norĩ u'âbâb zama wa za daro mono bâ uburé 're idahâimana za'ra mono norĩ ma hã, iwẽ te dama 're apisutu.

Neemia 9:8

Ta hã te te sina 're i'ai'umnhasi mono zém na 're waihu'u mono wa, ma tô asimiropisutu zahi hã tãma i'manha. Ma tô duré tãma iropisu, cananeu norĩ nhipti'a tãma sõmri da hã, hitita norĩ nhipti'a hã, amoreu norĩ nhipti'a hã, perizeu norĩ nhipti'a hã, zebuzeu norĩ nhipti'a hã, duré gigazeu norĩ nhipti'a hã, isihudu norĩ hã iwa 're ihâimana za'ra mono zéb da hã. A hã ma tô tãma iropisutuzé hã isuwa, sena na 're aihâimana mono wa.

Salmu 22:27

Niwa apto'o ré daro mono bâ 're idahâimana za'ra mono norĩ, te za Uburé Danhib'apito ãma 're po're pu'u za'ra. Te za duré apâ itẽme hã 're dasipizari za'ra. Duré te za a'uwẽ mono bâ ãma 're dawata za'ra.

Luca 1:72

Te za tô te te dama 're ab'manharĩ wẽ u'âsi, wahi'rata norĩ ma, te te iropisutuzéb uwaibaba. Tô sena te te tãma iropisutuzé hã, te za te te ãma 're a'uwaimrami u'âsi. Tiwi simani õ di za.

Zezusihi zadawa wasuꞌuꞌwa norĩ nhimiromhuri na robꞌuiꞌéré 13:26

Te duré dama tinha, ãne: — Wasiré Abra'ãhã nhihudu norĩ, ĩwapari za'ra wa'aba, duré zudeu'õ norĩ, 'Re ihâimana u'âsi mono ãma 're aiwata za'ra wa'aba mono norĩ zama. Uburé wa'udâna ma tô iwasu'uwẽ hã wei watẽme satõrĩ za'ra, wahâiba mono bâ, danho'reptuzé wasu'u hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:39

Ãne ma tô aima ropisutu siromo za'ra wa'wa, te te aima 're sõmri za'ra wa'aba mono da, asihudu norĩ ma zama. Wasiré'õ norĩ ma zama ma tô tãma ropisutu siromo za'ra. Wanhib'apito, 'Re ihâimana u'âsi mono, za sitẽme sô 're ihârâ za'ra mono norĩ ma, ma tô ropisutu siromo za'ra, Tipẽ'ẽzani na hã.

Roma 15:8

Cristu hã ma tô we ti'ai u datẽme mo, zudeu norĩ hã te te 're apawapto mono da, duréihã zudeu norĩ hi'rata ma, dama ipire za'ra norĩ ma, 'Re ihâimana u'âsi mono te te tãma 're iropisutu za'ra mono zéb zarina, te te dama ãma 're a'uwaimrami mono da, duré uburé 'Re ihâimana u'âsi mono te te dama ãma 're i'a'uwaimrami mono zém na, tô sena na da te ãma 're waihu'u pese za'ra mono da.

Roma 4:13

Duréihã 'Re ihâimana u'âsi mono hã Abra'ãhã ma, ma tô ropisutu, uburé danhipti'ai mono bâ te te tãma 're anhomri mono da, isihudu norĩ ma ropibu ma, isihudu sidâpâsi. E isimiroti hã uburé te te 're 'madâ'â pese uptabi mono wa, duré nimahã na marĩ na misi isimiroti na te te upai õ wa, ma tô ãne na tãma ropisutu. Mare di. Taha wab õ di. 'Re ihâimana u'âsi mono te te isazei pese na, te te wẽsãmri wa, ma tô ãne na tãma ropisutu siro.

Galata 3:16

Tane Abra'ãhã ma, isipai u isihudu na zama, 'Re ihâimana u'âsi mono te te iropisutuzé hã. Ãhã wasu'u na, da te ãma rob'ui'éré wamhã, isihudu norĩ hã da te wasu'u za'ra õ di. Isihudu norĩ hã da te wasu'u za'ra 'wa'âhã, te aré isihudu ahâ na dasiwi wasu'u ni. Isihudu misi, te wasu'u. Ta hã Cristu.

Galata 3:8

Zahadu romhâ uptabi nherẽ, ma tô zudeu'õ norĩ ãma sima roti, 'Re ihâimana u'âsi mono hã. Ãne isimiroti hã: Zudeu'õ norĩ hã, Cristu Danho'reptui'wa na te te sina 're umnhasi za'ra mono wamhã, ta norĩ ma zama te za duré tãma 're irowẽ za'ra mono zéb da hã te te tãma 're apisutu, 'Re ihâimana u'âsi mono hã. Iwasédé hã te te oto ãma 're i'ab'madâ'â mono õ zéb zarina, te za te te 're awẽsãmri. Taha zarina wasété za'ra 'ru te, te te ahâ za'ra õ di za, rob'rãsutuzéb ãma hã. Ãne isimiroti hã zudeu'õ norĩ ãma hã. Tahawa, ma tô ãne Abra'ãhã ma waihu'u siro, 'Re ihâimana u'âsi mono hã: “Te aima iropisutuzém na asina ĩzazei pese zéb zarina, wa za dama 're irowẽ za'ra mono zéb da hã te dama 're apisutu, dapoto mono bâ.” Ãne ma tô iwasu'uwẽ na romhâ ré ãma po're pu'u siro.

Apocalipsi 14:6

Tawamhã wa tô duré 'madâ, hâiwa ãma 'Re ihâimana u'âsi mono ma, romhuri'wa hã. Hâimo uptabi te 're wara. Iwasu'uwẽ hã te dama 'mahâ, isi'utõrĩ'õ hã, dapoto mono bâ 're idahâimana za'ra mono norĩ ma, duré damreme sipo'o mono bâ 're idahâimana za'ra mono norĩ ma zama.

Apocalipsi 5:9

Tawamhã ta norĩ hã te Pone'ẽrebâi ma tinho're za'ra, tinho're itém na. Ãne te tãma tinho're za'ra: “A hã ma tô dasiwi aiwĩrĩ ni. Ma tô dazada hã atâ. Dazada atâ'âzém na ma tô ida'awa'â, dawasédé hã dama 're apari mono da ãma, 'Re ihâimana u'âsi mono nhib'a'uwẽ oto 're danomro mono da. Dapoto mono bâ a hã ma tô ida'awa'â, damreme sipo'o mono bâ 're idahâimana za'ra mono hã. Danhipai u aiwẽ uptabi di, a hã. Aiwaihu'u pese uptabi di duré. Tahawa, te aiwétési sada hã aihâiba, ibaihâ isinhai ré i'âri da hã, duré i'uptobzé hã aprub da.

Apocalipsi 7:9

Taha parimhã, wa hã Zuwã, wa tô duré 'madâ. Te 'madâ'â wamhã, wa tô da'ab'madâ, da'ahâ uptabi na, da te idaza'rata waihu'u õ hã. Dapoto mono bâ te aimasam ni, damreme sipo'o mono bâ 're idahâimana za'ra mono hã. Danhib'apito simasisizém nho're te aimasam ni, duré Pone'ẽrebâ nho'reb zama. Da'uza hâpa hâirã ré te isõ're aimasam ni. Tawamhã wa'asu ne hã, da te tété za'ra sina, te damreme 'rãihâ na ãma tawata za'ra ni, ãne: — Wanhib'apito 'Re ihâimana u'âsi mono, danhib'apito simasisizém na isãmra hã ta hã, Wa'anho'reptui'wa. Duré Pone'ẽrebâ hã tô isiré Wa'anho'reptui'wa. Ã norĩ hã ma tô wawasété wi te te 're wa'anho'reptu zahuré, 're iwasi'utõrĩ za'ra mono zé wib zama.