Zezusihi zadawa wasuꞌuꞌwa norĩ nhimiromhuri na robꞌuiꞌéré 3:15 - ꞌRe Ihâimana Uꞌâsi Mono Zadawa Wasuꞌu

¹⁵ Dahâimana wẽ zéb da, dapẽ'ẽ wẽ hã za te te dama 're i'anhomri mono 'wa hã, aima za'ra wa'aba, da te dasiwi wĩrĩ da, ma tô dama i'ru za'ra wa'wa. Tazahã 'Re ihâimana u'âsi mono, ma tô apâ hâiwa'utu, dâ'â uptabi nherẽ. Wa norĩ hã Zezusi apâ hâiwa'utu wa, wa te isabu za'ra hã wa tô wa te dama 're wasu'u za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 3:15 ပူးပေါင်းရင်းမြစ်များ

Luca 24:48

A norĩ wa'wa hã ma tô ĩ'ãma i'madâ'â za'ra wa'wa, ĩdâ'âzé hã. Duré ĩhâiwa'utuzé hã ma tô ĩ'ãma iwaihu'u za'ra wa'wa. Tahawa, te za ĩwasu'u wẽ'wa, 're anomro aba mo.

Zuwã 1:4

Ta hã Imreme hã, rowẽ na 're idahâimana u'âsi za'ra mono zé nhomri'wa, te dama 're hâimana. Ã hã rowẽ na 're idahâimana za'ra mono zé hã ma tô rowa'azé te te dama 're a'ãwisi, damorĩ wẽ na ãma 're danomro mono da hã.

Zuwã 10:28

Ta norĩ ma, wa za pisutu za'ra, 're dâ'â za'ra mono ãna, 're hâimana u'âsi za'ra mono da, hâiwa ãma 'Re ihâimana u'âsi mono 'rata. Ni'wa hã te te ĩwi 're waibui mono õ di za, ĩzazei'wa norĩ hã.

Zuwã 14:6

Tawamhã Zezusi ma te asa ãma tãma wa'rã ãne: — Wa hã bâdâdi uptabi na, wa ĩsiwasu'u, duré tô sena na rowaihu'u wẽ nhomri'wa na, duré 're idanomro u'âsi mono zé nhomri'wa na. Tahawa, ni'wa hã ĩ'ãma 're morĩ õ nherẽ, Ĩmama u hã wisi waihu'u õ di za.

Zuwã 17:2

A hã ma tô ĩma 're ida'apisutu mo, ĩzazei'wa 're danomro mono da. Wa hã ma tô duré ĩpisu, uburé dama ĩpire uptabi da. E marĩ da. Ĩzazei'wa norĩ ma, te 're apisutu mono da, robzei u'âsi ĩ'ãma 're nomro u'âsi mono da, duré 're dâ'â za'ra mono ãna, ai'rata 're hâimana u'âsi za'ra mono da, hâiwa ãma.

Zuwã 4:10

Tahawa, ma tô Zezusi hã asa tãma tinha, ãne: — 'Re ihâimana u'âsi mono nhoprubzé hã waihu'u 'wa'âhã, duré ĩwaihu'u 'wa'âhã, te aré â hã ĩwi iwaptẽ. Tawamhã â u'â hã wa aré aima tisõ.

Zuwã 4:14

Ĩnhib'â hã te dama 're anhomri mono wa, da te 're âhuri mono wamhã, 'rubu ãna te za iré 're dasi'ubumroi u'âsi. Ub're 're isidototo u'âsi za'ra mono ne, dawi 're si'utõrĩ waihu'u za'ra mono õ di za, da te 're âhuri mono wamhã. Tawamhã 're dadâ'â za'ra mono ãna, te za 're dasi'ubumroi u'âsi, hâiwa ãma.

Zuwã 5:26

Imama hã dapẽ'ẽ 're, dadâ'â ãna rowẽ na 're idahâimana u'âsi za'ra mono zé nhomri'wa dama. I'ra wa, ma tô duré pisutu, taha zama 're idahâimana u'âsi za'ra mono zé nhomri'wa na dama 're ihâimana mono da hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:24

Tane nherẽ, 'Re ihâimana u'âsi mono hã ma tô hâiwa'utu, ab're hawi watobro da, dâ'â uptabi nherẽ. Ma tô duré pawapto, dâ'â u'âsi nomro tõ da. Idâ'âzé tãma wapure wa, dâ'â u'âsi nomro waihu'u õ di, Zezusi hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:2

Ta norĩ hã ma tô sada ab'ru za'ra, Pedru norĩ zada, apâ 're idahâiwa'utu za'ra mono zém na te te dama rowasu'u zahuré wa. Ãne ma tô dama rowasu'u zahuré: “Dadâ'â nherẽ, te za apâ te te 're da'ahâiwa'utu, 'Re ihâimana u'âsi mono hã, Zezusi te te ihâiwa'utu ne.” Ãne na te te dama rowasu'u zahuré 'ru te, ma tô sada tizahi za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 5:31

Ta hã ma tô 'Re ihâimana u'âsi mono hã ti'â apâ, isimire niwĩ 're sãmra u'âsi mono da oto, dama pire na 're hâimana mono da, duré tiwaihu'u pese zarina te te 're da'anho'reptui mono da. Tahawa, te za te te 're wapawaptob za'ra, wasiré Izaraéu nhihudu mono bâ, wawasédé hã wa te 're rẽme za'ra mono wa, te te wama 're apari mono da.

1 Corĩtu 15:45

Duréihã Mozési hã ma tô ãne na ãma rob'ui'éré: “'Re ihâimana u'âsi mono hã ma tô aibâ hã poto 'rata, Adã na isisi hã. A'uwẽ hâiba na 're morĩ da, ma tô poto 'rata tô.” Tane nherẽ, Adãhã ne te tô 're hâimana, 'Re ihâimana u'âsi mono 'rata, dadâ'â ãna 're danomro mono da, te te dama 're i'apisutu mono hã, Ipẽ'ẽzani nhimipisutuzéb zarina. Ta hã Zezusi.

Éfézu 1:20

Wa duré aima za'ra wa'aba te tiwi 're rowaptẽrẽ u'âsi, te te 're aipawaptob u'âsi za'ra wa'aba mono da, iwaihu'u pe hã asina 're waihu'u za'ra wa'aba mono da. Tiwaihu'u pese na ma tô Cristu hã ab're hawi hâiwa'utu, dâ'â nherẽ. Taha pari, ma tô pisutu, pire na isimire niwĩ 're sãmra mono da oto, hâiwa ãma.

Hebreu 12:2

Dawara na 're dasipibu za'ra mono wa, dawara, da te 're i'rãsutu za'ra mono zéb u si, da te 're i'madâ'â za'ra mono ne, wa za Zezusihi ãma si wa te wasina 're rosa'rata u'âsi za'ra. Ta hã Zezusi hã ma tô isãna'rata hawimhã te te 're wa'apawapto, 'Re ihâimana u'âsi mono si wa te wasina 're umnhasi u'âsi za'ra mono da. Tane te za duré te te 're wa'apawaptob u'âsi, 're iwadâ'â za'ra mono zéb u, õhõ si wa te wasina 're umnhasi u'âsi za'ra mono da, tiwi 're wasipizari za'ra mono ãna. Ta hã Cristu hã sihâiba zawi õ di, wedepo'o nhonhi'rãmi na dazada dâ'â tõ da hã, wedepo'o nhonhi'rãmi hã dazada 're ihâimana wasété za'ra mono norĩ pãrĩzép si nherẽ. Taha wa'rãmi, hâiwa ãma to sina 're ihâimana u'âsi mono zé hã za tãma 're ihâimana mono na, te te sina waihu'u siromo wa, tahawa, sihâiba zawi õ di tô, wedepo'o nhonhi'rãmi na dazada dâ'â tõ da hã. Ãhã na hã 'Re ihâimana u'âsi mono nhimire niwĩ, te oto pire uptabi na 're sãmra, isiré 'râwi te te 're da'ab'madâ'â u'âsi mono da oto.

Hebreu 2:10

'Re ihâimana u'âsi mono hã ma tô uburé te te ro'apoto. Taha ma si te uburé marĩ hã tãma 're hâimana. Ta hã tô ibâ, ma ti'ra hã pisutu Zezusi hã, dazada dâ'â wa, te te robzépata da a'â, taha zarina te te 're da'anho'reptui mono da, te te sina uwaimrami da, 'Re ihâimana u'âsi mono te te tãma ipisutuzéb zarina. Da'ahâ na hâiwa ãma rowẽ uptabi na i'rata 're danomro u'âsi mono da, ma tô ãne da hã tãma pisutu, 'Re ihâimana u'âsi mono hã.

Hebreu 5:9

Tawamhã Zezusi hã ti'ab ré, te te 're robzépata mono nherẽ, Imama te te tãma iwẽzéb zarina si te te 're ab'manharĩ mono wa, ma tô sina uwaimra, uburé isimiroti te te 're i'madâ'â pese za'ra mono norĩ hã te te 're sõ'reptu za'ra mono da, hâiwa ãma dâ'â ãna 're hâimana u'âsi za'ra mono da.

1 Zuwã 5:20

Ãne wa tô duré waihu'u za'ra ni. Zezusi hã, 'Re ihâimana u'âsi mono 'ra hã ma tô wei mo, ti'ai u. Ta hã ma tô tinhimiroti na te te 're wa'apawapto, 'Re ihâimana u'âsi mono hã tô sena uptabi hã wa te 're iwaihu'u pese za'ra mono zéb da hã. I'ra ãma, Zezu Cristuhu ãma 're wanomro mono wa, wa duré Imama ãma 're wanomro, tô sena uptabi 're ihâimana mono ãma. Zezusi hã, ta hã uburé Danhib'apito uptabi. Ta hã dapẽ'ẽ 're dadâ'â ãna 're idanomro u'âsi mono zé hã, te te dama 're i'apisutu mono. Ãne na wa tô wasiwi waihu'u pese za'ra ni.

Apocalipsi 21:6

Tawamhã te duré ĩma tinha, ãne: — Tâibâ oto. Wa tô te ãma a'uwaimrami. Wa hã isãna'rata hawimhã marĩ õ ré hã, wa tô 're ĩhâimana u'âsi. Uburé marĩ hã si'utõrĩ pese nherẽ, wa hã marĩ zarina ĩsi'utõrĩ õ di za. Õne u'âsi, wa za 're ĩhâimana. Tawamhã ni'wam norĩ hã te te 're 'rubu za'ra mono wamhã, wa za â u'â hã te tãma 're õb za'ra, wa'âbâ ãna, da te 're âhuri mono wa, ĩsiré rowẽ na 're idanomro u'âsi mono zéb da hã.

Apocalipsi 22:1

Tawamhã hâiwa ãma 'Re ihâimana u'âsi mono ma romhuri'wa hã, tô õ hã ma tô duré ĩzaprõ, â u'â hã te 'madâ'â da. Â u'â hã da te 're âhuri mono wa, dato sina 're idanomro u'âsi mono zé hã. Simhi zarob'a uptabi ne â zarob'a uptabi di, â u'â hã. Panho'u 're ipraba za'ra mono ne, te 'Re ihâimana u'âsi mono norĩ simasisizéb zahâpâ hawi tipraba, Pone'ẽrebâ simasisizéb zahâpâ hawi me.

Apocalipsi 22:17

'Re ihâimana u'âsi mono pẽ'ẽzani hã te Pone'ẽrebâi mro da me, dazô 're hârâ u'âsi zahuré, ãne: — We 're anomro aba mono, â u'âsi u. Tawamhã ni'wam norĩ hã ãne hã te te 're wapari za'ra mono wa, â u'âsi u 're nomro mono wamhã, te za duré ihârâ zahuré na dazô 're hãsi u'âsi. Da te 're 'rubu za'ra mono wa, da te 're i'âhuri mono ne, ni'wam norĩ hã te te sima 're wẽ za'ra mono wamhã, te za tô â u'âsi u 're nomro, te te 're âhuri u'âsi mono da, wa'âbâ ãna. Â u'â hã da te 're âhuri mono wa, 'Re ihâimana u'âsi mono 'rata 're idanomro u'âsi mono zé.