Zezusihi zadawa wasuꞌuꞌwa norĩ nhimiromhuri na robꞌuiꞌéré 20:1 - ꞌRe Ihâimana Uꞌâsi Mono Zadawa Wasuꞌu

¹ Tawamhã damreme na ro'wa'rudu hã ma tô sahâri za'ra ni. Rowẽ di oto. Rob u'âsi nomro wamhã, Paulu hã ma tô Zezusihi zazei'wa norĩ zô tihârâ za'ra. Tahawa, ma tô tãma roti za'ra, siptete sina 're hâimana za'ra mono da. Tawamhã ma tô oto tãma siwasu'u za'ra, za oto imorĩ na hã. Taha pari, te oto mo, Masédonia u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:1 ပူးပေါင်းရင်းမြစ်များ

Zenezi 48:10

Tawamhã Zaco, isi'ihi pese zarina simirob'madâ'â nhib'uware di oto. Tahawa te te 'madâ'â wẽ zahuré õ di. Tawamhã Zuzé, ti'ra norĩ, ma tô 'râwi oto itẽme saprõni zahuré. Tahawa imama ma tô tinhihudu norĩ hã te te sitẽme ãma roptob zahuré sina tob'rata hârâ na sawi zahuré.

Zezusihi zadawa wasuꞌuꞌwa norĩ nhimiromhuri na robꞌuiꞌéré 11:26

Tawamhã tamomo wisi wamhã, ma tô sõpẽtẽ. Ta hawi, ma tô apâ saprõ, Ãtioquia u. Tame te aimasisi zahuré oto. Isazei'wa norĩ, siré 're isi'rã'õtõ mono norĩ 'rata te 're simasisi zahuré, te te dama 're rowahutu zahuré mono da. Misi ma tô ãma tiwahub zahuré, te te 're da'apawaptob zahuré mono ré hã. Tame ma tô Cristuhu nhib'a'uwẽ na da te 're sisi na'rata za'ra, Zezusihi nhirã zarina 're inomro mono norĩ hã, Ãtioquia ãma hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 16:12

Tawamhã Neapuri hawi, wa tô aihutu ni, Filipu na 'ri nho'õmo nhisi u, Masédonia ãma 'ri nho'õmo u hã. Tame te romanu norĩ hã 're si'ubumro. Tame wasi'ubumroi ré, ma tô bâdâ hã umro na wa'ãma ai'utõrĩ za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 16:9

Tawamhã sõtõ 'rowim ne, ma tô marĩ hã 'madâ Paulu hã, bara na. Aibâ hã Masédonia na danhipti'a nho'õmo nhisi ãma 're isãmra mono hã te i'rata za, sa'ẽtẽ te te waptẽrẽ da, ãne: — Wei watẽme aimorĩ, Masédonia u wa'ãma aime za'ra da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 19:21

Tawamhã ãne na romhâimana pari, ma tô Paulu hã 'râwi sima waihu'u, Zeruzalẽ u morĩ da, Masédonia wa'wai baba, duré Ataza wa'wai baba. Tahawa, te sima tinha, ãne: “Zeruzalẽ u ĩmorĩ parip si, Roma u ĩmorĩ da, wa duré ĩsima wẽ, te dazabu da.”

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:10

Tahawa, Paulu hã ma tô itẽme si'ra. Te te itẽme si'rai wamhã, ma tô sô aiwẽ'ẽ. Tawamhã ma tô iré pahato, te te sa'ra da. Tawamhã ãne ma tô dama tinha: — Aipẽ'ẽwara za'ra wa'aba tõ. Hâiba ré, te nomro.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:2

Tawamhã Masédonia na danhipti'a nho'õmo nhisi wa'wai baba, ma tô ro'razâ, Paulu hã. Daza'rui mono bâ 're morĩ ré, ma tô isazei'wa norĩ hã pawaptob za'ra isimiroti na, siptete sina 're hâimana za'ra mono da. Taha parip si, ma tô mo, Deresiza na danhipti'a nho'õmo nhisi u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:3

Tame sãmra ré, ma tô a'amo si'ubdatõ ãma ai'utõ. Tawamhã ma tô sima rosa'rata, Siria u morĩ da. Tane nherẽ, rowa'u'u na uba'renem na sébré õ ré, ma tô wapa, zudeu norĩ te te sima ihâiba za'ré za'ra zé wasu'u hã. Tahawa, ma tô sima ãma saprĩ, ti'ai babap si apâ hã morĩ da oto, Masédonia wa'wai baba.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:37

Mreme zusi pari, wawa sina ma tô Paulu hã nasi tinho'utu awaibu, te te sawi za'ra da, ãma pẽ'ẽzé za'ra wa. Ma tô duré nasi tob'rata hârâ za'ra.

Roma 15:19

'Re ihâimana u'âsi mono pẽ'ẽzani hã tiwaihu'u pese na te te 're ĩpawapto mono zém na si, wa tô marĩ dama i'manharĩ waihu'u'õ hã te dama 're ab'manharĩ, zudeu'õ norĩ hã tô sena te te 're saze za'ra mono da, ta norĩ hã. Zeruzalẽ hawi, Iliriza u 're ĩmorĩ ré, wa tô daza'rui mono bâ te dama 're rowasu'u, Cristuhu wasu'uwẽ na hã.

Roma 16:16

Uburé asiré isazei'wa 're aihâimana za'ra wa'aba mono wa, te za asõ'utu na asisawi sina 're asitob'rata hârâ za'ra wa'aba mo. Ãmemhã uburé Cristuhu zazei'wa norĩ hã, i'upsãtã mono bâ sitẽme 're isi'rã'õtõ mono norĩ hã te duré ãma asawi za'ra wa'wa.

1 Corĩtu 16:20

Ãme wasisãnawã norĩ 're isi'ubumroi mono norĩ hã te duré uburé ãma asawi za'ra wa'wa. Duré 're asi'rã'õtõ aba mono wamhã, te za uburé asiré isazei'wa na 're aihâimana za'ra wa'aba mono wa, asõ'utu na asisawi sina 're asitob'rata hârâ za'ra wa'aba mo.

1 Corĩtu 16:5

Wa tô ĩsima rowairébé, Masédonia u, a'â ĩmorĩ da, tame isazei'wa norĩ siré a'â ĩnhamra hutu da. Tawamhã Masédonia hawip si, wa za oto ãma atẽme ĩmorĩ 'wa, tamomomhã.

2 Corĩtu 13:12

Tahawa, te za uburé asiré isazei'wa na 're aihâimana za'ra wa'aba mono wa, asõ'utu na asisawi sina 're asitob'rata hârâ za'ra wa'aba mo. Ãme, 'Re ihâimana u'âsi mono nhib'a'uwẽ 're isi'ubumroi mono norĩ hã te ãma asawi za'ra wa'wa, uburé.

2 Corĩtu 7:5

Masédonia u, we wasimasisi wamhã, wa te ãma ãpusi waihu'u õ di. Ãmemhã wazada hã ro'wa'rutu uptabi di, da'ahâ na wazada dahâimana za'ra wa. Duré ai'ãma wahâtâ'â za'ẽtẽ za'ra wa'aba di. E marĩ wa. Wanhib'apito wasu'uwẽ nhiti, aipizari za'ra wa'aba õ'umnhasite.

1 Tesalonita 5:26

Uburé asiré isazei'wa 're aihâimana za'ra wa'aba mono wa, te za asõ'utu na asisawi sina 're asitob'rata hârâ za'ra wa'aba mo.

1 Timotiu 1:3

Masédonia na danhipti'a nho'õmo nhisi u ĩmorĩ u'âbâmhã, wa tô ai'ãma ropti, a'â Éfézu ãma hã asãmra da. Tane da hã, wa za duré ĩmreme na ãma aima sahu, tame a'â asãmra da. Tame ni'wam norĩ hã te isazei'wa norĩ ma, siwa'ru te te 're rowasu'u za'ra. Tahawa, te za a'â tame asã, sadawa uwati za'ra da, tinhimirowasu'u hã te te sazâri pese za'ra da.