Zezusihi zadawa wasuꞌuꞌwa norĩ nhimiromhuri na robꞌuiꞌéré 2:22 - ꞌRe Ihâimana Uꞌâsi Mono Zadawa Wasuꞌu22 Tawamhã Pedru hã ma tô duré ãma uzusi, tinhimirowasu'u na, ãne: — Wasiré Izaraéu nhihudu norĩ, ĩwapari pese za'ra wa'aba za. Zezusi hã Nazaré ãma aré 're isãmra mono hã, ta hã, 'Re ihâimana u'âsi mono zadawa para, ma tô te te 're da'apawapto, danho'a. Marĩ iwẽ hã dama i'manharĩ waihu'u'õ hã ma tô te te dama 're ab'manharĩ. Tô sena, õ hã 'Re ihâimana u'âsi mono zadawa para, te te dama 're i'ab'manharĩ mono zém na da te 're waihu'u za'ra mono da, ma tô Timama waihu'u pese zarina marĩ iwẽ hã te te dama 're ab'manharĩ. Ai'rata 're hâimana za'ra wa'aba mono wa, ma tô ãne na hã ãma asiwi i'madâ'â waihu'u 'wa. အခန်းကိုကြည့်ပါ။ |
Zezusihi zadawa wasuꞌuꞌwa norĩ nhimiromhuri na robꞌuiꞌéré 2:22
42 ပူးပေါင်းရင်းမြစ်များ
Tame te oto 're simasisi zahuré, Nazaré na 'ri wa'õtõ nhisi ãma. Ãne iromhâimanazé hã, duréihã 'Re ihâimana u'âsi mono zadawa 'mahârâ 'rata 'wa norĩ nhimi'ui'éré hã te te ãma uwaimrami da. Ãne duréihã iwasu'u na rob'ui'éré 'rada hã: “Ta hã Nazaré ãma 're isãmra mono na te za oto da te 're sisi za'ra.” Ãne ma tô waihu'u siromo za'ra, za da te dasima 're iwasu'u za'ra mono zéb da na hã.
Tawamhã Filipi te Natãnaéhé zô hã rĩtĩ. Te te oto sõpẽtẽ wamhã, ãne te tãma tinha: — Aibâ hã wa tô wasiwi 'madâ'â ni, wahi'rada Mozési te te ãma irob'ui'éré siro hã romhâ ré, 'Re ihâimana u'âsi mono zadawa 'mahârâ 'rata 'wa norĩ zama isa'u te te ãma irob'ui'éré za'ra hã. Ta hã Zezusi, Nazaré hawi we imorĩ, Zuzéhé 'ra hã.
Ĩmama hã tiwaihu'u pese na, te te 're da'apawapto. Ĩzama, wa tô isine te 're da'apawapto. Tahawa, te za i'ra na ĩwaihu'u za'ra wa'wa. Isine, te 're da'apawapto mono õ wamhã, i'ra na hã 're ĩzaze za'ra wa'aba mono õ di za. I'ra na wa tô aima 're ĩsiwasu'u za'ra wa'wa aré. Tane nherẽ, ĩmreme na 're ĩzaze za'ra wa'aba mono õ di. Tahawa, Ĩmama hã tiwaihu'u pese na te te 're ida'apawapto mono ne, wa hã te 're da'apawapto mono wa, te za i'ra na 're ĩzaze za'ra wa'aba mo. Tawamhã te za iwaihu'u za'ra wa'wa, ĩ'ãma 're ihâimana mono na, Ĩmama hã. Te za duré ĩwaihu'u za'ra wa'wa, Ĩmama ãma 're ĩhâimana mono na.
Tawamhã isimirowasu'u hã te te wapari za'ra wamhã, tisiré norĩ zô te sitẽme tihârâ za'ra, dama ipire norĩ zô. Tahawa, ma sitẽme si'rã'õtõ, sasedoti ipire norĩ hã, duré farizeu norĩ hã duré uburé zudeu norĩ ma roti'wa norĩ zama. Sitẽme si'rã'õtõ wamhã, ãne te sima rowasu'u za'ra: — E marĩ, wa za bété wa norĩ hã wasiwi 'manharĩ ni. Õ hã te marĩ hã dama i'manharĩ waihu'u'õ hã te te dama 're ab'manharĩ u'âsi, tiwaihu'u pese na.
Wa hã marĩ dama i'manharĩ waihu'u'õ hã wa tô te dama 're ab'manharĩ wẽ aré, danho'a, da te dasiwi 're ĩzaze za'ra mono da, 'Re ihâimana u'âsi mono we te te ĩzatõrĩ na. Ni'wa ĩsine hã te te 're da'apawapto mono õ di aré. Tane nherẽ, da te dasiwi 're ĩzaze za'ra mono õ di, we te te ĩzatõrĩ na. Marĩ dama i'manharĩ waihu'u'õ hã, te dama 're ab'manharĩ mono õ 'wa'âhã, te te aré 're da'awẽ'õ mono õ di, da te 're ĩzaze za'ra mono õ zém na hã. Tane nherẽ, danho'a te dama 're ab'manharĩ wẽ mono nherẽ, ma tô Ĩmama me hã da te dasiwi 're wa'ruiwapari.
Tawamhã Pilatu, ma tô ãne ãma rob'ui'éré: “Ã hã Zezusi, Nazaré hawi we imorĩ, zudeu norĩ nhib'apito.” Ãne ma tô ãma rob'ui'éré. Tawamhã te te ãma rob'ui'éré pari, te dama ti'ru, i'rãi uwaibaba te te siwi 'mazasõmri da, rob'ui'éré hã. Si'ubdatõ damreme na rob'ui'éré hã. Hebreu norĩ mremezém na, duré romanu norĩ mremezém na, duré gregu norĩ mremezém na.
Ta hã ma tô Zezusihi u wi, bara na. Itẽme wisi wamhã, te ãne tãma tinha: — Rowahutu'wa, wa tô wasiwi aiwaihu'u ni, 'Re ihâimana u'âsi mono we watẽme te te i'asatõrĩ na, wama 're rowasu'u mono da. Ni'wa ãne hã te te 'manharĩ waihu'u õ di marĩ isa'rese'õ hã, 'Re ihâimana u'âsi mono, isiré hâimana õ nherẽ. Taha zadawa para, ma tô marĩ hã dama i'manharĩ waihu'u'õ hã dama 're i'ab'manharĩ wẽ u'âsi mo, da te ãma aiwaihu'u za'ra da, we te te i'asatõrĩ na.
I'u'ẽtẽ wapu hã umrore nherẽ, da'ãma si'utõrĩ õ wa, ma tô ãma tatob'uzu za'ra ni, waihu'u pese wa, Zezusi hã. Tawamhã te ãne dasima rowasu'u za'ra ni, dasaihuri wẽ te: — Tô sena õ hã 'Re ihâimana u'âsi mono zadawa 'mahârâ'wa, we datẽme imorĩ zô 're idanhimipari za'ra mono. Oto wa te wasiwi saprõni aba, ãma wanhib'apito za'ra da.
Dasa hã siwamnarĩ su'u di. Tahawa, taha zô si 're romhuri za'ra wa'aba mono õ di za. Dasa ne isi'utõrĩ'õ zô si, te za 're irob'ruiwapari za'ra wa'aba mo, wẽ na 're ihâimana u'âsi mono zô si. Ta hã rowẽ u'âsi dadâ'â ãna 're idahâimana u'âsi za'ra mono zé, te wasu'u. Wa hã ti'ai ãma dasiré ĩpoto wa, ma tô Ĩmama hã ĩpisutu, isadawa para te dama 're anhomri mono da, rowẽ u'âsi 're idahâimana u'âsi za'ra mono zé hã.
Tawamhã ta norĩ hã sada hâimana za'ra nherẽ, ma tô da'ahâ na saze za'ra ni, Zezusi hã. Tahawa, te ãne dasima rowasu'u za'ra ni: — Danho'reptui'wa da, 'Re ihâimana u'âsi mono te te ipisudu hã oto wei morĩ wamhã, e te za te te dama 're ab'manharĩ, marĩ dama i'manharĩ waihu'u'õ hã, Zezusi te te dama 're i'ab'manharĩ mono nhipai u hã.
Tahawa, Paulu hã hâiwi ma tô za. Tinhib'rada, ma tô dama wẽ, ari'iwi dasi'ubumro da. Tawamhã te dama tinha, ãne: — Wasiré Izaraéu nhihudu norĩ, ĩwapari za'ra wa'aba. Duré zudeu'õ norĩ, a norĩ wa'aba zama wasiré õ nherẽ, 'Re ihâimana u'âsi mono ãma 're aiwata za'ra wa'aba mono norĩ hã, ĩwapari za'ra wa'aba.
Ãtioquia u apâ simasisi zahuré wamhã, ma tô isazei'wa norĩ zô tihârâ zahuré, te te itẽme ubumro da. Tahawa, ma tô dama siwasu'u zahuré, 'Re ihâimana u'âsi mono nhimipawaptobzém na. Ãne te tãma rowasu'u za'ra: — 'Re ihâimana u'âsi mono, ma tô wapawapto, marĩ iwẽ hã wa te dama 're 'manharĩ mono da, iwasu'uwẽ hã wa te dama ãwisi da, zudeu'õ norĩ ma zama. Tawamhã ta norĩ zama ma tô te te 're sazei pese za'ra.
Tahawa, te si'mahârâ za'ra zudeu norĩ hã, ãne: — Wasiré Izaraéu nhihudu norĩ, wei wa'ãma ana wa'aba. Ã hã aibâ hã ma tô daro mono bâ te te dama 're rowahutu, da te dasiwi wawẽ'õ za'ra da, duré Mozésihi nhimiroti hã da te dasiwi wẽ'õ za'ra da, 'Re ihâimana u'âsi mono nhorõwa 'ri zama, da te dasiwi wẽ'õ za'ra da. Ma tô duré zudeu'õ norĩ hã we te te simro, 'Re ihâimana u'âsi mono nhorõwa 'ri u. Isõrõwa hã wẽ nherẽ, ma tô wawi wasété za'ra.
Tawamhã apito Agripaha ma, te duré tinha, ãne: — Apito Agripa, Zezusi hã ti'ai ãma 're morĩ ré hã uburé marĩ hã tãma 're iromhâimana mono zém na hã aima waihu'u pese di, idâ'âzém na hã duré ihâiwa'utuzém na zama. Da'ahâ na ma tô ãma 're danhopré. Tahawa, apito Agripa, a zama ma tô iwaihu, uburé Zezusihi wasu'u hã te aima iwasu'u hã. Tahawa, sena na, wa aima ĩsiwasu'u ĩpahi ãna, waihu'u da.
Tawamhã Pedru te te da'madâ'â wamhã, te dama tinha, ãne: — Wasiré Izaraéu nhihudu norĩ, e marĩ wa, ma wa'ãma atob'uzu za'ra wa'wa. Wasi'uihâ na ihi'ré hã wa te ipese õ nherẽ, morĩ wẽ da hã, te we wa'ãma asõpré wa'wa. Wasi'uihâ na wa te pese õ di, wa norĩ hã. 'Re wane wẽ wa, wa te pese newa, te wei iwa'madâ'â za'ra wa'wa. Mare di. Ãne wab õ di.
Tawamhã a norĩ wa'wa hã te za iwaihu'u pese za'ra wa'wa, aihâiba mono bâ wa'aba. Uburé wasiré Izaraéu nhihudu norĩ zama te za duré waihu'u pese za'ra za. Zezu Cristuhu zadawa para, wa tô pese ni, ihi'ré hã. Zezusi hã Nazaré ãma aré 're isãmra mono hã asiwi wĩrĩ aba da, ma tô dama i'ru za'ra wa'wa. Taha paramhã ma tô dasiwi sasõmri ni, wedepo'o nhonhi'rãmi na. Ãhã wa, ma tô duré dârâ. Dâ'â nherẽ, 'Re ihâimana u'âsi mono, ma tô apâ hâiwa'utu. Taha zadawa para, te aibâ ihi'ré hã ãme za, rowẽ na. Ma tô tipese oto.
'Re ihâimana u'âsi mono zama, ma tô te te 're wa'apawapto, te te 're ida'anho'reptui mono zé wasu'u hã, tô sena na 're ihâimana mono na wa te wasina ãma 're waihu'u pese za'ra mono da oto. Tiwaihu'u pese na marĩ iwẽ hã dama i'manharĩ waihu'u'õ hã ma tô, tô te te dama 're ab'manharĩ wẽ, taha zarina tô sena, wa te ãma 're iwaihu'u pese za'ra mono zéb da hã, te te 're ida'anho'reptui mono zé wasu'u hã. Ma tô duré Tipẽ'ẽzani ma pisutu, romhuri hã isazei'wai mono bâ te te sima 're i'awẽ mono zéb zarina, te te tãma 're apisutu mono da, ãma 're idasipawaptob za'ra mono zéb da hã. Taha zarina, wasi'uihâ na tô sena, wa te ãma 're waihu'u pese za'ra mono da, ma tô duré te te 're wa'apawapto, 'Re ihâimana u'âsi mono hã.
ကြော်ငြာတွေ