Zezusihi zadawa wasuꞌuꞌwa norĩ nhimiromhuri na robꞌuiꞌéré 2:17 - ꞌRe Ihâimana Uꞌâsi Mono Zadawa Wasuꞌu

¹⁷ “Ãne wa za 'manha: Rob'rãsutu u ti'a si'utõrĩ õ ré, wa za Ĩpẽ'ẽzani hã te dama 're anhomri, daro mono bâ. Tawamhã asihudu za'ra wa'wa, aibâ norĩ hã, duré pi'õ norĩ hã te za te te 're ĩzadawa wasu'u za'ra. Ihi norĩ ma, sõtõ 'rowi te te 're irosawẽrẽ za'ra mono na wa za tãma 're ĩsiwaihu'u za'ra, ĩnhimiroti na hã. Duré, ipréduptém norĩ ma zama sõtõ 'rowim ne, wa za tãma 're ĩsiwaihu'u za'ra, ĩnhimiroti na.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:17 ပူးပေါင်းရင်းမြစ်များ

Zenezi 49:1

Tawamhã Zaco ma tô ti'ra norĩ zô sima sô tihârâ za'ra. Tahawa, ma tô ãne tãma nharĩ za'ra: — Ma'ãpé asiwi ĩ'uirĩ wa'aba, apto'oré aihâiba mono bâ wa'aba za marĩ aima ihâimana za'ra wa'aba zém na te aima nharĩ za'ra wa'aba da.

Zenezi 6:12

Tawamhã 'Re ihâimana u'âsi mono, ti'ai ãma uburé 're idahâimana za'ra mono te te da'a'madâ'â wamhã, ma tô 're idawasété za'ẽtẽ za'ra mono zép si ab'madâ. E marĩ wa. Marĩ iwasété si da te 're 'manharĩ za'ra mono wa.

Salmu 72:6

Apito hã tã rom na rob're nhisiwi 're ta'a mono wa, te te 're idi'i za'ra mono ne, duré pĩni pisutu pese na ti'a te te 're idi'i za'ra mono ne hã, 're ihâimana mono da si.

Provébiu 1:23

Ĩwapari za'ra wa'aba, niha na aihâimanazé te aima ihiri za'ra wa'aba zém na hã. Wa hã roti iwẽ si wa za aima sõmri za'ra wa'wa. Ĩnhimirosa'rata wẽ hã wa za aima hâi'ré za'ra wa'wa.

Daniéu 10:14

Wa hã awa'awi na wa we atẽme mo, asib'a'uwẽ norĩ ma, za iromhâimanazém na te ãma aima saprĩ da. E marĩ wa. Ã hã i'ab'madâ'â mono hã apto'oré za marĩ iwatobrozém na te rowasu'u.

Luca 3:6

Tawamhã watẽme wei wisi wamhã, te za aihĩni sabu za'ra ni, 'Re ihâimana u'âsi mono te te ipisudu hã, Danho'reptui'wa da. Ãne te za ni'wa hã te te dama 're roti, a'ubuni wimhã.”

Zuwã 17:2

A hã ma tô ĩma 're ida'apisutu mo, ĩzazei'wa 're danomro mono da. Wa hã ma tô duré ĩpisu, uburé dama ĩpire uptabi da. E marĩ da. Ĩzazei'wa norĩ ma, te 're apisutu mono da, robzei u'âsi ĩ'ãma 're nomro u'âsi mono da, duré 're dâ'â za'ra mono ãna, ai'rata 're hâimana u'âsi za'ra mono da, hâiwa ãma.

Zuwã 7:39

 u'â te te dama wasu'u wamhã, Tipẽ'ẽzani te wasu'u, Zezusi hã. Niwapsi te za te te tãma 're anhomri, tizazei'wa norĩ ma. Dâ'â wa, hâiwa'utu parip si, te za Tipẽ'ẽzani hã te te tãma 're anhomri.

Zezusihi zadawa wasuꞌuꞌwa norĩ nhimiromhuri na robꞌuiꞌéré 10:45

Tawamhã zudeu norĩ, Zezusihi zazei'wa 're ihâimana za'ra mono norĩ hã, Pedruhu siré, Zopi hawi isi'aba'ré norĩ hã ma tô ãma titob'uzu za'ra, zudeu'õ norĩ ãma, 'Re ihâimana u'âsi mono, Tipẽ'ẽzani ta norĩ ma zama, te te oto sõmri za'ra wa. Tahawa, te zudeu'õ norĩ hã damreme amo na sima robzanhamri za'ra, timreme nai õ nherẽ. 'Re ihâimana u'âsi mono ãma, te duré tiwata za'ra, iwaihu'u pese na. Ãne hã te te wapari za'ra wamhã, te zudeu norĩ hã sima nharĩ za'ra, ãne: — Oro õ norĩ hã zudeu'õ za, ma 'Re ihâimana u'âsi mono Tipẽ'ẽzani hã tãma sõmri za'ra. Tahawa, te Pedru hã tãma nharĩ za'ra, ãne:

Zezusihi zadawa wasuꞌuꞌwa norĩ nhimiromhuri na robꞌuiꞌéré 11:27

Tawamhã 'Re ihâimana u'âsi mono zadawa 'mahârâ'wa norĩ, ni'wam norĩ hã te ai'aba'ré, Zeruzalẽ hawi, Ãtioquia u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 11:28

Agabu na aibâ nhisi hã te ime timorĩ za'ra, tisiré isadawa wasu'u'wa norĩ me. Tawamhã Ãtioquia u sihutu wamhã, Agabu hã ma tô hâiwi za. 'Re ihâimana u'âsi mono pẽ'ẽzani te te tãma iwaihu'uzéb zarina, ma tô dama waihu'u siro romhâ ré, amnho hã daro mono bâ za dawi isi'utõrĩ mono na hã. (Roma ãma danhib'apito Claudiu hã te te dama 're roti mono ré, ma tô ãne hã tô da'ãma tiromhâiba, amnho õ na hã.)

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:16

Ãhã na isadawa 'mahârâ'wai mreme hã ma tô wama ãma uwaimra oto, 'Re ihâimana u'âsi mono hã. Zuéu mreme hã ma tô wama ãma uwaimra, isadawa 'mahârâ'wai mreme hã. Tahawa, te ãne wa'ãma asõpré wa'wa. Tahawa, te duré ãne iwawapari za'ra wa'wa. Duréihã, 'Re ihâimana u'âsi mono mreme hã ma tô wahi'rata norĩ ma, te te 're awaihu'u, Zuéu hã. Ãne 'Re ihâimana u'âsi mono mreme hã:

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:18

Ĩma romhuri'wa norĩ ma, wa za Ĩpẽ'ẽzani hã te tãma ãma 're aropé, aibâ norĩ ma, duré pi'õ norĩ ma zama. Tawamhã te za te te dama 're ĩzadawa wasu'u za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:33

'Re ihâimana u'âsi mono hã ma tô sitẽme ti'â apâ, isimire niwĩ oto 're sãmra u'âsi mono da. Tawamhã Tipẽ'ẽzani hã ma tô ti'ra ma tisõ, te te tãma ãma iropisutu siro hã, te te sima 're ida'awẽ mono zéb uwaibaba, te te dama 're anhomri mono da. Ãhã na, Zezusi hã ma tô wama sõmri za'ra, Tipẽ'ẽzani hã. Tahawa, ma tô ãne wa'ãma asõpré wa'wa. Ma tô duré ãne iwawapari za'ra wa'wa, aimreme mono bâ wa'aba.

Zezusihi zadawa wasuꞌuꞌwa norĩ nhimiromhuri na robꞌuiꞌéré 21:9

I'ra norĩ sipi'õ hã imro'õ za'ra maparane si'uiwa na ihâiba hã, te 'Re ihâimana u'âsi mono hã te te dama 're sadawa wasu'u za'ra.

Roma 5:5

Ãhã zô, taré sô 're wanhimipari baba za'ra mono õ di za. E marĩ wa. 'Re ihâimana u'âsi mono hã Tipẽ'ẽzani te te wama 're i'anhomri mono na, tinhimizawi pese zé hã te te wama 're awaihu'u mono wa. Tahawa, taré sô 're wanhimipari za'ra mono õ di za, marĩ iwẽ hã te te wama 're i'apisutu mono zéb zô hã.

1 Corĩtu 12:10

'Re ihâimana u'âsi mono waihu'u pese na si, marĩ dama i'manharĩ waihu'u'õ hã te te dama 're 'manharĩ za'ra mono da, ni'wam norĩ si te duré te te 're pisutu za'ra. Duré 'Re ihâimana u'âsi mono zadawa wasu'u na, sena na te te dama ãma 're rowasu'u za'ra mono da, te duré ni'wam norĩ si te te 're pisutu za'ra. Ni'wam norĩ si, te duré te te 're pisutu za'ra, 'Re ihâimana u'âsi mono, da te dasima 're isadawa wasu'u za'ra mono zé hã te te ãma 're pibu za'ra mono da, tô sena uptabi na hã te te 're waihu'u za'ra mono da, wa'uburé norĩ hawim hãi õ'umnhasite. Damreme dama iwaihu'u'õ na zama, 'Re ihâimana u'âsi mono te te dama 're sadawa wasu'u za'ra mono da, te duré ni'wam norĩ si te te 're pisutu za'ra, timreme nai õ nherẽ, te te dama ãma 're isadawa wasu'u za'ra mono zéb da hã. Ni'wam norĩ si, te duré 'Re ihâimana u'âsi mono pẽ'ẽzani hã te te 're pisutu za'ra, damreme dama iwaihu'u'õ na 'Re ihâimana u'âsi mono, da te dasima 're isadawa wasu'u za'ra mono zé hã sõ'awi te te dama ãma 're wasu'u pese za'ra mono da oto, da te 're iwaihu'u za'ra mono zéb da hã.

1 Corĩtu 12:28

Ãne ma tô 'Re ihâimana u'âsi mono hã romhuri hã te te wama 're apisutu, wate mono bâ isimipawapto waihu'u pese na tãma ãma 're iwasipawaptob za'ra mono zéb da hã, wasiré isazei'wa norĩ hã. Romhuri hã danhipai u ipire uptabi hã ma tô ni'wam norĩ ma si te te 're apisutu, Zezusi hã te te 're isadawa wasu'u za'ra mono zéb da hã, isazei'õ'wa norĩ ma, Zezusihi zadawa para. Romhuri aimawi hã ipire hã ma tô duré ni'wam norĩ ma si, te te 're apisutu, 'Re ihâimana u'âsi mono zadawa wasu'u na, sena na isazei'wa norĩ ma si te te ãma 're irowasu'u za'ra mono zéb da hã. Duré isazei'wa norĩ 're ihâimana wẽ za'ra mono zéb da hã, 'Re ihâimana u'âsi mono nhimiroti zarina, te te dama ãma 're iroti za'ra mono zéb da hã, ma tô duré ni'wam norĩ ma isimiromhurizéb da hã, te te tãma 're apisutu, 'Re ihâimana u'âsi mono hã. 'Re ihâimana u'âsi mono waihu'u pese na, marĩ dama i'manharĩ waihu'u'õ hã te te dama 're 'manharĩ za'ra mono da, ma tô duré ni'wam norĩ ma si te te 're apisutu, isimiromhurizéb da hã. Ma tô duré ni'wam norĩ si te te 're pisutu za'ra, iwaihu'u pese zarina te te ãma 're dapese za'ra mono da, 're dahâzé za'ra mono wa. Duré marĩ zô, tiwi 're irowaptâ'â za'ra mono norĩ ãma 're sina u'âsi mono da, ma tô duré ni'wam norĩ hã te te 're apisutu, isibrob'õ norĩ ãma hã, duré ihâzé ré norĩ ãma hã. Duré isazei'wa norĩ 'madâ'â'wa, dama 're hâimana za'ra mono da, ma tô duré ni'wam norĩ hã te te 're apisutu. Duré damreme dama iwaihu'u'õ na te te dama 're sadawa wasu'u za'ra mono da, ma tô ni'wam norĩ si te te 're apisutu, timreme nai õ nherẽ, te te dama ãma 're isadawa wasu'u za'ra mono zéb da hã.

Hebreu 1:2

Tane nherẽ, ti'ra si ma tô oto pisutu, isadawa nhipai u te te oto wama ãma 're irowasu'u za'ra mono zéb da hã, rob'rãsutuzéb u romhutu na za 're iwahâimana za'ra mono norĩ ma. Taha si ma tô Timama zadawa para uburé te te ro'apoto. Taha si ma tô duré pisutu Imama hã, niwapsi uburé roptede'wa na 're hâimana mono da oto.

Tiagu 5:3

Marĩ hã ate za'ra wa'wa, ẽtẽ waipo pré oru 'manharĩ hã duré ẽtẽ waipo prã prata 'manharĩ hã 're si'ubuzi za'ẽtẽ za'ra mono õ di za oto. Ta norĩ hã asima si 're ubumroi pese za'ra wa'aba mono wamhã, te za asõti na aiwaihu'u za'ra wa'aba ni. E asibro hã asima si 're isa'ẽtẽ za'ra wa'aba mono zarina, te za rowẽ hã aima 're hâimana u'âsi za'ra wa'wa. Mare di. Danhimarĩ hã unhama ro'o na, dawi 're isi'utõrĩ za'ra mono ne, te za rowẽ hã aiwi 're si'utõrĩ za'ra wa'wa. Rob'rãsutuzéb u romhutu nherẽ, ma tô asima si 're isa'ẽtẽ za'ra wa'aba mo, asima si marĩ asima 're rob'ubumro za'ra wa'aba mono hã.

2 Pedru 3:3

Marĩ ipire na, wa za oto aima rowasu'u za'ra wa'wa, waihu'u za'ra wa'aba da. Rob'rãsutu u hã romhuture wamhã, te za ni'wam norĩ hã ãne 're hâimana za'ra. Marĩ iwasété zô si te za te te 're rowasutu za'ra. Ãne te za te te aima 're nharĩ za'ra wa'wa: “Oro apâ wei morĩ 'ruza Zezu Cristu hã, te te sina iropisutuzéb zarina. E mahãta tawamhã. Wamama norĩ hã ma tô wawi 're dâ'â za'ra. Tane nherẽ, te õhõ u'â zahadu 're ropsa'wari, Ropoto na'rata hawim haré.” Ãne te za te te aima 're nharĩ za'ra wa'wa.